2009年2月日本東北溫泉鄉8日 - 初步行程篇

Day 1
香港 (JAL 凌晨機 01:50) ~ 東京 (羽田)  ~ 東京站 ~ 仙台 (outlet) ~ 仙台 ~ 東京
宿︰東京丸之內酒店 (confirmed)

Day 2 
東京 ~ 田澤湖 ~ 乳頭溫泉 (日歸 - 鶴の湯、蟹場、孫六  http://www.nyuto-onsenkyo.com/)
宿︰妙乃湯 (confirmed) http://www.taenoyu.com/

Day 3
乳頭溫泉 ~ 田澤湖 ~ 角館 ~ 松島
宿︰待定

Day 4
松島 ~ 山形 ~ 藏王溫泉 (日夜樹冰 http://www.zao-spa.or.jp/juhyo/index.html)
宿︰深山莊高見屋  http://www.zao.co.jp/takamiya/index.html

Day 5
藏王溫泉 ~ 山寺 (或天童) ~ 銀山溫泉
宿︰古山閣  http://www.kozankaku.com/

Day 6
銀山溫泉 ~ 大石田 ~ 最上川 (雪見舟  http://www.blf.co.jp/) ~ 上山溫泉
宿︰橋本屋 (confirmed)  http://homepage2.nifty.com/hatagonokokoro/top.htm

Day 7
上山溫泉 ~ 米澤 ~ 仙台市 ~ 東京
宿︰東京丸之內酒店 (confirmed)

Day 8
東京 ~ 新宿 (血拚) ~ 香港

2008年2月北海道8日遊 - Day 3 (Part 2 續遊函館)

2月23日   星期六

離開酒店，我地就正式開始今日嘅行程。行番出去車站搭市電，因為今日會搭多程車，所以就用尋日買定嘅 one day pass。

今日依然見唔到落雪，而且天色好陰沈，我地首先去左JR站放低D行李入locker，然後再搭市電去明治館。響十字街站落左車，行緊去明治館時又開始落起雨呀。老爺問我有無帶備雨傘，我答有，不過留左響東京個喼度唔記得帶.... D雨都唔細，真係掃興，上次嚟函館又係遇著落雨，攪到我地上函館山都睇唔到夜景，今次又係咁，真係有D擔心囉。去到明治館，行左個圈，都已經無心機影相。出到去見D雨重愈落愈大，完全無停嘅意思，咁咪唯有買把摭囉，反正唔知點解我地次次都有買摭返香港，都唔爭在呢一次！不過咁大個明治館只係得一間鋪揾倒有摭賣，重係透明cheap cheap果種，把摭重係鬼死咁細，摭一個人已經好勉強，仲邊夠摭兩個人。行左一陣，兩個人兩邊身都已經濕晒，咁去到Bay Area美食俱樂部，反正都係食午飯時間，咁就索性揾地方填肚。

最後我地去左一間叫Soup Curry度食湯咖哩，都係北海道名物嚟架~~

食飽之後D雨未停不特止，仲大過食飯之前，心入面真係忍唔住媽媽聲.......#$%^&#@!!....咁樣都唔係辦法，咁我就同我家老爺商量，不如買多把摭，唔駛比D雨 "dub" 得咁應啦。點知喺呢個時候，唔知做乜鬼，我老爺就開始發顛，係都唔肯買，話咁細把摭，多一把都無用喎！無用？點會無用呀？！都唔知係乜野邏輯，一人一把摭，點計都好個兩個人用一把掛！！但係佢係都唔肯買，係都要同我拗，真係愈拗就愈火滾.....已經又凍又濕，仲要無喇喇響度揾野黎拗，真係佛都有火....咁唔知係咪火摭眼，去到金森倉庫群又行錯路，咁我D火就出晒黎，發晒爛渣寧願自己濕晒都唔肯同佢用一把摭囉 (真係太純良，係都應該搶返把摭自己擔！).....就係咁樣，去到金森倉庫群已經反晒面，咁咪各有各行囉。

本來滿懷希望一心諗住響金森度出血架，但係鬧晒大交，都無晒心情買野，行左一個圈，無乜收獲，遙望下條茂李，見佢響不遠處度扮晒睇野咁款，咁咪唔理佢繼續自己行囉。最後點收科？咁就梗係佢認衰啦，識佢咁多年，無論道理響邊便都好，有邊次唔係佢認衰仔先...

