11 FEVRIER 2012 (DAY 1 - PART 2)
響酒店hea左一陣，我地就出發去香榭麗舍大道嘆個法國早餐先~
香榭麗舍大道 (Aveune des Champs Elysees) 位於巴黎第8區....全個巴黎市總共劃分為20個行政區，第1區響巴黎市嘅中心點，然後第2、3、4、5區一路以順時針方向向外迥旋，直至第20區，至於20區以外嘅巴黎周邊近郊就係所謂嘅大巴黎 (Ile-de-France).....愈近巴黎中心點，亦係巴黎市最旺最熱門嘅觀光地區，好似第1區就有羅浮宮，而第8區就響第1區隔離，有最出名嘅凱旋門同購物大道Champs Elysees，第4區有聖母院，而著名嘅巴黎鐵塔就響第7區.....基本上巴黎出名嘅觀光點都好集中啦~
Hotel California 個門面只係一般， 不過響巴黎市中心四星酒店算係咁啦~
有d房有balcony，不過一定好貴~
一朝早條街搵個人都無，雖然係星期六，但都已經九點啦，唔怪得d人成日話法國人好lazy......
呢架車個色都好fancy啫~
響巴黎街頭好多時都會見到呢個Autolib......因為係車，老爺好有興趣......
佢研究一輪，就話呢個係d租車station，d車應該係electric car喎......
條友仲好肯定話如果之前join左呢個Autolib嘅rental scheme，只要攞住佢地張card，響任何一個呢d station是但一架車旁邊嘅sensor拍一拍，條cable就會鬆開可以揸走架車喎，不過響邊度登記佢就當然不知......
呢幾舊野，字都唔多個，我都唔知佢點解可以推敲出咁多野出黎
，不過佢講咩我咪信咩囉，作為一個大男人背後嘅小女人，我絕對明白響適當時間要扮下乖巧先得嫁
......我比較有興趣嘅係如果下次再黎巴黎咁佢係咪都可以自駕遊，佢就答下次都已經係N年後嘅事叫我做人唔好諗太多
~
呢條就係我地酒店條街，叫 Rue de Berri，Rue係街道咁意思，相等於我地嘅乜乜Road咁囉.......盡頭街尾就係 Champs Elysees，由酒店行出去都係一、兩分鐘咋~
巴黎大部份d building都係咁上下，樸實之中不失優雅....... 
最鍾意係好有古典味嘅小陽台
...... 
d 欄杆嘅花紋好靚呀!
好快就行到出去 Champs Elysees，朝早九點鐘，呢條國際知名嘅購物大道無咩人，d shops全部未open，冷清清，凍冰冰，風又大，地上d垃圾周圍飛，距離浪漫呢兩個字好遠喎
，我地第一個感覺仲係有小小沙塵滾滾添
......
街道盡頸見到凱旋門!
好近呀，我地呢間酒店個location都真係幾好喎
~
哈哈，仲有仲有，一出到去斜對面街就係LV啦!!
(唔知點解由Champs Elysees開始我d相全部偏藍，尤其響室外，大概係我唔覺意又按錯左部DC仔
，但當時無留意到，所以Day 1 呢一日我影d相全部偏藍，好易認，正常嗰d就係老爺部機影啦)
Champs Elysees兩旁種滿晒樹，如果夏天黎應該幾靚，不過我覺得冬天d枯樹亦有另一種美態
向住凱旋門方向行左一陣，見到有間食店開左，個門口望落去好宏偉咁.....
唔好以為呢間Brioche Doree個門面好似成個百貨公司咁就以為一定係高級餐廳，其實佢係一間法式快餐店，啱晒我地呢d平民百姓啦
~
望落去d麵包好似都唔錯咁喎~ 
入到去個女服務員好好笑容，我地同佢講英文佢都好樂意同我地對話，以前成日聽人講話法國人好高傲，尤其唔妥英國人，所以你同佢講英交佢地唔會多睬你，不過今次我地黎到法國又唔覺囉~ 
我地嘅法式早餐呀......
雖然係快餐店，但其實真係一d都唔平囉，兩杯野飲加三件cake，唔該11.5e!! 成百幾蚊港紙一個二人早餐
，麥當當一個早晨全餐都係廿幾蚊，我同老爺朝朝響茶餐廳食個好豐富嘅早餐，兩個人埋單$50仲要有找......歐洲消費高，旅程一開始嘅第一餐已經感受得到!
睇下我地叫左d咩......老爺要左個蘋果餡，1.75e......
我當然要試一試法國真正嘅牛角飽啦，1.15e~ 
我嘅chocolate，2.7e.... 
