2011年2月北海道道東道北12日 - Dinner @Hal & Chapel on the Water Tour

2月26日 - DAY 8 (PART 4)
Alpha Resort Tomamu

響 VIZ Spa House 玩到唔知時間，突然見外面天色已黑晒先醒起我地仲有Ice Village 未去，同埋好鬼肚餓要去食dinner，於是就拿拿聲搭shuttle bus 返去酒店放低d 野......本來為左慳時間可以直接搭車去餐廳，但因為我唔記得帶兩張dinner coupon 出黎，所以要返去酒店攞返，咁樣一來一回又嘥左半粒鐘........


返到去酒店就check 下邊度有野食，resort 入面有幾間餐廳，我最想試嘅當然係我地酒店頂樓 "Platinum" 嘅法國菜，不過我地無做reservation，而且最主要係用free coupon 要加錢，所以一早老爺就已經ban左，叫我揀過第二間.......之前幾晚都係食日本料理，今晚就轉下口味，好想食buffet，有一間 "Nininupuri" 一向聽人講話個森林view 好正，而且係食buffet，啱晒! 點知原來成個星期都close，殘念.......再check 下就只有響 Hotel Alpha Tomamu 嘅 "HAL"，望下錶時候不早，於是就又拿拿林搭shuttle bus 趕過去.......

去到餐廳門口但見人頭湧湧，好多人啊! 個個都等緊入坐，走去留位個receptionist 話起碼要等半粒鐘，當堂暈一暈，我地原先諗住食完dinner 後要趕去Ice Village 同Chapel on the Water，而家要等咁耐，真係邊度都唔駛去.......

老爺話一係試下去第二處食，好似響 The Tower 就有 "Yukku Yukku" 係食意大利餐 同 "三角" 係食日本餐，但我地又擔心去到唔知需唔需要等位，而且好鬼煩又要搭shuttle bus，頭先我地搭shuttle bus 黎嘅時候超多人排，食飯時間個個都係去呢幾處地方，連搭shuttle bus 都要排，如果而家再去等shuttle bus 睇怕去到 "HAL" 呢度都有望食得，所以最後我地決定都係留返響度等~

無無聊聊周圍影下相.......望落去餐廳都有吉位啦，點解唔俾人入去呀??

響等緊嘅時候，我地就趁機籌謀一下今晚嘅行程.......本來我地打算食完dinner 就先去Ice Village 逛下然後再去參觀安藤忠雄嘅水之教會........Ice Village 響Villa Sport，即係剛才我地玩過嘅VIZ Spa House 附近，夜晚十點close，而水之教會就響我地身處嘅 Hotel Alpha Tomamu，期間限定每晚九點至九點半開放俾公眾參觀......我地估計響度食完dinner 最快都要八點半，去Ice Village 要搭shuttle bus，來回需時，點都無辦法趕得切九點返到黎join 水之教堂嘅tour，所以只能夠二擇其一.......最後老爺決定唔去Ice Village，佢對安藤忠雄嘅水之教堂興趣大d，而且前一晚我地已經去過然別湖嘅Ice Village，雖然Tomamu 呢度個Ice Village規模大d，不過都係大同小異，如果我地唔去Ice Village，亦可以唔駛趕頭趕命響度慢慢dinner......無得去Ice Village 我當然有d 唔開心，不過老爺嘅分析都好啱，佢話個Resort 咁大，反正仲有好多野今次未玩得晒，咪留返下次再黎玩過囉，聽佢咁講我當然ok 啦.......可惜言猶在耳，到而家已經接近兩年，我地都仲未有計劃搵個冬天再去北海道，連出年二月往常多數會去嘅大旅行老爺亦都ban 左唔去，真係唔知何年何日先可以再黎Tomamu.......果然男人講嘅野係信唔過嫁!!

等左半個鐘終於有位，餓到暈.......


我地被安排坐面向窗口位，對正水之教會~

唔欣賞外面景色住，拿拿聲出去搵食.........


d人多到嘔!!!!......呢碟魚生，排左十幾分鐘!!


呢d 啡色啫哩狀物體唔記得係乜，不過幾好食~

有占小牧出產嘅北寄貝........ 

都幾大隻~


整返個北寄丼先........




呢碗野都等左十分鐘


呢間野都幾多野食，味道整體都ok 唔錯啦，不過真係超多人，每樣野食都要排，真係食到媽媽聲!

實在太多人，後來老爺索性一隻碟攞一大堆費事走來走去~

 

食左一個鐘人潮先開始小返d，再有機會黎呢度真係最好避開七至八點半呢段時間~


甜品都有好多揀.......


呢餐食得真勞累，仲要因為等食而唔夠時間去Ice Village，我唔食返你夠本我真係枉為人





呢個雪糕好好味

 

一邊食一邊欣賞外面景色真係唔錯~


差不多九點我地就離開出去lobby 等集合去睇水之教會，好多人一齊等呢........

  

九點鐘就有職員帶住我地出發........穿過酒店又乘搭電梯落basement，之後就要行過一段雪地路，應該係我地頭先食dinner 時望出窗外嘅地方，現場睇綴滿燈泡嘅樹真係好靚，不過要跟住大隊行所以無停留影相........之後就到嘞，呢個方盒形構成嘅skylight 都好型

 

 入到去禮堂入面大家都嘩一聲，真係好靚呀!!

落地大窗外面係被燈光映照嘅樹林同十字架，本來係一片湖水而家都被白雪覆蓋......燈光掩映下好有一種安靜神聖嘅感覺


大家當然不斷咁影相......
 

 

焦點一定係外面嘅十字架~

 

大家都好有默契無靠近窗邊，如果個個都走晒去前面就會阻住其他人影外面景色.........日本人真係好自律，好老實如果呢度係強國地方唔知又會係乜野狀況


真係好多人~




真係有本聖經呢......教堂嘛，果然似模似樣~


參觀完遊人就陸續離開，我地可以慢慢影返沿途嘅景色~


 

 

樹後面嘅building 就係剛才我地dinnner 嘅 "HAL"，我地就係坐響其中一面窗後嘅位置~


樹木都綴上燈飾，好似聖誕樹~




行到返Hotel Alpha Tomamu 等shuttle bus，周圍影下相........


可愛嘅木公仔


一邊牆上掛左好多水之教會嘅相片.......

 

夏天時教堂外係一片湖水，十字架響湖中佇立，好美~






Ice chapel......我地唔夠時間去，真可惜!






返到去酒店已經十點幾，今日玩得真開心，不過活動左一個下午到夜晚真係有d 攰，當然第一時間衝去jacuzzi 放水浸返個暖水按摩浴先啦........

個jacuzzi 好大，兩個人好鬆動


著左燈光嘅浴池將d bubbles 睇得好清楚，好靚呀~

 

老爺當然唔放過個私家sauna room 啦，兩個人一齊焗都唔會覺得迫.......不過要預熱間房都等左好耐時間

浸完焗完亦係夜宵嘅時間.......




飲飽食醉，臨瞓前又再浸多次個jacuzzi，唔好蝕呀!! Relax 過後就去瞓返個靚教.......第八日又搞掂!!

(...待續)