2014年4月日本中部立山8日 - ETC card, where are you??

DAY 1 (HK > 名古屋)

又出發啦.....雖然已經去過名古屋兩次，但今次係第一次直飛中部國際空港，所以都係搭 CX 10:15 班機~

今個 trip 嘅主打係上雪山，雖然二十幾度天氣但要多帶件厚褸同行山鞋，未出發兩個喼已經無左一半位.....唉，咁我點買野返嚟呀??

今次有驚喜，upgrade 左我地 premium economy，之前見身邊 d 人成日都有得 upgrade，係我地未試過，今次終於到我地，雖然唔係 business，但都已經好開心

To Min Chun C 好大個廣告牌呀!!

呢期實在太迷佢，忍唔住要做小 fans 影一影

響 lounge 食完免費餐逛一陣就夠鐘 boarding~

Premium econ 都幾正噃....個位比 econ 闊落好多，同前面座位個距離亦好闊，老爺完全唔需要起身我都可以行出去

用餐枱闊少少之餘，仲另有地方放杯......

TV screen 好似都係闊d.....

有腳踏.....

同 headphone~

不過餐就無分別，一樣.....咁唔掂

食下野睇場戲好快就到名古屋啦~

Check in 好快就搞掂~

跟住就行過對面搭名鐵出市區......

大約40分鐘就去到，名古屋駅好多人好繁忙呢.....

我地先去酒店放低 d 行李，因為係第一次由機場直接出市區，所以都花多dd時間搵太閤通口~

我地第一晚住呢間ヴィアイン名古屋新幹線口，由車站行去五、六分鐘就到~

酒店地下就有間 OK 店，超方便，而且房價亦唔貴，只係 6800円，不過我一定唔會再入住，因為 service 實在太差

做完 check in，職員話我地知有 d 包裹幫我地收左並已經放左響我地房.....

一入房果然就見到我 d Amazon orders, heehee, 都唔係好多啫......咪住先，除左 Amazon，應該仲有最重要嘅 ETC card 未見有噃，於是我地即刻走返去 reception 詢問.....

往時響日本租車如果租埋 ETC card 響 Tocoo 一次過可以搞埋，攞車時會俾埋張卡，但而家改左張卡係直接郵寄去機場或者酒店，響做 booking 時會問你取件地點，我地打算第二日先攞車所以就填左呢間酒店名，但我地有個疏忽，book 酒店係用我個名，而 book 車就係用老爺個名，我地一路無為意，直到出發前兩日 Tocoo send email 溫馨提示我地如果酒店 booking 個名唔同租車個名記得通知酒店要幫我地收件，一貓驚醒於是即刻 send email 俾酒店，因為佢無一個酒店專用 email 所以我就響佢個 general enquiry 留言，諗下諗下都係放心唔落於是又再補多一封 fax 請佢地幫我地留意收件，第二日就收到佢地 email 回覆話我地個 package 早兩日已到左亦已幫我地收左，當時已經覺得有 d 唔妥，照理 Tocoo 都係尋日先提我地咁快前一日就已經寄左去酒店，而且酒店又無老爺個 record 佢地咁都識得收，不過礙於時間緊迫同語言難溝通關係，我地都唔理得咁多，諗住去到先算.....果然就真係發生問題...... 

去到 reception 剛剛同我地做 check in 嗰位姐姐都仲可以勉強用有限英文同我地溝通，check 左一輪佢話無收過份件，咁我當時就諗會唔會份野仲未送到呢，不過唔係喎，酒店覆過我話幫我收左嘛，咁即管叫佢地再 check 真 d，嗰位姐姐 check 左一陣就走左入去入面，之後應該係一個較高級嘅女人走出嚟，以為佢搵個講到下嘅人同我地傾，唉，佢 d 英文仲屎過之前嗰位，基本講十句佢大約明兩句，搞左一輪終於明白佢講乜，原來佢地尋日確係有見到我地份件，但因為收件人個名唔係住客所以就拒絕簽收，之後就一副愛理不理完全唔關佢事模樣......頂佢! 俾著以前我已經拆左天，不過而家年紀大左脾氣收返 d，我於是好心平氣和同佢講我有 send 過 email 同 fax  俾酒店通知我有個 package from Tocoo 收件人係用另一個名字，而最重要係你地酒店亦以 email 覆左我話幫我收左份件，咁你無理由而家又同我講你地竟然 reject 左我份野啫......

