2月23日 星期六
今日係第三日，係函館全日遊。未開始敘述今日嘅旅程，要先補述番尋晚可怕嘅經歷呀
話說尋晚瞓瞓下，突然間就醒左，點解會醒？係因為覺得比D野責住個身郁唔倒呀！好驚呀，明明見唔倒有野，但係就成個人都不能動彈
第二朝同老爺講返件事，佢都覺得好不可思議，不過佢話我多數係發惡夢喎。事但啦，咁我個人一向又唔係話真係好信果D野嘅，過左去就算啦
不過再細心想件事真係有跡可尋架，大家先望下下面張相，就係我地間房喇，果兩張tatami 嘅擺法覺唔覺有D奇怪呢？係呀，尋晚當我睇住果兩位亞姐幫我地鋪時，個心都已經有D唔係咁舒服囉，床頭有乜理由向住個路口架？？咁果D野咪可以喺你個頭上面到行來行去！不過唔知點解自己又無話去拉返張野令到個枕頭貼向牆喎，所以都係神推鬼擁，最後咪咁邪囉
好啦，講返今日嘅行程，今日全日都係遊函館。一朝早起身，梗係浸下個私家溫泉先啦，今次記得影相啦~~
望出去係大海呀！
呢條小溪流係溫泉水黎架，就喺我地間酒店流出去大海囉~~
浸完就落去食早餐，個朝食勁多野食架，因為今日時間充裕，我地就對住個海景慢慢歎。食到飽飽上返房換衫後，見時間尚早，我地就決定去海邊行下。今日好天陰呀，海邊勁大風，海浪聲又好大，有一種好冷清嘅感覺。唔知係唔係太早，想揾個人見下都無，全個海灘只得我地兩個人咋，我地就好free咁喺到影下相，又走去淺水處度踩下水咁囉，總之就好寫意啦！
睇下，呢條溪澗就係今朝喺酒店房影落嚟果條溫泉水啦，真係喺酒店度流出架~~
強風下的造形照~~
玩左一陣，愈來愈大風，重開始落起雨呀，正當我地忘晒形咁影緊 view cam 之際，突然聽到岸上有人大叫，回頭見到原來有個類似酒店職員嘅人喺度呼喚我地呀，不過佢喺到嘰呢咕嚕，都唔知佢講乜，但見佢兩手指下個海，又雙手打交差，都估到佢叫我地唔好行出去海邊啩，咁我地咪唯有邊講sumimasen邊離開囉！
返回酒店，又再浸多次溫泉，然後就執野check out，離開渚亭開始下午嘅行程啦，總計今次響酒店都浸左不下六、七次溫泉，真係乜都抵返晒啦
渚亭，Bye-bye 啦！
沒有留言:
發佈留言