2009年2月日本東北8日溫泉之旅 - Day 4 (Part 8 藏王樹冰‧夜篇)

2月17日   星期二   (松島 > 山形 > 藏王山)

上回講到響車站餐廳攤抖夠就又再走出室外再戰大風雪......

出到去仍然勁大風大雪，通向樹冰原嘅路仍然封住，連去地藏尊嘅路亦都封埋，因為天色陰暗，能見度好低，遠少少嘅景係完全睇唔倒~~

成個山都封晒唔俾人行，只係淨返門口右手面沿車站邊一條小路無封，即係響餐廳望出去嘅方向，所有遊客只能夠響呢個範圍逛下~~

條小路其實唔係好長，行到盡頭唔駛兩分鐘....盡頭可以見到好多吊車上緊黎~~

小路旁邊都有好多未完全成形嘅樹冰嫁~~

其實絕大部份嘅樹冰仲未完全成形，我地真係有DD失望，因為藏王樹冰係今次旅行嘅第一目標.....一直都滿懷期望會見到好似樹怪一樣嘅雪怪人形......

我地想見到嘅係呢種樹冰呀....(見唔倒唯有之後買返D postcard補返數啦~~)

見唔到雪怪，小bear bear 熊好down....抗議呀))))

睇下連D樹枝個形都見得到，可想而知係幾咁瘦弱.....

睇樹冰呢家野真係好講timing，有blog友早一星期黎就完全係另一個模樣.......不過雖然睇唔到肥美嘅雪怪，但就可以睇到第二樣野(自我安慰~~)......D樹枝被雪包住晒，近睇一層層嘅雪呈現出橫紋，可以想像D風係打橫咁打過去棵樹度囉~~

藏王山嘅樹冰響夜晚五點後會亮起燈~

所謂亮燈其實係響車站頂set左幾種唔同色嘅大光燈，然後打過去樹冰群嗰邊~~

外面其實真係好Q凍，D風雪兜頭兜面咁撲埋黎.....睇下我隻小bear bear熊，我地將佢放左響雪地上由得佢自生自滅，十零分鐘後就俾D雪掩左半身....

雖然D樹冰俾預期中較瘦弱，但係我地嘅情緒都依然好高漲，加上其他日本遊客猛咁響旁邊V嘩鬼叫大聲讚嘆D樹冰，又好熱情咁互相幫大家影合照，所以都玩得好開心!!.....響外面影下呢度影下嗰度，唔經唔覺就過左十幾分鐘，手腳又凍到僵硬晒，於是我地又走返入去車站餐廳攤抖返下回下氣先~~

響室內hea左一陣，由窗口望出去，因為開始天黑，打左燈嘅樹冰都變左青綠色~

個天愈黑D樹冰就愈清晰....遠望過去可以隱約見到無數嘅樹冰群嫁~~

Hea 左十零分鐘我地又再走出去.....

好奇怪，唔知係咪因為個天黑左，個底色深D就將樹冰襯托出黎....D樹冰比響白天睇真係反而愈夜愈清楚嫁~~

好似一隻隻火柴人響度踱步~~

個造型好古怪呀~~

一堆野.....

呢棵比較正常~

打左燈上左色都幾靚~

個雪地都幾深嫁~

玩到五點九倒老爺就話差唔多時候要走喇，因為約左酒店六點半食晚餐.....懷住非常不捨之情同樹冰講bye bye~~~~

搭返吊車走....走嘅時候好多人，架架cable car 都坐滿晒人，架吊車無燈又無暖氣，雖然好多人一齊坐，感覺反而有D寂寥.....(我覺得自己真係有D玩後抑鬱症....)

落到去樹冰高原站，要再轉另一種纜車落山腳~

車站有一段路係望到室外.....經過見到D樹夜晚打左好多唔同顏色嘅燈，好靚呀~~~~

影完相就拿拿林搭纜車落山，點知原來樹冰高原站呢一程纜車嘅班次比較疏，入到去車站發覺仲未夠鐘，好多人響度等緊.....趁呢個時候就去探下個toilet先啦~~

當時溫度得-10.3度咋!!

車站售票處

無咩做蓋下紀念印先~~

呢個係纜車D鋼纜嘅sample~

等左一陣就可以上纜車，今晚同下午搭纜車嘅人數爭好遠，好多人迫埋一齊響個車廂入面，不過我地都好快手搵到前面窗位~~

成個藏王山黑媽媽，將近落到去山腳先見到個滑雪場著左燈俾人滑雪~

仲有人坐呢D凌空嘅登山吊車上山喎.....周圍咁黑都好勇啫~~

見到車站喇~

落到山已經差唔多六點半，快手快腳行返去酒店....雖然落返山下，但係夜左真係好Q凍，加上玩左成日開始覺得好攰，不過我地間酒店響個小山坡上，又要行返條斜路上山，真係有D想死嘅感覺呀.....

返到去酒店房放低D野就即刻衝去餐廳食晚餐......(待續)

---> Day 4 - Part 9 藏王國際‧夕食篇