2014年新春九州好hea 6日 - 觀光篇

之前完成晒三晚溫泉旅館，要補寫返小小頭尾兩晚響福岡嘅住宿，上次去福岡我地住 Canal City 同天神，今次無自駕所以就住近博多駅，酒店係 package 包埋，我地揀左車站旁邊嘅 Hakata Miyako Hotel......真係好方便，筑紫口一出過一條馬路兩分鐘唔駛就到~

最 basic 嘅 twin room，細就當然係細，但設備一般齊全，free wifi access，receptionist 識講普通話，service 唔錯，唯一缺點係無冷氣，雖然我地係冬天去，但間房實在太熱，就算熄左個暖氣都出汗.....不過整體上都好ok 啦，下次如果住博多駅都會揀返呢間~

酒店地下有兩間食店，我地第一晚都去左其中一間居酒屋食 dinner~

Record 晒 d 酒店，係時候要講下 d 景點.....雖然今個 trip 主要係泡湯，日日都好 hea 無乜去景點，但都有小小觀光嘅.....由於唔係自駕，我地嘅移動方法就係靠 JR、巴士同埋的士，出發前先響 JAL 買 5-day JR pass，因為識人好似有 d 折扣~

第一站係去湯布院，當然係搭「由布院之森」特急列車.....

我地坐最後兩行，後面係駕駛 show room，可以盡情影相

又去日本，三隻 bears 都好 high

同一般特色列車一樣，有日期紙板影相，有 souvenir shop 俾大家 shop 下平，仲有紀念品.....

同埋蓋紀念印章.~

兩個多鐘車程影下相玩下食下野好快就到~

由布院車站入面有兩個足湯，坐完長途車可以 relax 下~

大堂環境優美~

遠山就係由布岳~

車站觀光案內所同對面 souvenir shop 有大量 locker，就算 full 晒附近都另有寄存服務，好方便~

嚟湯布院除左泡湯，其實都無咩好做，最好就係逛街.....

Shopping 係主打項目......

當然仲有試食

有溫泉蛋賣，完全係自助形式.....咩叫文明，實在唔需要再多解釋~

好可愛嘅煤屎鬼

成日都見到呢 d 好大朵花花，好靚!

好快就行到去 B-Speak......

我同老爺上次嚟比較晏已經賣晒，今次終於可以試下......

係幾鬆軟，不過又未至於不可不食囉

食完繼續逛湯之平......好鍾意逛呢 d 溫泉商店街，一間一間精品店，逛得累又可以搵間 cafe 坐低飲杯野休息下.......

中途響呢間「立花」解決我地嘅午餐~

食完又繼續逛.....

今次我地無行到去金麟湖，反正我同老爺上次已經去過，逛左咁耐老媽子已經好攰，所以就離開去酒店......好悠閒嘅一個下午~

離開湯布院，下一站係去阿蘇火山.......由湯布院去阿蘇火山如果搭 JR 需要先去大分再轉車去阿蘇，然後再搭巴士......除左轉折，JR d 班次好疏，轉幾程車去到阿蘇車站都已經差不多兩點，如果再等巴士上阿蘇山西站登山就只剩好少時間玩，所以我地棄 JR 改搭呢個あそゆふ高原バス，由湯布院只需要一程車就直接去到阿蘇山西站，中途會有休息時間，去到阿蘇山西站會俾時間大家上火山，之後再車返去阿蘇站，票價好似係 2000円，雖然我地買左 5 day JR pass 但為左慳時間同唔駛老媽子轉咁多次車都無所謂啦~

上車地點就響由布院駅前，好易搵~

朝早 10:40 出發，既然係觀光巴士，車上有導遊小姐介紹沿途風光，不過當然係講日文~

車行左大約四十分鐘去到一個叫朝日台嘅地方，大家有十五分鐘休息時間可以落車去放下水或者 shop 下平~

呢個休憩處嘅 toilet 超優雅~~

休息一陣又繼續上路......

導遊小姐沿途一直有介紹景點，幾乎無點停過嘴.....知道我地唔曉日文佢好體貼畫左張圖俾我地睇邊個山打邊個山~

上緊山時見到車路旁邊有雪~

去到咁上下導遊小姐就宣佈阿蘇火山因為火口噴火警戒提高左，火口嘅展望台已經關閉，上去嘅阿蘇山索道亦停止運行......唉，真令人失望，山長水遠走嚟竟然無得上，好難再等下一次噃

之後旅遊巴去到阿蘇車駅會停留40分鐘俾大家自由時間~

車站周圍環境唔錯~

如果搭 JR 嚟阿蘇駅前有巴士可以搭去阿蘇山西站.......

