2012年10月大阪四國好求其七日 - 淡路島夢舞台

Day 1 (香港 > 大阪 > 淡路島 > 嗚門)

我知好怪，本來剛去完北海道返來正常人都應該即刻寫返個遊記，不過之前先剛剛完成2010年嘅北海道遊記，足足寫左北海道兩年半，又唔係好想咁快寫返呢個地方....大阪四國係舊年十月去，到而家超過一年，其實想寫左好耐，咁啱電視上個星期又做呢個地方嘅旅遊特輯，撩起條筋，趁仲有少少記憶一於湊下熱鬧寫埋佢~

又係搭凌晨機.....

差不多四個鐘頭嘅航程，基本上瞓完就食，食完又再瞓....我呢劇肥野而家已經進展到坐響度一樣可以隨時瞓得著

0620抵達大阪關西機場.....又去日本，兩隻bears好開心

朝早唔係好多人入境，好快就搞掂手續，當然又去washroom執下個貓樣先~

之後就搭南海電鐵去難波~

去到都未夠八點~

Car rental 就響南海難波站南口附近，都唔算太難搵~

今次都係租返Prius~

搞掂手續就即刻向第一站淡路島出發.......

最初唔係好熟個GPS，花多左小小時間適應之後先上到阪神高速公路~

雖然係行IC，但近寶塚池田一段都好塞車.....車行左大約45分鐘，係時候搵個SA舒展一下......

呢個SA都幾大，有cafe，可以坐響外面飲杯野，不過我鍾意入去室內貢多d......

因為入面有野shop嘛

好鍾意日本d垃圾箱分得好仔細，而且d人係seriously地分類，唔同香港大部份都只係做樣~

買左兩件cake做早餐....

再行多一陣就去到超似青馬大橋嘅明石海峽大橋啦.....d烏雲厚到呢，真係山雨欲來嘅感覺

今日第一個景點，就係響明石海峽大橋下面嘅道之駅あわじ・松帆アンカレイジパーク.....

呢度除左係一個休息站，仲係一個旅遊景點，因為可以近距離欣賞明石海峽大橋.....

呢條橋全長3911公尺，據講係全世界最長嘅吊橋，連結神戶明石同淡路島~

大橋嘅固定水泥樁，真係好巨~

橋樁周圍係一個公園，環境唔錯，再加上面向明石海峽，陣陣海風吹過，好舒服~

欣賞完大橋當然要去室內逛逛......

空枱多過人....唔知點解我發覺近幾次去日本好多時d食店或者shops都無乜人氣咁，或者係因為我去嘅時間唔係旅遊旺季?

無乜精品，都係土產野多.....雖然無乜進帳，但齋逛都開心~

離開道之駅あわじ，大約十多分鐘車程就去到第二個景點淡路夢舞台.....所謂夢舞台其實係著名建築師安藤忠雄一手打造嘅一個綜合性發展項目，有酒店、convention centre、植物館、戶外劇場等等，範圍好大，時間關係，我地當然又係只去左其中幾個地方逛逛~

泊好車一出電梯就見到呢個好型仔嘅設計

由頂層望返落去~

蓮花!

呢個咁型格嘅設計其實係一個展望台，題為円形フォーラム・楕円フォーラム.....俾個全景大家睇睇先，左下角係圓形廣場，對上遠dd嗰個就係橢圓形廣場，而連接兩個廣場嘅就係山回廊．海回廊~

Photo from Official Web Site

我地一出電梯嘅所在就係円形廣場....主調仍然係安藤忠雄一貫嘅清水混凝土美學~

連個電梯設計都好型~

處處可見弧形同直線切割出嘅空間感......

「找不到門，卻處處是入口」

「順著牆走，就會找到坡或階，入口隨即顯現」

身處其中，你就會發現響安藤忠雄嘅設計下，每一扇窗、每一個轉角都係一幅幅唔同嘅風景~

下面有個好大嘅水池，水池底係用貝殼鋪設而成，有個好好聽嘅名稱，叫貝之濱.....

其實成個夢舞台大部份水池嘅池底都係鋪滿左大小均一嘅帆立貝貝殼.....

真係每一片都差不多size呢!

呢d貝殼全部都係安藤忠雄向日本全國民眾募集得返嚟，總共有100萬個!

咁優美嘅環境，身在其中真係好寫意....不過個天好烏雲密佈呢，d雲好厚，都係快手快腳趕下場~

水池盡頭就係橢圓形廣場......

不過我地個視線好快被對面呢個沿山而建嘅設計吸引，流水淙淙而下，瀑布牆之上就係夢舞台當中最著名嘅百段苑.....

Mini F bear勁仰慕安藤先生，已經嘈住要即刻走過去

不單只係純視覺上超型格嘅規劃，安藤忠雄將建築融入大自然，為淡路島注入生命，令寸草不生嘅荒島得以重生，夢舞台嘅背景故事更令人感動.....

