2012年10月大阪四國好求其7日 - 鳴門漩渦

Day 1 (淡路島 > 鳴門)

上次講到離開淡路島夢舞台，原本下一站係打算去うずの丘大嗚門橋記念館，不過我地今次個 trip 其中一個重點行程係觀賞嗚門漩渦，之前響網上 check 左今日嘅大潮時間係12:50，睇漩渦最好就係響呢個時間嘅前後一個鐘，而家已經接近十二點，時間緊急，唯有skip左唔去記念館，即刻開恆turbo直趕去鳴門亀浦港.....一路行d雨就愈落愈大，好似倒水咁，頂!

嗚門海峽除左大嗚門橋，要數最出名嘅景點一定係渦潮，由於水流同海底高低差嘅關係，每逢滿潮同退潮時瀨戶內海嘅水位差有成一、二尺高，所以產生奇特嘅漩渦現象......想要近距離睇漩渦就要坐觀光船出海睇，我地 check 左有兩間船公司，一間係高速観潮船うずしお汽船，而另一間係嗚門觀光汽船，我地打算去第一間，點知去到停車場欄住晒入唔到，好似無營業咁噃，當時落住好大雨，我地都費事周圍搵，於是即刻改去第二間.......去到泊低架車時簡直橫風橫雨，老爺話咁樣出海都無野睇喎，不如索性先去渦之道，於是就打算開返車去，點知架車唔知整乜鬼，撻極都唔著好似 lock左部車咁，搞左一陣都開唔返，唯有搵人求救，落住大雨搵隻鬼都無啦，正當兩兜友好迷咁呆左響度唔知點算好之時，忽然見有架車剛到泊響我地附近，即刻出去求救，真係唔好意思，雖然嗰位大叔幫唔到我地，但要人落住狗屎同我地研究架車，一身都濕晒呢....搞左一陣唔知點解忽然架車又撻得返，呢個時候d雨又好似細返d，咁就照原定計劃去坐船啦~

呢間船公司有兩種觀光船，大型船票價1530円，小型船2200円，一開始我地就諗住坐小型船，諗住可以近距離睇清楚d......

12:45有一班，啱啱趕得切呢

小型觀光船叫 Aqua Eddy~

上船啦~

就係呢艘觀光船~

上到船職員就叫大家落去船底層，船側係觀景窗，可以望到水底.....

不過船開左無耐大部份人都走返去上層，因為水底暫時都無咩好睇.....船一直向鳴門大橋方向駛去.......

好快就去到大橋附近，d漩渦基本上都係集中響橋底.....

每個人都好興奮，大家落足眼力搵漩渦......

有啦有啦!! 好大個漩渦呀!! 我地隻船會唔會被佢捲左入去嫁

我地去呢一日係初十四，又趕到干潮時間，本來應該係最佳觀賞漩渦時機，不過可惜前一日大阪刮颱風，天氣好差，不斷落住雨，又超大浪，影響左d漩渦構成，明明見住有一個漩渦差不多形成但一個大浪蓋過就沖散晒~

雖然d 雨愈落愈大，但並無影響大家嘅情緒，船上所有人都興致勃勃咁四圍搵，只要一見到有漩渦踪影就會大叫通知其他人......

落住大雨又大風真係好鬼凍，船又搖擺得厲害，但大家都好 high，每次見到一個完整嘅漩渦都好開心，不過真係好忙，d 漩渦形成得好快亦消失得快，又要影相又要影 video，一頭一身又濕又凍好狼狽但又好過癮.....

近距離睇好振震撼呀!!

中途我地都有走落去底層望下 (乘機暖一下)，響水底見到有d漩渦都幾得意，不過影相影唔到~

好快走返去上面，始終都係響海面睇過癮好多~

一陣間我地就會走上去上面望返落嚟啦~~

響嗚門大橋下面逗留左大約二十分鐘就歸航，整個船程差不多有半粒鐘~

上返岸就攞返架車出發去渦之道，我地先將車泊響嗚門公園，停車場收費410円~

響行人天橋上可以見到嗚門大橋~

大嗚門橋架橋紀念館，就響嗚門大橋旁邊，我地打算睇完渦之道先去~

所謂渦之道，即係大鳴門橋內嘅渦潮觀賞步道，大橋有上下兩層，上層係車道，下層本來係預留作四國新幹線之用，不過後來新幹線建唔成，於是就將下層改為觀光用嘅遊步道，遊客可以由渦潮上方高角度欣賞不同形態嘅漩渦~

入場費500円，因為我地會去埋大鳴門橋架橋紀念館，所以買共通門票880円，便宜左220円嫁!

