PIGGYBREAD: 2014年9月瑞士塵世美11日

繼前年嘅英法、舊年嘅德國，今年嘅「大旅行」我地仍然係去歐洲，今次嘅目的地係瑞士......按往常習慣第一篇遊記我都會先來一個撮寫，同埋 show off 一下戰利品，不過瑞士物價實在太高之餘，實情係即使我想唔睇價錢任意地乜鬼都狂掃，當地亦真係無咩精品好敗，所以今次嘅戰利品數量絕對係歷史性新低

瑞士嘅風景真係好靚，我係飄零燕 fans，實在太鍾意阿爾卑斯山充滿童話色彩嘅小木屋，每睇見綠油油嘅草地同山坡我就好想好似凱迪咁除晒衫除晒鞋響上面打筋斗

.....不過我地似乎仍然唔能夠打破宿命，呢幾年每一次旅遊，重點景點都唔好天氣，今次亦都唔例外

，響瑞士十日大概只有最後一日係好天，最期待嘅馬特洪峰同少女峰更加只係能夠「驚鴻一瞥」，上 Matterhorn Glacier Paradise 竟然落大雪，而少女峰區亦都唔弱落足兩日雨

下面呢個咁完整咁靚嘅馬特洪峰只係響我地眼前出現左短短一個鐘，其餘時間，響 Zermatt 頭尾三日我地連個山腳都睇唔見不特止，連邊一座係馬特洪峰都分辨唔到囉

.....不過可以見到傳說中嘅 Golden Matterhorn 都已經好感恩啦

天氣唔好，講真除左無奈仲有更多嘅憤慨!!

點解次次都係咁嫁?? 去富良野賞花落激雨、響函館遇暴風雪所有交通停駛、去青森睇紅葉一係枯晒一係未開、去嗚門睇漩渦遇著颱風落狗屎、去法國 Mt. St. Michel 又係落狗屎、去層雲峽睇紅葉上黑岳都仲係落狗屎、去知床五湖運氣好 dd 只係陰雲密佈未落出雨、去新加坡四日死唔忿氣去左三次 Gardens by the Bay 都係落狗屎、上立山睇雪牆最後都係要落．狗．屎!!!

.....我愈來愈討厭 d 人話天氣唔好又可以俾藉口自己去多次.....我其實唔介意喜歡嘅地方一去再去，但人生咁短，年假係咁少，世界又咁大，想去見識嘅地方係咁多，而且仲要儲彈藥呢!! 如果每次去完一個地方都總係留有遺憾，幾時先可以去得返晒?? 我只係唔明，點解同一個地方、同一個季節、月份，大部份人總係可以欣賞到最美嘅景色而我地就永遠唔係呢 d 咁幸運嘅人囉!!

記得有一日我地響 Grindelwald Grund 等車，當時落住好大雨，我嘅心亦跟住流緊眼淚

，因為旅程已經過左一大半，第二日就要離開少女峰區，而由於幾日都唔好天氣，我地非常期待嘅 First Bachalpsee 健行一直都拖著未去，但睇住個淒慘天色第二朝恐怕都唔會有令人驚喜嘅改變

......當時心情低落，響車站無咩好做又無野 shop，於是就同兩個遊客開始閒聊 (題外話︰唔知點解今個 trip 我地同左好多當地人同遊客傾計，有一次甚至響火車上同一家波蘭人傾足個半小時差 d 唔記得落車，我地連香港政治環境一國兩制都講埋

，最後佢地仲寫埋 email address 要我地下次一定要去波蘭搵佢地，諗返起都覺得好笑)......當時嗰兩位男士，一身裝備一望就知係慣於健行之士，佢地好勁呀，當日由 Lauterbrunnen 經 Kleine Scheidegg 行到去 Elgergletscher，然後再繼續沿 Eiger Trail 一路行到去 Alpiglen，最後行到嚟 Grund，行左差不多八、九個小時!! 真係好厲害，如果換轉係我恐怕要行八、九日

.....佩服之餘少不免我話可惜天氣唔好，完全睇唔到少女峰，但好意外佢地一d 都唔介意，我好記得當時佢地興致勃勃話天氣唔好完全唔係問題，佢地一邊行一邊欣賞天氣嘅變化，響空曠嘅山頭望住一邊厚厚嘅烏雲密佈、山雨欲來，另一方卻又密雲隱隱透出藍天陽光，大自然嘅奇妙真係令佢地好感動.....

