2月20日 - DAY 2 (PART 1)
第二日啦!!
尋晚早早上床,今朝六點幾就起身.......經過尋日一整日咁多嘅阻滯,今朝起身望出去窗外,yeah!! 無落狗屎啦!! 雖然未至於藍天白雲大放晴,但至少一滴雨都無.......好兆頭!!
不過開心嘅情緒好快就已經被打殘左,個兇手就係我家嗰位身體抱恙嘅老爺......休息左一晚,呢位人兄無好返不特止,D感冒又再嚴重番,淨係咳,一個朝早都已經咳到成個肺幾乎咳左出黎,咁都未夠,兜友仲有發燒嘅跡象
.......救命!! 今日要去攞車開始連續七日自駕遊,兜友咁嘅狀態真係諗起都打冷震........不過幾愁都好,都要去食早餐先........呢間酒店個package係包早餐.......地方唔錯,D野食都好多選擇,以商務酒店黎講,整體上我地都覺得好滿意~~
食完早餐,我地先去酒店附近嘅Nissan攞車.......
今次係我地響日本第二次自駕,上一次我地搵Toyota,雖然攞車過程好唔順利,但Toyota個職員姐姐個service就好掂,英文又講得好,溝通完全無問題
,但今次Nissan就差好多喇!! 首先接待嗰兩個妹妹仔化妝化到鬼五馬六,仲要個口一陣臭煙味,對住佢地已經好想反胃,兩個人仲要完全唔曉英文,都唔知有無攪錯,今時今日做接待竟然連單字都唔識多個!! 本來攞車順順利利就話之你曉唔曉英文,但唔知點解,我地總係唔可以好順利咁攞一次車......今次又衰咩呢? 兩個妹妹仔又check單又打電話,攪完一輪就同我地咿咿哦哦一大堆野,都唔知佢地講乜!! 幾經推敲,原來話無non-smoking car,問我地O唔OK......無野呀?!
梗係唔OK啦,咁我地做booking時你地個confirmation寫明係non-smoking car,無你就唔好confirm俾我地,而家黎到先話無,有無攪錯,諗起架車一陣臭煙味就火都黎,同佢地理論左好耐,當然最後佢地都係俾唔倒non-smoking car我地啦.........都唔知咩世界,明明我地係消費者,次次都係要我地屈服,但佢地係俾唔出架non-smoking car,我地死企響度都無用,佢地猛咁sumimasen,又話幫我地徹底清潔過架車,唔會有煙味咁.........老爺就話不如先去睇下架車咩境況先.......出到去車場,有個職員正響我地架車度吸緊塵,我地check左一轉,其實都無咩野,不過你話架車個內籠無氣味就假,不過又唔似係煙味,總之個感覺就係唔知點咁
........我知,我係特別 "or goh",D火一黎就收唔倒,次次都要老爺番熄我D火.......算啦,老爺話無謂再嘥時間同佢地糾纏,架車大致都OK,拿拿林攪掂趕下場好過啦~~攪掂晒D手續,我地就將架車揸返去酒店附近個car park,然後就去番酒店check out........
今日嘅行程,原本安排朝早先去五箇山,下午再去白川鄉,但老爺個狀態真係好唔掂
,而最主要係我地響香港帶黎嘅藥只係淨返兩日,D退消藥又無乜淨,再考慮埋跟手幾日我地都會響D鄉村地方過夜,驚到時搵醫生仲麻煩,所以我地就諗住今朝skip左唔去五箇山,橫掂都係睇合掌屋啫,響白川鄉都可以睇個夠啦,當務之急就先去搵個醫生睇下攞定D藥先啦,至少金沢呢度話晒都係城市地方,D醫生應該可靠D掛.........響酒店攪完check out手續,我地就請酒店職員幫我地搵下響附近嘅診所.......最後佢地幫我地搵左一間響金沢站上蓋嘅醫務所.......我地首先將D行李攞左去car park放響架車度先,然後就行去金沢站,一於體驗我地響日本嘅第一次,睇醫生~~
間醫務所響金沢站百番街四樓,叫 VieC........
入到去已經有六七個病人響度等緊,我地走埋去同個receptionist講話想make appointment.......頂!! 個姐仔又係口啞啞咁望住我地,又係唔曉英文
.......又話日本呢兩年積極鼓勵國民學英語,點解我地呢今日遇到嗰D小小英文單字都唔曉嫁!! 同佢地指手劃腳嘰哩咕嚕左一大輪,佢地就叫我地先坐低等下,我諗應該明白我地想點掛.......我地就係坐響呢個位等........
佢地俾左張form我地填,好彩張form附有D英文,都係填D個人資料咁,之後就繼續等
........閒來無事就周圍昅下.........原來呢間醫務所係一間綜合診所,除左內科,仲有乳線外科、皮膚科,婦人科呀咁.......個receptionist都無問明我地睇咩科,唔知會唔會分左老爺去睇乳線科呢??
