2016年10月23日星期日

2016年9月韓國5日 - 阿豬媽重遊首爾


上個月嘅中秋走咗轉首爾.......不經不覺原來上一次到訪韓國已經係 2005年,仲記得當時係最 hit 大長今嘅時候,當年我同老爺去嗰個大長今 park 真係一頭煙,交通唔算方便,搭巴士基本係文盲兼雞同鴨講,我地最後都係搞唔掂終於只有打的來回......當年對韓國嘅印象真係好一般,覺得 D 人好粗魯,唔知點解無啦啦又成日俾人撞,D食店好似唔歡迎遊客咁,招呼黑口黑面,所以當年去過一次之後都再無重遊嘅打算.....事隔十一年,因為韓劇 hit 關係,趁住中秋假期請多兩日假去玩咗五日,今次重遊印象好好多呀,D 野好食,買野又平,尤其護膚品! Super 購物狂嘅我直情好似走水貨咁,買得好滿足呀,哈哈!!



今次話就話去五日,但第一日去到明洞酒店已經六點幾,最後一日中午機,為咗要預留時間去機場最後一擊,一朝早已經要搭巴士去機場,所以整個 trip 實際只得三日玩......阿豬媽響有限時間當然只能揀做佢最擅長嘅事,不過 shopping 呢 D 咁神聖嘅野 of coz 要另開一篇專寫,絕對唔可以三言兩語敷衍了事

可以求求其其寫嘅當然係非 shopping 嘅紀錄.....呢個就簡單啦,反正成個 trip 都好求其、十二分 hea.......或者係年紀大咗,近年出外旅行都無乜邊度係一定要去一定要食,去得到就去食得到咪食囉,最緊要唔駛點排隊唔駛等......所以,而家港人去首爾至 hit 潮玩潮買潮食,例如著韓服體驗、玩汗蒸幕、去馬場洞食韓牛、橋村食炸雞、排長龍為咗一件 Issac 三文治等等.....呢 d 通通都係無做嘅

對於我呢 d 咁懶嘅人嚟講,duty free shopping 要排長隊俾錢只能夠無奈地要接受,其他就真係可免則免,尤其食店,但凡要等超過十分鐘嘅都唔會考慮......其實喺韓國食野實在有太多選擇,而且大部份都好食,我地要求唔高,絕對可以去到邊食到邊~


未到冬天但都要去食蔘雞湯~


再加一杯冰凍嘅五味子養生茶.....會唔會太補呢?


紫菜包飯......我最 like 個辣魷魚,好好味呀!

小吃



美美的玫瑰花雪糕、蜂巢雪糕


呢間喺弘大嘅韓牛漢堡扒店,標榜 100% 韓牛,連 cheese 同蛋一齊食,yummy!!


每個位都有個私家小型吸煙管,每次將一小份肉放上鐵板上燒,個吸管就會即刻將油煙吸走,有得食又有得玩,好過癮~



 即炸薯條 & 香蕉奶.....yum yum~~

同日本嘅 Calbee 一樣即叫即炸,一樣咁好味!!


去韓國又點可以唔去烤下肉?

話時話韓國 D 啤酒都幾好飲,好易入口~


宵夜飲燒酒.....鍾意佢個名,初飲初樂 ~

逛超市 D 燒酒真係多選擇過汽水......不過呢個柚子味嘅就唔算特別好飲


粟米雪條.......

真係有一粒粒粟米嫁~~


雖然話隨緣去到邊食到邊,但有一樣野係今個 trip 好想試嘅,就係醬蟹啦......早兩年睇「來自星星的你」第一次知道醬油蟹,見千頌伊食得咁 happy 已經好想試,所以第一晚一到埗就即刻衝去食.....住明洞最正嘅除咗方便shopping,其次就係周圍都係食店......住宿酒店附近就有一間好多香港人都去嘅「咸草醬蟹」......第一次食醬油蟹,真係好好味呀

個套餐除咗一碟二碟伴菜仲有個蒸蛋,熱辣辣食落肚好舒服~

食過返尋味,隔一晚又食過.....因為去開東大門就去咗呢間「順美家幸福的醬蟹」,就響現代百貨 outlet 旁邊,佢有個任食套餐真係好抵食,包括原味醬蟹、辣味醬蟹、醬蝦等都係任叫,仲有每人包一隻蟹蓋飯,其餘湯、泡菜、瀨尿蝦等都係響 food bar 任攞,每位只係 KRW16000......當然 D 蟹唔算頂級,但咁嘅價錢真係好抵食囉,而家諗返起都流口水呀


呢個辣味蟹勁辣!! 我食咗兩隻已經頂唔順


醬蝦都好好食,好爽口,又大隻!



