PIGGYBREAD: 7月 2010

2月20日 (DAY 2 - PART 5)

離開五箇山，我地朝住白川鄉駛去，沿路落住綿綿密密嘅雪........

天色好陰暗喎，希望去到白川鄉會好天D，因為我地今晚要去睇點燈~~

D雪愈落愈大，呢次係我地第一次嘅雪中自駕，響車入面睇住車窗外D雪飄洒落黎，個感覺都幾得意，同大家分享下我地呢個第一次~~

不過行左無耐，個天色無好番D不特止，仲開始落雨........

車行左大約二十分鐘，GPS顯示就快到目的地嘞~~

Yeah!! 見到白川鄉道之站嘞，即係話我地就到啦........不過今次我地唔停呢個休憩站 lu，費事嘥時間，都係快D去到旅館放低架車再出去條商店街搏殺好過啦!!

睇個勢應該就到，遠遠已經見到D合掌屋........但係再行多一陣點解都仲未到呢? 明明個GPS顯示話到左目的地lu 喎?! 過晒都唔見大田屋嘅?? 沿路都係一條山路，望落去左手邊山下隱約見到有D合掌屋仔.......check返D資料.......大煲!! 原來入錯GPS個code.......明明應該要入大田屋嘅電話，大矇嘅我竟然入左和田家嘅電話.........

唔駛講梗係即時俾人翻白眼啦........呢個時候我當然要死撐，真係，駛唔駛咁就俾對白眼我睇呀!! 需知道人誰無錯，又唔係咩大不了嘅野，錯幾粒掣之嘛，反正和田家都係響白川鄉入面，離大田屋都唔係好遠啫

........於是我地就搵處地方停低重新再入過個code......不過當時都有D奇怪，就算之前入錯code，但剛才都唔覺有見到嗰個和田家?? 照理個和田家應該係響條商店街附近，呢度點睇都唔似條商店街掛?!

入番大田屋個電話code，GPS話只係幾分鐘嘅車程.........但係架車行行下開始唔係好對路，好似愈離愈偏離白川鄉咁

.......最 "R" 頭係個GPS好似唔係好work咁，指示絛路同我地實際行緊嗰條路愈黎愈唔同，但又無話我地行錯路喎

.......終於去到一個分叉路口唔知應該行邊條路，但個GPS就無指示........攪咩呀，都已經到左白川鄉啦，唔好響呢個時候先黎玩我地好喎!!.........我地 "O" 左一陣嘴，唔知點好，望下周圍，遠少少地方好似有個牌寫住 "白川鄉"，咁就是但啦，駛過去睇下咩環境.......點知去到原來係IC入口

......IC入口?! 點解仲要行IC?? 都到左白川鄉啦，仲要行IC.......但已經無得返轉頭，個死人GPS好似死左咁，一D指示都無，淨係叫我地向前行........咁唯有攞飛繼續去

.........

上左IC，個GPS仍然係咁叫我地向前行........好快又去到一個分叉位，但個GPS又無話俾我地聽揀邊條路........頂，真係俾佢玩死!!

.........唔知頭唔知路嘅老爺響一邊猛咁問應該揀邊條路.......我望住即將駛到嗰兩條路，一邊指示係去富山，一邊係岐阜........富山?! 大佬，我地剛剛先響富山過黎，點都無理由係返去富山掛?? 而且白川鄉明明係響岐阜縣，咁我就好有信心咁叫老爺行岐阜嗰邊啦

，我當時真係覺得自己嘅推理係無錯嫁

..........各位，其實我都唔知究竟我揀得啱唔啱，因為我都唔知就算我揀行富山我地最後會去左邊..........我只係知道當我懶醒咁揀左行岐阜之後，亦都係我地惡夢嘅開始

...........

我地架車飛快咁響條高速公路飛馳，好快就入左去隧道入面........呢一條隧道，黐線嫁!!!!! 好似無盡頭咁，行極都行唔完..........最恐怖係個GPS，平時如果行隧道，個GPS係仍然會show住條路俾人睇，但當時個GPS好似short左咁，個指示箭咀係無左，即係話我地根本唔知自己響邊

........我好難響度用文字同大家解釋當時個感覺係幾咁得人驚

，如果大家有試過響日本自駕，而大家又好似我地咁除左早晨早抖多謝唔好意思平D啦外，其餘日文一概不曉，咁就一定會明白，呢個GPS簡直係我地嘅靈魂，無左佢即係邊度都唔駛去...........或者咁講，個情況就好似你俾人用布摭住左對眼，然後要你響黑暗中自己摸索向前行，你話個感覺係咪好恐怖先???

但恐怖不特止，最大嘅問題係我地無得停，有得停都可以試下睇有無地方掉頭，但呢條係高速公路嘛，搵鬼地方俾人停咩..........呢段路真係行左好Q耐都未行完，個GPS仍然short到無影........真係#$@##*&^!! 就算行錯路，個GPS平時都會好快出過第二條路線，但而家唔單止無search過第二條路線，仲無晒行車線，完全唔知去左邊，我覺得我地好似係走左入個山入面之後，忽然去左第二個空間咁

.........

