2010年2月日本中部北陸9日 - 飽暖思浸浴

  2月20日  (DAY 2 - PART 7)

 

 

上一回講到我地離開荻町展望台，諗住沿返上山嗰條車路落返山，點知條路原來封左，有好多交通警響度阻截唔俾人行........唔係掛，另外一條路唔知通去邊喎，落得山黎個天點都會黑晒，點搵條路返大田屋??

於是我地就諗住扮唔知靜雞雞走去行封左嗰邊，點知行唔夠兩步就俾人發現叫住，有個警察哥哥同我地嘰哩咕嚕講左一大堆野，大概係話條路危險唔俾人行咁啦，咁我地就攞張location map佢睇話要去嘅目的地就響封左嘅呢條路.......佢老兄望左張map兩眼，都費事同我地嗲，耍晒手叫我地行另一條路.......無辦法咁唯有照行囉.......

 

另一邊路都係落山，相比上黎條車路，呢一條絕對係一條小路，兩旁都係雪，好多人同我地一齊行，路旁邊set左好多燈，應該係因為點燈日而特別set，平時應該唔會有，個感覺好似去左小樽雪燈路咁.......我嘅意思係嗰種人多嘅躋迫程度.......我地係咁快步行，見人過人，因為落左山都唔知仲要搵幾耐........老爺係咁拉住我扯恆turbo走，我幾乎係半跑半碌咁終於落到山下......真係反晒白眼，要嘔白泡咁濟

.......條街黑媽媽，好久先有盞好微弱昏黃嘅街燈睇下，我地都不知身在何處，唯有跟住人流係咁行..........

行行下見到有好多人停低左，原來好多人向住一間set左燈光嘅合掌屋影相，我地無點打算停，響百忙之中係咁意影左張，就係以下呢張......個環境好黑呀，真實都唔係光好多咋.........

終於出到去一個路口，係大路，要決定行左定行右，(好多人轉左，因為大部份嘅民宿都集中響商店街一帶) 老爺話照我地由山上一路行落黎嘅方向，應該係要行右面.......佢話乜就乜啦，我一向都無咩方向感，已經行到成隻狗咁，響嗰一刻只係想快D返去食飯........出左大路已經無咁多人同我地一齊行，不過街燈就多左，個感覺都無咁徬徨........行左無耐，yeah!! 見到白川鄉之湯!! 我記得呢間旅館，因為之前有諗過食完晚飯會去浸日歸湯，呢間溫泉旅館離大田屋唔係好遠咋，原來我地真係無行錯路.......老爺認路好掂呀!!

 

再行多一陣就見返之前通去大田屋條車路入口，夜左已經無晒D交通警響度攔截lu，我地沿住條車路行上山好快就返到去大田屋，返到去都只係六點三十五分咋.........

拿拿聲返入房放低D野.......嘩間房凍到好似雪櫃咁.......呢間民宿每間房都有一部暖氣機，大田妹妹之前提過我地話如果出外記得熄左部機，但都無諗過返黎間房會咁Q凍.......不過唔理咁多住，hur hur 聲去canteen醫肚先........

呢間大田屋唔知有幾多年歷史，不過白川鄉呢度嘅合掌屋基本上都有過百年歷史，我估大田屋嘅樓齡都唔弱.......屋內D陳設都真係好古舊......

呢D一抽抽咁嘅野係樂器........

雖然古老，但都有部TV.......

飯堂入面仲有個好古老嘅爐，真係用黎煲水嫁~~

個爐仲係用呢D紙黎透火嫁!!

我地去到D晚餐已經set好晒.......

又係飯餐show time時候嘞........先黎豆腐......

燒岩魚

唔知咩.......

山菜天婦羅

我至愛漬物

陶板燒......

係飛驒牛呀!!

飯後一個orange

呢餐唔算豐富，不過民宿嘅料理我地都預左係咁上下，而且折滕左一整日，黎到晚飯呢一刻成個人relax 晒，呢一餐我地都食得好滋味.......民宿主人大田媽媽同大田妹妹仲周不時走出黎睇下我地有咩需要，又同我地傾計，尤其大田媽媽，好鬼nice.......同我地一齊食嘅住客仲有兩pair女仔，都係台灣遊客，佢地曉講日文，同大田媽媽好多野講~~

食飽後大田媽媽問我地去唔去白川鄉之湯浸溫泉，如果去佢地有折扣卷，又送毛巾俾我地~~

臨離開時見到有塊咁嘅野，我仲以為係朱古力，正奇怪點解放響地下，原來大田媽媽話係用黎按腳.........

