2011年2月北海道道東道北12日 - 玩到不亦樂乎嘅 Alpha Resort Tomamu

2月26日 - DAY 8 (PART 3)
Alpha Resort Tomamu


響房間放低d 行李，係咁意望左下酒店職員留俾我地關於酒店嘅資料，時間無多，我地就急不及待離開酒店衝出去玩 lu.......

Alpha Resort Tomamu 係一個大型嘅渡假村，hotels 都有三間，分別係Galleria Tower Suite Hotel, The Tower & Villa Sport，我地今次揀左位置最偏嘅Galleria Tower.......


村內有各種activities，冬天唔駛講當然有得滑雪，仲有dog sled, snow mobile, snow shoe, spa 同室內泳池等等，每個zone 個距離都好遠，不過就有free shuttle bus 接送.......我地首先當然係衝去Polar Village 玩snow mobile 先啦.......不過我地掛住趕，之前又無做好researh，落到去lobby 見到有shuttle bus 就盲中中上，一心諗住第三個站就係Polar Village，落左車係見到好多人拎住d snow board 走來走去，但點解唔見玩snow mobile 嘅地方嘅? 問下人，吓，原來我地去左Resort Centre，呢度係去玩ski 嫁......雖然老爺都好想滑雪，不過因為我無興趣，而且時間唔夠所以今個trip 都無預俾佢玩ski.......去錯地方唯有再等shuttle bus 啦，呢度d shuttle bus 原來係有分左右兩個方向，其實每個車站都有time table 指示，不過頭先我地太趕一見車就上所以無留意

下一班車係15:04.....話就話有shuttle bus 好似好方便，但班次都要成20分鐘一班，miss左一班都好嘥時間~

由Resort Centre 去 Polar Village 要7 分鐘......去到靜俏俏，比想像中冷清.......


Centre 入面有好多種size 嘅頭盔......我地想玩嘅snow mobile & banana boat 都要帶頭盔嫁~


Snow mobile 分short course (3150円 for 5 km), touring course (4200円 for 8 km) & long course (5250円 for 10 km) 三種，而 Banana boat 亦有分exicting course (1575円 for 1.5 km) & touring course (2625円 for 3 km).......其實都幾貴，兩個人玩左唔夠一粒鐘咁就無左萬幾円! 不過唔緊要啦，出外旅遊就預左要洗錢啦

 

首先玩banana boat，我地揀左 3km 嘅 touring course.......兩個人一隻boat，個guide 響前面揸住架snow mobile 拖住我地隻boat，佢開得好快呀，仲要不斷左左右右咁片來片去，我地隻boat 就跟住佢個方向左搖右擺，佢好似玩緊飄移囉，有好多次好似甩尾咁，我好驚一個唔覺意鬆左手會飛彈出去呀!! 以前去泰國都有玩過banana boat 但都好似無咁驚......唔知係咪太緊張太用力揸實個扶手，好攰囉，同埋成日驚會飛出去，成個過程都唔算好enjoy

Banana boat 轉一圈好快就玩完，之後就玩snow mobile，因為一開始唔知我玩唔玩得掂，所以我地揀左中間嘅 touring course.......一人一架車，個coach 會首先約略簡介一下部車嘅操作方法同要注意嘅事項好似車同車之間距離咁......講解完教練就叫我坐上車試下 (唔知點解佢只係叫我試老爺又唔駛，或者佢一睇就知我成舊飯咁)......好緊張呀，果然我係手腳嚴重唔協調，一踩腳掣就彈前然後就死火，試左兩次都係咁，瘀爆!! 個coach笑笑口叫我唔好咁緊張，又再由頭教我一次，老爺對眼反到上天，佢話人X無藥醫......哼，咁人地真係好緊張嘛........其實都係控制個腳掣同手掣啫，都唔複雜，我再試多次就叫OK啦......之後就正式開始嘞，我地排成一直線，個coach 排第一，我排中間，老爺就殿後.......一開始個coach都唔係開得好快，我諗佢係就住我啦，不過無耐我已經熟習晒，開始嫌佢個速度慢添.......