老爺唔駛講一定係咖啡，佢今次要capuccino，2.9e.....d 野嘅價錢其實同Starbucks差不多，不過老老實實，普通人等有幾可會無啦啦餐餐走去Starbucks食早餐?
呢個chocolate muffin最貴，3e! 我覺得比較甜囉...... 
仲有兩粒朱古力送，幾好食嫁! 最衰無得買，如果唔係我一定買一大袋返HK
食完個法式早餐原來已經過左九點半，本來應該要拿拿聲趕去Paris Tourisme (巴黎旅遊局) 搞個Museum Pass，不過唔知點解一離開Brioche Doree我地就好自然咁沿住Champs Elysees向住凱旋門行過去......響法國無論你事前plan個trip幾精細都好，你一定唔可能跟到足，因為當身在其中，你就會好自然咁受到當地嗰種悠閒散漫所薰陶，所有野都好自然咁hea住做
..... 
由Brioche Doree行去凱旋門好近咋~ 
好大粒candy!!
凱旋門響正Champs Elysees嘅盡頭，戴高樂廣場嘅中央，四圍有鐵鍊欄杆欄住，如果要行過去地面係過唔到嫁，需要由地下隧道過......
凱旋門嘅頂部係觀景台，可以睇晒成個巴黎市，我地打算今日晏d睇下可唔可以就啱時間先上去睇埋日夜景，所以而家就只係離遠影幾張相算啦~
門墩上刻左好巨型嘅浮雕，遠睇都覺得好精緻~ 
兩隻bears都忍唔住走出黎同凱旋門say 個 hi 呀!!
因為凱旋門響正Champs Elysees嘅正中央，想要影佢嘅全正面一定要企響車路中心先影得到，不過Champs Elysees終日都車水馬龍，稍為企出行人路小小都有車響你旁邊飛過，所以要影靚相，對正凱旋門嘅第一個紅綠燈位就成為遊人嘅拍照熱點，真係無時無刻都企滿晒人嫁~ 
多人到要排隊輪候......
Champs Elysees真係好繁忙，再加上戴高樂廣場本身就係一個迥旋處，不斷有車來來往往~ 
響馬路中心影左幾張相，我地就行過埋對面馬路...... 
公眾電話亭，好似幾先進咁喎~ 
有間Nespresso，不過未開門，如果唔係可以入去飲杯free coffee~ 
歐洲d building真係好古典，連度門都靚d......
好可愛嘅小天使~
朝早Champs Elysees幾好行，因為d shops未開，無咩遊人......行左陣行到去差不多我地酒店附近，係時候要搭地鐵去搞個Museum Pass.....巴黎嘅地鐵叫 Metropolitan (簡稱 Metro) ，我地酒店附近就有一個地鐵站 George V，不過搵左陣我地都唔見個地鐵站入口
，我記得應該有個 "M" 字標誌，但行晒兩邊街都唔見，沿路又唔似香港咁有路牌指示
，最後發覺原來巴黎嘅Metro站個個d入口嘅 look都唔同，唔係一定有個 "M" 宇嫁
，好似 George V個入口，一d標示都無
，只係好鬼祟咁響個地下入口有個細細嘅名牌咋，因為巴黎d街道久不久就有呢d咁嘅地下入口，但就唔係個個都係Metro入口，所以一開始我地就miss左無留意...... 
除左站名，都有標示埋係邊條線，因為巴黎嘅地鐵網絡都幾複雜 (一共有三百幾個站.gif)
)，有d大站會有機會行幾條路線，所以就算搵到個station都要分清楚係邊條line囉，我地呢個 George V 站就只有一條黃色M1線，比較簡單~
落到去發覺好簡陋下，青綠色嗰度就係自助售票機，走埋去睇下，真係 "R" 頭
，同我地港鐵個 look完全唔一樣，仲要全部都係法文.gif)
，又搵唔到button將個screen switch 去做英文，點搞呀? 想搵售票counter又無......
好在自助售票機隔離都仲有個 Information，於是我地就走去問個女職員可以響邊度買車票.......個女職員隨手就指向旁邊嘅自助售票機叫我地自己買票.....
我地夠知啦，就係唔識買先問你啫
，於是我地就同佢講話無英文顯示我地搞唔掂啦，個女職員有小小唔耐煩
，小小啦，個面口又未至於係難睇嗰隻，佢一聽我地咁講就企起身，隨手披左件冷衫開門走左出黎，叫我地跟佢過去自助售票機，原來係要親身同我地示範點操作部機，佢d動作好快呀，一句野都無講，簡直係手起刀落，幾秒鐘就將個steps按晒，或者係因為呢度響正個樓梯風口，d寒風勁大，佢只係披住件冷衫又真係幾難委佢嘅，示範完佢就拿拿林閃返入去.......