咁我地就繼續行埋其他倉庫啦，行行下咁啱又比我地見到有間專賣精品同雨傘嘅鋪，咁我就揀左把有荷葉邊啡色嘅長摭囉。去到夢藏人，老爺又睇中左唔知係幾多條骨嘅日式雨傘，佢話1050yen，咁抵無理由唔買喎。就係咁樣，短短一個下午，我地就買左三把摭，出面落狗屎都唔使驚啦....點知，出到外面已經停左雨！......世事就係咁樣架啦，唔係咁易比人估到.....世上不如意事十常八九 (歎氣)

外面停左雨啦~~

遙望函館山，個天落過雨後反而好清喎....希望打後唔好再落啦...

西波止場，入面有個海鮮市場賣米飯饟魷魚架~~

行行下就去到八幡坂啦，見到熊仔美術館！對於超愛熊仔嘅我，梗係拿拿聲走入去啦。點知入到去，竟然開始close，4點幾之嘛，D旅遊書又話6點先close？！無辦法啦，一場黎到，唯有順手去個toilet，同埋梗係響樓下果個仲未close 嘅teddy bear紀念品店購下物咁囉

個teddy bear紀念品店好多teddy bear呀~~~

離開熊仔美術館，我地就沿住八幡坂行上去。嘩~條斜路結晒冰！睇見都驚呀~~~好彩旁邊有樓梯

行到咁上吓，望返轉頭，個函館港好靚呀~~

八幡坂行到盡頭，我地就轉左向住山麓站個方向行過去，沿途見到好多富歐陸色彩嘅教堂。由山腳至山麓站成段路嘅風景其實都好靚，白雪鋪滿一地，好浪漫呀~~~

不過有D路結晒冰，行到我心驚膽跳....

呢個教堂好靚呀~~~~~~~~~~~~

終於去到車站搭纜車啦，好緊張呀，因為驚好似上次咁天氣唔好睇唔倒夜景....好彩今次無問題，咁就拿拿林買票囉~

上到山頂，由展望台望出去，個景都好清，好開心呀，終於睇倒成個函館市啦~

呢個係津輕海峽....竟然比我地揾倒渚亭呀~~~

個海好似有神光咁照落黎，好靚同埋好寧靜嘅感覺呀~~

響外面影晒view cam同埋相之後，玩左一陣，實在好凍，又未天黑，咁就走返入去室內shopping下先啦！個手信店勁多野啱買，我入左好多貨，好開心呀~~

買完野外面已經天黑，咁我地咪走返出去室外，老爺就梗係拿拿聲走去霸好位影view cam啦，咁我就周圍影下相囉。函館個夜景真係好正，日本人用 "100萬ドルの夜景" 黎形容真係一D都唔誇張，個扇形夜景真係燈色璀璨架！！

老爺影完view cam 就睇下我影D相，又話我影得唔好喎，又一手搶左部機去自己影~~唔係啩，我覺得都OK喎，睇佢影果D咪同我果D差唔多？！佢就沒好氣咁話你返去慢慢睇清楚就會睇到有咩分別啦.....我睇左好耐，左邊果張係我影，右邊果張就係佢老人家影嘅，好老實，我真係睇唔出佢果張同我果張有咩分別咯！

影晒相後兩個人都涷到僵晒，咁就入返去搭纜車落山，然後走返去金森果邊揾地方食晚飯。我地揀左 Hakodate Beer，因為旅遊書有介紹過話D啤酒係用100%嘅函館地下水黎釀造架，咁咪試下囉！

牛肉海鮮窩~~

函館式成吉思汗呀~~

食飽後8點都未夠，平時響香港都未食飯，但係金森D鋪已經close晒，條街水靜河飛，好久先會見到有一兩個人行過，又無咩街燈，個感覺都幾冷清，仲有D得人驚添，咁我地拿拿林就行返去十字街車站搭市電去JR站囉。

攞D返行李，順便響JR站果間便利店入左D小食，就行去今晚我地住嘅酒店，就係響JR站隔離果間Harbour View Hotel。我地住1208號房呀~

響房度攤抖左一陣，食埋響便利店買果D布甸，就同函館夜say good night啦...

