2013年2月東京伊豆6日無景點好hea 之旅 - Part 1

停左一段時間無update 個blog，呢幾個月實在太忙，忙住去玩呀!! 自從去年十月頭去完日本四國返來，好似都無點停過，六個月內已經外遊左四次，快樂嘅時光實在過得太快，不過d 遊記就愈堆愈多，終於月初去完德國「大旅行」返來，外遊總算都要告一段落，而家又可以專心寫返遊記.......趁記憶仲新鮮，拿拿聲寫返二月嘅農曆年合家「親子遊」先~

近呢兩年我地都習慣每年農曆年假同老媽子出外玩下，最初因為驚佢唔係好行得，早兩年我地都係跟旅行團，不過對於慣自遊行嘅我地，跟團嘅模式始終唔係咁啱feel，所以今年我地決定同媽咪黎一次日本自遊行，一於等佢體驗一下我地往常係點樣自己搵食搵住呢度去嗰度去享受人生樂趣啦!

今次成個trip 都好hea，話就話去伊豆，但d 著名景點我地全部都無去.......一直都想同老媽子浸下溫泉，所以搵左兩晚住溫泉旅館，不過佢老人家係一個好傳統嘅中國女性，叫佢光禿禿同其他女人一齊浸浴，打死佢都唔肯，所以兩晚嘅旅館房間都有私家溫泉，等佢自己赤條條響房浸個夠~

今個trip 話就話去六日，但其實頭尾只係得四日......Day 1 去到成田機場都已經八點幾，過海關時真係超超超多人，唔知係咪因為係除夕夜個個都出去避年，成個hall 塞滿晒人，個蛇餅真係打左好多轉，蛇年啫，都唔駛一黎就送條蛇俾我地歎......排左一陣但見條龍郁都唔郁，咁搞法唔掂喎，好在呢個世界有樣野叫家有一老如有一寶，我地就搵左個職員問佢老人家係咪可以有priority pass，佢即刻示意我地跟佢行，我地滿心歡喜啦，點知個職員只係帶我地行前左一小段人龍然後叫我地打尖......又排左一陣我地眼見個等候時間起碼仲要多45分鐘，但距離最後一班開出嘅Narita Express 只剩15分鐘，如果搭唔到呢班車就麻煩，機場巴士一早無晒，雖然仲有skyliner，但拎住大件行李真係唔想要老媽子同我地走幾轉車囉，於是我地又再出動皇牌又搵過另一個職員問，今次呢個職員終於叫我地去排priority 嗰條隊......真係好趕，過完關攞行李再衝去買埋車飛，去到月台只差兩分鐘班車就開lu

今次來回新宿同機場我地都係搭Narita Express，所以就買左N'EX & Suica 套票，5500円包來回車票加一張2000円嘅Suica~


去到Sunroute Plaza 搞掂check in 已經十一點半，不過夜慣嘅我地當然掉低老母走左出街逛，行下便利店都好嘛，之後仲響街邊大排檔食埋個拉面先捨得返酒店~

 

DAY 2 朝早個個攤C 唔願起身，終於搞到差不多十點先出門口，頭兩晚機票酒店package 唔包早餐，於是要出去搵食，平時外出我地乜都可以食一餐，但同老媽子去就要有所揀擇，最主要係佢上落樓梯個膝頭會痛，平時真係無特別留意原來真係好多食店係要上落樓梯，最後我地響車駅搵到間Cafe 食左個都好貴下嘅早餐

食飽後就去買定之後三日去伊豆嘅關東地區通票，原來呢個車票只能夠響新南口個ticket center 先有得賣，新南口嗰邊又做緊大型工程改晒d 路，走來走去搞到我一個早上未去逛街已經好攰

呢個通票真係好抵，8000円任搭三日，範圍去晒成個關東地區，由新宿去熱海一程車都要五千幾円啦，真係愈去得多地方愈有so呀!!

