2012年2月巴黎倫敦11日 - 夜遊香榭麗舍大道

12 FEVRIER 2012 (DAY 2 - PART 5)

離開協和廣場，我地繼續沿住香榭麗舍大道逛.......


入夜後香榭麗舍大道兩旁嘅樹著晒燈，車路永恆地塞滿車，連綿嘅車頭車尾燈一行白一行紅，將大道盡頭嘅凱旋門映照得異常美麗~


逛左一陣就去到大皇宮 (Grand Palais)......


大皇宮其實唔係真皇宮，只係1900年響巴黎舉行嘅世界博覽會而建嘅國際展覽館......夜幕下拱型嘅玻璃頂好靚~






呢度仲未close，不過我地無打算入去逛，只係響門口望下算........屋頂內部嘅金屬結構好有型


大皇宮對面就係小皇宮 (Le Petit Palais).......


其實我反而有興趣入去呢個小皇宮參觀下，呢度雖然同大皇宮一樣都係因為世界博覽會而建，不過而家已經成為一個博物館，收藏左好多印象派、浪漫主義等19世紀嘅作品，好想入去參觀，可惜呢度close 六點，又係無得入


大門嘅裝飾好精緻~




由大小皇宮中間嘅馬路向塞納河方向行就會見到亞歷山大三世橋........




仲見到巴黎鐵塔呀!!


無論邊一個角度欣賞鐵塔都係咁靚，可惜我地無帶腳架嚟.......老爺響度呻，尋日枝腳架揹足一日最終響凱旋門唔俾用，今日應該要用我又唔提佢帶，有人覺得我個planning 好差喎.......男人，其實只係識響度怨，唉!


亞歷山大三世大橋可以話係塞納河上最華麗最靚嘅一座橋.......




橋上嘅銅燈好古典~


橋嘅四角各有一根石柱，石柱上有造型唔同嘅飛馬金像，近距離睇真係好宏偉~~


金光閃耀嘅飛馬振翅欲飛，姿態栩栩如生




橋上仲有好多其他雕像，全部都好細緻，不過夜晚好暗睇得唔係咁清楚，可惜呢個trip 我地再無時間白天再嚟過，唯有又等下一次




對岸就係著名嘅傷兵院

塞納河嘅夜景真係好靚




愈夜愈美麗


離開亞歷山大三世大橋，我地又行返去香榭麗舍大道......


望下錶接近七點，係時候要搵個地方坐低食飯，大皇宮呢度有一個metro station，不過只係搭一個站就到我地酒店嘅 George V Station，真係搭又唔係唔搭又唔係，雖然已經好攰，但只係一個站又唔想浪費兩張t-ticket，一個站應該唔會好遠掛? 最後我地決定都係繼續行埋條香榭麗舍大道，去到酒店附近再搵餐廳醫肚~


行左半個鐘先去到酒店附近，好累呀!!.......搵左幾間餐廳，最後決定揀呢間食意大利菜，因為今日lunch 食得太貴，dinner 要經濟返d，響餐廳外嘅menu 見個價錢都幾合理，而且老板娘好落力sale 我地入去~




入面裝修唔係好grand 好高級嗰種，但氣氛唔錯幾自在，啱晒我地呢d 平民大鄉里




今日行左一整日，對腳攰到好似唔係自己咁，一坐低老爺就要啤啤佢~


另外又要左枝mineral water~


麵包又係任食......其實d 麵包永遠食唔晒，如果有得揀我情願要免費水好過免費麵包


先上starter，我地要左個mini salad，最初老爺仲擔心會好細碟，點知原來都好大份!


當然要叫pizza，呢間餐廳嘅signature dish，當然要試下~


仲有 pasta，都ok 唔錯~


老板娘好熱情，久不久走過嚟招呼我地，又幫我地影合照，仲要係唔同角度影左好多張，真係唔該晒佢~~


埋單47.1e，算係好經濟~


之後就慢慢行返去酒店，Sunday night 嘅香榭麗舍大道人流不絕~


返到酒店未夠九點，真係已經攰到隨時瞓得著，不過點都要食埋宵夜先


食完就早d 沖涼瞓教啦，養精蓄銳，聽日要暫別巴黎去我期待已久嘅Mont St. Michel 呀!!

(...待續)