PIGGYBREAD: 2009年8月北海道親親大自然之旅 - 攞車記之有人發老脾呀!!!!!

DAY 2
PART 1 (札幌...美瑛...)

朝早起身望出窗外，天色陰沉，仲落緊雨，真係唔好兆頭......

先去酒店地下「藏囲」日式餐廳食早餐，食嘅係自助餐，野食只係一般，同埋間餐廳無啦啦間左好多間房仔，坐響入面好鬼焗，一路食一路流汗......

係咁意食完就上返房執埋D行李去七樓check out，係自助形式嫁，就咁插張key card入去部機就OK~~

之後就留低一件大行李響酒店寄存，然後拖住一個大喼加一個行李袋就正式起程去今次旅程嘅重點主題 -->親親大自然呀!!

我地首先去車行攞車，雖然老爺有好多年駕駛經驗，亦試過響加拿大揸車，但話晒都係響日本第一次自駕，好緊張呀))))))

我地響租車網ToCoo (www2.tocoo.jp/?file=rentcar_inbound/main) book左車，預約八點鐘攞車，攞車地點揀左響札幌站南口嘅office......大家睇以下ToCoo網頁顯示嘅地圖，驟眼睇係咪一定認為ToCoo個office響京王酒店同7-11中間嗰座建築物啦.....我地都係咁以為.......

點知去到搵左好耐都搵唔到呢間ToCoo，問路人甲路人乙都幫唔到我地，當時落住雨又拖住個大喼，企響條街度真係好愁......明明7-11對面就係京王，點解話中間仲有座建築物呢??......當時諗到有兩個辦法，一係打電話去ToCoo問，一係走入去京王酒店睇下D職員知唔知附近有無呢問野啦，我地揀左先入京王......

入到去，酒店個bell boy攞住我地張confirmation letter睇左一陣都唔係好知間野響邊，不過佢叫我地等一下，原來係幫我地打電話去check呀，京王D服務真係好!!.....等左一陣，佢就用日文指手劃腳同我地講左一輪，然後就帶我地行落去酒店個basement.......頂佢個肺!!! (唔好意思，用詞比較粗鄙左D，但唔用呢四個字真係表達唔出當時係幾咁懊惱!!)，原來攞車嘅地方係響京王入面嘅Toyota Rent-A-Car!! 真係媽媽聲，同ToCoo做booking梗係以為係去佢office攞車啦，點知原來係去Toyota，就係咁樣我地已經嘥左大半個鐘......

去到就即刻攪手續啦，Toyota 入面個靚靚女職員D英文好掂，溝通一D問題都無，原本我地做booking時係預約左四日三夜，不過呢度嘅還車時間最遲都係夜晚七點半，最後嗰日我地應該響十勝返黎，車程遙遠怕趕唔切，所以就請靚女姐姐幫我地check下如果遲多一日朝早九點先還車睇下要加多幾多錢啦，WOW!! 一check原來唔駛加錢呀

，咁就一於加多一晚第二朝先還車啦~~

碌左card攪掂晒手續，有個男職員就帶我地去酒店地下個停車處攞車喇......正當我滿懷高興睇住個男職員將我地架烈火戰車駛埋黎面前之際，忽然發現老爺個面色開始變黑......原來佢話佢book嗰架唔係呢款車喎!!

於是佢就開始同個男職員響度理論喇......

佢老人家心目中嗰架戰車係下面呢架 Prius......

但係Toyota就俾左呢款Corolla我地......

呢兩款車響ToCoo個web site入面係同一個class，同屬於"P3"type......如果你問我呢兩款車有咩分別我真係答唔出，平時如果老爺口痕話要換車我通常只係對D顏色同咩牌子指指點點，講到實際揸起上黎嘅分別我就真係好無知，基本上我響佢架車入面大部份時間都係瞓教多........

我地之前響網上book車時係book "P3" class.......當時我望住老爺響度同個男職員拗到面紅耳赤，講真我真係好少見佢咁樣同人嘈嫁，佢平時出外對人都好nice，唔知點解今次佢咁燥要發晒老脾........

