2009年2月日本東北8日溫泉之旅 - 後記 + INDEX

終於完成了日本東北這個旅程的遊記! 由東北回來已經半年，這個遊記亦寫了半年....時間過去，當日很多的細節已逐漸淡忘，但是，不論記憶如何褪色，日本東北的美麗及純樸，總是悠悠地永藏心底，不會輕易忘掉。

東北無疑是一處令人印象難忘的地方，這次走訪東北，探訪了宮城、秋田及山形，於我們來說，每一處都充斥著我們愉悅的記憶，仙台的牛舌、松島的悠閒、乳頭溫泉鄉超「騎呢」的日歸浴、角館的浪漫、藏王樹冰的瑰麗、山寺的清麗、銀山溫泉的遺世獨立、最上川的恬靜、橋本屋及米沢牛的「豪」....這一切一切，在在構成了我倆這個獨特的飄雪溫泉之旅....是的，無論這些地方，已經盛載過多少遊人的回憶，也許已經變得不再新鮮，然而，對於我們來說，這八天的遊歷，仍然是獨一無二，當中的每一個小節及遭遇，都是屬於我倆的私藏，記憶也許會模糊，當日的快樂卻是將會長久地銘記在我們的心中，揮之不去。

2009年2月日本東北8日溫泉之旅 - Day 8 (Part 2 再見東京~~)

2月21日   星期六   (東京 > 香港)

三點幾返到酒店，攞返d行李，再將今日d戰利品pack返好.....

酒店大堂幾特別，幾現代feel......不過我地就好似難民咁瑟縮響一角大包細包咁將d野塞落個行李箱....

2009年2月日本東北8日溫泉之旅 - Day 8 (Part 1 東京 shop shop shop!!!)

2009年2月21日   星期六   (東京 > 香港)

時間過得飛快，尤其係快樂嘅日子，話咁快就去到第八日，最後一日喇))))

8:30先去食早餐，早幾日食慣左d日式溫泉旅館供應嘅豐富早餐，返到黎東京酒店只係一d好普通嘅自助早餐，真係有d唔慣.....

2009年2月日本東北8日溫泉之旅 - Day 7 (Part 5 從鄉間返回城市)

2月20日   星期五   (葉山溫泉 > 米沢 > 東京 > 新宿 > 東京)

懷住萬分不捨嘅心情，我地終於離開東北，乘搭14:42班次嘅新幹線返東京~

2009年2月日本東北8日溫泉之旅 - Day 7 (Part 4 米沢牛! 我地黎啦~~~)

2月20日   星期五   (葉山溫泉 > 米沢 > 東京 > 新宿 > 東京)

上一回講到逛完上杉城史苑，我地就行返去巴士站等搭巴士，下一個行程係米沢遊嘅重點，就係去食和牛呀~~~

米沢市有好多食店都係食和牛，我地揀左老字號登起波~~

按照時間表應該11:56有巴士到，不過等左好耐都未見架巴士出現....平時搭日本d巴士基本上都好準時，就算有誤差都係一、兩分鐘，今次真係遲左好多，差唔多十五分鐘! 仲要落住大雨，無摭無擋，又凍又濕，真係等到媽媽聲!!

2009年2月日本東北8日溫泉之旅 - Day 7 (Part 3 上杉神社)

2月20日   星期五   (葉山溫泉 > 米沢 > 東京 > 新宿 > 東京)

米沢上杉神社係響米沢市中央が岬公園入面，落左巴士行幾分鐘就到.....呢個神社係供奉上杉一族嘅先人，據講上杉家當年好威猛嫁，不過對於我地黎講真係無乜所謂，都係當一個景點咁行下啫~~

2009年2月日本東北8日溫泉之旅 - Day 7 (Part 2 向米沢出發)

2月20日   星期五   (葉山溫泉 > 米沢 > 東京 > 新宿 > 東京)

懷住好滿足嘅心情，我地向橋本屋講bye-bye，旅館特別安排左專車送我地去JR車站~

2009年2月日本東北8日溫泉之旅 - Day 7 (Part 1 橋本屋‧朝食篇)

2月20日   星期五   (葉山溫泉 > 米沢 > 東京 > 新宿 > 東京)

話咁快個旅程已經去到第七日，只係剩返兩日就要返香港，都未離開東北就已經有好唔捨得嘅感覺~~

一朝早起身，望出去小庭園發覺鋪滿晒雪~

2009年2月日本東北8日溫泉之旅 - Day 6 (Part 5 橋本屋‧夕食篇)

2月19日   星期四   (銀山溫泉 > 最上川 > 天童 > 葉山溫泉)

浸完溫泉就響房攤抖一下.....平時去親旅行我地都總係要趕頭趕命，好難得可以好似今次咁D時間咁鬆動.....