上世紀八十年代日本因為建造關西機場，響附近嘅淡路島挖走左大量土石嚟填海，島上山丘幾乎被夷為平地，原本以花卉輸出聞名嘅淡路島再見唔到一花一草，自然生態遭受嚴重破壞，更不幸嘅係之後關西又發生7.2級大地震，震央就響淡路島，當時島上居民傷亡慘重....淡路島可謂真正經歷天災同人禍，而負責重建工程嘅安滕忠雄就決定為呢個島打造一個夢舞台，其中一個項目就係響斷層線上建築左100個紀念花壇嘅百段苑.....

花壇以三組大正方形構成，每組都各自有36個四方形小花圃，中間係一道流水梯級，源源不絕嘅水流從山上而下，經過十公尺高嘅瀑布牆再一直流向山下嘅具之濱~

夢舞台嘅一草一木，以至整個企劃嘅設計，水係不可或缺嘅元素，但淡路島缺水，安藤忠雄為左減輕島上居民用水嘅負擔，於是就響山坡內植入一個地下水瓶，用以收集雨水，循環再用....

水流過之處形成好別緻嘅構圖.....

但更重要嘅係，生生不息嘅水流，象徵淡路島嘅重生~

階梯旁邊嘅花壇沿斜坡排列而上，要走到最高處真係小d腳骨力都唔得

其實有電梯可以直上高處，下面呢座纏滿左蔓藤嘅建築物就係連接去百段苑嘅電梯，但係我地都揀選左用腳慢慢行上去.....大師嘅設計向來注重人同自然之間嘅互動，好似梯田一樣嘅花園，遊人一邊拾級而上一邊於花草之間遊走，我地呢d俗人都要趁機感受下大自然嘅氣息.....

工整嘅花圃，一級一級依山而建，走在其中相當有趣.....

據講每一組都種植左來自世界各地嘅花朵，如果係花季相信一定好靚~

走到最高處可以眺望成個大阪灣.....

中間圓圓嘅地方就係剛才嘅円形廣場~

一點一滴，響安藤忠雄同佢嘅團隊嘅努力下，曾經受傷嘅土地而家一片綠意，300萬棵樹苗已經欣欣向榮~

橋嘅盡頭就係電梯.....

由橋嘅盡頭位置可以見到一幅幅花圃排列得相當有趣~

響百段苑消磨左一陣，我地就沿山路逛逛.....

d象仔造型好得意~

走得累可以響度抖抖~

呢度都有名堂，叫プロムナードガーデン，其實只係一個花園.....

有間好可愛嘅小屋~

 

響山上hea左一陣，之後打算去花木林苑逛逛....

不過十月唔係花期無野睇，沿路只係有小小百合~

之後就兜返去海回廊．山回廊.....其實我唔係好知點樣分兩條回廊，呢一條近山大概係山回廊?

到處都係大小相若嘅小貝殼，一片一片排列得好整齊，一定花左唔少人嘅心思.....

呢100萬個向日本民眾搜集得來嘅貝殼，可以話係串聯住日本人嘅心!

呢座building係奇蹟之星之植物館，係日本最大嘅室內植物園，好可惜時間關係我地實在無辦法去埋參觀~

不過外面d植物造型都好cute~

2000年初，夢舞台完工，以盛大嘅花卉博覽會開幕，呢個博覽會以「人與自然的對話」為主題，為期半年，30個國家參展，接近700萬人次入場參觀....重建後嘅淡路島已經再無當年受破壞嘅痕跡，響安藤忠雄嘅努力下，夢想實現，受傷嘅島得以重生~

走走下又返到去橢圓形展望台......

不經修飾嘅清水混凝土，配合簡約嘅幾何造型.....

安藤忠雄嘅建築基本上就係一件藝術品~

無啦啦響牆上有枝尖尖嘅野隊左出嚟.....

原來係一個時鐘，如果天氣好隨住日照嘅移動就可以知道時間，不過老爺講解完我都係唔太明囉

個構圖真係好鬼型

遠處嗰座就係Westin Hotel，如果有時間真係想入去住一晚，睇下以清水混凝土為主調嘅酒店，內裡嘅裝潢又係點樣營造配合~

事實上如果只係響有限時間想要仔細逛晒整個夢舞台係無可能嘅事，由於要趕住去睇鳴門漩渦，今次我地又係走馬看花到此一遊，除左Westin Hotel、奇蹟之星之植物館，仲有著名嘅海之教堂，今次都唔夠時間去參觀，唯有又等下一次啦~

臨離開前當然又要去souvnier shop巡個圈先啦，幾趕都要掃一掃場嫁

再見啦夢舞台，希望將來有機會可以再嚟，下一次，一定要留多d時間遊走每一個角落、細細品味大師精心設計嘅每一個元素

離開淡路島，起程去下一個景點，鳴門漩渦，we are coming~~

(...待續)