入口有簡單介紹鳴門漩渦嘅形成~

仲有圖片.....點解人地影嗰d 漩渦咁完整咁靚嫁 (羡慕 ing)

一入去就見到大橋嘅架構.......

好有型呀~

由高空望落去大海嘅漩渦又係另一番感覺~

遊步道全長450米，展望室就響遊步道盡頭.....有排行呢!

中途某幾個位嘅地板上會有鑲嵌嘅強化玻璃，可以睇到橋底下嘅大海~

終於行到去展望室啦~

呢度有好多塊玻璃地板.....體驗一下騰空嘅感覺先

跟坐觀光船近距離接近漩渦嗰種震撼唔同，由遊步道望落去，可以更清楚見到漩渦嘅形成同消失，真係好神奇呀!!

如果天氣好，相信可以一次過睇到幾個漩渦響海面~

好多觀光船駛近漩渦~

雖然d漩渦唔算十分完整，但可以見到個大概都已經好滿足~

響渦之道 hea 左大半個鐘就離開啦，臨離開前當然要蓋返個渦之道印章先啦~

忽然有位識講英文嘅工作人員同我地答訕，佢話我地唔好彩遇著關西剛剛刮完颱風，如果唔係應該d漩渦會正好多，又送左兩隻紙鶴俾我地，好開心呀~~

已經兩點幾，老爺話餓到反艇，係時候去食 lunch 啦......我地行返過去嗚門公園嗰邊睇下有咩食........

求其搵左呢間~

已經兩點幾過晒午飯時間，一個客人都無~

我地點左兩個烏冬 sets......隔左咁耐都唔記得係咩味道 lu

食店望出去係嗚門大橋，環境都唔錯嫁~

開餐啦~~

食店一樓仲有野賣噃，都係當地特產，食飽當然要逛一下......

金時薯呀，300円一袋，據聞好甜好好味，不過咁重老爺當然唔俾買.....最後我地只係買左兩樽調味粉~

順道去埋附近嘅千畳敷展望台望下條嗚門橋先......

只不過企左一陣啫，嗚門橋嘅另一邊灰濛濛一片，d 暴風雨好似就快打到嚟咁呀!

嗱嗱林撇啦.....不過幾趕都要去埋旁邊嘅若山商店巡個圈先嘅

之後就行返去大嗚門橋架橋紀念館.....

又見到大嗚門橋，真係無處不在呀~

大嗚門橋架橋紀念館，館內展示大嗚門橋嘅設計同建築特色.....

大橋嘅組件模型~

除左資料性嘅展覽，仲有d俾人親身體驗嘅模擬設施，好似呢座祖谷蔓藤橋.....

我地聽日都會去，而家就玩下條模擬橋先~

頂樓仲有個展望台，不過太大雨我地都無走出去......參觀完紀念館，出到去但見橫風橫雨，真攞命，咩 mood 都無晒，望下錶只係三點幾，又無理由咁早去酒店，於是就 on schedule 繼續去埋エスカヒル嗚門.......

其實呢個館無咩睇，最大賣點係頂層六樓係一個360度展望台，如果好天可以清楚睇晒成條大嗚門橋......入館要搭一條超長嘅電梯~

去到頂樓大雨仍然未停，勉強衝出去室外快快手影兩張相到此一遊~

走返去山下，響 souvenir shop 逛左個圈，無咩收獲~

離開エスカヒル嗚門，大雨仍然無停嘅跡象，於是就決定結束今日嘅行程，開車去今晚入住嘅酒店 Moana Coast Hotel~~

(...待續)