PIGGYBREAD: 9月 2010

2月21日 (DAY 3 - PART 5)

離開白川鄉荻町合掌村，我地向住奧飛驒方向駛去.......

今晚會入住奧飛驒溫泉鄉嘅新穗高溫泉，途經飛驒大鐘乳洞當然要去逛逛......尋日俾個GPS老點走左半日冤枉路嘥晒D時間，我地唯有改動D行程skip左平湯大潼唔去，但今朝響荻町又逛左好耐，因為驚早天黑唔想太夜到新穗高，所以去飛驒大鐘乳洞都好趕下，我地預計兩點半前可以抵達大鐘乳洞，唔hea咁耐玩一個鐘，四點半左右應該可以去到新穗高.......

將飛驒大鐘乳洞嘅電話set 入GPS，個導航show左一大堆日文出黎，搵個漢字睇下都無，睇極唔明唯有唔理佢繼續去馬........以下嘅location map就係GPS指示嘅路線........

之前我地上map fan個web site check過路線，map fan show 最快嘅路線係行IC經飛驒清見去高山方向.........

GPS而家指示嘅路線就係沿國道360走，即走返上去展望台嗰條山路...........唔知點解個GPS唔要我地行IC，照理行IC唔係會快D咩? 不過我地人生路不熟，個GPS點玩已經唔係真係話好精，日文字又唔識多個，都無理由challenge 呢個GPS啫，咁就信佢跟住行啦.......

離遠見到我地尋晚凍到黐筋又悶到嘔電嘅展望台........

日頭都有好多人上去響展望台喎~~

我地一路沿山路行，但愈行就愈覺唔妥，呢條國道360，離開荻町向住天山峠方向走，條路愈行就愈窄，唔知幾時行行下已經變左一邊係雪山，另一邊係懸崖

，雪山嗰邊有好多樹東歪西倒，D樹枝同亂草好似好耐無人清理過，亂七八糟咁飛晒出條車路，路面D雪又好厚，應該好久無車行過，總之就好荒蕪好得人驚

.......

老爺開始有D愁，猛問我點解揀埋D咁山卡啦地方去

.......大佬，我都唔知架，我都未黎過，你估我係先知咩，但當時都唔敢再駁斥佢，唯有收口唔出聲

，架車一路行一路俾D樹枝打，一邊係懸崖，想避都無得避，當時個心真係好驚

........

再跟GPS點嘅路線行多一陣，但情況愈來愈惡劣，老爺話咁唔係辦法，佢好擔心話驚山上D雪會隨時塌落黎

，決定搵地方走返轉頭，但條路只夠一架車行，想搵個避車處都無，心諗如果有對頭車點算.......不過有對頭車都仲好，至少知道有車安全行過我地將會行嘅路，同埋可以問下人咩境況........當時嘅情況就好似成個世界只淨我地兩個人加一架車去左個死城咁，好恐怖

.........無地方掉頭，老爺唯有將架車開得飛快，佢話至少希望快D行完呢段路.........

當然佢呢個係一個妄想，因為好快就出事嘞.........

正當我地架車飛快咁鏟過個雪地，眼見黎緊係一個手臂彎，就響轉完個大彎.......嘩~大鑊!!

迎面竟然係一大座雪山橫亙響面前差唔多要撞埋去!!

救命)))) 唔通我地兩兜友要魂斷他鄉!!! 我雖然鍾意去日本啫，但都未至於想響日本香消玉殞架.......好在老爺響掟彎嗰下減左速及時剎停，如果唔係就成架車飛埋去個雪山度啦!!!

嗰剎那真係幾乎嚇死左，驚魂未定之餘，真係扯晒火，有無攪錯，點解條山路封左都無路牌顯示俾人知嫁!!

如果撞埋去真係釘得.......

我地即刻掉頭.......老爺話嗰座雪山應該係類似D雪崩，好得人驚!! 佢將架車開得飛快，因為好驚唔知其他地方會唔會仲有雪塌落黎........好可惜當時我已經嚇到傻左唔記得影相留念.......當然，就算只係咁樣諗下都已經俾老爺鬧到七彩

........

沿返原路走，終於大步檻過去返荻町村落.........

搵個地方停車再set過個GPS，但set左幾次，個GPS都係出返同一條路線，真攞命!! 正當唔知點好之際，忽然醒起之前響map fan check過嗰條路線係經由高山去奧飛驒喎，於是就是但搵左個高山景點再set過GPS先啦.......入電話號碼嗰剎那真係好驚佢依然出返同一條山路

.........

果然GPS係指示行東海北陸車道，即係我地尋日無啦啦行錯去左飛驒清見嗰條好Q多隧道嘅路囉!! 唔理咁多，一於去到高山先再算啦~~

呢條路已經係第二次行啦，尋日又愁又喊都無心機影相，今日可以安心欣賞一下湖光山色~~

其實係一個水庫......

同尋日一樣，當然又係經過好Q長嘅隧道，不過今次嘅心情就比較輕鬆......

大家留意下面呢張高速道路通行劵，呢個時候係13:56........

大家又黎睇下我地個路線圖.........

根據路線圖，我地沿住東海北陸車道一路行，經過一連串水蛇春咁長嘅隧道後，去到紅色圈圈就係飛驒清見IC出口，之後應該轉行高山IC........但命運就專愛作弄人，或者個天知我鍾意白川鄉，所以不斷要我響呢個區域兜兜轉轉，去完一次又一次...........

