2月20日 (DAY 2 - PART 4)
五箇山最出名嘅料理係蕎麥麵同豆腐，逛完合掌村咁啱係午膳時間，當然要趁機去試下呢D名物.......菅沼合掌造集落入面只得兩三間食店，我地是但搵左間.........
雖然呢度係觀光旅遊點，但唔知係唔係因為地處偏僻，熱門程度始終唔及另一個世界文化遺產白川鄉，我地黎左咁耐其實都無咩點見到其他遊客
先斟個熱茶暖暖肚先
我地首先要左個五平餅，其實唔知係咩黎，不過見佢大大隻字響門口賣廣告，梗係要試試........原來係甜嘅，食落煙煙韌韌咁，都OK嫁~~
好可惜竟然無豆腐
唔知係咪肚餓，真係好好味!!
唔同香港嗰D，D魚片係橙色~
以為個蕎麥麵已經好好味，之後呢個炸野菜烏冬仲正!! O-i-shii~~~
好古舊嘅爐，上面仲可以用黎煲水??
外面落住雪，屋入面暖笠笠，口中食住美食，個感覺真係好正~~
呢間食店係由一對上左年紀嘅夫婦打理，佢地都好nice，雖然大家唔知大家噏乜，但佢地都同我地搭訕左一輪，下面呢個就係個老闆，佢成日笑咪咪咁望住我地嫁.......
食飽飽諗住去過方便，於是就問下老闆洗手間響邊，之後佢就帶我地出去......原來帶我地去佢屋企，就響食店對面條街.........老闆伯伯叫荒井昇.......
好攪笑，響屋企都要貼紙標示御手洗，大概都係要方便D遊客~~
本來對呢位伯伯嘅印象幾好，點知原來佢係煙民一族，響門口等我地方便之際佢不斷咁起勢抽煙
方便完同老闆伯伯bye bye後，我地就繼續響附近嘅土產店shop多一陣，實行最後一擊
好得意嘅飛驒寶寶!! 係兔仔造型，好fancy!! 不過我竟然蠢左 (or 傻左??)，當時都唔知做咩，成日諗住遲D響白川鄉同高山仲有好多飛驒寶寶有得買，所以只係買左一個粉紅色........係 (((一個))) 咋!!!!
真係，攪咩呢，都唔同地方，點可以咁計呢，唔同地方有唔同嘅特色嘛，都係470円啫，應該每隻色都買一個........而家買得咁小，返黎就後悔 (其實未返嗰晚已經後悔
Shopping完就真係要離開嘞........
落住雪嘅合掌村，好浪漫
行返去條隧道，發覺原來有段路係通去升降機，即係我地原本一直想搵嘅停車場，最主要係呢個停車場隔離係展望廣場.......我當然要順手走去睇下，成日掛住想快D去攞返架車嗰兜友唯有好無奈咁由得我.
個展望廣場其實仲係一個細細嘅觀光案內所，有資料單章攞，仲有得蓋章嫁，不過就無紀念品買........
下面張guide map，左手面嗰堆就係合掌村，而右手面係五箇山合掌之里，亦叫青少年旅行村，有露營區、網球場等設施，仲有個生活館展示當地嘅生活文化........
睇返個map就知道原來個大型car park係響展望廣場旁邊，而我地就將架車泊左響最左面嘅合掌之里嗰邊嘅蚊型car park仔，即係話其實我地應該向山上再直駛就可以見到個展望廣場，咁就唔需要行咁遠，都唔知點解個GPS會老點我地去左合掌之里嘅car park........
[事後睇返響展望廣場嘅資料單張 (唔係講笑，我真係一個好認真、好鍥而不捨嘅自遊行planner
[我想講嘅係，其實D旅遊書quote俾大家睇嗰D電話號碼，好多時都唔係exactly去到個目的地嫁
據旅遊書講由展望台望出去可以睇到成個菅沼合掌村落，不過呢一日個觀景台竟然close左 (#%#@!!)，周圍都俾D厚厚嘅雪蓋住，根本無辦法睇到下面
實景睇唔倒，唯有影張poster算........
離開展望廣場，我地就搭番lift沿番條隧道行返去泊車嘅地方........
有如仙境嘅五箇山，bye bye啦~~
離開菅沼合掌村，離開五箇山，我地朝住下一個景點白川鄉進發.......呢個時候係兩點鐘，據GPS指示目的地只需半個鐘車程..........我地嘅心情真係好興奮，因為就快會見到期待已久嘅白川鄉，我地今晚仲會響文化遺產合掌屋住一晚
好似要彌補我地尋日不斷落狗屎嘅遺憾，今日一路上都落住綿綿嘅大雪，車窗外嘅景色真係好靚
下一篇，今個trip最驚恐嘅一次經歷
(待續