聽住佢地滔滔不絕一整日遊走於雪山同青草地，我忽然記起，一直唔係話最重要係享受過程嗎? 原來事不關己就講得輕鬆，臨到自己頭上就忘記得一乾二淨......我成日執著於天氣，但其實天氣最唔係人力所能夠掌控，如果我總係埋怨陰雨天，唔開心嘅就只會係自己，同埋會忽略左整個過程同當中遇到有趣嘅事物，從另一個角度睇，大晴天當然最好，但陰雨天亦可以係另一種風景，就好似彩虹，風和日麗又點可能欣賞到彩虹? 但今個 trip 我地見到好多次彩虹呀!! d 人成日講外國嘅月亮比較圓，我就話瑞士嘅彩虹比較靚囉

印象最深係有一次響 Mannlichen，我地一出纜車，迎面就係一道大大嘅彩虹，從未見過色彩咁鮮明嘅彩虹

，而且好近距離，好似隨時只要觸手便可及，當時我地兩個興奮得好似傻左咁響度不斷大叫

......回想起來呢 d 都係旅途中非常難忘嘅經歷，我地呢 d 城市人，能夠同大自然如此接近實在係好難得，開心真係可以好簡單，我應該要好好珍惜每一次難得嘅體驗、銘記每一個感動嘅瞬間~~

雖然天氣不似預期，但瑞士湖光山色，風景仍然動人，我地兩個人總共影左張 11,000多張相!!....黐線

......今次 post 嘅相會有好多唔同 size，因為老爺帶左兩部機 (條友終於買左佢部 dream 機!)，我自己又一部機，再加上又用電話影左好多相，不過都唔難辨別，同往時一樣，靚嗰 d 一定係老爺影，而騎騎呢呢、九唔搭八、手震嗰 d 就一定係我嘅傑作啦

吹水完畢，講返今個 trip 嘅 planning，今次真係好早就預備，五月初去完日本中部返來無耐就開始睇旅遊書，五月尾開始上網 check 酒店，諗住都仲有成三個幾月時間，九月中又已經過左 high season 應該都幾鬆動，點知有 d 熱門地點嘅酒店已經好 full

，好誇張囉，而且房價好貴，以市區來講，蘇黎世、琉森三至四星 standard double room 一晚大約要 CHF230~250...

，去年我地響 Frankfurt 車站旁四星級大酒店只需要 140歐！住宿又貴又緊張，單係 book 酒店都搞左幾個禮拜，之後又要趕住定實條大約路線，因為又要儘早 book 冰河列車，所以今次其實都係迫住要早三、四個月前開始做 planning......瑞士話大唔大話細唔細，我地實際只係玩十日，當然唔夠時間去晒成個國家，重點係馬特洪峰同少女峰，參考網上其他 blogger 遊記，發覺呢兩個地區都應該最低限度各玩三至四日，所以最後就將日內瓦、St. Moritz 同 Lugano 等捨棄......當然，對於一個飄零燕迷來講，去唔到 Maienfeld 固然有 d 可惜，不過我所鍾情嘅係日本動畫版，響網上搜索一下，瑞士版嘅凱迪實在唔算好可愛，而且據講路途遙遠好花時間，所以就決定放棄唔去~

瑞士向來被喻為世界最富裕國家之一，旅遊唔需要太擔心治安問題，今次出發前都無咩特別需要預備，除左有幾日因為我地打算健行，所以要帶行山杖同行山鞋，平時一向唔鍾意揹背囊嘅我今次都要乖乖拎，因為老爺已經事先講明話佢今次要揹兩部大機同埋其他垃雜野，實在唔可能好似上次登黑岳全程幫我拎埋個手袋，請我至少將自己裝備得似返個健行 look

.....健行響瑞士實在太普遍，一個少女峰區已經有70多條健行路線，就算我幾懶幾易 PK 都要搵一兩條路線行下，如果唔係真係唔似去過瑞士囉.....

