2013年9月北海道道東 - 又去完返來啦~

話咁快八日嘅北海道 trip 又玩完返嚟啦!  今次雖然係我地第六次去北海道，而且大部份嘅地方都係我地兩年幾前去過嘅地方，但當時係冬天，今次係初秋，感覺完全唔同.....我只可以講北海道真係一處永遠唔會令人生厭 n 樂而忘返嘅地方，我真係好 like Hokkaido 呀!!

呢個 trip 其實決定左好耐，舊年10月去完四國返嚟，諗住有d mileages 快到期於是求其去check 下，點知見到九月尾十月頭北海道竟然有位，北海道喎，一向好難換嫁，當然拿拿林即刻 book la，之後當然又繼續 hea，四月去完德國返嚟老爺已經不止一次叫我趁有時間就好開始plan，but 我想講我呢d 係死性，唔好輕易去改囉，所以當然又係拖到臨出發前一個月先去搞啦......今次比較特別，咁啱又有一位比較熟嘅 blog 友又係呢個時候去北海道，呢位姐姐晨咁早我都未去德國就已經開始 plan 路線 book 定晒酒店，搞到我好似好 lazy 咁，不過後來做 planning 時我地成日互通消息，真係好多謝佢呢段期間成日過料俾我呢個懶人呀 (不過佢去日本成日都好黑仔，大家都話佢今次過晒d 黑氣俾我)

第六次去北海道，仲有咩地方係好想去呢? 北海道咁大，要講話未去過嘅景點其實仲有好多，不過我地未試過秋天呢個時份去，所以好自然就會想搵d 有紅葉睇嘅地方啦，根據往年紅葉開展情況，我地揀選左層雲峽，同埋道東一帶，因為我好想再去知床呀......不過同上次青森一樣，我地始終同d 花花草草無乜緣份，見紅嘅地方好少，仲要層雲峽兩日落狗屎，好無癮，不過因為呢個 trip 其實一開始都係諗住用左d 免費機票同埋咁啱北海道又有機位，其實個原意都好求其，無得賞楓係有小小失望，睇開d 就當去 relax 幾日咁啦 (of course at the end 幾乎日日都係趕頭趕命一d 都唔relax, haha~)

本來最有機會賞楓熱點層雲峽最後都係令人失望，往年九月尾開得好盛喎，但今年又推遲左.....到底我地仲要去多幾次日本先可以見到一天一地滿山頭嘅紅呢?? 唉~

沿途只要一見到紅葉我地都唔會放過~

呢度係紅葉谷!! 叫綠葉谷好似似樣d......

Okay, 唔講咁多廢話，趁記憶猶新，即刻 highlight 呢八日嘅行程重點先......首先要講下我地嘅裝備，去日本唔同歐洲，其實就無咩需要預備，不過最初諗住會影好多靚靚紅葉，所以老爺終於肯去買部靚機，需然佢部 dream cam 仲未出，但今次佢都好捨得買左呢部~

至於我呢個 low b，早幾年嘈住話要學影相，老爺已經買左部 Panasonic 女友一號俾我，不過我實在無心機去學，又嫌部野重，所以趁早排我地N年周年紀念佢又送左呢部輕巧 Leica 俾我，呢部野好正呀，啱晒我呢d low b 懶人，thx so much, hehe~~~

今次個旅遊大使當然又係最心愛嘅紫bear & mini forever bear la......仲有of course 要出動早幾個月前響德國買嘅 Rimowa 啦.......

紫 bear︰ pig pig 你真係好鬼cheap! 竟然要搵個透明膠套笠住個 gipson (no eye see!!)

Haha, 講返個行程，今個 trip 最難忘嘅一日係 day 2 響層雲峽嘅黑岳....只怪自己去之前無做清楚資料搜集，連最基本嘅行山鞋都無帶.....以為行山唔係好難啫，平時間唔中 weekend 我地都有行嫁....BUT!! 你以為係繞太平山頂行一圈 or 城門水塘嘅行山徑好易行? 又或者挑戰過山形縣嘅山寺同埋金刀比羅宮嗰千幾級石級就已經好厲害? No way!!! 登黑岳絕對係我呢一生最痛苦嘅行山經歷......平時唔願做運動行多幾級樓梯都會喘氣嘅我預左上山會好辛苦，但我真係無諗過係要不斷行呢d 石路囉....d 石有d 好巨，好多時唔係行，係要攀爬....

