PIGGYBREAD: 3月 2012

2月24日 - DAY 6 (PART 5)
帶廣站 > 三余庵

話說上一回講到響帶廣駅附近嘅元祖豚丼食左個好好味嘅豬扒飯，之後hea下shopping左一陣就差不多夠鐘搭酒店shuttle bus去三余庵......

我地約左14:40響JR站外面等，響locker攞返d行李，行出去就見到三余庵架van仔到左，同行仲有一pair日本伯伯同嬸嬸，以及一pair香港人......車行左大約十多分鐘就到左三余庵，原來嗰對日本人係去Daiichi Hotel，只係得我地同另外嗰pair香港人落車 (sad)

(sorry，其實我唔係好想響三余庵遇到香港人囉，唔好問我點解，總之就係唔想)....呢pair香港人好後生，係真係好young 20歲出頭嗰隻，之後我忍唔住同老爺講而家d後生仔真係有錢又捨得洗，三余庵喎，間間個室都起碼要二萬幾三萬円一位，我地兩條老野捱左咁多年而家呢兩三年先叫做肯俾多小小錢去享受下 (thinking)

.....老爺話我有好嚴重嘅憎人富貴嫌人貧嘅傾向，叫我唔好理人咁多.....我唔否認，咁我真係一個八婆嘛 (big grin)

期待已久，呢三個字，今日終於親身見到嘞!! (applause)

所謂三余，余即餘、餘閒，咁係邊三餘呢? 響三余庵網頁上講得好清楚︰「三余，冬者歲之餘，夜者日之餘，雨者晴之餘」......冬天同夜晚分別係一年同一日中最悠閒嘅時間，冬天我地應該去感受歲月暫停嘅餘暇、夜晚則為白天忙碌嘅日子留下喘息嘅時刻，而雨天，即連時間都慢下腳步 (day dreaming)

.....將呢句說話引申至三余庵嘅待客之道，意思就係客人來到三余庵，都能夠放下煩憂、忘卻歲月，悠閒咁體驗時間慢慢流轉所帶來嘅感動，從而令疲累嘅身心都可以得到休憩.....講咁耐其實簡單一句，即係話要relax囉!!

如果你黎到呢度，心態仍然係嗰種唔知點解乜都要趕頭趕命嘅話，你係唔能夠體會三余庵為你特意營造嘅意境嫁

同所有溫泉旅館一樣，一落車就有幾個職員走出黎幫我地拎行李，同埋入到去室內要除鞋換佢地嘅拖鞋......

我地就係坐響呢度做check in.....環境好優雅 (day dreaming)

，據講lobby呢幾棵樹幹係來自十勝清水町羽帶嘅千年之森~

而地板上嘅波紋就係象徵溫泉同水嘅流動~

Welcome cake 同綠茶，oishi!!

比較意外係佢地搵左個好後生嘅男仔serve我地，其實男性都唔係咁大問題，當然如果可以揀梗係希望係一d有經驗嘅女將個感覺會好d囉，因為始終女性係細心d (thinking)

.....serve我地嗰位男仔其實好好禮貌，不過佢嘅英文好一般，好多時詞不達意，結果個酒店presentation真係做得麻麻 (no talking)

好勉強講解完d設施就去揀浴衣，係女士先有得揀，男士係standard款~

仲有唔同款嘅枕頭可以揀~

之後就上房.....個lift lobby嘅外牆係粉紅色，幾特別~

我地住二樓，間房叫「細雪」.....

