Dinner @ 沃川自家料理

早兩晚我地去左尖東呢間沃川食日本野，其實都好久無寫飲飲食食，不過見係補祝紀念日就做返個record 啦.....Hehe，係補祝呀，因為正日嗰日大家都唔記得左，過左幾日忽然先醒起，哈哈~~

呢間小店響南洋中心二樓，夜晚商場比較冷清清，不過呢間食店都幾多客，我地七點多去到，坐左一陣都full 晒~

店舖唔算好大，坐位十多個，另有bar枱，同埋四間tatami房 (min. charge $1,500)，有d 居酒屋feel~

一坐低女侍應就會奉上熱茶同一碗枝豆，不過呢個枝豆係要計錢嫁~

睇下食乜先.....

除左基本menu，個女侍應同我地介紹當日店長推介，佢介紹得都幾詳細，但又唔會係好hard sell 嗰種，感覺幾舒服......當日推介好多樣野都好正咁，樣樣我都想食呀，不過價錢都唔平囉......

落左order，老爺就話今日無揸車，不如飲d 酒......我想飲梅酒，個女侍應就介紹左隻宇治茶梅酒，果然有淡淡茶味，幾好飲~

老爺揀完一輪最後都又係揀返玉乃光，明知都仲係要俾人賺double價錢，唉!

等左一陣，正野黎啦，先上日本紅衫魚，呢個比較淡味，同埋肉質較軟身，配食店自家調制嘅醬汁，少少酸味，唔錯

呢個係半條胡麻鯛，肉質較紅衫魚有質感，同埋魚味濃d，好味......不過師傅刀功好似一般喎，竟然有骨，比較失敗

呢個係柚子鹽燒白鱔，柚子味就唔係好覺有，但個魚燒得好香口，好好味呀

兩個時令刺身送魚湯，我地加左稻庭烏冬煮，個魚湯好鮮甜，烏冬好滑溜彈牙，正!!


另外一個我地無要魚湯，加錢改左炸魚頭魚骨魚尾，嘩! 好香脆好好味呀!! 我地連魚眼都食埋，真係一條骨都無淨

呢個牛舌同雞軟骨串燒都ok啦~

本來我地仲想叫個壽司拼盤，七款壽司x2，只係$168，好抵食喎......點知忽然收到細妹whatsapp通知兩個鐘頭內會掛八號風球 (頂! 又係夜晚掛，一d 著數都無!)，唯有作罷，不過其實都已經夠飽......

當然最後都要食埋甜品先走，職員特別推介柚子sorbet同菠蘿sorbet，我地揀左柚子，柚子味好濃.....個賣相好可愛，真係一個柚子入面塞滿晒sorbet嫁，咁菠蘿sorbet係咪都係用成個菠蘿呢? 如果係咪好抵? 哈哈

另外一個綠茶雪糕，又係好正!


食飽就閃人.....出到外面果然幾大風，條街好多人呀，仲多過平時，唔知係咪個個趕住返屋企，火車都幾乎迫爆，返到屋企就啱啱改掛八號，真無癮，今年d 風都無乜著數俾到我地，第二朝又要一早爬起身返工，唉!!