熟習左之後真係覺得好好玩呀!! 我地響瞭闊嘅雪地上奔馳，沿途又可以欣賞下雪景，個感覺真係好正，我最鍾意係上一d 小斜坡，因為衝落去嗰下真係好過癮，有時又要掟彎，呢個時候就要將個速度略為減慢，我試過專登唔減慢個speed，嘩! 差d 飛左我出去，好刺激呀!! 老爺都讚我叻女呀，佢話響後面由初初見我蟻爬咁真係幾乎瞓著，不過好快就見我好勇佢幾驚我開得太快轉彎收唔切會抄車喎，哈哈

去到中途個coach 就會停低俾大家休息下影下相，佢仲會同我地影合照.....

休息嘅地方風景都幾靚~

雪山前面一紅一綠兩棟buildings 係酒店The Tower，後面遠d 嗰兩棟就係我地住嘅 Galleria Tower~

Hea左一陣我地就繼續飛馳，我仲專登將同個coach 嘅距離拉遠，然後一下子加速追前，超爽呀!! 成個tour大約玩左30分鐘就玩完，好正呀，早知就玩long course 啦，希望將來有機會再玩過啦!!


返去Polar Village 交還返個頭盔後我地就去搭shuttle bus，下一個目的地係VIZ Spa House~

未有車周圍昅下.......天氣報告，而家室外氣溫係-5度


又見到 The Tower，呢兩座野都幾型~


等左一陣就有車，大約7、8分鐘就去到.......VIZ Spa House 係一個室內溫水泳池，佢嘅好玩之處除左定時有人造浪外，仲有個jet spa cottage 有唔同款式嘅jet spa & jacuzzi，同埋露天風呂「木材之湯」.........


當然又要收費啦，每人2500円，價錢包浸埋個露天風呂~


既然係泳池當然要自備定泳衣啦，響更衣室入面有locker，可以放衣物同貴重物品，每人有張locker card 要寫上自己個名嫁~

換好衫就衝去玩lu......響更衣室入面有大量大小毛巾供應，而泳池邊亦有個細細嘅rental store，有好多水泡、浮床租借......

我地租左一個黃色大水泡，600円，個水泡好大好重，我索性坐上去當浮床玩......有人話當我坐左上去響水上面飄浮時好似航空母艦出巡咁......


成個Spa House 四面都係透明玻璃，環境優美而開揚.......個pool 好大，隔一段時間仲有人造浪，好好玩，我地玩左好耐!!

玩得攰可以去旁邊嘅沙灘凳休息下~

小朋友可以玩水上滾筒.......


我都好想玩，不過實在唔好意思同d 小朋友爭玩


最初我地唔知除左swimming pool 仲有個jet spa cottage，後來老爺去完toilet 返黎見到即刻叫我轉移陣地......個jet spa cottage 響另一邊，要通過一條水中長廊...... 

Jet spa cottage 有好幾款按摩設施，真係有排玩.......


呢個水柱用黎按摩肩膀好鬼正!!


同老爺一人一格一邊浸一邊按一邊傾下計，好正呀!!




有個cool vibration.......


Wow, 凍到飛起!

 

我地響 Jet Spa Cottage 消磨左好長時間，真係疲勞盡消.......玩到開始天黑我地先至捨得過返去 swimming pool 嗰邊....... 

返到去又遇返 wave time.......good 呀，又沖下浪先.......




玩到差不多時間忽然醒起仲有個露天風呂未去玩，怕蝕底嘅我當然唔會放過，拿拿聲同老爺分道揚鏢去浸下個雪景溫泉先.......

(Photo from offical web site)

「木材之湯」分男女，內裡設備都好齊全，除左望住雪景嘅浴池，室內有休憩室，有按摩椅 (好似要俾錢) 同sauna room，不過我地酒店房自己有個私家小型sauna room 所以都無響度焗........個溫泉池就一般啦，無咩特別，佢其實唔係天然溫泉，只係引山上地下水再加熱而成，呢個trip 我地已經浸左好多次唔同特色嘅溫泉，所以對呢度都完全無expectation，而且好多人一齊浸有d 嘈囉，再加上天已經黑晒望出去都睇唔清個雪景......浸溫泉都係諗住唔好蝕順手浸埋啫，所以浸左一陣我就出返去同老爺會合再玩多一陣個pool lu........

真係玩到不亦樂乎，終於我地響呢個VIZ Spa House 消磨左兩粒鐘先捨得走........

時間飛逝，唔覺唔覺已經接近六點半，真係玩到唔知時候，夜晚仲有好多地方要去，拿拿林去沖身換衫趕下場啦!!

(...待續)