三余庵全館只有十一間個室，當中有兩間係洋室，其餘全部係和室，全部房間都有私人溫泉，不過大部份都係室內，只有兩間係露天風呂.....眾所周知，呢間旅館嘅收費都好昂貴下，我地雖然都成日俾人話叫做幾捨得洗錢去享受，但都有個底線，只不過係每次都唔覺唔覺咁將個limit推高dd又dd啦

.....今次個trip總共12日，單係住宿都好金，d 円又貴，而且呢間旅館又未入住過唔知係咪真係咁正，所以我地只係book左全館幾乎係最平嘅package......所謂幾乎，其實係尾二，點解唔係最尾? 因為我唔想係最cheap囉 (laughing)

，即使住唔到最貴，甚至唔係中等價，都唔想最平啦 (big grin)

，咁啱做booking時見到有個package "旬の食材１品付プラン"，check下翻譯大概係響基本嘅和食料理加多一種時令食材，27,550円一位，比最平嘅package貴dd咁囉，哈哈，啱晒我呢d女人仔心態啦

至於個室，當然係全館最細嗰間啦

，大家睇下下面個room map，我地就係book左十一間個室中最細嗰間256「細雪」，唔好以為357「春之海」好似一樣咁size，其實佢係複式加有露天風呂嫁!!

雖然話係全館最平房價，但講真55,100一泊二食都真係好金

，睇返我地過往住過嘅溫泉旅館，以日元計佢雖然唔係最昂貴嘅一間，但當時係去到十算計，所以為起仍然係我地暫時住過嘅酒店中最貴嘅一間囉 (whew!)

......既然係最貴，當然對佢有一定嘅期望，事實上響去之前已經上網睇過晒 offical web site 嘅資料同其他blog友嘅遊記，有晒心理準備，知道呢間旅館走嘅唔係奢華浮誇嘅路線，而係好似佢響網頁上所講嘅講究「五感」嘅體驗.....所以即使我地明知自己book嘅唔係至正嘅個室，但仍然好希望可以響呢「五感」上得到極大嘅享受同滿足 (day dreaming)

首先睇下我地嘅個室，以下呢個就係「細雪」嘅floor plan~
間取り

一入門口就見到呢個擺設，我覺得幾型~

雖然明知道呢間「細雪」係全館最細嘅個室，有一定嘅心理準備，不過一入房個感覺仍然係比想像中細 (surprise)

，或者因為之前一晚我地住嗰間鄙之座比較大，相對黎講呢間房就細好多，即時有dd失望 (sad)

.....不過平心而論其實以40平米黎講都唔算好細，老爺話如果我地將同鄙之座個入住次序掉轉，個感覺就會好好多......當然其實大細都唔係真係咁大問題，好似舊年我地響長崎住嗰間溫泉旅館成100平米，係好大，不過無咩用囉，其實房間最緊要乾淨同舒服，感覺唔好太侷促就ok~

一入房右手面係living area，張梳化好柔軟好舒服嫁

，左手面係bedroom，中間係一張好大嘅梳化凳，用黎放野好正~

呢個CD機係Marantz，老爺話係好野......房入面有幾隻CD供應，都係一d大自然嘅healing music，唔夠亦可以同lobby職員租借，我地當然借多兩張啦 (big grin)

書枱個櫃桶入面有套書，書名同我地間房個名一樣，唔知係咪全館所有客房都係以文學著作命名呢? 我只係睇過川康端成嘅「雪國」，其他嗰d就唔曉~

電動香薰座.....我地當然亦無放過，個香味好清香嫁~

呢個係moisturiser

茶具都好齊全.....

有送一枝水同一枝茶~

年紀大，如果有得揀而家都鍾意揀洋式 (laughing)

我揀左呢款枕頭，不過事隔太耐，唔記得有咩特別功能.....老爺嘅無特別影相，大概係用返房內standard嗰種~

衣櫥係自動感光.....

Basic 嘅浴衣，男士就係著深咖色嗰件~

我就係揀左下面呢套粉紅色浴衣......

