2012年12月東京熱海快閃72小時 - Part 2

12月14日 (星期五)
湯河原 > 熱海市 (熱海城)

浸完「獨步之湯」，我地就離開湯河原朝熱海進發.......大約二十分鐘就去到熱海，之前響一本日本旅遊雜誌睇過有間食店唔錯，響銀座町，所以我地響附近求其搵左個停車場泊低架車~

呢個係自助式停車場，即係泊好架車唔知幾多分鐘後就會自動lock 住你部車......
到離開想攞返架車時響呢部自助ticket machine 俾錢之後就unlock 架車嫁啦.......

一個鐘400円，都好貴啫，不過老爺話是但啦費事嘥時間周圍搵~

我地光顧呢間已經開業70年嘅小店寿し忠 (Tel: 0557-82-3222).......



午飯時間都無乜客人喎......

不過人小小都好，食得自在d，店員又招呼得殷勤d~

我地叫左一個特上壽司.......


以及一個地魚壽司~

師傅係咪整緊我地d 野食呢......唔該俾d 超級新鮮我地丫


等左一陣d 野食就嚟嘞.......我嘅特上壽司......

魚生片都幾新鮮，海膽就一般，整體唔錯~

老爺嘅地魚壽司......店員好細心，同我地講解每款係咩魚，不過佢都知我地聽唔明，所以又預備左張紙有齊每款魚嘅名嫁


個魚湯d 料都好豐富嫁


呢餐食得好滿足


食完就行返去停車場攞車，途經見到呢個locker 係賣桔，好搞野，咁樣嘅售賣方式真係第一次見，貪得意我地都買左一袋，100円一包五個~


攞返架車就去我地今日嘅第二個景點，熱海城 (Tel: 0557-81-6206).......

Carpark 500円一回~


熱海城響山上，由呢個角度望上去都幾靚啦，不過好似好細咁


對出就係相模灘~

呢個欄杆隻色好搶眼~

要行一條長長嘅石級.......

呢間屋仔個位置又幾得意~

上到山頂，第一眼望見個入口個感覺已經有d 怪怪，好似同一般去開嘅日本古城堡好唔同，老爺就問點解呢個熱海城咁新淨，睇落去唔似係歷史古蹟喎



呢種類似百葉窗簾點解好似咁現化咁嘅?


入場費要900円一位，都唔平喎......唔知點解今次去得咁急我又竟然記得響網上print 定左割引卷，每位減100円

我地首先上去頂層嘅天守閣展望台.........可以360度眺望成個熱海市~




真係一望無際，天氣晴天，藍藍嘅天同海，好舒服呀!

Zoom 埋去中間嗰度其中一座building 就係我地今晚入住嘅酒店嘞~

熱海港



遠遠呢個係初島.......

過d 係真鶴半島~
 

 

呢度夏天會舉行海上花火大會，相信會好熱鬧~

 

360度睇完熱海市，有時間可以去埋見晴茶屋食個日式tea~


落一層五樓有江戶體驗之間，可以著古時嘅衫體驗一下江戶時期嘅人係點樣生活......

好似試下擔屎桶

或者施展軟骨功坐入去呢頂轎......江戶時期d 人好嬌小啫


四樓有江戶之判じ繪........

係一d 畫謎，考下你嘅智力，d 日本人個個好有興趣響度遂幅畫估........日文我地當然唔曉，好快逛完~


呢度d 樓梯，好有五、六十年代feel........好明顯成座熱海城唔係咩歷史古蹟囉~

二樓係日本城郭資料館，展示左日本大部份古城嘅模型，好似大阪城、犬山城、名古屋城等等........


睇完先知原來我地去過好小古城咋，真係要加把勁密d 去
d 模型係用火柴做嫁，幾有型




仲有古時d 帆船~

逛逛下去到basement 忽然見到有個浮世繪秘畫館，年滿18歲以上先可以入去參觀........


Free 喎，當然順道入去昅下.......

嘩! 入面d 畫好三級呀!! 不過三級得嚟又真係好好笑，d 女人畫到成個男人咁，d 姿勢又超高難度，我地邊睇邊笑到唔停嘴，最衰唔俾影相，如果唔係影低俾大家笑下

(官方網頁圖片)

呢個熱海城真係好搞野，上返一樓仲超多野逛，首先有個仮裝寫真館，可以租借古代d 衫影相，下面呢個金鯱就係俾人騎住影相~

我知我唔應該笑，但中間嗰位造型真係好頂癮

(官方網頁圖片)

最特別係呢度竟然有個露天足浴.........

呢個響佢網頁標榜係海拔120米嘅足湯，可以遠眺伊豆半島，嚟之前都有dd 期待......

Well, 原來只係一個木槽裝住d 水.......


仲要做緊維修，叫人點走埋去浸腳呢?

呢個足湯已經夠騎呢，但更騎呢嘅係睇返d 相先知原來當時我地竟然買左條毛巾......真係無印象，買嚟做乜呢?? 事前諗住抹腳定係事後打算留念?

一座「古城」有足湯已經夠意想不到，仲有無料按摩設施(?!)........點解無啦啦整d 按摩椅俾人坐? 呢個熱海城真係令我地大開眼界

不過凡事兩面睇，雖然有d 騎呢，但亦可以話佢多元化，除左足湯、按摩椅、浮世繪秘館，仲有懷舊玩具體驗，甚至有無料乒乓波、遊戲機，小朋友嚟一定覺得好好玩~


唔少得當然仲有壳店.......當然! 即使幾騎呢嘅店我都可以有收獲

濕水變nude 毛巾，我細細個老豆老媽子年代嚟日本玩已經 "興" 買呢d 毛巾，真係長買長有!

唔知係咩茶，有得試飲當然要試下，不過好難飲

雖然呢個熱海城同我地想像中嘅日本古城有好大出入，但一座城堡計埋basement 共七層，每一層都有野俾人體驗同娛樂，我地響度消磨左差不多一粒鐘，800円抵啦!!

響熱海城旁邊其實仲有一個人形美術館，展覽各種西洋娃娃，不過睇完咁有創意嘅熱海城，老爺話頂唔順唔想再去睇公仔，而且時間有限，係時候去下一個景點熱海梅園~


(...待續)