嘈左一段時間都無結果，個職員又唔識講英文，淨係好無奈咁話呢架車無錯，咁我就拉埋老爺響一邊，靜雞雞同佢講，book車嗰陣人地又的確講明唔一定保證俾到你指明嗰款車噃，點知老爺答話佢記得呀，不過兩款車爭咁遠，點都一定要堅持要佢心目中嗰款喎!!.....咁我見佢咁堅持，所謂有難同當，唔理有無道理都要死撐佢啦，於是我就加入埋同佢一齊同個職員理論啦........

又糾纏左好耐，個職員都係唔肯同我地換過另一架，事實上當時放眼望過去係有一架Prius響度但佢都唔肯換俾我地，老爺真係好火......最後之前響office入面幫我地攪手續嗰個女職員走出黎同我地溝通......咁唔知係咪個女職員真係生得幾靚呢，哼!! 老爺見到佢出黎心入面道氣已經消咁半，見佢面色都已經緩和左好多(#$@*& !!)........個女職員笑容滿面，話在場嗰架Prius已經reserve左俾人，笑晒口咁話而家真係換唔倒俾我地又話呢架Corolla都好OK諸如此類咁啦.......最後老爺終於屈服於美色之前，好無奈咁硬食左呢部Corolla喇!!!

個女職員同我地check埋架車，又好耐心咁教我地點用部GPS，我地試完一個地點又一個地點佢都無唔耐煩..........擾攘一輪終於可以起行啦~~~~

出發啦!!!!!

攪左咁耐，今朝我地已經嚴重behind schedule，原本打算去北竜町睇向日葵，不過今朝天氣唔好，再加上之前兩日check過開花情況，大部份嘅向日葵已經凋謝，費事嘥咁多時間去冒險，所以就決定放棄向日葵之鄉直踩去美瑛喇~~~

呢個就係黎緊呢幾日帶領我地遊山玩水嘅GPS啦.......

GPS後面係放CD嘅地方.....我地當然有帶定幾隻CD黎聽歌解悶啦~~

響外國自己揸車(其實我只係做坐車嗰個)，個感覺真係幾奇妙，基本上我地唔識路，下一個路口係轉去邊度都唔知，只係靠個GPS老點，就咁跟住佢嘅指示穿州過省，又竟然成功安全去晒大部份嘅地方，真係好得意囉~~

關於GPS同自駕，都有DD體驗可以同大家講下︰

*1. GPS基本上真係好易用，只要輸入目的地嘅電話號碼，佢就會先show出條路線同埋所需嘅時間、所需嘅料金等等~

*2. 除左電話號碼，仲可以輸入Map Code同目的地嘅地址......又可以search油站、toilet等設施......當進入高速公路突然想去方便方便都唔駛驚，GPS會提示話俾你知仲有幾耐會到休憩站，站內有無toilet、觀光案內所、食店等資訊嫁~

*3. GPS一般以40、50km/h黎計算距離，不過你一定無可能滿足於40km，大部份時間你都會好自然咁行七、八十，高速公路更會飛馳至百二、三......所以當個GPS話俾你聽要兩個鐘嘅車程，其實個多鐘頭就會到~

*4. 當將要響紅綠燈位轉彎，個GPS就會有兩下叮叮聲提醒你響路口轉彎.......不過唔知係咪我地開得太快，又或者個GPS D反應實在太慢，嗰兩下叮叮聲好多時都響我地飛過左盞燈先響，我地成日好容易就錯過D路口，同埋佢地有D路口好難睇，特別係行經D大平原，離遠根本睇唔到個路口響邊，到見到時已經miss左.......不過就算錯過左或行錯路都唔駛愁，GPS會即刻出過第二條路線俾你跟住行~

*5. 最唔慣係，除左響一D市內，佢地有D行車線好興用短虛線黎分隔相反方向行車，唔同我地香港大部份都用雙白線分隔......咁就大鑊啦，我地慣左爬頭嘛，試過去十勝途中唔記得左，以為係分隔雙程路嘅分界線，老爺揸長途車揸到吽晒一時醒唔起就換線爬頭，點知迎面有架對頭車衝緊過黎，嚇到我當堂花容失色，好彩老爺手腳都算敏捷，趕得切成功超車......