雖然佢個態度都幾求求其其，但至少佢肯抵住冷走出黎教我地，我地都好唔該佢啦，法國人做野個個都係咁上下，好難要求佢地provide 嘅service 好似日本人咁有禮貌同誠意
，正所謂各處鄉村各處例，去慣日本玩嘅港人黎法國玩真係要調節好自己個心態囉~
個女職員雖然好快速咁operate部機，我地都好努力咁記住d steps，試下試下又俾我地搞掂左啦
.......其實唔難，最難係首先要將個screen轉返去英文version先囉，原來screen下面正中間嗰個滾輪係用黎移動個cursor，只要將個滾輪轉動去英文嘅頁面，之後跟佢嘅指示就可以購買各種類型嘅車票嘞，真係好簡單呀!
巴黎市內嘅交通工具主要有四種︰Metro (總共15條線)、RER (行走市中心至近郊嘅火車，有4條線)、Tramway (行走巴黎市外圍，有4條線) & Bus，由 RATP 經營，詳情可以去睇呢個網址︰ http://www.transilien.com/web/site/
如果好似我地咁基本上只係stay響巴黎市內玩，搭得最多嘅一定係Metro，Metro嘅票價係全線統一，無論由邊個站坐去邊個站單程票 (Ticket t+ ) 都係1.7e，呢種車票Metro同市內巴士都可以用，除此之外，巴黎亦有幾種唔同嘅通行証或者tickets可以考慮.....
如果係諗住搏晒老命去盡晒d景點，可以買一種叫 Paris Visite嘅travel card......Paris Visite 分1、2、3 & 5 days四種，價錢因zone而唔同，zone 1 to 3 一日票由9.75e 起，五日票就要31.15e，呢個travel card係無限次使用，適合巴黎市內同市郊嘅所有交通工具，仲有參觀某d博物館會有d優惠，但多過一日就要連續使用~ 
(Photo extracted from official web site)
另外有一種叫 Mobilis 嘅全日卡，一日內任用，價錢同樣係depends on 咩zone啦，最基本嘅zone 1 to 2係6.4e，zone 1 to 3就要8.55e，如果一日內打算搭好多程Metro，呢種coupon係最抵嫁!
仲有一種以前叫Carte Orange 而家改左叫 Passe Navigo Decouverte 嘅儲值卡，呢個travel card分weekly 同 monthly，價錢亦係分zone而定，以weekly 為例，zone 1 to 2係18.85e，如果響巴黎連續stay超過五日可以考慮呢個weekly pass，個用法同我地嘅八達通差不多，響入閘機嘅感應器上掃一掃就OK，不過要注意嘅係，呢種weekly pass，無論你響邊一日買都好，佢都係以星期一開始計，有效期係去到星期日，所以星期一買黎用係最抵，如果係星期三之後先到巴黎就唔好諗呢個Pass嘞，唔抵嘛，而且買呢種卡要自己provide一張玉照同埋將自己個大名寫落張卡上面，唔見左不單止蝕錢，連個人私隱都俾人睇埋，要小心使用囉~
不過如果係好似我地咁，一日內都只係搭兩、三程車，連續stay響巴黎嘅時間又唔多過兩日，以方便程度黎講當然係買ticket t+ 啦，一次過買一set十張tickets 仲會平d，只係12.5e 咋，慳成27%嫁!
而且無時限，就算真係買多左留返下次再去用都仲得，所以我地第一日都只係買住十張一齊用，反正唔夠可以再買.....呢種ticket t+ 可以搭所有嘅 Metro lines、Tramway lines，但係RER就只限zone 1，如果去airport or Disney Land (zone 5) 或者凡爾賽宮 (zone 4) 就要另外買票~
買左ticket就要去搵月台，Metro入口基本上都會有路線圖，所以唔難搵......通去月台嘅通道，好殘舊下，不過一向都知我地嘅港鐵幾乎係全世界最乾淨整潔嘅地鐵，而且巴黎嘅 Metro已經有成百幾年歷史，殘舊都好正常~
有d通道仲要好暗下，如果夜晚響度行，周圍靜蠅蠅，都唔好話唔驚
呢個就係入閘口，同港鐵差不多，過左旋轉杆仲有多道門要用手推開~
我地發覺月台上好多時會見到一地都係車票，唔知係咪因為巴黎Metro出閘時唔需要再驗票，所以好多人一到站好自然就會隨手將d票掉到一地都係......話時話巴黎d人都好無功德
，d Metro站好多都幾污糟，周地垃圾，有d仲好臭一陣尿臭味
，真係幾攞膽!
