2月19日 - DAY 1
(香港 > 新千歲 > 札幌)
今年呢個「大旅行」係響比較倉促嘅情況下成行，雖然由訂機票至出發都有成半年時間，但由於近月家事嘅關係，一來無心情，亦無咩時間做詳細planning同上網搵料，所以今次呢個trip可以話係近年來響最無準備嘅情況下出發.....不過冬天嘅北海道日短夜長，其實都唔會有太多嘅觀光點，純粹去睇下雪浸下溫泉買下野咁，所以即使無咩準備亦唔係太大問題~~
雖然話無咩planning，但唔多唔少都有D野要準備，好似要check定d JR班次，同埋最緊要嘅當然係兌円啦，12日嘅旅程，CX package包左三晚酒店，都仲有八晚嘅住宿費要俾.....d円咁鬼貴，真係好肉赤，不過去得就預左要洗錢，最緊要係洗得開心啦!!
Mini-bear︰ Wow~ 呢D一大叠紙係咩黎嫁?
紫bear︰ 呢D叫円!! 去日本就靠晒呢叠紙
Mini-bear︰ 哦，咁piggybread一定會好珍惜咁用呢d円啦??
大bear︰ (嘆氣) 我都好難同你解釋佢係咪好珍惜咁洗，除左一半用黎俾酒店錢，其他最終咪又係換埋一大堆狗屎垃圾唔等使嘅野返黎，次次都係咁，你睇下佢地一屋都係d九唔搭八嘅野就知啦!!
以上嘅對話其實係想反映響我身邊一眾親朋好友對我今次俾airline罰咁多錢嘅comment (無奈ing)......唉.....我其實唔係唔知成日咁買野係好無謂，我亦都知每次買埋一大堆野返黎都係永久放左入櫃就無點再攞出黎睇，但人總有d劣根性係好難迫自己去改......有時響日本玩完搭飛機返黎，響機場見到有d人竟然可以兩個人都只係手推一個喼寄艙
吹水完畢，正式開始向北海道出發!!
好耐無搭朝早機，今次去12日，老爺話咁長日子唔將架車泊機場car park啦，所以天濛濛光就走去搭機場巴士......不過呢一朝好凍，又落雨，為免帶多件褸，我地索性將件羽絨著上身.....去到機場熱到飛起，又要將件羽絨塞返入個喼
搞掂晒check in同過移民局後，就去Lounge食野.....上一次搭凌晨機無咩野食，日頭d野食就多返好多.....味道一般啦，唔駛錢仲想點~
我覺得最好就係野飲任攞
食完已經差不多夠鐘登機....自從識得去lounge食免費餐後，我地次次都無時間shopping
上機無耐就派snack同野飲嘞~~
去程無咩電影啱睇，所以揀左Friends，去旅行要輕鬆d嘛，雖然以前已經睇過N次，但仍然笑到停唔到嘴，老爺依然睇埋d打打殺殺......睇到咁上下就派餐嘞，我地每樣叫一份，我要鰻魚......
老爺要pork~~
食完繼續睇電視，之後就開始inflight sales.....過年去台灣時咁啱又係坐國泰機，當時已經睇啱有d野想買，於是返HK後check左價錢就上網預訂左響機上攞.....預先online訂定野嘅好處係多數都會有貨，不過當空姐攞住一大袋野俾我時老爺先醒覺原來我又訂左過千蚊野，佢對眼真係反到上天花板
差不多兩點就飛到北海道啦
想睇雪去北海道一定唔會令你失望......一地都係白雪呀，yeah!!
未夠三點飛機就降落新千歲機場啦.....Mini-bear第一次踏足日本，好緊張......
兩隻bears加鏡頭後面嘅兩個人都好興奮!!
新千歲自從加建左個新嘅國際線客運大樓後，我地都係第一次黎.....雖然話係新加建，不過過關counter都唔係好多，而且呢班機好多外籍人士 (我成日都覺得d鬼佬過關特別慢)，所以都等左半個鐘先搞掂~
由國際客運大樓要行返去以前個terminal先可以搭JR出市區，其實都幾遠，點解唔好似羽田機場咁響國際航廈整多個JR站呢?? 好嘥時間囉!!