等坐好耐,見身邊D人一個二個都被叫左入去D房,就淨係我地兩兜友一碌木咁坐響度,嘗試走去問D接待,但佢地D驚慌表現真係攪到自己好似黎睇沙士咁,問多兩次都無謂再問........等左差唔多大半個鐘,終於有個男人攞住我地之前填嗰張form走埋黎同我地講野,雖然佢一句說話十個字當中有九個半字都係日文,但總算有半個字係英文,但等左咁耐真係吹脹,原來係問老爺個名點讀.......攪咩呀,大半個鐘啦,仲係攪緊個名!!
真係,黎睇醫生啫,你理得我地個名點讀呢?? 之後又繼續等........又等左好Q耐,終於之前個男人又走出黎,帶我地入左去入面,原來入面好大嫁,佢示意我地入去其中一間房坐,間房入面又有幾間房嫁.........
等左一陣,有個姑娘就請我地入去一號房.......入面個醫生同我地打左招呼......原來日本D醫生嘅英文都唔係好掂,不過都叫做識D單字,之後我地就開始用多國語言,即係響日劇學番黎嘅日文單字、英語、同身體語言黎溝通喇.......
日本D醫生唔係用筆寫病歷嫁,全部電腦化........
就係呢位安田秀明醫師幫老爺睇病嫁~~
同安田醫師傾左十零分鐘,佢都好nice嫁,都問得好detail,我地同佢講想配多幾日藥,佢都好詳細解釋俾我地知有隻藥因為要食一個療程,所以要夾返日數等等......跟住我地就出返去外面等喇.........
呢張就係老爺嘅診証卡~
等左一陣就叫我地俾錢喇,診証費3,410円......
唔同香港,日本D醫務所係無藥俾嫁,佢地會俾藥方病人自己去藥房配藥.......
咁邊度有藥房呀? 個姐姐講左個名俾我地聽,話二樓就係.......落到去一望,哈哈,原來係我成日都好鍾意逛嘅 Matsumoto Kiyoshi!!
平時次次黎買化妝品日用品都唔知原來呢度係配藥嘅地方........
真係唔黎配藥都無留意有個咁大嘅配藥counter喎~
俾左張處方佢地,就響旁邊等.......原來配藥嘅area都幾大,有sofa俾人坐住等,旁邊仲有得俾人量血壓嫁.......
仲有免費咖啡綠茶烏龍茶任人飲!!
藥房咁體貼,我地無理由嘥左人地D心意啫~~
呢D就係老爺嘅藥喇,要成五千幾円嫁,咁樣睇一睇醫生,用左成九千円,好貴呢!!
藥房隔離有間supermarket,老爺話要買返枝空氣清新噴霧放響架車度......Yeah!! 又可以乘機shopping下!!
好快速逛完個supermarket,我地就返去car park攞車,正式開始自駕遊
........合掌屋,我地黎啦)))))(待續
)
呢D經驗真係無好過有 而家睇咗妳篇blog衰D講句下次我知點睇醫生啦 多謝寶貴資訊
回覆刪除[版主回覆05/16/2010 10:39:00]唔駛多謝,呢D野十年唔逢一次,咁嘅經驗睇怕都無邊個想有,難得試過就同大家分享下,我地今生今世應該都唔會再有咁嘅機會嫁喇
亞大姐,你話人哋唔識英文之前,有冇檢討過自己啲英文發音先? 人哋大和民族,學嘅係日式英語,你哋嗰啲係英式英語,咁就肯定溝通唔到啦 就算佢勉強聽得明你講乜,到佢同你講英文,你咪又係聽唔明 ... 算把啦 我之前跌咗銀包去報警仲頂癮呀!佢一見我攞外國passport,四個警察就不停咁圍住我講佢哋啲英文,我直頭覺得自己去咗火星呀 結果最後咪又係講日文埋尾 唉 ...
回覆刪除[版主回覆05/16/2010 10:45:00]咁又係,你講得啱,佢地D英文發音真係好怪,都係自己學藝不精,唔好怪人,以後唔再爆粗,有失儀態
好耐無同你傾計喇! 咁我上次亞妹睇牙醫又照兩次x光, 又做治療, 只收我哋 3000 yen 真係超平呀!
回覆刪除[版主回覆05/16/2010 10:48:00]好耐無見,一陣去探下你........3000 yen!! 牙醫唔係應該仲貴D嘅咩?? 係咪北海道睇醫生平D嫁??