不過而家一樣係運休中!

無咩好做，呢個時間當然最好係去食午餐，我地就揀左車駅入面呢間坊中亭 (其實都無得揀，只係得呢間)

食飽已經夠鐘上車......藍藍的天，一路天氣都好好呢......由阿蘇駅去阿蘇山西站中途會經過草千里濱，導遊小姐話我地可以揀響阿蘇山西站或者草千里濱停留，只可以二揀一唔能夠兩個地方都去晒.......

雖然上火口嘅索道關閉左，但一場嚟到我地都係決定停阿蘇山西站，草千里濱係一個大草原，可以騎馬同逛旁邊嘅火山博物館，不過呢兩野媽咪都無興趣所以就唔打算去~

差不多兩點就去到阿蘇山西站~

響呢度會停個半鐘.......本來如果纜車無關閉上去睇火山嘅時間係好 perfect 呢

走去纜車站望下~

乘纜車入口.....

貼晒告示索道運休中~

要 stay 個半鐘，當然係慢慢 shopping 時間

食下火山灰雪糕

Shopping 完就出去周圍影下相......

纜車站後面有個神社~

山頂上就係中岳火口.......

Zoom 埋嚟睇下個車站同展望台先~

有個 police station......24小時當值??

呢 d 係 toilet，既乾淨又有型

除左纜車站，附近仲有食店同 souvenir shop~

個半鐘好快就過去，之後就返去阿蘇站~

Mini 火山口，好 Q ar!!

總括嚟講，呢個觀光巴士都唔錯，除左省卻轉 JR 轉巴士又要就班次嘅麻煩，又唔駛將 d 行李搬上搬落，沿路又有景點介紹.....呢架觀光巴士係一條循環線，由別府駅開出，終點去到阿蘇山西站，之後再返去別府駅，中間會停由布院駅、黑川溫泉同阿蘇駅，按選擇上落地點收費，同車有遊客去黑川溫泉，車長直接將佢地送到去溫泉酒店門口，真係好方便~

離開阿蘇，我地下一個景點係鹿兒島指宿.......

阿蘇車站內發現有間貓屋仔俾人影相......

好 cute 呀~

由阿蘇去鹿兒島要搭豐肥本線去熊本.......

原來熊本駅係一個大站~

之後再轉九州新幹線去鹿兒島中央~

響鹿兒島中央駅要停兩個鐘先再搭指宿枕崎線去指宿......

呢個站好大，兩個鐘時間可以 shopping......

同埋食午餐~

當然揀食鹿兒島名物黑豚啦~

去指宿當然係想搭佢個「特急たまて箱」，不過一日三班車都已經 full 左，第二日由指宿返鹿兒島中央都一樣 full 晒

只好搭普通列車，比特急多二十分鐘車程~

普通列車就好似富良野嗰 d 細細列車......

車廂入面有風扇！

仲係可以自由開關.....鄉下婆，我真係第一次見

愈接近指宿嘅風景愈來愈靚~

由鹿兒島中央去指宿搭普通列車要 75分鐘~

車站外面就有的士站~

指宿係溫泉勝地，車駅外已經有免費足湯俾人 relax

咩意思?? 因為呢度係最南所以最北嘅稚內駅送個碑嚟做紀念??

呢架紙製「特急たまて箱」好搞笑，十足燒俾先人嗰 d 祭品咁

指宿最出名嘅係砂蒸溫泉，雖然上次去別府時已經玩過，但一場嚟到當然都要去玩下.....響我地酒店吟松附近有一間砂樂會館，算係市內人氣最勁嘅砂浴場，由酒店行過去十分鐘唔駛，超方便~

呢個砂浴場個規模比我地上次響別府玩嗰間別府海濱砂湯大好多......要先買票，只係玩砂浴收費 900円，如果浸埋溫泉要加 600円.....玩砂浴要帶一條毛巾，如果無帶可以同會館買，110円一條~