搞掂晒就開始 day 2 嘅行程嘞.....well, 其實係無乜行程嘅，只係打算去skytree 逛下，由新宿坐地鐵去轉一程車大約半個鐘，不過我地搭錯車(haha!!)，最終搞到十二點幾先去到

 

呢個skytree 都已經開左大半年啦，不過仍然勁多人，再加上我地去呢日係星期日，我地睇見條黑漆漆嗰條人龍已經唔想上去，當然去shopping 好過啦，不過去之前都係食返個lunch 先，其實距離早餐時間都唔係好耐，一d 肚餓嘅感覺都無，只係想搵個地方俾媽咪坐低休息下啫......skytree d 食店好似任何時間都塞滿人咁，但見呢間唔駛點等就走入去食下松阪牛啦~

 

食完就去shopping 嘞，skytree 地方真係好大，不過d 野都唔係真係咁啱買，逛左成個下午我都只係買左件衫同埋小小野食咋

之後就返去新宿，逛左一日老媽子已經好攰，所以我地就決定由佢響酒店休息下，我地出去趁百貨公司七點後割引買d 野食返去酒店開餐啦，又可以乘機shopping一下

Yum Yum!!

 

 

DAY 3 正式開始我地好hea 溫泉之旅......由新宿去伊豆每日有一班直通車，9:25開，中間唔需要響東京駅轉車，方便好多......

5號月台，同去成田機場一樣~

特急踊子號

始終唔係去伊豆嘅high season，人唔多，兩隻bear bear 都有位坐


開車後就食早餐lu.......車駅便當，我地專揀d 可以自動發熱......

示範俾老媽子睇點樣拉條繩就會加熱，佢覺得好新奇，猛咁響度讚日本d 發明，哈哈!

 

食完野又睇下 Train Shop.....


假髮帽......日本人真係咩都諗得到!

瞓下傾下，11:15就到左伊東啦~






觀光案內所就響車站對出右手面


雖然話係無景點之旅，不過睇地圖見車站附近有個伊東公園，順手都過去睇下......

不過冬天時節乜花草都未開，成個公園都係枯木，無野睇，仲差過上次熱海梅園都仲有小小紅葉，所以影左幾張相就走人~


無咩好做就逛下條溫泉商店街.....

 

嘩，呢個公眾浴場，有無人會想去?

逛左一陣我地又去食野，呢個遊記無景點之餘成日都只係record 去食野......行行下見到呢間標榜係鮮魚商，一於走入去試下啦~

我地叫左幾個地魚刺身定食，d 魚生片都好新鮮，唔錯~

仲可以揀白飯或者壽司飯嫁~

呢個地魚刺身+ 金目鯛定食真係好正，而且唔貴，1800円，正!!

條鯛魚都好大條，用醬油煮一樣咁鮮味，媽咪好鍾意......金目鯛果然係名物，第二晚我地食刺身，依然好好食!

金目鯛好好味呀!!

 

食飽飽就繼續逛街......無乜景點其實都幾寫意，哈哈

好多商店門口都擺放呢d 金目鯛......


仲有呢d 唔知係乜~

 

可愛嘅渠蓋


條溫泉街有七個七福神像散落響街嘅角落，不過我地搵極都欠一個搵唔到~
 

逛完溫泉街湯之花通，緊接住有條商店街，不過d 野唔係咁啱買，好快行完~ 

慢慢逛終於行到去松川，河畔兩旁種滿櫻花樹同松樹，相信櫻花滿開嘅時候一定好靚

 

行過松川好快就到左我地今晚住宿嘅酒店ホテル ラヴィエ川良........都未行到去門口已經有兩個職員走出黎招呼我地~

 

酒店lobby 都好大~




搞掂好check in 就上房......

最高興 toilet 有埋洗手盆......

 

仲有tissue, good 呀!


睡房好大，三個人瞓綽綽有餘，一張大雙人床加一張好闊落下嘅單人床，瞓四個人都夠.......


不過我覺得如果有埋個電視就仲正囉~


有個pantry


呢間客室都真係幾大........

有兩個雪櫃，一個響pantry 嗰邊，吉嘅，下面呢個就響客廳入口，仲要有道門分隔......

不過無野贈送，d 野飲全部要計錢

西式客廳


大TV


日式客廳




有閉路電視睇到門外情況，不過除非好似我地咁book 兩間房，如果唔係有邊個會到訪按門鐘?


陽台
 

未見過咁長嘅陽台~


睇到伊東市同遠遠嘅相模灣海景~


陽台仲有個避難所.......

一揭開個蓋d 風好勁......差錯腳好易跌死喎

 

另一邊係washroom........

有個私家sauna 房......


