真係俾yahoo玩殘,唔知點解無啦啦會睇唔到呢篇blog,唔識點攪,唯有再re-post多一次......yahoo blog成日都有問題,真係有D擔心會唔會有一日所有嘅網誌會突然消失晒~~
----------------------------------
上星期我地去左海洋公園,事緣係因為早排美心有張coupon話兩個人去第二個人可以有半價,六月尾到期,張coupon其實放響一邊好耐,有日揾野突然見到,所以就響最後限期前用左佢,同埋我已經好耐好耐無去過~
通常星期六日唔駛返工都瞓到日上三杆,不過老爺話太晏驚會好多人,一朝早就不斷咁鏟我起身....
十點鐘去到,已經好多內地同胞響度,剛剛開門放人入~
好彩去左,遲D又話加價~
首先去探下安安同佳佳~
等左一陣都淨係見到一隻唔知係安安定佳佳,另外嗰隻唔知去左邊....
只得一隻熊貓好寂寞咁響度食緊早餐...
之後去左坐升空氣球....
淨係排隊都排左一個鐘,排響我地前面見到陳嘉儀,即係老婆大人入面宣萱個阿媽,佢真人都keep得幾好.....嗰日超熱,又排得耐,排到尾仲要見到有個中東肥女人帶住個豆靚靜雞雞響我地後面想打尖,我捉住個女人隻手叫佢去後面排隊,佢怒睥我仲同我嘰哩咕嚕講一大堆中東話,其實對我地無影響,但係響我地後面俾佢打左尖嗰班人又唔出聲,我地話俾D工作人員聽但都無理就照放佢地上氣球....離晒大譜!!
終於升空~
響高空見到安安佳佳嘅熊貓館~
另外一個熊貓館
永恆嘅標誌
坐完汽球就去搵盈盈同樂樂~
首先有小熊貓,走黎走去好鬼精伶~~
盈盈 or 樂樂
D熊貓真係好得意~~
娃娃魚
呢度D環境比安安佳佳嘅熊貓館正好多....覺得安安同佳佳好可憐~
熊貓公仔....當然無買啦~
跟住去睇金魚....
其實無咩好睇~
超騎呢許願燈....
仲有鱷魚
個小朋友好得意,忍唔住影佢~
跟住就去搭纜車上山,或者仲早所以唔駛點排隊~
首先去坐海洋摩天塔,都要排幾個字時間~
轉一圈,360度睇晒~
太平洋海岸
唔知係海獅定海狗 (我從來都唔識分....)
海獅定海狗呢? 抑或係海豹?.....(其實有無海豹呢樣野呢??)
老爺唔肯玩機動遊戲,"哎"左好耐先肯同我玩滑浪飛船....
都排左成大半個鐘先有得玩......玩完後淋到一身都濕晒~~~
之後去食野....D魷魚好惹味,不過我覺得最好食都係冰凍嘅生果,因為露天無冷氣,熱到飛起~~
食飽後行左去紅鸛池,不過D紅鸛鳥唔知係咪太熱"喱"埋晒一隻都見唔到....真係熱得好交關,我地連百鳥居都唔想行~
環保樹
越礦飛車,望落去都唔係好危險啫,不過老爺死都唔肯玩....
無得玩機動遊戲,我地直接行去水母館睇水母.....
入場都要排隊,其實唔係真係好多人,只係因為入場時D工作人員要你企響度影張相.....阻住晒D時間~
D水母都幾靚~
個珊瑚都靚~
D水母都好多種款嫁~
有間房入面勁多呢款水母,有唔同顏色嘅燈光打落去,好迷幻~
呢面牆好得意,有D水母響牆上面游黎游去,你用隻手拍落去D水母會彈開,D細路猛咁響度霹靂啪啦,拍得好興奮....其實我都覺得幾好玩~
我買左個jelly baby~~
睇完水母就去排隧入海洋館....
鯊魚baby & 蛋
D海星可以俾你伸隻手去摸,不過要先去排隊洗手,勁多人爭住洗手,真難頂....終於洗完手想去摸點知唔係好夠手長,我唔想太"烏"低身 (因為呢日件衫個領口比較低),所以就叫老爺求其影張相算,跟住就俾佢鬧我混吉....
個海洋館同N年前黎睇嘅都係差唔多樣~
奇奇怪怪嘅魚
呢條鯊魚條尾斷左,攤左響度唔郁....
呢條唔知響度hea緊定瞓緊教,又係唔郁....不過唔郁都好嘅,如果佢郁就影唔倒相啦....
D魚遊得好快好難影,都係影video算~
自從海威死左之後,總係覺得少左D野....既然夾唔啱時間睇海豚表演,所以都無等下一場.....行左成日都好攰,係時候搭返纜車落山走人....單係排纜車都排左大半個鐘有多~
老爺話覺得呢個角度望落去D纜車好有型,好似傻左咁不斷勁影相....佢有時都好鬼低能~~
山下好多地方做緊工程擴展緊~
Bye-bye 啦....又要等N年之後先再見~~
piggybread : 今次睇到喇 , 上次有編 "東北" 又係睇唔到 , wow ~ 大暑天時去都幾 "甘" 喎 , 唉 ~ 影衰晒D中東人 , (平時形像都唔多好架啦) 果度D野都唔慌平得去邊 , 總括黎講今次既行程好掂呀 , 有擴建工程 ? 唔怪得加價啦 .
回覆刪除Bye Bye !
[版主回覆07/10/2009 00:15:00]Yahoo blog 成日都short short 地,好鬼老土~
真係好熱,不過好彩去左,可以有排唔駛去~~
香港好似愈來愈多中東遊客,上次去坐昂平360都見到唔少~
piggybread : 相隔一個小時 , 又睇唔到呢篇 , 真邪門 ? 發生過乜野事 , 唔通妳變黑名單 ? 定係篇網誌長過頭呢 ? 真係考起 ?
回覆刪除Bye Bye !
[版主回覆07/11/2009 11:28:00]黑名單?? 我與世無爭無奶油入黑名單喎,係都應該係你先啱啦,你成日響個blog度"撩事鬥非"~
依然看不到, 真的很奇怪
回覆刪除[版主回覆07/11/2009 11:24:00]都唔知咩原因,不過有d friend 又話睇到晒無問題,而家都唔知以後d post 得唔得.....點解淨係我先係咁呢??
呢兩篇真係好奇! 開咗三秒鐘就完全消失!
回覆刪除[版主回覆07/11/2009 11:24:00]都唔知咩原因,不過有d friend 又話睇到晒無問題,而家都唔知以後d post 得唔得.....點解淨係我先係咁呢??
卡地亞專門店
回覆刪除omega
omega
二手錶
cartier
piaget
我都n年無去過海洋公園, 正當有興趣時, 佢居然話加價, 早知好似你咁, 趁佢有折玩一次先啦, 而家又放暑假, 大把人會加價前去, 睇怕我同海洋公園都係無緣
回覆刪除[版主回覆07/11/2009 11:21:00]加左價後就真係幾貴,等佢擴展後先再考慮,或者下次去開日本先諗下去佢地d海洋館仲好啦~
我都試過呀! 妳可以試下 delete 一兩張相就無事啦 !
回覆刪除有時更會 d 相神秘睇唔到 , 要 add 過好麻煩
講開有講 , 其實海洋公園真係好鬼大
[版主回覆07/16/2009 23:14:00]原來你都有咁情況,我以為係我先咁倒霉....真係令人百思不得其解,但係唔知點解有d人又會睇到,真係頭都大,或者真係因為太長篇幅同埋太多相,所以而家我都唔係好敢寫太長~