由七合目我用左兩個鐘上到山頂 (注意︰係山頂，not 九合目! 原來由九合目再上山頂仲有好長一段路!!!)，真係好Q辛苦，但上山，都只係好攰嗰種辛苦，行一陣抖一陣都勉強頂得住....正所謂上山容易落山難，我今次真係真正感受到，因為要趕 chair lift close 之前返落山，我完全係一卜一碌咁冒住大雨響d 岩石群中滾落山，中間無停過......我 PK過一次又撻過一次同埋好羞家喊左兩次，成身由頭dirty到腳，一身泥濘，又濕又攰，落到山真係成個乞兒咁!

請睇我地上山時嘅腳，我對鞋都算幾乾淨......

Downhill, look at my shoes!! 陰功，我好鍾意著呢對 Rockport 嫁

幾經辛苦終於上到山頂，講真，我真係唔知咁辛苦為乜，沿路由七合目到九合目再到山頂一d 紅葉都無....咁山頂又有乜風景呢? 答案係 NONE!! 或者係因為大霧大雨所以完全無野睇，平時好天唔係咁? 我只能夠咁樣安慰自己.......

由山頂望返落去係白茫茫一片~

山頂上係亂石一片，好荒蕪，又大霧，有間好 mini 嘅屋仔，屋前仲有個好簡陋嘅鳥居(?)，唔知 for what??? 最詭異係有隻狐狸響度飲 Sapporo beer!!

唔係講笑，我 cut 細張相 focus 俾大家睇!

不過第一次見狐狸都開心啦，雖然呢個登黑岳嘅經歷好淒慘，不過呢一日又已經成為我地旅遊歷程中其中一個最難忘嘅經歷，返嚟每次講起都仲係停唔到嘴，我諗我地永遠都唔會忘記~

層雲峽除左登黑岳係 must to go，仲有就係入選日本之滝百選嘅銀河+流星瀑布......

由銀河去流星係沿住一條溪流，環境都幾靚.....好似去左澳入瀨咁呀~

另一個入選百大嘅瀑布，知床八景其中一景 Oshinkoshin Falls (雙美之滝).....

今次雖然又尋紅失敗，不過我地就欣賞到另一種紅，就係每一年特定季節特定地區先有嘅珊瑚草......

真係紅得好轟烈呀!! 

原來d 珊瑚草好mini 嫁，好似我手掌咁上下size 咋!

 

不過上面呢片靚靚珊瑚草唔係響最著名嘅能取湖，而係響北見常呂榮浦嘅原生花園見到，有d 驚喜囉，反而能取湖真係把鬼，我地去到已經枯死晒~

好彩響附近嘅能取岬無令到我地失望，老爺好鐘意呢度，原本諗住停十五分鐘點知佢磨左成個鐘先肯走~

非誠勿擾入面舒淇飾演嘅笑笑就係響度跳海啦!

呢一日響能取同網走一帶係成個 trip 最好天嘅一日，好開心響朝日ヶ丘公園有開得好燦爛嘅向日葵花海 welcome 我地

一雙一對sweet sweet 採花蜜~

D 向日葵大過 mini bear 個頭呀!!

今個 trip 另一個重點就係去知床五湖，雖然當日天色唔好，但現場睇真係好靚!!

知床五湖真係好值得去，如果大家有心去千祈唔好只係去一湖，一定要行埋地上遊步道先可以近距離欣賞五個湖，不過我地呢段時間係植生保護期，d 棕熊仲有機會隨時出沒，入森林之前要上一個 lecture，當中會教你如果中途遇見棕熊要點樣應對，又放條片俾大家睇 d 棕熊點襲擊人，嚇到我死死下，初段一路行都好驚，老爺仲要成日整鬼嚇我.....不過唔知好彩定唔好彩我地始終都見唔到囉~~

呢個 trip 除左知床五湖，我地仲去左好多個湖......好靚嘅網走湖.......

