2010年8月22日星期日

2010年2月日本中部北陸9日 - 早晨!! 大田屋


2月21日 (DAY 3 - PART 1)


 
 


第三日啦!! 尋晚早早就瞓,一晚無醒過,今朝六點就起身嘞.......



一睜開眼即刻摸摸身,OK喎,一D都唔覺得凍,個身不知幾暖.......不過摸摸塊面,嘩~凍冰冰!! 老爺即刻彈起身走去睇下個電暖爐,一揭開張被佢老人家就V嘩鬼叫喊凍.......原來個暖爐唔知幾時真係熄鬼左......我地尋晚臨瞓前明明set左響26度,睇黎應該係過熱所以會自動熄........不過民宿供應嘅被鋪好夠暖,所以一D都唔覺得凍,我地連D暖包都無用過!! 但間房就真係好Q凍囉,得11度咋!! 想凍死我咩

,我死人都唔肯離開個被窩........唔該快D set返個溫度先啦........


個電暖爐都好掂嫁,好快個室內就暖返.......呢個時候雖然只係六點鬆D,但民宿已經好多聲音,因為成間屋都係木板間格,好傳聲,有人響走廊行過,甚至隔離房有人講野有人咳都聽得好清楚.......好似尋晚臨瞓前,隔離房唔知邊位人兄不斷響度摷膠袋,"c呢sa拿"攪左好鬼耐.......不過擾人呢樣野就相對嘅,我家老爺嘅鼻鼾聲絕對可以用震撼黎形容,以前聽唔慣我試過好沮喪地走左入去toilet避足一晚

.......所以我絕對好同情尋晚附近房間D住客.......不過有人話尋晚我嘅鼻鼾聲已經超越左佢攪到連佢自己都俾我嘈醒喎..........


 


廢話講完,講返D正經野.......晨早起身就梗係要去刷牙洗面執返好個貓樣先啦,我地又係等到公用washroom無人就拿拿林走出去.......不過今朝無咁好彩,正當我地響度刷到成口牙膏泡沫之際,後面忽然有人行過同我地講 "ohayo"

,仲要唔止一個,久不久就聽到 "ohayo....ohayo......-.-".......真尷尬,我地一口野,應又唔係唔應又唔係
.......做咩事晨咁早咁多人行黎行去嫁........雖知道一朝早我副尊容十足一隻鬼咁
,各位唔驚恐我自己都頂唔順,唯有快快刷乾淨棚牙係咁意洗個面就即刻閃返入房啦........


返入房攪完一輪終於似返個人.........七點鐘就去食早餐嘞......


 
 

入到去食事處,D野食又係已經set好晒響度........


雖然唔係D咩溫泉旅館,但個早餐都OK嫁,同埋份量都好足夠~~







朴葉味噌!! 今個trip第一次食到啦......好味!! 用黎送飯真係好正~~



食到咁上下大田媽媽又走入黎同我地傾左一陣計,又同我地影相.......無耐就見到一大班香港人浩浩蕩蕩走入黎,原來佢地係食第二時段嘅早餐.......我地即刻閃人........



返入房無咩做,當然係周圍影下相留念啦..........間房細細,當然已經俾我地攪到亂七八糟啦~~




房間同房間之間其實只係用呢D門隔開,所以好應聲~


房門口係呢D紙門~


古老門鎖


外面係走廊,個個人D拖鞋就咁放響自己房門口........仲有我真係覺得佢地將個地下打理得好光滑,可以想像佢地 "烏"低身由呢度走到嗰度用塊布響度抹地個樣囉........


呢度係大門口,所有人D鞋都放晒響度.........




有個好大嘅飛驒寶寶,請隨便抱起佢影相.......請留意寶寶旁邊個籃,放左D合掌造民家園嘅折扣卷,不過我地後來掛住同大田媽媽佢地影相唔記得左攞.........


呢度就係我儀態儘失嘅地方嘞.........其實都好乾淨企理~~


民宿都有浴室嫁,不過我地去左街外面浸浴所以無用過啫........


入面D設備都OK齊全嫁.......



可以浸浴添~


洗手間,雖然係民宿,都有分男女嫁~~


參觀完畢,差唔多時間離開嘞........入房攞返D行李,之後就同大田媽媽say goodbye啦.......佢仲送左兩張有白川鄉風景嘅名片俾我地,多謝晒呀!!



呢個就係大田媽媽..........


大田妹妹........好似好衰咁,只係自己打格仔,不過佢地個樣都已經俾好多網友post上網,我諗佢地唔介意掛.........



一出門口就見到我地架車~


攞住D行李走去攞返架車.......老爺開始努力鏟走車上面D雪.........


我呢個食野唔做野嘅無聊人當然唔會幫手啦,我呢D只做大事嘅人梗係要做D更緊要嘅野,就係周圍影下相........今日好好天呀!!



大田屋大門口



門口有棵好大嘅樹,好風景!!.......如果我地屋企門口都可以有棵大樹就好啦.........


大田屋全貌


鋪響屋頂D茅草都好厚下........



要爬上呢條梯都好驚啫~~


我地架車就係泊響呢度.......


由駐車場行落去大田屋要行落一條斜路.......


有個水井.......


通去山下嘅路,我地尋晚響白川鄉之湯浸完浴就係行呢條路上黎~~


上山去展望台嘅路........


仍然係封左唔俾車上~~


影完相,老爺亦已經鏟走晒車上面D雪,係時候離開嘞........



Bye-bye 大田屋!!


離開大田屋,我地又開始第三日嘅行程,希望今日一切順順利利啦.......


(待續
)