老爺好有興趣，仲即場表演，之後就愛不惜 "腳"，話要買塊帶返香港，第二朝搵左好耐最終果然俾佢響商店街搵到.........

飲飽食醉，正好搵D野消磨一下，都未夠八點，但鄉下地方又有咩好做呢，當然係去浸浸浴啦.......白川鄉荻町大部份嘅住宿都係民宿，想搵一間比較有規模嘅溫泉旅館就必定係白川鄉之湯，於是我地就出發去泡湯嘞.........

 

由大田屋行去白川鄉之湯只需要五、六分鐘左右......

入到去.....嘩好多人!! 大概所有遊客食完晚飯都會走黎浸下浴~~

想浸日歸湯，可以響近門口嘅自助售票機購買，700円，不過民宿多數會有折扣卷 (sorry, 減幾多真係唔記得lu)........

白川鄉之湯嘅日歸時間好長嫁，由朝早7:00到夜晚9:30，不過大部份日歸客都係食完晚飯黎浸浸，飽暖就思浸浴嘛........

買左飛就同老爺分頭去梳乎下嘞~~

更衣處有細locker嫁~~

除左男女分開嘅大浴場，仲有露天溫泉......不過勁多人，D日本女人個個都雞啄唔斷咁響度hea住浸，我地嘅同胞就唔駛講啦，久不久就聽到大大聲熟悉嘅廣東話同普通話.......

(官方網頁圖片)

 

 

浸完浴後出返去同老爺會合，之後就周圍hea下.........

有小賣部，可以shopping下~~

仲有休憩地方俾人relax下，不過已經好多人攤左響度........

有牛奶賣.......

我地當然唔放過啦........浸後一樽milk，快活過神仙~~~

近門口有個合掌屋模型.........

之後我地就離開嘞.......外面只係落住微微嘅雪，天氣雖然都幾凍，但浸完浴成個人都暖晒.......雖然今日一整日嘅行程都好唔順暢，但呢一刻，抬頭望見澄清嘅夜空，白雪響身邊輕輕飄下，身邊有在乎嘅人，所謂良辰美景大抵就係如此情懷.......回程嘅路感覺好溫暖好幸福

.......我抬頭望天，只想永遠記住呢一刻嘅美好!! 唔知點解，呢一晚竟然係成個trip入面我過得最深刻最開心嘅一晚........

 

返到大田屋，屋主已經幫我地鋪好床舖.........

較好個電暖爐先.......

之前睇其他blog友D blog話呢度個暖爐去到半夜會自動熄左，幾乎凍屎人，所以我地帶定好多暖包放定響枕邊以備不時之需，我連暖腳包都預備定，瞓教時我對腳好唔易暖，所以帶定無壞........老爺連雪褲都攞定出黎.......咁樣大費周章住嘅旅館都幾攪野，不過百年合掌屋，有幾可住喎，幾無謂都要試下啦.........

攪完一輪，我就走出房去洗面刷牙.......係呀，呢間係民宿，房入面係無washroom嫁，我地等左好耐，確保外面無人就拿拿聲攞D "架撐" 出去公家washroom 刷刷刷.......好在一路無人.......你話我 "or goh" 都係咁話，洗面刷牙呢D咁私隱嘅事唔想俾三唔識九嘅陌生人見囉.......我對上一次同其他人一齊洗面漱口已經係N年前teenage時同D同學仔去露營先唔計較做過咋..........(D咁無聊嘅野我都可以攞出黎講咁大段，我都好服自己.......)

 

攪掂晒返入房，望下錶，唔係掛，先得嗰九點半!! 又無電視睇，唯有攞D今日嘅戰利品出黎欣賞下..........

玩左一陣，都係決定早D瞓，一黎老爺都仲係唔係好舒服，食左藥都已經每邊都只淨半隻眼

，二黎呢度D房係木板間，好傳聲，無謂嘈住其他人啦.........

Good night!!

Hehe.....hea左咁耐，終於寫完第二日.......(待續

)