-----> Day 4 大災難日!!!!

2008年2月北海道8日遊 - Day 3 (Part 1 - 靈異事件部)

2月23日  星期六

今日係第三日，係函館全日遊。未開始敘述今日嘅旅程，要先補述番尋晚可怕嘅經歷呀

話說尋晚瞓瞓下，突然間就醒左，點解會醒？係因為覺得比D野責住個身郁唔倒呀！好驚呀，明明見唔倒有野，但係就成個人都不能動彈.....望下隔離我家老爺瞓到成隻死豬咁，咁我咪大聲叫佢囉，點知又出唔倒聲，好得人驚呀，跟住我就係咁喺到無聲嗌同埋喊囉，咁喊左一陣就慢慢郁得返啦，本來想即刻叫醒老爺，但見佢瞓得鬼死咁lum，費事嚇親佢，咪唯有眼睜睜咁捱到天光囉。講真，從呢件事上睇黎，我覺得我真係一個好體貼好偉大嘅人呀，所以我家老爺應該撫心自問，檢討一下，以後對我再好D囉~~~

第二朝同老爺講返件事，佢都覺得好不可思議，不過佢話我多數係發惡夢喎。事但啦，咁我個人一向又唔係話真係好信果D野嘅，過左去就算啦....點知後來老爺執野時突然大叫，話知道點解我會撞野喇，原來我好衰唔衰，尋晚竟然將個bra擺左喺全間房最神聖嘅地方度呀！！！呢樣野真係好奇，係解釋唔倒架，我好記得尋晚我仲千叮萬囑咁同老爺講，所有日式房間都有一處最神聖嘅位置，千祈唔好放野喺果到，真係唔知點解自己會明知故犯...

不過再細心想件事真係有跡可尋架，大家先望下下面張相，就係我地間房喇，果兩張tatami 嘅擺法覺唔覺有D奇怪呢？係呀，尋晚當我睇住果兩位亞姐幫我地鋪時，個心都已經有D唔係咁舒服囉，床頭有乜理由向住個路口架？？咁果D野咪可以喺你個頭上面到行來行去！不過唔知點解自己又無話去拉返張野令到個枕頭貼向牆喎，所以都係神推鬼擁，最後咪咁邪囉....唔知係唔係呢個原因，不過都算係一個經驗啦，希望D野唔好再來攪我就好啦......

好啦，講返今日嘅行程，今日全日都係遊函館。一朝早起身，梗係浸下個私家溫泉先啦，今次記得影相啦~~

 

望出去係大海呀！

 

呢條小溪流係溫泉水黎架，就喺我地間酒店流出去大海囉~~

 

浸完就落去食早餐，個朝食勁多野食架，因為今日時間充裕，我地就對住個海景慢慢歎。食到飽飽上返房換衫後，見時間尚早，我地就決定去海邊行下。今日好天陰呀，海邊勁大風，海浪聲又好大，有一種好冷清嘅感覺。唔知係唔係太早，想揾個人見下都無，全個海灘只得我地兩個人咋，我地就好free咁喺到影下相，又走去淺水處度踩下水咁囉，總之就好寫意啦！

睇下，呢條溪澗就係今朝喺酒店房影落嚟果條溫泉水啦，真係喺酒店度流出架~~

強風下的造形照~~

玩左一陣，愈來愈大風，重開始落起雨呀，正當我地忘晒形咁影緊 view cam 之際，突然聽到岸上有人大叫，回頭見到原來有個類似酒店職員嘅人喺度呼喚我地呀，不過佢喺到嘰呢咕嚕，都唔知佢講乜，但見佢兩手指下個海，又雙手打交差，都估到佢叫我地唔好行出去海邊啩，咁我地咪唯有邊講sumimasen邊離開囉！

返回酒店，又再浸多次溫泉，然後就執野check out，離開渚亭開始下午嘅行程啦，總計今次響酒店都浸左不下六、七次溫泉，真係乜都抵返晒啦

渚亭，Bye-bye 啦！

-----> Day 3 (Part 2) 續遊函館~~