件浴衣真係好靚，幾乎係我咁多年來去過咁多次溫泉旅館所著過嘅最靚

，除左個花好靚 (呢個其實當然係因為我揀得靚啫 (laughing)

)，d 料都好柔軟，好soft嘅cotton，不過嗰條紫色腰紗好難搞，搞左好耐都整唔到個蝴蝶結 (worried)

，後來先知可以call 職員上黎幫你搞

.....老實講呢度真係有小小唔like，因為之前個男職員做presentation同介紹房間設施時都無同我地講過佢地有咁樣service

，相比下前一晚鄙之座個女職員個presentation就做得好好多，亦都有同我地講可以隨時call 佢地過黎幫我著浴衣囉~

Washroom都算幾闊落.....

設備亦好齊全~

簡簡單單一小棵綠色植物，感覺舒服雅致~

好齊全嘅個人護理，連shaving foam 都有，Shiseido嫁~

之前聽人講過呢隻Phytomer法國牌子好似幾正，不過香港好似無零售.....

其實我想講嘅係，呢 d skincare，本來你唔係provide獨立packing 俾d 客用其實都唔緊要，而家咩都講環保，OK，但你要refill先得 o架，嗰枝玫瑰補濕都算嘞，至少仲有四分一份量，粉藍色嗰枝cream係唧唔出，好用力先唧出一滴

.....

老爺話我搵野黎挑剔，佢話咁枝野未用晒唔通要人掉左佢? 如果用晒咁可以問佢地攞嘛.....個問題就係響呢度，如果佢地有認真check過應該知道枝野係唔夠用，無論點都應該主動換左佢而唔係等我開口問 (no talking)

.....你可以話我挑剔，認為呢d係好小事、鎖碎野，但我就覺得呢個係基本野，唔關呢間旅館係咪收得貴事，一係你唔好provide，既然你provide左就應該要follow up.....當然呢度仲要收得咁貴，我無諗過最基本嘅野都有甩漏囉

Washroom左手面係toilet.....

呢舊唔知係咩?

另外一邊就係bathroom......

旁邊就係檜木風呂......

呢個私家溫泉唔算大，而且響室內，感覺係比較侷促

，好在有個窗......同我地以往住過嘅幾間高級溫泉旅館相比，呢度嘅私人風呂只可以話係好一般，不過由於之前已經見過blog友post出黎嘅相片，有定晒心理準備，所以都唔會覺得有太大問題，而且十勝川溫泉向被稱為「美人湯」，我地都願意將個重點focus響佢嘅泉水上而ignore佢嘅環境同design

......不過佢嘅溫泉水係自動開關，雖然話咁樣好似環保d，但每次要浸都要事先灌水，唔好睇個木盆好似好細，開滿一缸水都要等十多分鐘，同嗰d不斷有水流出嘅私家風呂比，始終無咁方便

......再膚淺d諗，不斷有水流出嘅溫泉池個感覺點都似天然溫泉多d囉

房內另有welcome snack.....

不過茶要自己沖囉.....你地唔好話我又要挑剔，of course 我會expect 呢度會有人幫我地沖第一壺茶啦(!)

，我唔覺得呢個期望好過份，一d普通嘅溫泉旅館都有咁嘅service，其實我唔係要求一定要人服侍，只係覺得呢個係一個好warm 嘅待客之道啫......當然老爺又黎解畫，佢話唔通你會expect頭先個 "男" 職員幫你沖茶咩?!

呢個好好味.....

係甘納豆，響鄙之座都有......好快已經俾我 KO左一半~

響房內hea左陣，見時間仲早，都未夠四點，於是就出去諗住響附近逛下...... 我地響旅館外圍影左陣相，發覺有個女職員一路企響出面走廊，離開時我地問佢白鳥飛來地同今晚彩凜華會場嘅方向，佢雖然唔係好曉英文，但都好詳細指示俾我地知，仲同我地講今年無白鳥睇.....我懷疑佢係知道我地要外出 (因為每次外出都要問佢地攞返對鞋)，所以專登走出黎送我地或者睇下我地有咩需要，如果唔係我諗唔到凍冰冰佢無啦啦一個人企響度呆係為乜囉.....我覺得呢樣佢地做得幾好 good