Dinner @ 天喜

早幾晚我地又落CWB，諗到都唔知食咩好，忽然記起恆和鑽石大廈成棟樓有好多日本食店，走過去是但搵左間叫天喜，響大廈28樓~

去到都將近八點，但全間食店得兩三張枱人，真係任我地揀坐邊度都得，我地揀窗口位，望出去係三越舊址~

先黎個六款魚生拼盤.......魚生好新鮮，個吞拿魚雖然未至於入口即溶，但都好好味.....yummy yummy!!!

天婦羅蝦卷，味道只係一般~

牛舌厚切，幾好味~~

雞翼盬燒，味道OK~

和牛炒飯，食唔出係和牛，不過幾軟腍，炒飯幾乾身，唔錯~~

呢個雜錦天婦羅要$90!! 但只得幾件，唔係好抵....

室內環境唔錯，簡單得黎幾清雅，招呼都幾好，不斷加茶，我地一枱人都有兩個侍應服侍，或者係因為根本無咩人可以招呼.....

埋單七百幾，野食都OK，不過如果同樓下嗰間榮川相比，好似榮川D野抵食D囉~

成棟大廈佔左八成係食日本野，我地諗住遲D由上至下逐間試晒佢~~