之後呢位姐姐又走返入去入面，估計應該係 check email 啦，等左好一段時間佢終於走返出嚟，嘩，個臉色簡直 180度轉變，猛咁 say sorry 話有收過我個 email 只係同事搞錯左，咁我其實都唔駛你地 say  咁多個 sorry，最緊要係而家我點樣可以攞返個 package，佢又 check 左一大輪，終於搞清楚份件而家彈返左去郵局度，就響呢個時候老爺就收到 Tocoo 嘅 urgent email 通知我地酒店唔肯收我地個 package，請我地五點半之前一定要同酒店搞清楚......咁我地唯有問返酒店而家究竟可以做 d 乜，因為當時已經五點幾，又係星期日，我地第二朝一早就要閃，好驚如果要等到第二日辦公時間先有人幫我地跟進.......個女人就話原來個郵局就響附近，佢地會即刻搵人過去攞返件野，請我地等等大約半個鐘就可以攞返嚟......咁都安心 d，原來星期日郵局都有人辦公，於是我地就話而家要外出今晚返嚟先攞返件野啦......直到呢一刻我覺得酒店嘅 service 都還 OK 啦，雖然之前搞錯左而且態度麻麻，但當知道係佢地嘅問題，佢地都即刻想辦法幫我地解決，我之前話 service 太差永不再入住唔係指呢壇野，令我極度不滿嘅係另一個職員，遲 d 會講到~

上返房洗個臉，趁房間未整亂影幾張相先......12平米嘅房間，一眼見晒.....

都有張工作枱.......

反而 TV 比想像中大~

雪櫃、電水煲都有~

無衣櫃，只有四個衫架......

有加濕機~

Washroom standard 設計......

只 provide 基本嘅牙刷同 shaver，其他綿花棒、浴帽等一概欠奉.....Shit!! 偏偏今個 trip 唔記得帶浴帽

Hea 左一陣就拿拿聲出去做緊要野......

見到有間 Laduree，當然入去巡個圈，唔買都要望下

樣樣都好靚，樣樣都想買

最後都忍唔住買左呢 d 鎖匙扣吊飾，比香港平好多

高島屋勁多人!

大堂正中仲有對新人響度影相~

高島屋二樓有個花園平台，環境都唔錯~

逛完高島屋，循例走去名鐵百貨逛逛......

呢座 building 好型，次次都要影~

當然又要同大公仔影返張相，今次係空姐 look~

仲有凌志跑車~

響名鐵百貨行左陣，之後打算去榮町嗰邊行下，上次響大須商店街掃左好多平野今次又想去走個轉，而且如果今晚唔去之後就再無咩時間去，但唔知點解呢一晚兩個人都唔係好想郁，心想要花時間搭地鐵，去到其實都係做同一樣野都係 shop 平，不如響呢度逛下地下街算......逛到七點半就去矢場とん食豬扒飯，第一次嚟名古屋已經食過覺得幾好食又想再回味下~~

Window display 呢隻豬仔好可愛~

真係唔錯，d 肉好嫩滑呀

鐵板呢個一樣咁好味

食完離開時見到有豬扒三文治，當時已經食飽所以諗住走時響機場買嚟試下，可惜去到當然又無左件事

食飽飽唔捨得返酒店住，於是去千里馬藥房掃下貨，記得 2010年嚟嗰次覺得呢間藥房超大超正超多野買，但今次再嚟已經無呢個感覺，甚至覺得貨品種類比較少，或者係因為自己近年實在去得太多呢 d 藥房，一般規模已經唔可以滿足我??

返到去酒店，當然第一時間問酒店職員攞返 ETC 個 package，不過下午嗰兩位姐姐都唔見人，只有兩個男士當值，於是就問其中一個貌似佬版唐澤壽明嘅大叔我地應該有份件可以攞......我 d 英文雖然唔可以算好醒，但一般日常對話都問題唔大，我見呢位大叔好似無乜反應，以為佢唔知頭唔知尾所以唔明 (不過其實即使唔知事件由來，我同你講你地應該有份件俾我你只需要 check 一 check 個 record 就知啦!!)，於是我唯有從頭將成個 case 講一次，但佢仍然一副天然呆 look 望住我，我唯一諗到佢係唔識英文......OK，你聽唔明咁至少俾 d 反應又或嘗試搵其他人同我溝通而唔係一副完全唔 helpful 嘅姿態掛?? 正當我開始有少少想發作之時，下午同我地做 check in 嗰位姐姐走左出嚟，一見到我地佢就即刻攞返份件俾我.....我臨離開前再望下嗰位大叔，佢正若無其事同其他人響度傾計，有 d 樣衰......我承認佢俾我第一印象唔係咁好，或者因為咁所以第二朝先會同佢發生吵大鑊事件?!

幾經波折，終於到手，好險.....以後謹記酒店同租車 booking 都要用同一個名呀!!

除左 ETC Card，我地今次仲租埋 wifi router，419円一日啫，方便好多，可以隨時上網、收 email 或同人 whatsapp，好正呢!!

沖完涼 check check Amazon d orders，影完相又同細妹 whatsapp 左一陣，之後就瞓教啦，聽日要出發去下呂溫泉呀!!

(...待續)