臨出發前最重要係兌換外幣，上次去德國都用淨好多歐元，但瑞士唔係歐盟成員國，所以唔係用歐元而係法郎.....因為瑞士物價超高，所以今次兌左好大疊瑞士法郎

瑞士紙幣好易辨認，我地兌左10、20、50、100、200 (最大面額係 1000，我地當然無咁多錢兌

)......每種面額長短不一，面值愈大就愈長，幾有趣~~

今次都係搭 Lufthansa，要響 Munich 轉機，本來都好想搭 Swiss Air 直飛蘇黎世，但價錢實在貴好多.....11:20 dep，之前一日已做定 online check in，去到好快搞掂寄行李，之後當然又去 Plaza Premium lounge 食 free dinner，今次預 d 時間好鬆動，慢慢食完仲可以周圍逛下~

一向都知 IWC 係瑞士名錶，不過就唔知 Schaffhausen 係乜東東，今次去完瑞士就知原來係一個地方名，著名嘅萊茵河瀑布就係響附近~

逛到差不多就夠鐘 boarding......

起飛我就開始瞓，老爺照舊睇埋 d 打打殺殺戲.....瞓左大約個幾鐘就被叫醒食野，Lufthansa d 野食都 OK 啦，點都比 CX 好好多囉......老爺要雞.....

我就要燉牛肉.....我個好味 d

今次呢班機個 toilet 全部響下一層......

集中晒一處地方我覺得好 d 呀~

旁邊仲有個 mini bar.....上次飛 Frankfurt 只係得水供應，今次好 d 有果汁同 snack，任取.....不過 snack 好快就沽清~

斷斷續續都瞓左五個幾鐘，瞓醒想話搵套戲睇下，點知我個 TV down 左

，無咩好做唯有繼續瞓，之後就到早餐時間......個早餐都幾正嫁，我地兩個都揀炒蛋雞肉腸~

好好味嘅 yogurt

坐左差不多12 粒鐘，朝早五點幾就到左 Munich......響 Munich 要先做入境手續，好多人呢，都排左一段時間，不過我地有兩個鐘時間轉機，所以都唔駛急......過左關就直接去 Gate G，只需要 security check，唔駛再做 check in......不過個 security check 都好嚴，老爺唔止條皮帶、waist bag 過唔到，佢兩部 Leica 都要拆左個鏡頭俾佢地檢查.....德國 brand，一d便利都無

......搞掂晒已經六點幾，d shops 都開晒 lu~~

舊年先去過德國，玩得好開心，今次雖然過境，但都好有親切感

老爺至愛~

逛到咁上下就去閘口等 boarding......

有 free drinks 供應，我地當然唔客氣

七點多先開始天光~

由 Munich 去 Zurich 只係一個鐘......機上都有供應野飲同 chocolate bar~~

8:50 終於抵達蘇黎世，去到都唔駛再做入境手續，大概因為瑞士同德國都係申根公約國? 所以只需要響德國入境出境.....攞左行李經地下通道過對面火車站，瑞士國鐵叫 SBB，佢個 web site 好正嫁，操作方法同德國嘅 DB Bahn 差不多，只要輸入點對點嘅資料同乘搭日期時間，個網頁就會 list out 所有交通工具、班次、價錢同有關資訊，連巴士、cable car 都有埋，對出發前做 planning 真係好有幫助

去到車站第一時間先去搵 Ticket Counter 買張 Swiss Pass.....