我地一路跟住GPS嘅指示係咁穿插嗰D好似永無盡頭嘅山窿，為左偷返剛才嘥左嘅時間，老爺響條IC真係逢車過車，好似玩緊澳門格林披治大賽咁........將近去到飛驒清見IC出口，正當老爺準備掟向左面出口之際，個GPS竟然係指示直去.........我一見到個向前箭咀就諗都無諗，本能地即刻喝住老爺叫佢直去

..........本來如果老爺stick to 佢一貫同我嘅相處態度 ->即係唔理我為乜同點樣亂吠都唔差理我

，照樣左出就無事啦，偏偏唔知點解今次佢又好聽我話直去 (平時叫佢買野俾我又唔見佢咁聽話!!

)........

真係佢老闆，一 "直去" 我地就已經知道衰左

........除左個死人GPS即刻show唔到條路線外，尋日痛苦嘅經歷又重現眼前

.........

仲記得尋日又係經過呢個飛驒清見IC出口，我地無出，之後就直落莊川，兜左好Q大個圈去白川鄉.......換句話講，同樣可怕嘅事又一次發生，所唔同嘅係尋日我地嘅目的地係白川鄉，點兜都係為左返去白川鄉，但今日明明唔需要再去白川鄉啦，無啦啦又要去多一次!!! 一諗到跟手又要嘥時間行一大段冤枉路真係想殺人!!! 個死人GPS不斷響度叫，大概係話我地行錯路........頂!!

我夠知啦，係你D指示唔清唔楚攪到我地行錯路，明明要左出做咩事叫我地直去喎，嗰一刻真係想打爆個GPS等佢唔駛再遺禍人間!!!

好無奈地我地繼續響條東海北陸車道度兜圈

，去到莊川IC出口就俾錢......頂佢個肺，又嘥我地1700円!!

離開莊川IC，老爺即刻搵地方停車再set過GPS，睇下會唔會由莊川去高山有第二條路可以快D到 (事實上後來睇返地圖照計應該可以上返莊川IC去返飛驒清見IC出口出再去高山)，但詭異嘅係當時個GPS竟然叫我地行國道156上白川鄉

........更詭異嘅係唔知點解我地又繼續聽佢老點

........我只能夠話呢一帶唔知係唔係日本嘅神秘百慕達三角，我地迷迷糊糊咁俾D不可思議嘅力量操控住完全無反抗嘅能力

.........

又沿國道156走返上去白川鄉!!.......呢條路好熟啦，尋日先被迫黎過，無諗過咁快今日又被迫黎多次........雖然D風景好靚，但我真係無心機再影相住，唔好話去飛驒大鐘乳洞無望，而家到底幾點去到高山都唔知，最攞命係高山並唔係我地個目的地，仲要由高山再去新穗高，我真係好擔心我地會走唔出呢個百慕達三角，不斷響呢一帶兜兜轉轉

.........

我今次無喊啦，當時只係覺得好憤怒

.........我只係想順順利利咁去奧飛驒啫，因乜事你個死GPS玩完我地一次又一次!! 真係好想一野打爆佢

........不過老爺反而好從容，仲響度笑

，佢話或者個天知我鍾意白川鄉所以俾多個機會我又去多一次

.........

無啦啦又要走多一大段路，老爺話我地成日行錯路，都係去入定油穩陣D~~

行完國道156又(!)去返白川鄉........Sorry, 話之你幾靚，我真係唔想再望一眼........又再行多次條荻町隧道，之後就再走返上白川鄉IC向住飛驒清見IC駛去.........

又經過個佈滿白雪嘅水庫.......同一個地點，又係同一對茂李，響兩日內已經係第三次行呢段路

........我嘅心情次次都唔同，第一次係好驚，第二次係好他條，第三次就好沮喪.......去旅行去到我咁樣，同一個trip同一個地方去三次仲要感受三種截然不同嘅心情，真係永世難忘!!

又一次拎呢張高速道路通行劵，時間係15:24

........真係唔講粗話都唔得，足足浪費左個半鐘!!!

終於又差唔多去到飛驒清見IC出口.......我今次有備而戰，揸定部相機影低D證據........

路牌指示高山方向係左邊出口.........

但大家睇睇，個GPS唔係叫我地左出，而又係老點直去!!!

我地今次當然無再聽佢枝笛啦，一於左出離開飛驒清見IC再上高山IC......

終於成功走出百慕達三角，嗰種開心真係非筆墨所能夠形容

........但個問題係點解個GPS會咁樣.........老爺話估計其實 "直去" 嗰個指示應該係指走離IC左轉後再 "直去"，不過呢個指示實在偷步出得太快，我地又唔係咁熟習呢個導航，所以咪俾佢誤導左囉!!

行完高山IC去到高山市，我地就繼續set過GPS，呢個時候當然無可能再去飛驒大鐘乳洞，我地只想順順利利快D去到新穗高........高山市好塞車，我地都要塞左一段時間先可以離開.......之後就行國道158，因為唔係行IC，老爺將架車開到飛快希望可以偷返D時間.......去到丹生川町附近就見到大大個廣告牌指示去飛驒大鐘乳洞，我地只能夠過門不入望門輕歎...........