2011年2月北海道道東道北12日 - 泡泡美人湯

2月24日 - DAY 6 (PART 6)
三余庵

響十勝川附近逛左一陣，我地就行返去三余庵嘞.....一入到去就記起之前接待我地嗰個男職員話我地可以去 lobby bar飲野，係free嫁，我地當然唔放過啦~

成間三余庵靜俏俏，之前同我地一齊黎嗰pair香港人唔知去左邊?

 

我地一行埋去個bar table就有個女職員出黎serve我地.....

Hehe，我地要左白酒呀!
 

呢隻白酒有特別介紹嫁，不過係日文唔知寫乜.....

橫掂都係飲，梗係飲d好野啦 (我諗係好野掛?)，無理由仲飲果汁啫~

 

成個bar得我地兩個，好似包場咁，好舒服好relax呀! 

旁邊有個火爐，好溫暖~
 

有個望遠鏡放響一大面落地玻璃窗前面，唔知用黎睇咩呢?


側邊有個書架，不過全部書都係日文~

再過d就係細細嘅souvenir shop，呢個我嘅興趣比較大d....

睇下有咩啱買先.....

好想買d香薰用品，不過實在太貴，買唔落手!

呢間旅館除左個房價貴，連d紀念品都好貴，唉!

 

之後我地走左黎呢度坐......

因為發現有盤波子棋呀......

好耐無玩，我地於是就坐響度一邊飲酒一邊捉棋，真係好耐都無試過咁他條呀!!

雖然成個大堂都無其他客人，不過就有幾個女職員坐左響reception嗰邊唔知係開會定傾計......呢度d職員普遍都比較年輕，兩日一夜除左個廚師係有d年紀外，我地接觸過嘅職員都好young下，講真係有d意外囉~

 
玩完一局成功擊敗老爺.....之後我地就上返房嘞~ 

呢個係massage room~


返到去發覺房門口放左份報紙~

距離食晚餐時間仲有成大半個鐘，返到房換返見浴衣，我地就落返去一樓個大浴場，當然要趁個天未黑去浸浸個美人湯先啦~

男女就響隔離，夜晚九點後兩邊會互換~

 入到去係無人嘅，不過唔知點解有對拖鞋響度.....旁邊有紙筆，咩意思呢? 莫非俾人寫comment??

更衣室嘅設備當然好齊全，大把毛巾任用~


有埋locker~

 

一邊仲有野飲供應~

趁浴池未有人，拿拿聲影返幾張相先.....

大浴場總共有三個浴池，兩個室內，一個露天......去大浴場浸溫泉，最開心嘅事莫過於一個人都無，可以自己一個包場，正!!

十勝川溫泉一向被稱為美人湯，因為呢度嘅泉水係屬於非常少有嘅植物性溫泉，含有大量植物有機物，據講全世界只有十勝川溫泉同德國嘅溫泉療養地Baden兩個地方先有呢種泉源.....泉水係啡啡地色，因為有天然嘅保濕成份，浸緊嘅時候就好似浸住d天然嘅化妝水咁，所以就叫美人湯嘞.....浸左一陣，唔係講笑，d皮膚真係滑左好多，好神奇呀!! 而且呢度個設計好簡約，個感覺好舒服，再加上又無人呢，我覺得絕對好過響自己間房入面浸嗰個比較侷促嘅私人溫泉囉~

 

 

泡完湯飲返d冰水補充下先......


浸完個美人湯，成身滑嫩嫩，美人湯嘅稱號真係無改錯呀! 而家諗返起都好想再去浸多次......離開大浴場，又去lobby bar飲返杯牛奶，之後就上返房睇下電視攤抖左一陣，差不多六點就去食晚餐嘞~


(...待續)