去到即刻買飛，行李唔多，買自由席就已OK~~
Mini-bear第一次搭JR~~
欣賞下車窗外嘅雪景先~~
去到札幌站差不多四點半，首先去酒店check in先......我地今次住近札幌站北口嘅Best Western Hotel Fino，由車站行去只需幾分鐘，不過要過幾條馬路，過馬路時行嗰d冰地真係好驚......
酒店大堂
Souvenier Corner
房間都唔算好細，比上次住嗰間Gracery Sapporo已經大好多~~
房間設備都好齊全，仲可以免費上網~
我地住三樓，外面無咩景~
放低d行李當然就拿拿聲外出shopping!!
黎過北海道幾次，次次都係住南口嗰邊，今次第一次住北口，個感覺唔係好習慣，好似南口嗰邊旺d~~
Shopping之前當然先要去搞左d JR pass先......
今次個trip總共12日，由於有好多日都會利用酒店嘅免費迎送service，計過度過只需要買張4-day flexible pass就ok~
其實最初決定左去北海道，老爺因為舊年響白川鄉自駕差d撞埋雪山嚇餐死後，已經表明冬天去日本基本上唔再自駕，所以一開始就打算搭JR....12日嘅旅程，當中有幾晚嘅酒店有免費迎送service，最初以為at least要買張7日全國pass，但後來計計下就發現原來買張4 day flexible pass就ok，預先check定最貴車資嗰4日就用pass，其他日子就即場買車票，咁樣係絕對抵過買7 day pass嫁~~
兌換左pass就reserve埋d車票....搞掂晒就可以安心去shopping啦!!
札幌站一帶我地可以話算係老馬識途啦.....逛札幌就好似逛新宿池袋一樣，太多野逛，but 太小時間 & 太小$$.....同老爺約定左個時間，兩個人就各自分頭去搵心頭好......
時間唔多，兩個人d收獲只係一般，不過今日只係第一日，唔緊張，仲有大把時間.....匯合後我地就一齊逛我至愛嘅大丸啦!!
上去二樓巡左個round，Blue Label同Agnes B而家d袋款真係無咩睇頭，想買個Anna Sui老爺又話好姣唔俾買，唯有去睇鞋但又無減價鬼屎咁貴，最終響大丸空手而回
D菓子嘅賣相好吸引，真係好想每樣都咬一啖!!
Basement真係有好多野食，老爺話有d肚餓但晏小小約左朋友就快食飯，所以唯有忍口......
雖然話要忍口，但basement呢層實在有太多野試食，我地檔檔都走去試，真係好過花錢去食tea.....
行過見到呢D炸魷魚好似幾好味咁......
終於都忍唔住買左100g，兩條友好似餓鬼咁響門口是但搵個位即刻開餐.....肚餓時覺得特別好味!!
今次咁啱有兩個朋友又係呢段時間響札幌，難得異地碰頭，所以就約定一齊去食飯聚聚，我地約左七點半，見仲有d時間，就行返酒店放低d戰利品，費事第一日就一袋二袋嚇親人.....返到酒店諗住攤抖一下，點知一撻落床就陷入昏睡狀態，終於搞到要遲到，真係唔好意思
同朋友匯合後，就去醫肚.....我地諗住去食蟹宴，大家都唔係第一次黎北海道，蟹宴一定食過唔少，所以我地打算搵間大家都未食過嘅食店試下，之前唔知睇邊本旅遊書介紹過話雪華亭好似唔錯，上兩次黎札幌都已經想試不過就唔啱時間，咁啱朋友又係未試過所以就決定去試下，點知去到無鬼左，搞咩呀，搵極都無，老爺就問個location響邊處得返黎，我就答早兩年去北海道時響某本旅遊書scan定左今次搵返出黎，不過本旅遊書已經係幾年前嘅版本
四個人我地叫左一個金波蟹會席、一隻活毛蟹同兩份帝王蟹鍋.....不過成晚掛住傾都無點影相......
食到差不多十點食店職員就走黎話要埋單，之前朋友已經響網上print定折扣劵，有10% off嫁，折左後多謝29,264円~
食飽飽就行返去酒店，朋友聽日就要返HK，呢晚當然要早d返房執行李，約定聽朝一齊食早餐後就say good night啦.....十一點未夠，我地返到房當然開電視開電腦hea返夠本先捨得去洗白白，終於搞到十二點幾一點食埋個宵夜先去教教豬，而第一日嘅行程亦都結束啦!!
