2009年8月北海道親親大自然之旅 - 咁樣就叫夏祭?!

DAY 1
PART 4 (防災中心...大通公園...狸小路...)

離開防災中心，我地就行返去地鐵站......

沿路見到好多呢D平房....

D樓梯好有日劇feel呀~~~

由南鄉七丁目站搭返去大通站~

返到去大通，我地首先去行下丸井今井.....例牌逛下Blue Label 同 Agnes B，不過都無咩啱......早幾年去親日本都會響Blue Label入貨，不過近年去已經唔係點買到野，D款愈來愈普通，來來去去都係咁上下，激發唔起購買嘅意慾，有D款都啱嘅，不過就要成六、七萬yen.....傻咩!! 俾得咁嘅錢我又唔想買呢個牌子啦!! .....至於Agnes B，基本上係去執平貨，響香港睇定款，響日本一定平D，不過就唔會期望有咩新款，日本D貨色好舊下，連東京都係咁，香港一定出得最快同最齊嫁~~

入唔倒貨，有D失落，之前響outlet間Coach見到有個手袋其實都OK，不過諗住Blue Label 同Agnes B如果睇得啱款，個價錢就一定唔駛咁貴，而家咩都買唔倒真係有小小後悔......

再行下basement，好多包裝得好靚嘅野食賣呀~~

望住呢D朱古力同cake真係好想每件都咬一啖~

日本真係貴過香港嫁!!

之後我地就行去大通公園......個電視塔已經去過兩次，今次唔上去喇~

有個祭台，不過未有人表演......

大通公園入面最出名嘅雕像

大通公園每年嘅七月都會舉行花祭，八月尾去都仲見到小小花.....

但係行左幾段都未見到夏祭同啤酒節，反而見到有雪糕賣......

梗係唔放過啦~~~

大通公園觀光案內所，入面D職員好nice嫁~~

但係唔知點解行左好耐都見唔到所謂嘅夏祭同啤酒節.....公園入面D banner都寫明有喎，唔通我地太早黎到未開始??

行到最後終於見到有好多檔攤擺賣，不過賣嘅都係D好殘舊同古老嘅野，咁樣就叫夏祭???  唔係掛，好似二手市場咁，真係無咩興趣......

呢個所謂嘅夏祭同冬天嘅雪祭真係差好遠，實在好令人失望!!......究竟係我地黎得時間唔啱抑或真係咁騎呢呢? 如果有blogger咁啱睇到我呢篇野而又去過呢個夏祭，唔該話聲俾我聽係咪真係咁.......

但係又話有啤酒節嘅?? 有無攪錯，一枝啤酒都見唔倒!!.....見唔到啤酒節，我地就決定離開，直踩去狸小路買手信啦~~

原來狸小路做緊狸祭，好靚呀!! D裝飾平時冬天黎係見唔倒嫁~

大手入左好多貨後，我地對腳已經攰到好似唔係自己咁，同埋好鬼眼瞓，實在唔想再走返去大通公園搵啤酒節，於是就走去食我地嘅晚餐喇.......

下一篇︰食到唔想再食嘅蟹將軍!!