2011年2月北海道道東道北12日 - 十勝彩凜詩祭

2月24日 - DAY 6 (PART 8)
十勝川


響三余庵食完個好好味嘅夕食，拿拿聲上房換衫，因為book左shuttle bus去彩凜詩祭典會場.......

落到樓下，一出lift已經有個女職員拎住我地兩對鞋企定定響度等我地，原來去祭典會場嘅shuttle bus係唔停三余庵，需要行過去Daiichi Hotel 嗰邊上車.....個女職員帶我地由souvnier shop嗰邊嘅後門出去，之後經過一條長長嘅走廊同樓梯，去到盡頭佢就同我地講過左道門就係 Daiichi Hotel 嘅範圍，請我地響度換返對鞋，佢話今晚睇完祭典坐返shuttle bus返黎都係停 Daiichi Hotel，叫我地經返呢度返去三余庵，因為三余庵唔準d 客人著住對鞋通處走，到時我地響返呢度換返三余庵provide 嘅拖鞋由原路行返去旅館就ok~

換完鞋個女職員就帶我地行去 Daiichi Hotel 嘅lobby，同嗰度嘅負責人溝通過佢就請我地等一陣，之後會有人叫我地上車.....無無聊聊周圍望下，Daiichi Hotel 嘅lobby都幾大.....

等左陣就上車嘞，都有好多人同我地一齊上車.....車行左一陣好快就到會場，會場其實好近，就響溫泉區嘅十勝之丘公園嘅Hanakku廣場......一入到去就見到偌大嘅雪地上佈滿無數嘅三角錐形燈，近入口處有個臨時搭建嘅屢望台，我地當然即刻走上去......

個展望台其實唔算好高，但就可以一眼望晒成個會場......睇真d 嗰 d三角錐形燈原來好整齊咁一行行排晒響雪地上....

我地搵左個有利位置set好腳架，好快個祭典就開始，首先有旁白講左一大段野，不過係日文唔知 "up" 乜......

之後就響起悠揚嘅音樂，雪地上嘅三角錐形燈就會隨住音樂嘅節拍變化出唔同嘅顏色......

所有燈全部著晒唔同顏色，好靚呀!!

五顏六色都幾壯觀嫁!


有興趣可以睇下片......

離遠見到個大花鐘~

不過當晚天氣唔係太好，祭典開始無耐就落起雨，真係又凍又濕，好多人響展望台望左一陣就離開~

我地都堅持左十分鐘，塊面同對手已經凍到僵硬晒，實在頂唔順，影夠相同video後我地就離開展望台響會場周圍逛下......

呢個燈祭除左有主打七彩燈飾音樂會，仲有其他玩意，好似尋寶抽獎咁，小朋友應該會幾好玩......有埋中文version，強國而家真係無得頂~


呢條隧道幾靚......

d 樹葉係紙做~


老爺又響度影埋 d 效果相......

隧道另一邊有個溫室，好似係餐廳，仲有個足湯，不過好多人，我地只係響門外望左眼都無入去~

之後我地行返去會場中心近距離欣賞下d 燈飾.....

d 三角燈有大有細，燈光嘅顏色仲成日轉換......


有d足有成個人咁高嫁!

 

中心點有個好高嘅三角錐，差不多5、6米高，唔知有咩寓意

行行下又見到有個雪滑梯呀，我地當然走上去玩返夠本啦!!

呢個雪滑梯係要坐橡皮圈嫁....滑落黎嗰下真係好過癮，好好玩呀!!

 

玩左唔知幾多次，終於又係玩到d人走得七七八八先知撤退......行返去休憩所，諗住飲返杯免費熱牛奶點知又close左，唉，餐餐都係咁!!

旁邊有個手湯，都好，浸下隻手暖返下先!!


呢個七彩燈祭規模唔算大，內容當然唔及札幌雪祭咁豐富，亦無小樽嘅雪燈路咁浪漫，不過會場內不斷播放住音樂，d 燈色又不斷變化，都幾有氣氛，如果去開十勝溫泉區不妨花d時間去參與下~


之後我地就行返去shuttle bus集合點搭車走人......返到去Daiichi Hotel 當然要去souvnier shop巡個圈入返d貨啦~~

哈哈，呢間酒店嘅紀念品啱我多d呀!! 成功入左d戰利品後，就由原路行返去三余庵......

Daiichi 住客請注意，遊人行到呢度就要止步嘞......三余庵入口有寫明三余庵以外嘅人係唔可以內進嫁，哈哈!! 高檔次就即係高檔次......驚大家睇唔明，有齊晒日英中語言，不過個中文翻譯好似錯左喎

換返三余庵嘅拖鞋先~

連接Daiichi Hotel同三余庵嘅通道都幾長，不過都有d暖氣~

返到去三余庵，當然首先係去浸浸個私家美人湯，拿拿聲衝去灌水先.......

個檜木溫泉雖然係細左d，但都要搏晒命浸多幾次嫁，咁貴唔好蝕嘛.......浸完溫泉當然係食野時間，頭先食完晚餐職員俾左呢個籃我地話係夜宵......

係腐皮卷，雖然凍左但老爺話都幾好食......

腐皮卷就唔啱我，我都係食返之前買嘅fruit jelly 好d~


食飽睇下電視，然後又再浸多次美人湯，成身滑嫩嫩，好舒服呀，之後就去教教豬啦......嘻嘻，第六日旅程終於又搞掂!!

(...待續)