重新開張之兩傻西遊記

搬左竇一段時間，由於各方好友都異口同聲話新竇無得私訊無得八好唔方便，於是返黎重新開業，大家有咩要八要 "up" 就快d埋位啦!!

重新開張，為左隆重其事，當然要寫d新鮮野，最最新鮮出爐當然係剛剛完成左嘅一年一度大旅行....近呢五、六年，我地嘅目的地都係至愛嘅東瀛，今年我地終於打破慣例，改向西方世界出發~

所謂西方，其實都只係巴黎同倫敦啫....兩個城市，兩種截然不同嘅感受，感覺上英國d人比較cool d，但就好似返左香港咁囉，巴士、路牌、紅綠燈同香港都好似，好有歸屬感，最主要係你完全明佢地講咩寫咩嘛.....至於巴黎，叫得上浪漫花都，d人都熱情奔放好多，無啦啦響條街度行行下前面嗰pair男女都可以忽然停低kiss，呢種情景真係一街都係簡直司空見慣，搞到我地由最初唔好意思望到最後連自己都貪得意玩埋一份，到最後一日我地都笑住話呢樣野要戒，如果唔係返到黎香港響條街俾人影低左擺上YouTube真係邊度都唔駛去，哈哈

講返個trip，雖然我地兩個絕對唔能夠稱得上係日本通，但去左咁多次日本自遊行，plan行程可謂無咩難度，今次換轉另一個國度，所有嘅野都可以話係由頭學起....不過我鍾意呢種感覺，人係應該要向新事物探索，過程中或者會遇到好多阻滯，但每次成功完成一個景點，嗰種滿足感真係好正....仲記得有一日當我地一個上午轉左好幾程車，山長水遠終於走到去一直夢寐以求嘅Mt. St. Michel，抬頭望向山頂上面近在咫尺嘅修道院，心入面嘅激動真係好難形容!!

只係籌備左唔夠兩個月嘅時間，仲要係去之前同屋企人走左轉日本關西，響極度準備不足嘅情況下，兩個傻人就咁膽粗粗就出發嘞，從來未試過響臨出發前嗰一刻鐘我仍然改緊行程仍然對住個電腦做online booking，好心急咁對住個printer猛咁叫佢快d print完張ticket先上路....所有嘅 "論盡" 野都歷歷在目，11日嘅旅程忽然一眨眼就過左去，時間點解過得咁快嫁?? 明明仲係第一晚，我地企響凱旋門上面睇緊巴黎市嘅夜景，一個唔覺意就已經玩完11日返黎.....開心嘅時間真係過得特別快! 11日嘅行程，當中有苦亦有樂，有失望亦有驚喜，不過大致上都能夠順利渡過，只係響回程機場搞check in時又遇到阻濟....係呀，大家估得無錯，當然又係行李超重嘅問題啦，我都唔係第一次有咁嘅經驗，但諗唔到平時見法國人做野咁hea咁馬虎，對於行李嘅限制咁嚴囉，我地俾佢地搞到一頭煙一額汗，幾乎係last minute先趕到去boarding gate，不過老實講，罰錢事小，我都成日響日本俾airline罰慣啦，今次區區罰我200e，都未算真係好入肉，但罰錢事小，條氣chok住嗰下唔好嘛，我唔敢講佢地一定歧視我地中國人，但我覺得security check嗰條友好明顯係玩野囉，不過d衰野過左去就算，最緊要平安返黎，所有開心或唔開心嘅經歷留待以後先慢慢同大家分享啦~

今次呢個trip去左11日，雖然無舊年去北海道12日咁長，但洗嘅$$就真係倒水咁，歐洲d洗費真係好金呀，尤其係Paris，去餐廳食野飲杯水都要錢，仲要係唔平，平均都要4、5e一樽水，不過佢地係飲mineral water，至於可樂就仲得人驚，我地飲過最貴嘅一杯可樂係7e，當十算計即係港紙70蚊(!)，咁都未算最貴，試過響Opera區見個menu標嘅價係9.9e....黐孖筋，100蚊一杯可樂!! 連檸檬都無片，就算當時我幾想飲都真係叫唔落手囉!!

今次我地影左好多相，歐洲真係一個充滿住歷史嘅地方，是是但但響條街是是但但但一座building是是但但一道門都好靚好有內容咁feel，我地兩個人總共影左七千多張相，從未試過兩張16G 嘅sim card會用盡晒，好在我地有帶定多兩張8G 嘅，video亦都影左7張DVD!....執相需時，而家係咁意整幾張相俾大家睇下先....


唔駛講先黎張巴黎地標啦，現場睇真係好宏偉好靚嫁，夜晚每逢整點仲會有五分鐘閃燈，好浪漫呀!!

凱旋門，我地 day 1 一去到見到嘅第一個景點.....紫bear好開心，佢話返左鄉下，其實佢係came from 普羅旺斯，不過都係法國啦，由得佢啦~

美麗嘅巴黎聖母院


聖母院入面好靚嘅彩繪玻璃


當然唔少得嘅係羅浮宮，燈光掩映下好美喔!!


我恨左去好耐嘅Mont St. Michel，據講係一生人一定要去一次嘅地方，島上最高點係被喻為全法國最靚嘅修道院....不過自從當局起左條車路連接呢座孤島，我覺得已經失去左個意義，而且島嘅四周滿佈商店，感覺好似過於商業化囉~




我地去嗰兩日天氣都唔好，夜晚仲久不久落狗屎，老爺搞左好耐都影唔到一張合心意嘅夜景相，最後實在太凍，又橫風橫雨，唯有放棄，不過我覺得下面呢張都算OK啦，響風雨下某人堅持影出黎嘅效果，大家又認為點呢?

Parliament & Big Ben，好靚嘅歌德式建築!


由Westminster嗰邊可以望到London Eye，我地去嗰日多人多到嘔，差d搞到我去唔到倫敦行程中嘅最重點Harrods


呢一日紫bear好雀躍好興奮猛咁響度唱 "London Bridge is falling down, falling down, falling down...."
 

Mini bear即刻糾正︰傻bear，呢個先係London Bridge呀! 你嗰個係Tower Bridge咋，唉... (搖頭歎氣ing)


巴黎市黃昏景.....我已經將心遺留響美麗嘅塞納河上.....

Revoir Paris!!