空間雖然只夠容納一人，不過都好ok 啦，焗sauna 啫，咁多人一齊做咩喎......我地焗左好多次


內風呂


外風呂


個展望露天風呂都幾大，兩個人一齊浸都ok

由客廳嗰邊望過去外風呂......如果靠近玻璃欄杆浸浴其實係會俾人睇到你赤條條嫁
 

 

今個trip 我地會住兩晚溫泉酒店，咁多人d $$ 當然要慳住洗，第二晚住下田會豪d，book 左兩間露天風呂附客室，而今晚就只book 一間，另一間普通房就安排響隔離.......


做booking 時係話8疊......


但好似都幾大咁，唔通upgrade 左?




有bathroom，整體設備齊全而且乾淨企理.......呢間房價8900円一位一泊二食，我覺得好OK 喎，最過份係仲平過新宿Sunroute Hotel，離晒譜!!

 

酒店有送coupon 下午13:30 至 17:30 可以去大堂免費飲杯野，我地當然唔會放過

 

酒店大堂近休憩區有Doctor Fish 玩，500円5分鐘~

休憩區都好大.......


不過招呼我地嗰位阿姐d 態度就認真麻麻，個面口成個晚娘咁，我地俾d coupon 佢睇然後坐低，佢好不情不願咁走過黎企響旁邊，又唔出聲又唔俾menu 又唔話我地知有咩係free drink，面色黑過墨豆，響日本真係好少見到咁無禮貌嘅服務人員......其實當時都無其他客，佢都唔係忙啦，不過或者佢覺得我地阻住佢休息掛


為免麻煩，我地全部要晒橙汁......


最初我地以為呢位阿姐係針對我地，不過後來有其他日本客佢個面口都係一樣，咁即係唔關我地事，係佢個人嘅問題啦......做人如果日日都咁面口，睇怕佢嘅日子都過得好辛苦

飲完野我地d 後生嘅就出外逛下，由得老媽子自己一個人響房入面享受下泡湯嘅樂趣

伊東雖然唔大，都有d 名勝，就係響松川旁邊嘅東海館........




入場費只需200円，另外仲可以日歸浴，不過我地只係入去參觀下，泡湯當然返酒店慢慢泡啦~


一入去就係傳統日式中庭~




基本上展示好多唔同size 嘅古時客室間格~

 

外面就係松川，果然好多松樹

最頂層嘅展望台可以望到我地間酒店~


仲有好多史料同舊時相片

 

東海館曾經係溫泉旅館，平成9年結業，之後開放俾人參觀，而家仲可以俾人去浸日歸浴........

大門外有個手湯，唔浸日歸都可以浸下手暖一下~

返酒店途中發現附近有間超市，當然唔會放過入去掃一掃

返到酒店當然就去大浴場浸浸........ 

呢間酒店嘅溫泉設施都唔錯，除左大浴場同露天風呂，大浴場內仲有按摩池，另外亦有水柱按摩，俾佢沖擊下個膊頭真係好正，我同細妹輪流玩左好耐

(Photos from Hotel web site)

浸完浴搵埋老媽子去souvnier shop 逛下~


七點就去食dinner.......Book 呢間酒店時已經覺得房價唔算貴，即使嗰間露天風呂客室有內外風呂同sauna 房，一泊二食都係17900円一位，唔算好貴，所謂一分錢一分貨，最初我地就諗咁嘅價錢有咁正嘅客房設備，估計食物方面就應該相對麻麻.......點知真係估佢唔到，dinner 係食buffet，wow! d 野食種類超多呀，而且質數亦ok，單係食長腳蟹已經食回票價，我諗我起碼食左十隻

 

自己BBQ，又有得食又有得玩

 

有螺肉同帶子.......

 

我地連長腳蟹都攞黎燒下

熱食種類都唔少，不過掛住食好多無影相......

  

 

幾飽都要食埋生果同甜品嫁










本來我地個露天風呂客室package 有個特典係每人加 1000 円就可改響部屋食13 品之會席料理，仲會有鮑魚、金目鯛同地魚刺身，其實個價錢真係好吸引，不過因為另外一間房無呢個優惠，一家人無理由分開食，而且下一晚響下田嘅酒店都係會食傳統料理，兩晚唔同style 感覺又好d，所以我地都無加錢照舊食buffet，結果係無令我地失望，呢個夕食海鮮放題真係相當唔錯!!

結論︰呢間酒店住宿同食用都好ok，而且交通方便離車站好近，以咁嘅價錢黎講簡直係超抵呀!!

(...待續)