雖然出閘唔需要再驗票，但其實坐車途中係會有機會有d Metro職員走黎查票，我地都俾人查過......好多人話如果夠膽可以唔買票，只要你跟實前面嘅人趁佢過閘時跟住攝埋入去就OK，入左去響地下是但執張飛，就算有人查票都過到關.....我地當然唔會咁做亦唔鼓吹人咁做啦，不過我都真係試過一次跟住人攝過道閘門
，有次入閘時唔知點解我張飛唔work過唔到，正當企響度唔知點算好之時，我後面有位男士叫我跟住佢後面同我一齊過，仲幫我推實度門好有風度咁等我過左佢先過呀
......其實幾奇怪，佢唔係叫我攞張ticket去counter check，唔知係咪呢d情況太普遍，所以巴黎d人都已經習慣晒唔會去check票反而快快手跟人入閘呢?
過左閘嘅ticket底部會有藍色嘅印記，間唔中會有驗票員走黎查票，佢地會有部細細嘅equipment響張票上面scan一下就知道你張飛係咪當日入閘嫁~
George V 嘅月台係有幕門，不過唔係個個站都有，同香港一樣~
巴黎嘅垃圾桶好多時都係就咁一個膠袋，唔知係咪方便替換，不過無蓋始終好似無咁衛生
車廂大同小異......巴黎出名小偷多，所以每次坐Metro我地都好戒備
，唔知係咪心理作用，成日都覺得好多黑人昅住我地咁
......
我地嘅目的地係 Pyramides......由 George V去 Pyramides係需要轉線，首先坐 M1 黃色線去 Palais Royal Musee due Louvre，然後轉 M7 粉紅色線坐一個站就係.....
巴黎地鐵RATP網頁入面有個 interactive map，可以search乘車路線，對出發前做 planning 好有幫助
，只要響出發地同目的地按一下，佢就會幫你搵出最快嘅route，仲會show埋個車程時間同轉邊條line，只要記住搭邊一條線、響邊一個站轉車同嗰條線嘅終點站名稱就可以，算係幾方便~
有d車廂入面仲有電子屏幕顯示即將抵達嘅車站名......好似下面個screen第一行 "Chateau de Vincennes" 就係呢條M1 線嘅終點站，要記住搞清楚終點站個方向，如果唔係就會搭錯對頭車啦
~ 
好快就去到第五個站 Palais Royal Musee du Louvre，落左車就要去轉M7線，首先當然要揾通去M7線月台嘅入口先啦，但係正所謂初黎步到唔知頭唔知路，d指示又全部都係法文，兩兜友企左響月台一時間都唔知從何人手
，響呢個時候有個洋妞響我地面前經過，見佢行到去一個出口推開道門就出左去......說時遲那時快，有人唔知係咪九世未見過靚女
，即刻標童上身咁就拉住我跟住金髮美女一樣推開道門就出左去，平時都唔覺佢身手咁敏捷，真係叫都叫唔住
......出到去發覺係一條樓梯通向大街，好明顯係一個出口! 我地都未轉車就出左閘!!.gif)
我望住條友，雙眼幾乎要放出毒箭
......有人知衰唯有嬉皮笑臉咁講左句︰Oh! 搞錯左添
.....嗰剎那我望住佢個衰樣真係好想一野打埋去!!
人地明明寫住 "Sortie"，sortie即係exit，都唔知佢咁心急跟人走出去做乜，除左因為人地靚女，我實在諗唔到第二個理由囉!!
發覺搞錯左當然要想辦法走返入去，出閘口旁邊就有一個入閘口，但無理由要嘥多張ticket入去啫，想由出口嗰道門入返去但道門又唔能夠掉轉方向推
，於是我地就想話試下等人由出閘口出黎時道門開左我地攝返入去......呢個係妄想當然無可能做到啦，道門咁鬼窄d人一行過就關上根本無辦法攝到埋去.......想話搵個information問下又唔見有，正當企響度唔知點好之際，忽然有個著住制服類似Metro職員嘅人響月台行過，我地即刻叫住佢show張ticket俾佢睇同想話講個情況俾佢知啦.....哈哈，我一開口唔覺意第一句又彈左 "sumimasen" 出黎
.....我地講唔夠兩句，唔知係佢無心機聽定我地個樣實在太似遊客都唔慌會講大話唔買票呃佢，佢就響出口嗰個閘旁邊搞兩搞就開左道門叫我地走返入去嘞，連我地張ticket佢都無check，真係好兒戲呀.gif)
~
走返入月台，我地就搵M7線嘅入口.....La Courneuve就係 M7線終點站~
今次呢個月台係無幕門嫁......