仲有小册子送~

買票後就去更衣室換會館 provide 嘅浴衣，浴衣入面唔好著衫同內衣，因為玩完砂浴之後會濕身~

換左浴衣就落去砂場啦，好多人排隊，不過輪侯時間都好快......呢度嘅工作人員好 nice，會幫我地將條毛巾包好耳仔先叫我地瞓低，然後好熟練就將d 黑砂埋響我地身上，感覺上呢度 d 砂無上次響別府嗰 d 咁熱，同別府一樣工作人員會幫大家影相，然後好細心搵個膠袋幫我地套住部電話放響一邊.......雖然 d 黑砂唔算十分熱，不過耐左都出晒汗，本來話係埋大約十分鐘，不過埋左差不多二十分鐘 d 職員都無叫我地起身，有賺呀!!

玩夠就去沖身，shower room 有兩格係兼有按摩設備，好正，我同細妹沖左好耐......之後就響會館周圍逛下.....

 

好多野買~

離開指宿返去鹿兒島我地仲有大半日時間，當初做 planning 時考慮左兩個方案，一個係市內遊，另一個當然係 shopping......我同細妹雖然極度鍾意 shopping，但話到底都係有小小深度同智慧嘅人，shopping 幾時都可以，難得走到嚟鹿兒島點都應該要逛下呢度嘅景點，而且 shop 幾粒鐘想悶死老媽子咩......不過由於我地唔係自駕，而鹿兒島 d 景點又唔算好集中，時間又唔多，所以我地就 join 左個半天 local tour，最主要係想去櫻島睇火山......響鹿兒島中央車駅 information counter 可以搵到好多呢 d tour，仲可以幫遊客做 reservation~ 

上車地點就響 JR 車站外邊東口8番乘場，不過鹿兒島中央係一個大站，要行去呢個巴士站都要一d 時間......

幫我地做 reservation 嘅姐姐仲俾定張 location map 我地方便搵上車地點~

Local tour 之前先響巴士站附近醫左肚先~

好快填飽肚就趕去上車......架旅遊巴同導遊小姐已經到左~

我地 join 個 tour 叫「鹿児島市内・桜島早回りコース」，料金每人2700円，包仙巌園入園費用同埋來往櫻島嘅渡輪費~

上車無耐有小小插曲......我地上車前同導遊小姐核對左資料，座位係劃位制，已經幫我地 mark 左車上嘅座位，上到車發覺我地 d 位俾幾個大嬸坐左，見到我地響度對 d 位佢地一 d 意思都無諗住俾返個位我地，咁我地見成架車又唔 full 都仲有大把位咁就算啦所以就坐左響佢地前面嗰一排位，諗住如果之後真係有人要坐先同導遊小姐講啦，後來發覺原來佢地坐緊嗰幾個位係闊落 d，估計佢地係貪呢樣野所以就霸左我地 d 位.....well, 都唔好成日鬧強國人出外旅遊 d 素質乞人憎，日本人都唔係個個有禮貌個個係好人

之後臨開車之際坐響前排一位阿叔本來同導遊小姐講緊野忽然嘔左一大堆核突野出嚟，有 d 仲彈左落導遊小姐身上，好驚嚇......導遊小姐好可憐，都唔顧得身上 d 嘔吐物就要即刻同司機叔叔一齊清理架車，就咁樣就阻遲左十幾分鐘，到清理得七七八八忽然有兩個乘客話要落車唔 join 個 tour，好似話係驚架車有菌.....係咪咁誇張見仁見智，或者日本人 d standard 係高 d，我地後面嗰幾位大嬸已經好快手帶晒口罩好似慌死有生化武器咁.......你問我介唔介意我當然唔係咁樂意架車有人嘔過但又未至於要閃人囉，我嗰位可愛嘅細妹都無諗呢樣野只係不斷響度擔心嘔吐嗰位大叔驚佢有咩事 (唔通做左天主教徒個人真係善良咁多??)......好啦，係咁意清潔完架車終於起行，行左唔夠十分鐘阿大叔又嚟料嘔到一地都係.....唉，你話我無同情心都係咁話，唔舒服就唔好去啦，係咪應該自動自覺取消走人呢? 你咁樣既阻左大家 d 時間又整到架車 very very dirty 囉，呢位阿叔對大家做成嘅不便似乎一d 唔好意思都無，佢 d 同伴仲響度飲緊啤酒，估計阿叔唔係唔舒服只係飲大左，後來去到景點大家落車佢同佢 d 同伴仲猛咁響度煲煙，好樣衰囉......反而我地落左車見導遊小姐身上嗰 d 核突野我地好自然俾 tissue 佢清潔，至於其他乘客全部都好似睇佢唔到咁囉，我地當堂覺得自己好有品，哈哈~~