瑞士物價高，交通費當然亦都好金，好在 SBB 都提供左好幾種火車套票俾外國遊客，詳情可以去佢個網頁慢慢研究......我地實際響瑞士玩10日，但當中有好多日係需要搭登山火車、纜車，而呢 d 登山鐵道、纜車等交通工具 SBB 嘅 Swiss Pass 係唔包，只提供折扣優惠，而且唔同嘅 Swiss Pass 亦有唔同嘅優惠同限制，所以要買邊一種套票都有 d 傷腦筋

.....最簡單但亦係最麻煩嘅方法就係將每一日要搭嘅交通工具 list out，再 check 每一種 Pass 所需要支付嘅價錢然後做一張 Excel spread sheet 作比較，我地發覺根據我地嘅行程，買 Half Fare Card 或者 3 days Swiss Flexi Saver Pass 最化算，最後我地決定買 Swiss Flexi Saver Pass，因為 Half Fare Card 係針對每程車或船提供半價優惠，愈去得多地方就愈貴，所以為保險計都係買 Swiss Pass 穩陣 d，價錢上都係爭少少啫~

3 days Swiss Flexi Saver Pass 每位承惠 CHF234!

SSB d 職員好 nice 呀，幫我地出左 pass 之後又問我地會去邊，又幫我地 check 同 print 埋下班車嘅時間，不過我地趕唔切搭嗰班車，因為仲要去寄行李.......瑞士鐵路有個好正嘅 service，就係全國絕大部份嘅車站都提供 Reisegepack，即行李配送服務，只要每日19:00前將行李託運，兩日後 9:00 打後就可以響指定嘅車站領取返件行李，每件收費 CHF12，以 25 kg 為限.....另外仲有一種 fast luggage，只要當日早上9:00前託運，即日傍晚 18:00 後就可以響指定嘅車站攞返件行李，不過收費當然貴好多，CHF22 一件，而且全國只有47個車站有呢個 service，最估佢唔到竟然蘇黎世機場車站係無提供呢個 fast luggage! 原本我地想將其中一件行李先寄去當晚住宿嘅琉森都唔得~

蘇黎世機場火車站嘅行李託運處就響 Ticket Counter 旁邊~

對於需要成日移動嘅遊客來講，行李託運真係好 helpful

，以我地為例，我地會響琉森住兩晚、Zermatt 兩晚、Spiez 一晚、少女峰區三晚、以及蘇黎世一晚，如果隔一兩日就要攞住兩件大行李走來走去也實在係太累人嘅一件事，而且瑞士國鐵一般列車內可以放置行李箱嘅位置實在太少，有 d 甚至係無提供任何地方

.....去年去德國發覺 DB Bahn 反而好少少，就算無地方放行李，某 d 車廂兩張反方向嘅坐椅背與背之間有個頗大嘅空位可以將件行李打橫 "攝" 入去......所以今個 trip 我地都有利用呢個託運服務，一舊水寄件行李話貴唔貴但都唔係平，但正所謂錢解決到嘅問題就唔係問題嘛......最初都有 d 擔心驚會寄失，不過響網上睇人地 d 遊記又無見過有寄失或錯寄情況囉......由於隔一、兩晚就會轉酒店，響行李託運嘅編排上都花左 d 心思，我地甚至整左張 list 以防自己到時會搞亂

第一、二晚我地會 stay 琉森，所以就先將一個行李箱寄去第三晚嘅 Zermatt.....要好好保存張 receipt 呀，到時憑 receipt 取件~

至於另外一個行李箱，我地就先去搵個 locker keep 住先，因為今朝我地會去萊茵河瀑布，等去完返來先攞返件行李再搭車去琉森......Ticket counter 附近都有好多 locker，大 locker 要 CHF9 (好q貴!).....不過我地無 coins.....呢度唔係日本，無精算機噃......