2009年8月北海道親親大自然之旅 - 返來囉!!!

六日六夜嘅北海道親親大自然之旅終於完結喇!!!! 開心嘅日子過得特別快，平時返工由星期一等到星期五好似等足半個世紀，但出去玩一個星期眨一眼就過左去，明明仲好似係剛剛先搭機去羽田，話咁快又要搭返機返黎......

今次呢個旅程印象最難忘自然係自駕啦，返到黎香港，老爺揸緊車時我仲會扮GPS把聲提醒佢左轉.....GPS真係好鬼方便，雖然間唔中都會俾佢老點，但總括黎講真係國外人自駕嘅好助手!! 自駕嘅好處仲有係唔駛煩拎住d野通街行，尤其係對於我地呢種購物狂黎講，shopping完隨手放響車上就唔駛理，真係買野都爽手d嫁~~~

今次最美中不足係天氣唔好，成個trip只係響十勝嗰朝有陽光，試過有一日仲落狗屎!!! 真係落狗屎咁嫁，日本天氣報告用激雨黎形容，我就覺得係我地香港嘅黑雨! 天氣唔好原本嘅schedule都要改過晒，好多地方都無去到，再加上初初第一日自駕唔係咁熟點用個GPS，去到美瑛條拚布之路d小路兜到亂晒籠，淨係掛住搵嗰d咩名木，攪到我地一d都唔enjoy，嗰日真係好唔開心，不過事後諗返都當係一種經歷，睇返d相又覺得好回味，唔開心嘅感覺都已經消失晒，我諗旅行嘅其中一個意義就係咁啦，有開心有失落，就算係唔如意嘅經歷都會成為我地將來記憶嘅一部份，事後講返就會笑當日嘅傻勁，開心同唔開心嘅事情都可以成為第時老左回味無窮嘅點點記憶~~

雖然今次好多景點都去唔到，不過都有唔小開心嘅野，好似響深山峠Woody Life過左一朝好溫馨嘅早上，響富田都見到一part薰衣草田，美馬牛Kanno Farm個花田真係好靚，當然仲狂shop左勁多無謂野啦.....不過最最最難忘嘅竟然係響十勝川溫泉遇上令我地此生都唔會忘記嘅私家風呂.......

唔講咁多喇，各位如果有興趣，就請響黎緊嘅日子陪我地一齊經歷呢個有開心又有失望嘅親親大自然之旅啦.....

出發啦

~~~

 

Dinner @ Hokkaido Rice Pizza

呢晚又去左沙田，見到呢間新開嘅Hokkaido Rice Pizza，Hokkaido喎! 打正北海道招牌，一於臨去北海道之前食返個北海道菜先.....

間野唔係好大，都等左十零分鐘先有位....

蕃茄湯，$25.8....講明係有機蕃茄，都ok嘅~

和風蕃茄海鮮意粉，$78.8，無咩味道，而且份量好小，一人只食到一轉~

芒果黑椒雞批，所謂regular size 都要$88.8!....呢個米pizza係呢度嘅主打，去咁多次北海道都未見過有rice pizza 呢樣野，點都要試下啦....

餅底個樣 (唔好意思，食到最後一片先記得影個底，隻碟比較核突左d)....其實真係無咩特別，而且味道只算一般，size又細.....

和風積木牛扒，$39.8....牛扒?? 牛肉粒似d喎，味道ok，但得嗰幾小舊，真係唔係好抵....

同menu張相真係爭好遠.....

抹茶冰淇淋黑糖蕃薯，$42.8....都好甜下，不過老爺最愛蕃薯，未坐低已經講定話要叫.....我就比較鍾意食雪糕嗰part多d~

呢間食店d野食好細碟，份量好小，但相對價錢就唔平，而且味道真係一般，如果價錢平返一半間唔中去坐下都無所謂.....最後結論，我都係疊埋心水過兩日去北海道食好過..........

 

Dinner @ 功德林

早幾晚去左尖沙咀，正當諗緊食咩嘅時候，咁啱行過北京道，老爺記起有間功德林響附近，佢話呢排公司好黑仔，不如去食返餐齋消下d衰氣喎，咁我地都好耐無去功德林，所以就去解下惡運啦~~

去到已經full得七七八八，只剩返近門口兩張枱，是但啦，都無咩所謂~

呢間食店d service都幾好，d部長好樂意同你介紹佢地d菜色，其他d waiters 都好nice，成日走黎幫你加茶，個感覺幾舒服自在~

呢個竹笙百合燉蟲草本來唔諗住叫，不過不斷有部長同waiter過黎sale，咁就試下啦....又真係唔錯噃~~

素鵝，好好味!!

咕嚕肉，外形同質感都真係好似嫁，呢味菜平時係唔會放膽食，今次可以盡情咁食過夠本~~

魚香茄子，味道都ok~

呢個雪菜松子炒飯都炒得幾乾身~

飯後甜品，要左個原隻南瓜布甸，好味~~

食飽後我地行左出去海邊散步，呢晚夜色都幾靚，仲見到月亮呀!!

2009年2月日本東北8日溫泉之旅 - 後記 + INDEX

終於完成了日本東北這個旅程的遊記! 由東北回來已經半年，這個遊記亦寫了半年....時間過去，當日很多的細節已逐漸淡忘，但是，不論記憶如何褪色，日本東北的美麗及純樸，總是悠悠地永藏心底，不會輕易忘掉。

東北無疑是一處令人印象難忘的地方，這次走訪東北，探訪了宮城、秋田及山形，於我們來說，每一處都充斥著我們愉悅的記憶，仙台的牛舌、松島的悠閒、乳頭溫泉鄉超「騎呢」的日歸浴、角館的浪漫、藏王樹冰的瑰麗、山寺的清麗、銀山溫泉的遺世獨立、最上川的恬靜、橋本屋及米沢牛的「豪」....這一切一切，在在構成了我倆這個獨特的飄雪溫泉之旅....是的，無論這些地方，已經盛載過多少遊人的回憶，也許已經變得不再新鮮，然而，對於我們來說，這八天的遊歷，仍然是獨一無二，當中的每一個小節及遭遇，都是屬於我倆的私藏，記憶也許會模糊，當日的快樂卻是將會長久地銘記在我們的心中，揮之不去。

2009年2月日本東北8日溫泉之旅 - Day 8 (Part 2 再見東京~~)

2月21日   星期六   (東京 > 香港)

三點幾返到酒店，攞返d行李，再將今日d戰利品pack返好.....

酒店大堂幾特別，幾現代feel......不過我地就好似難民咁瑟縮響一角大包細包咁將d野塞落個行李箱....