個路軌上面仲有好多垃圾，too bad!!
只係一個站就到 Pyramides......今次真係要搵 "Sortie" 出口嘞.....
巴黎嘅Metro同港鐵唔同，好多時都無自動電梯要行樓梯，想死!
出左車站，老爺憑之前響酒店搵嗰個location嘅記憶，好彩都仲有d印象，唔駛攞部 iPad出黎睇.....免得過我地都唔想響戶外用 iPad or iPhone，費事俾人搶或者偷啦，之前響討論區成日都見人話巴黎 d pickpockets好 active嫁，咁啱我有個同事早排都響凡爾賽宮俾人偷左部 iPhone，所以都唔好話唔驚.....
行左陣好快就搵到 Paris Office du Tourisme (巴黎旅遊局)......老爺睇地圖搵路真係有一手
，如果換轉我呢個無方向感嘅路癡，出左站東南西北都分唔清真係隨時搵到天黑都搵唔到呀~
入到去我地就搵左個女職員，將個情況話佢知，佢攞起個record幫我地check左一陣，然後就show俾我地睇話個Museum Pass已經響九號送左去Hotel California啦，仲有埋酒店嘅簽收添......唔係掛，酒店幫我地搵過話無喎
，於是個女職員就打電話俾 Hotel California 再counter check嘞......佢同酒店d人用法文嘰哩咕嚕講左一大輪
，收線後就同我地講話酒店再幫我地check下，轉頭再覆......
個女職員有d年紀，但就著得好時髦，唔通響巴黎生活嘅人都打扮得型d? 佢仲好nice，響等緊嘅時候不斷同我地傾計，我地其實有d心急擔心個Pass嘅下落，不過佢真係好friendly
，傾左一陣我地都放鬆晒，佢仲送左兩張coupon俾我地，可以響14號之前去某個甜品店換領free macaron，不過可惜後來我地唔記得左，蝕左呀!!
等左一段時間酒店都無覆，於是佢就再打電話去問，當然酒店嗰邊仍然係答話搵唔到......真係有理說不清，一個話send左，一個又話無收到，不過最無辜係我地囉，錢就俾晒，人又專登過埋黎，但張 Pass都係未攞到手......個女職員同酒店嗰邊講完電話後，好無奈咁望住我地，佢話張Pass好肯定send左過去酒店，酒店嗰邊再會繼續幫我地check，呢個時候就睇下我地想點，我地好自然就問可唔可以再出過張Pass俾我地，如果酒店嗰邊搵到咁就請佢地send返過來啦，在我地睇呢個當然係最簡單快捷嘅解決辦法啦，不過佢話每一套Pass都入晒電腦紀錄，響未肯定酒店嗰邊搵唔搵到之前唔可以又再出過另一套...something like that 啦
......佢話可以繼續等酒店嗰邊嘅消息，不過佢都唔想太阻我地時間，剛才同佢閒聊時佢已經知道我地只係響巴黎stay兩日，第三日一早就離開，所以個Pass一定要今日開始用，於是佢就問我地一陣間打算去邊度，我地答會去羅浮宮，於是佢就suggest我地唔好嘥時間響度等，因為羅浮宮離呢度好近，不如我地先響度買過兩張羅浮宮嘅入場門票，去完羅浮宮再行返黎睇下酒店嗰邊有咩消息，如果酒店真係搵返張Pass，佢就refund返兩張羅浮宮入場門票嘅錢俾我地......
於是我地就同佢買左兩張門票，最主要係我地覺得佢好肯幫我地諗辦法去解決問題
，其實佢絕對可以唔理咁多由得我地繼續等酒店嘅消息.....
羅浮宮入場票每位10e.....個女職員叫我地一定要keep好張receipt，如果唔見左就好難同我地做refund，仲再三同我地講今日佢成日都會stay響度，叫我地七點前返黎搵佢就OK.....我覺得佢真係好 helpful 囉~
Tourisme其實係一個類似日本嘅觀光案內所，有好多旅遊資料供應俾遊客，我地當然都攞返d啦~
離開Tourisme，向住女職員教嘅方向，我地終於朝住今個trip第一個景點進發......羅浮宮，我地黎啦!!
(...待續)