日通 ?仲要係仙台,果d鄉下地方,最後佢地打電話落東京總部,搵我同我講英文咯~ 架車又舊,明明Book Non-smoking car, 點知成架車都係煙味,叫佢地換,又唔肯,淨係肯幫我地即刻做果d五分鐘除臭咋~ 所以,由果次開始,小寶寶落左order,一定要Toyota~ http://picasaweb.google.com.hk/bennypang/200702#
回覆刪除[版主回覆05/16/2010 10:59:00]我地上次去北海道都係book Toyota,個service都係好D,老爺都話以後book Toyota算~
sorry~ 睇錯添~ 你地book 日產,唔係日通 Nippon~
回覆刪除9000 yen 睇個感冒又真係幾貴, 但啲藥有冇效呢? 回來有冇claim番保險?
回覆刪除[版主回覆05/16/2010 11:02:00]D藥OK嫁,食左兩日都有好轉......無claim呀,返黎原本都諗住claim, 不過你知啦,返黎整下整下就唔記得左啦
雖然話就話日本人啲英文好0左,其實都係假象,識英文果啲一係外地留學生(即係唔係日本人),一係就啲遊客區,有時住啲唔出名0既商務酒店,啲接待員都可以唔識英文,問妳死未 !
回覆刪除係外地睇醫生都係一個特別經驗,不過要成九千円因為妳地唔係本地人啫,其實妳信得過去藥房買藥都ok,大部份藥都分0左類而且有漢字唔難明,再唔係妳去柜面找人,用"身體語言"佢都幫到妳 。
[版主回覆05/16/2010 11:13:00]我諗係囉,本地人D醫藥費無理由咁貴,平時去藥房買藥都係聽人或睇雜誌介紹先去買,聽你講,下次真係要研究下先得~
原本係咁樣睇醫生, 不過真係好貴......
回覆刪除[版主回覆05/16/2010 11:13:00]係啦,9000 yen!! 肉赤死~~
我哋係 Toyota Fans ,所以未試過其它租車公司,乜金沢日產服務咁差,夾硬要人硬食吸煙車,其實有無可能屈佢地 upgrade 架車?
回覆刪除咁樣係日本睇醫生,有無得 Claim 返保險嫁?
[版主回覆05/16/2010 11:21:00]如果要屈埋佢地upgrade架車,我諗講足一朝都攪唔掂.....
應該可以claim返保險,不過我懶囉,返黎拖下拖下就唔記得左 .....而家響度提起,老爺睇見一定俾佢哦死.....
你呢個臨時行程又貴又特別, 呢個體驗一次就夠, 去旅行病真係咩mood都影響, 睇醫生之餘都不忘影相, 果然係你 , 連入到醫生房都影一張, 應該同醫生影張合照嘛
回覆刪除[版主回覆05/16/2010 11:25:00]咁我鍾意咩九屎垃圾都影一餐嘛,如果唔係點影幾千張相返黎 .....後尾講返我地都話應該要同個醫生影張合照,不過人地專業人士又好似唔係幾好意思咁囉~
最憎煙味
回覆刪除[版主回覆05/16/2010 11:26:00]係囉,臭到死
咁佢食左藥有無好D呀? 佢仲要做司機喎! 辛苦晒!
回覆刪除[版主回覆05/16/2010 11:28:00]D藥OK嫁,食左兩日都好返好多.....係呀,所以每次我發完脾氣都唔係幾好意思
佢要做司機 , 睇睇doctor 都係好~
回覆刪除[版主回覆05/16/2010 11:31:00]係囉......但咳幾聲就用左成萬yen.....
以後唔再爆粗,有失儀態
回覆刪除你話我呀?
[版主回覆05/16/2010 11:32:00]Hehe....我同你共勉啫~
你租車真系多災多難, 系九州都系租日產, 個店員好禮貌到不得了, 又識英文, 我地系架車攪個GPS, 佢到見我攪做好耐, 之後都出來幫我地攪, 笑晒口送我地走, 到東京租萬士得都好好, 雖然英文唔得, 禮貌搭夠, 日本的診所真系好乾淨, 香港個D都好學下
回覆刪除[版主回覆05/16/2010 15:33:00]其實都應該係啱啱遇著剛剛啦,咁啱兩次都唔順利......日本D診所真係OK嫁,成個畫廊咁,又大,同埋最唔同嘅係無大陣藥味,感覺無咁cool囉~
piggybread : 車到咁 , 又真係幾黑仔喎 , 部車對咁多日 , 真係好重要架 , 嘩 ~ 3仟幾Yen 又5仟幾Yen , "日本" 睇醫生勁貴呀 . 不過最緊要係有料到 .
回覆刪除Bye Bye !
[版主回覆05/23/2010 22:14:00]係囉,肉都赤埋,不過好彩都叫醫得好......
我上次租toyota就好好服務, 跟住租日產又係把鬼, 個人又無同我地講附近0既油站早收, 等我地6點還車時搵唔到車站要入佢地d貴油, 真係激死!!
回覆刪除嘩....原來係日本睇醫生噤貴架, 有無買保險claim番呀???
[版主回覆05/23/2010 22:13:00]保險當然有買,不過返黎唔記得claim.......唔該大家唔好再提,已經俾人丙到飛起.......