講返個 tour，呢個觀光巴士會響市內繞一個圈，途經幾個景點，當中有 d 可以落車遊覽，之後就搭船去櫻島.......車行無耐就經過西鄉隆盛銅像，據講此君係薩摩嘅偉人~

之後去到城山展望台，呢度需要落車由山下行上去.......

可以望到鹿兒島市同埋櫻島，不過呢一日好多煙霞，遠望櫻島好朦~

影下照片補返數~

有十分鐘可以自由影下相~

有間店舖又有得 shopping~

上返車之後經過西鄉洞窟~

沿途經過見到唔知係桃花定梅花.....二月頭，照計無理由咁早有櫻花

下一個景點就去到仙巌園......

入園前先逛逛鶴嶺神社~

導遊小姐有介紹呢個神社，不過我地當然唔明佢講乜，都係自己睇簡介啦~

跟住就入園，個 tour 已包入園費~

鐵製150磅巨炮~

大根好巨呀~

克炭袋，因為櫻島火山久不久就會爆發，政府就預備定呢d 克炭袋俾人用嚟裝火山灰然後回收~

又有呢種大大朵嘅花花......

我地最初以為係梅花，但導遊小姐話係櫻花~

正門，篤姬外景拍攝場地~

鍚門，古代藩主專用紅漆門~

獅子乘大石燈籠，係園內最大嘅燈籠，頂上面係一隻飛獅子~

御殿，歷代藩主嘅別墅~

庭園景色幾優美~

可以望見櫻島~

響水池位置望向遠遠嘅山頭可以見到岩壁上刻左千尋巖三個大字，係1814年島津藩主派人建造，全長11米.....當時就諗起張翠山使出氣功響山壁上用銀鈎鐵筆刻上武林至尊誰與爭峰幾個大字

亭台樓閣，環境優美~~

遠山白色好似瀑布咁嘅就係刻左千尋巖嘅石壁~

有俳句短歌聽

可以學以前 d 武士練習一下武道

響仙巖園大約只係係停留45分鐘，所以我地無逛晒成個園，差不多夠鐘要上車，但點都要逛埋売店先

仲要買埋呢度嘅名物兩棒餅.......其實係類似糯米糍加上醬油，鹹鹹地唔算好好食啦~

都係紫心薯雪糕 yummy d~~

離開仙巖園，就去坐渡輪過櫻島~

航程大約十五分鐘，可以落車響船上周圍逛下~

就係坐呢種渡輪~

一路向櫻島方向駛去，火山愈來愈清晰......

過左一陣忽然見到櫻島火山爆發呀!!

Wow!! 第一次現場見火山爆發，好興奮呀

船上所有人都好雀躍同火山影相......

好勁呀!!

好快就去到櫻島~

大約十分鐘就上到去位於四合目嘅湯之平展望所~

個火山口仍然仲爆緊呢!

不過過多一陣就終於爆完~

周地都係火山灰，櫻島火山係一個活火山，導遊小姐話火山雖然未至於日日爆發，但爆發嘅次數都好頻密，上個月就已經爆左十幾次，今次我地都算好彩可以現場睇到~

展望所除左近距離睇火山，當然仲有得 shopping~

之後就落山啦，沿路見到好多呢d 火山灰石造成嘅嘅古怪石群~

又去坐渡輪啦~

大約五點幾就返到去市區，原本打算搭六點鐘開嘅新幹線返福岡，不過一場嚟到鹿兒島不如逗留耐 d 響呢度 shopping 啦，反正返到去福岡都係做同一樣野，所以就響天文館落車，整個觀光巴士 trip 大約玩左四個鐘，OK 唔錯呀~~

天文館就好似狸小路、心齋橋咁好多商店逛，藥房物品價錢大部份仲平過福岡呢

觀光篇又寫完啦，最後補放返呢個 trip 食過嘅幾款車駅便當......搭長途車最好就係可以試唔同嘅便當

(...待續)