位於北見榮浦嘅 Lake Saroma，睇日落一流!




呢張係我嘅傑作，我覺得好能夠捕捉到老爺孤獨老人feel 呀，哈哈~~


影日落當然唔少得知床嘅夕陽台，不過今次幾個日落 shot 都好多雲，但趕得切睇得見都好感恩啦~

仲有阿寒湖欣賞雄阿寒岳......

雌阿寒岳~

距離阿寒湖二十分鐘車程嘅 Lake Onneto，又叫五色沼，但比較失望，都無五色嘅

今次響知床一帶見到好多鹿呀! 首先係知床五湖.....

同埋由知床自然中心行去 Furepe Waterfall 途中見過兩次，仲可以慢慢影相.....D 鹿仔都好似唔怕人咁，之後響知床峠、阿寒湖附近一帶山邊馬路都見過好幾次，好開心呀~

仲有狐狸，除左黑岳頂嗰隻詭異的狐外，仲有響阿寒雙湖台個carpark 又見到一隻......

真係好鬼cute!! 佢會跟住我地d 車跑，又攤響地下擺好多唔同造型俾人任影，我好想走埋去摸下佢d 毛毛呀，真係影到唔捨得走!!

最後要講到住宿啦，因為今次機票係 free，酒店又可以揀得鬆手d, hehe.....今次去八日，除左頭尾兩晚 stay 札幌，其餘住左四晚溫泉酒店同一晚cottage，大致上都 OK，其中揀左兩間鶴雅，一間係想住左好耐，非常聞名嘅阿寒湖鶴雅，之前聽人講話近幾年d 水準都低左，或者我地有心理準備所以感覺都唔錯 (當然如果要比較我都係最最 like 爆鄙之座啦!!).....不過個美味百選 buffet 就一般啦，係就係超多款野食，不過 d 食材就比較普通，無咩矜貴野食囉~

But 好 like 佢地嘅 welcome tea set，個和菓子成粒綠藻球咁，so cute~~

層雲峽上次住朝陽 Resort，今次揀左大雪，個和房雪花部屋同晚餐料理都好正，不過嗰晚響黑岳返嚟實在太攰原來我無乜點幫間房影相，殘念!

(Photo extracted from Jalan web site)

最happy 係有張按摩椅，雖然功能唔多，但對於當時已經筋疲力盡就快虛脫嘅我地，簡直係登黑岳人士嘅至大恩物~~

再朝早浸浸個私家溫泉，乜 energy 都返晒嚟啦~~

今個 trip 我最鍾意嘅酒店客房係 Lake Saroma 嘅鶴雅 Royal Suite，今次最昂貴嘅一晚住宿.....如果我地屋企間房係咁樣就真係 lum 死啦!!

 

Living room 仲可以睇晒成個 Lake Saroma，好正!

第二朝晨早影出去個 lake，好靚呀!!

間房我就好滿意啦，不過整體嘅 service 就一般啦，唔係差，不過就少左傳統溫泉旅館嗰種好 warm 好貼心嘅感覺囉.....但講到失望，一定係知床Grand Hotel，上一次冬天住過覺得都好OK，今次揀左露天風呂客室.....嘩! 呢個私人溫泉池真係好唔掂，絕對係我地住過咁多間私人風呂客室中最差嫁，連我地唔敢浸嘅十勝川觀月苑、同細細個池嘅松島絕景之館都好過呢間好多呀!!

成個溫泉 facility 都好殘舊，所有野都俾d 溫泉水侵蝕到白化晒，個賣相真係唔掂.....well, 唔該係時候要做下翻新工程啦，最難頂係我竟然響個溫泉池旁邊見到有條唔知咩人用過嘅 hair rubber band! 好嘔心呀!! 酒店管房無做清潔工作咩?? 非常之不可原諒呀!!

OK，終於 highlight 晒今個 trip 嘅重點，到左呢個時候，又係最最最興奮嘅 moment, hee, 當然係 show time 時間啦，究竟我呢個 shopaholic 今次又敗左幾多無謂野返嚟? 行李又有無超重罰錢呢，hehe，詳情請留意下一篇戰利品篇~~

(...待續)