2011年8月澳門好hea 2日- Day 2 (Part 2)

睇完個「運財銀鑽」show，又係時候去食lunch....

Galaxy都有好多食店，不過食飯時間，間間都好多人，最後我地求其搵左翠華......

下圖呢位仁兄我地真係好頂佢唔順....

我地入去呢間食店時同時又有另外一pair人又係兩位，咁個帶位小姐就叫我地兩pair人一齊入去，行行下唔知幾時開始呢位仁兄跟住我地行，入到去有兩張枱，個帶位小姐就示意我地兩pair分別各坐一張，因為我地行先，所以就先坐，點知呢位仁兄完全無視另一pair人好快速就坐左響我地隔離張枱，個帶位小姐叫左佢一聲佢一d反應都無，唔知係咪見慣呢d場面，帶位小姐好無奈咁望左佢一眼，然後就請另一pair去過第二張枱.....咁都未算，呢位仁兄一坐低望左兩眼個menu，即刻響度大呼小叫要人過黎同佢落單

，我今次無誇張，佢係真係響度大喝.....咩叫財大氣粗? 如今國內d大豪客嘅行為姿態真係令人見識唔少~

講完見聞講返個trip....呢間翠華d野食個名都好有心思，呢個叫哈哈笑炒兩麵黃

呢個叫羸晒咖哩牛筋腩

呢個仲搞野，叫黑金瑞士雞翼

食飽我地就周圍shop下.....呢度有咀香園，可以入返小小貨，不過媽媽之前已千叮萬囑唔好買野，所以我地只係買左一盒佢鐘意食嘅蟠桃果~

之後我地就離開嘞.....

唔駛講我當然堅持要搭shuttle bus啦......不過真係好多人排隊，起碼要等四、五轉車....老爺邊等仲要邊響度哦，話如果唔等而家已經行到返去，我當然無視佢~

響等車處望返過去威尼斯人.....係呀，望落去真係好似幾近，不過我真係唔想行囉!

等緊嘅時候我後邊有兩位帶鄉音廣東話嘅阿嬋，後生d嗰個成日唔知係用個袋定係個手踭頂我個背脊，我真係好想頂返佢個肺

....

等左幾轉車，終於排到去前頭，前面d人差不多上完呢班車，個工作人員就截停左我地前面兩個人，班車只係淨返一個位，咁好自然我地就停低啦，點知我地後面嗰兩位阿嬋要衝出去，咁所有人都沒好氣同佢地講得一個位咋....但奇事不斷發生，老d嗰位阿嬋竟然大大聲話︰「我地兩個人嫁，俾多個位我地上啦，我地排左好耐，服務咁差，有無搞錯....(下刪一百個鬧爆字)」...我想問佢點樣先可以俾多個位佢

，不過我唔想俾comment，我唔想d人成日話我地香港人故意針對內地人，我今次只係描述返件事啫~

返到去威尼斯人，我地就去金光好會展嗰邊玩冰fun世界.....

入場費要$100一位，好貴，不過我想玩~

地方實在太大，由售票處行過去會場嗰邊都要行好耐~

呢個冰fun世界據講係請左49位哈爾濱嘅冰雕師傅用左9000塊滲入17種唔同顏色嘅冰塊雕出好多世界名勝....會場氣溫只得-15度! 大會有羽絨免費提供，亦有雪靴出租，費用$20但就送一對襪，另有手套可以買，$60一對....咩都係錢.....

因為我著左涼鞋所以要租佢地嘅雪靴，但原來會場供應嘅雪靴唔係好多，尤其係細size，要等有人玩完退返出黎先得，仲要係無provide 35號碼只好揀36號....好在我地唔趕時間，個工作人員都好nice猛咁同我地講唔好意思.....等左大約10分鐘見到有36號鞋，個姐姐仔第一時間攞起，仲用消毒噴霧噴噴先俾我地~

件羽絨都ok保暖，不過條zip唔work，只係有兩塊成日都自動鬆開嘅自動黏貼係咁意黐住下....所以響入面hea耐左個身都有d凍，始終係-15度喎，不過其實最凍係對手，我地無買手套，真係僵硬晒嫁!!

會場都幾大，總共有9個主題冰雕~

第一個主題︰澳門勝景.....一入場就見到尋日我地去探訪過嘅東望洋燈塔~

第二個主題︰北京天壇，手工真係幾精緻~

九龍壁?

第三個主題︰西遊記

豬八戒最得意~

第四個主題︰冬日森林

呢個好靚呀!!

有馬車坐~

第五個主題︰世界景觀....呢個羅馬鬥獸場只係得前面兩塊冰雕，入左去發覺後面係無野嫁~

第六個主題︰merry-go-around!! 雖然唔轉得，但都好可愛~

第七個主題︰Wow!! 冰雪城堡.....

有我最鍾意玩嘅冰滑梯!!

第八個主題︰冰河時代

哈哈，最後係個ice bar!! 唔需要去到然別湖咁遠都可以響冰酒吧飲返杯呀!!

(呢兩個係路人甲，唔係我地)

玩左一個鐘終於玩晒，之後交還羽絨同雪靴......

照例有紀念品店.....

不過無野啱買....唔係日本，我硬係咩紀念品都無興趣買

呢個冰fun世界個規模都幾大，d冰雕都好精緻，唔需要去到北海道咁遠都可以睇冬祭，真係唔錯呀!!

(...待續)