講完食就講下觀光啦,雖然得三日玩,但都抽咗一日去近郊逛下......上次去韓國已經好想去南怡島,因為當時交通好唔方便所以無去,事隔多年,或者因為我地呢十年已經好習慣自由行,又或者近年韓國多咗遊客 D 交通配套安排好咗,今次發覺要去南怡島都唔算好困難,由市區坐 subway 或 Korail 到加平站,然後搭巴士再轉船就到.....(其實都幾轉拆)

去加平站有兩個方法,若由明洞去,一係搭 subway 到往十里站或清涼里站再轉 ITX 青春列車,或者搭 subway 到上鳳站再轉普通京春線.....兩者嘅分別就係快同慢、以及貴同平囉,搭 ITX 大約快普通列車30~45分鐘啦,但都只係貴 2000 won 啫! 正所謂時間就係金錢,慳多 30分鐘瞓晏小小,話晒近郊要晨咁早出發,可以 hea 就 hea 耐 d 啦,而且因為 ITX 係指定席一定有位坐唔駛同人逼,又可以上網先 book 位,然後去車站換票就可以~

加平站一出右手面係 Tourist Information,旁邊就係觀光巴士站~


南怡島位處京畿道,如果即日來回可以去埋同區域嘅小王子村同晨靜樹木園,都係風景優美又好多韓劇取景嘅地方,不過一日內去晒三個地方就會好趕,所以今次只係揀咗南怡島同小王子村......由加平站出發可以搭觀光循環巴士,一日票 KRW6000,上車跟車長買就可以,但如果只係去南怡島一個景點就搭公車比較化算~

由加平站大約十分鐘就到南怡島碼頭......

入島可以搭船或者呢 D zip wire......


我當然想坐 zip wire,上次少女峰玩 zip line 真係超級好玩,但短短一分鐘實在意猶未盡,南怡島呢個 zip wire 長好多,連入島費都係 KRW38000,唔算太貴,but 一朝早已經好多人排,所以只好乖乖搭船~


乘船入島都只係約 15分鐘,來回票一人 KRW10000,遊客出示 passport 減 2000~

一朝早已經勁多強國人!

去南怡島最主要都係因為嗰套經典劇「冬日戀歌」,當年真係幾迷裴勇俊嫁,我甚至學過佢響套劇入面嗰個結圍巾方法,哈哈~~



男女主角第一次 bobo 嘅地方



周圍有好多劇照~



仲有銅像俾 fans 攬住俊尚係咁狂影







除咗劇中嘅景點,其實南怡島風景唔錯,沿島慢慢逛一圈都幾寫意~

 




周圍都有好多雪人嘅擺設~
















上午去完南怡島,下午繼續搭觀光巴士去小王子村......去呢度除咗因為我自細就鍾意睇小王子本小說外,當然亦因為 Do min chun C 啦

呢個主題公園唔係好大,不過因為依山而建,好多時有好多石級要上上落落~



一入園就會見到都教授用念力令千頌伊飄起飛埋嚟嘴嘅場景


當眼處有紙板俾你扮主角.....當然要去玩玩,可惜旁邊嗰位唔係都教授


除咗「來自星星的你」,「秘密花園」都有響呢度取過景~


認得玄杉件閃光衫嗎?


藍天下嘅歐陸色小屋好靚~~


呢一組都係旅館,如果可以響度住一晚就可以睇埋夜晚嘅燈色~



小王子係我睇嘅第一本小說,自始開啟咗我閱讀嘅興趣.......由細到大睇咗唔少書籍,不過小王子始終係我最愛~



作者.....小時候曾經一度我以為佢去咗 B612 星球而唔係死咗




園內有小王子曾經到訪過嘅幾個星球模型





你看見的到底是一頂帽子還是蛇吞象?.......小王子教曉我們︰只有用心看事物才能看得清楚,重要的東西肉眼是看不清的~











(...待續)















2 則留言:

  1. Over 啱咀型喎,樂天要一早去會少好多人架!宜家我係一早喺香港網上訂哂最尾先喺機場攞,醬油蟹我食過2次都係幫襯大瓦房,不過上次食過感覺差咗,所以下星期會去另外一間試試,弘大嗰間韓牛漢堡扒店我都有食過,如果你鐘意哩間你下次可以去試試九州天神嗰間類似做法,但個人感覺牛嘅質量好少少

    回覆刪除
    回覆
    1. Over over! 我當然都有網上訂購啦 (點會錯過呢, haha),不過我愛貪小便宜嘛,現場買可以攞samples,所以都有排囉....成個樂天免稅店都係強國人,人山人海,好恐怖!
      唔該晒,下次去九州一定去試下~~

      刪除