幾經折磨，行完條隧道以為可以離開IC，點知好快又入第二條隧道.......如是者，唔知行左幾多段隧道，愈行得耐即係話我地離開白川鄉就愈遠，最慘係當時又唔知自己去緊邊度，一諗到咁真係想打爆個死人GPS.........

當時我地兩個傻仔就係不斷響呢D黑媽媽嘅tunnel入面行，好似無盡頭咁，只係響深山入面不斷向前行，好恐怖呀!!!!

唔知行左幾耐，響行完其中一條tunnel後，終於見到有指示話將會有個出口，呢個時候個GPS又開始work返，見到條路線...........原來我地去到一個叫飛驒清見嘅地方........咪住先，飛驒清見，我有D印象喎，做資料搜集時有見過呢個地方，諗下諗下，記得嘞.......頂!! 真係唔爆粗都唔得，飛驒清見係響高山附近!! 有無攪錯，個死人GPS帶左我地去後日先要去嘅地方，真係媽媽聲

...........

不過媽叉還媽叉，路都要繼續行，我地估計個GPS應該要叫我地響呢個出口出啦，因為照道理佢應該要帶我地行返轉頭先可以去返白川鄉........點知個GPS又無叫我地出IC嘅指示，係咁叫我地直行.........咁點呢? 出唔出呢? 唔出又唔知要響條IC行幾耐，正在猶豫之間，一個唔覺意老爺就飛快咁miss左個出口繼續直去..........

繼續直去........繼續直去嘅意思原來係繼續行嗰D黑媽媽嘅tunnel.........我地行完一條又一條..........佢老闆，有無咁多條隧道呀，響個山入面整咁鬼多條隧道攪咩呀!!........當時真係好忟好唔開心，時間一分一秒咁過，又唔知究竟幾時先會行返啱條路線，會唔會行到夜晚黑我地兩個好似D孤魂野鬼咁仲要響D隧道入面兜黎兜去走唔出個山呢?? 一諗到咁我就喊左出黎........

平時去旅行我間唔中都會喊，不過次次都係因為D小事同老爺吵大鑊而俾條友激到喊，但今次係第一次覺得自己累事.......如果頭先唔係自己自作聰明響兩邊分叉路揀左行岐阜，係咪唔會行錯呢?

見我無啦啦響度流馬尿，老爺當然嚇到傻左.......佢安慰左我一陣，見我情緒好返D就開始笑，話原來一向乜都大Q晒嘅我，遇到事故原來都只會變左隻鵪鶉........真係，今勻真正千年道行一朝喪，以後唔知仲要俾條友恥笑幾耐

(無奈ing)...........

講返個行程，又唔知響個山入面D隧道s 兜左幾耐，終於又去到第二個出口，叫莊川，都唔知係咩地方，但我地已經決定，唔理個GPS叫唔叫我地出我地都會照出，因為只有響離開條IC我地先可以搵地方停低再set過code 重新search個目的地..........

佢老闆，呢段車程要我地白白俾多1700円!!

離開IC，我地搵左個位停低再set過個GPS........亞GPS大哥，靈靈聖聖，唔該你唔好再short，快D帶返我地去白川鄉啦!!

重新上路，感謝主，之後我地一直都係行國道，唔駛再行IC.......真係唔想再行IC，嗰D山窿真係行到人驚，入左去又無機會俾人掉頭.......行普通國道，就算唔覺意行錯都可以停低搵過第二條路嘛......

之後一段路我地都係響莊川一帶行駛.......後尾無事無幹睇返D旅遊書，先知原來莊川都係一個幾出名嘅旅遊景點.......沿路嘅景色都幾靚，個天色亦都變得幾好，不過當時我地實在無心欣賞，只希望可以快D到白川鄉........望下錶原來三點鬆D，原來我地響D隧道兜左半個鐘多D......只係半個鐘多D至咩? 感覺上好似已經過左半個世紀咁

..........

呢個莊川之里都好出名嫁~~

行行下見到有個道之站，於是我地停低架車想話搵toilet方便下先，點知呢個道之站竟然無toilet

........有無攪錯，最基本嘅設施喎?! 究竟係我地黑仔所累眼大睇過龍，定真係咁攪野呢處無toilet，我地都無心機去深究，不過雖然搵唔到toilet，但就發覺原來呢度攪緊個小小嘅雪祭.......八掛嘅我就算幾趕路，唔理老爺點睥住我，都要停低影幾張相先啦~~

叮噹呀!! 好想走去玩，不過已經俾老爺怒睥

.........

影完相繼續趕路........離開莊川，愈近目的地個天色又變返暗.........

又行左一段時間，終於又要行tunnel，不過今次呢條tunnel我地係好樂意行，因為係白川鄉嘅荻町隧道，係通去白川鄉嘅必經入口呀!! Yeah，我地終於成功去返白川鄉啦!!!

幾經波折同恐懼，我地終於成功抵達白川鄉，都過左條荻町隧道，睇怕今次唔會再行錯啦........望望錶已經係將近四點，咁樣俾個死人GPS玩一玩，就已經浪費左我地個半鐘，真係媽媽聲

........究竟點解之前我地明明已經到左白川鄉，一個唔覺意又會兜左咁遠路，到而家始終都係個謎，不過俾大家睇下下面張map就會知道我地呢條驚心動魄嘅路線係點走!! (亂左小小，大家唔好見怪，我呢D電腦白癡係咁上下~)

Map嘅最上方圓圈位就係白川鄉，我地明明已經去到嫁啦，個死人GPS無啦啦帶左我地走左上去IC，之後就一直響D連綿不斷嘅隧道入面前進，去到中間圓圈位就係飛驒清見出口，唔知點解個GPS又無叫我地出，我地到而家都仲係唔明，如果響呢個位出左，上返IC行返回頭路，至少唔需要兜咁大個圈........之後我地又一直再繼續響D隧道入面穿梭，去到最下面圓圈位就係莊川，出左呢個IC口，我地就一直行國道上返去白川鄉嘞.......整整兜左一個大圈，你話係咪唔用16個字粗口鬧個死人GPS都順唔返道氣先!!!

發洩完畢，繼續返個行情.......之前我地諗住到左白川鄉就放低架車，先去逛下條商店街同參觀D合掌屋，然後就上去展望台睇點燈，但而家遲晒，唯有先去民宿check in後再即刻趕上山頂展望台啦~~

我地今晚住嘅地方係好多香港人都住過嘅大田屋，就響荻町隧道出左無幾遠嘅地方........BUT!! 呢個時候，個GPS又玩我地嘞，明明指示話已經到左，但望來望去都唔見有大田屋嘅蹤影........我地兜左一陣都搵唔倒，周圍渺無人煙........今日真係黑仔，大概呢個GPS嘅時辰八字同我地好唔夾，成日俾佢老點.......搵唔倒唯有睇下有無人問下啦........但呢度真係都幾偏僻，成條路搵個人影見下都無，見有間屋仔響附近咁我就叫老爺搵個地方停一停等我落車走去敲門問問........

敲左一陣呼叫左幾聲都無人應，但明明聽見入面有人聲，試下拉拉隻門竟然無上鎖，鄉下地方D人都無咩安全意識........就響情急之下我竟然擅自拉開人地度門，除左對鞋走入去屋入面搵人........事後諗返，如果因為趕時間問路而俾人拉我上差館話我非法擅入民居，我真係死俾你睇........走到入去，入面有好多間房，我走到去有人聲嘅地方又拉開人地隻門，見到有兩個女人響度聊天，見到我闖左入黎佢地又無咩異樣喎........我又唔識講大田屋個日文，唯有攞住之前響大田屋個web site印定嘅map俾佢地look look啦，佢地研究左一陣，同我嘰哩咕嚕左一大堆野，見我好迷惘咁款，佢地就帶我出屋外........出返去就見到老爺，原來佢見我消失左咁耐就泊低架車黎搵我.........嗰兩位亞姐向對面山指指下，原來個大田屋響山上.......

同兩位亞姐say arigato 後，我地就將架車駛過去對面........頂!! 原來響上山嘅路口旁邊有個指示寫住有大田屋，點解我地兜左幾次都無留意嫁?? 真係黑仔!!........以為上山OK啦，但個問題係上山嘅呢個路口係封左嫁，大大個電子板打左個大交叉唔俾車上，仲有幾個交通警察響度叫D車走........唔係掛，唔俾上山?? 咁我地今晚瞓街?!

於是我地又攞住張map俾差大哥睇，又同佢做手勢話去瞓教咁啦，總之就咩九唔搭八嘅身體語言都出齊........佢老兄同佢同伴研究左一輪，先恍然大悟我地係去投宿，咁就俾我地上山啦........原來呢條路係通去荻町展望台嘅車路，大概係因為大雪所以封左唔俾車上.......OMG!!

咁即係話一陣我地唔可以揸車上?!.......不過而家唔理得咁多住，快D搵左大田屋先算啦!! 沿住條山路行左一陣，好快就見到大田屋駐車場嘅標誌.......但點解無劃泊車位嘅?? 就咁響路邊有個細細嘅空地.......唔理咁多，事但泊低架車先........落左車，四周望下，原來大田屋就響駐車場嘅下面，要行落一段樓梯先到，於是我地就攞住D行李走落去........

呢個大田屋嘅門口真係幾 "騎"，咁鬼簡陋，都唔似一般旅館......當然，呢間野又真係唔係旅館，係民宿黎咋，想要個門面點堂煌法喎.......

又係隨便俾人拉開度門，入到去叫左好耐先有人出黎，係個姐姐仔，應該係大田妹妹!! 我響網上見過佢張相，佢真人都幾靚女喎.......我一講個名佢就知，之後佢就帶我地去我地間房，係走廊第一間房.........放低D野後，大田妹妹同我地講解左晚飯同早餐嘅時間，又問我地會唔會去睇點燈，又俾左張map我地同教我地有兩條路行上山......佢D英文都OK嫁........之後就同我地收錢嘞，D民宿大概都係要俾左錢先，上次我地響富良野住嗰間都係咁.......