2009年2月日本東北8日溫泉之旅 - Day 6 (Part 4 橋本屋‧究竟有幾豪呀?!)

2月19日   星期四   (銀山溫泉 > 最上川 > 天童 > 葉山溫泉)

上回講到無啦啦響天童食左個lunch，之後我地就搭15:08班次嘅奧羽本線返山形，只係二十分鐘車程，去到差唔多三點半，跟住會搭15:57班次新幹線去葉山溫泉，未夠鐘上車，我地就響山形車站逛下~

見到有呢D jelly賣，梗係唔放過買返D啦....

2009年2月日本東北8日溫泉之旅 - Day 6 (Part 3 無啦啦去天童食個午飯)

2月19日   星期四   (銀山溫泉 > 最上川 > 天童 > 葉山溫泉)

上回講到坐雪見舟去到終點站草薙溫泉港，之後我地就要搭巴士去JR高屋站，然後再轉陸羽西線返新庄喇~

上左岸就直接去到一個souvenir centre，因為未夠時間搭巴士，周圍又無野行，所以所有人都只有響度逛逛~

2009年2月日本東北8日溫泉之旅 - Day 6 (Part 2 最上川懷古雪見舟)

2月19日    星期四    (銀山溫泉 > 最上川 > 天童 > 葉山溫泉)

離開古山閣，我地拎住重重嘅行李行去巴士站......

2009年2月日本東北8日溫泉之旅 - Day 5 (Part 7 古山閣)

2月18日   星期三   (藏王山 > 山寺 > 山形 > 銀山溫泉)

古山閣嘅晚餐時間好鬼早，揀到最遲都要六點!!  返到上房個鐘都未搭正六點電話就響，我拎起電話就懶醒咁mu-shi mu-shi，對方就同我講左一大堆日文，咁我就唯有用返英文問係咪"dinner??"啦~~

好快就有個女將搬左兩個tray入黎，上面已經擺左D野食，但係佢又唔係將個tray放響廳入面個茶几上喎，而係走左去露台出面搵左兩個几仔出黎，然後將個tray套左響上面，好鬼有趣~~

又係我最鍾意但老爺話最囉唆嘅一part喇.....就係介紹菜式啦~~

先黎兩款前菜~

My favourite dish, 漬物，有兩碟呀!!

岩魚刺身，o-i-shii~~

豆腐

尾花沢牛

咁好味嘅牛肉梗係做sha-bu sha-bu啦....yummy~~

??....太耐，已經唔記得係乜家伙.....

中華魚翅

真係有好大塊翅嫁~~

燒鰻魚，好味道!!

山形名物 --> 牛肉芋煮

唔小得嘅go-han同湯~

生果

呢餐晚飯都食左個幾鐘....大家留意下左下角，個飯煲又係擺左響女性嗰邊位....真係裝飯都裝到手軟，咁攪法，住多幾晚呢D溫泉旅館，老爺都真係乜仇都報晒~~

食飽之後就打電話叫個女將入黎收拾，然後有個男仔走左入黎幫我地舖tatami....個男仔就係中午載我地入黎銀山嗰個司機呀，佢地都好興一人做幾種工作.....

舖完床，食到飽飽好應該出去外面散下步消化一下，不過拉開門見到個貸切露天風呂竟然係空室，咁就梗係拿拿聲走入去浸下先啦~~

古山閣有兩個貸切風呂，一個露天，一個室內，兩個都唔需要預約，兩個風呂嘅入口掛左個木牌，如果見係寫住"空"就即係無人用緊，入去浸之前將個木牌掉轉話俾人知有人使用就可以喇~

入到去露天風呂好鬼凍!! 完全無暖氣，好簡陋，個洗手盆仲係得冷水，唔怪得無人浸露天啦.....拿拿林除衫沖涼，一路沖一路打冷震，真係凍到要喊阿媽....唔掂，頂唔順，D冷風吹到牙關打晒震，係咁意沖沖算，即刻跳落個溫泉度.....嘩~好熱呀!! 辣到成個人即刻彈起!! 要慢慢坐低慢慢潑水落身先掂~~

呢個所謂嘅露天風呂，其實係得一面半開揚，望到出面個後山，咩景都無，完全唔駛驚會有人望入黎~~

(旅館網頁圖片)

浸左陣D水溫已經適應，不過可能D水始終太熱老爺唔係咁舒服，所以浸左無耐就走喇....換返衫我地就再出去外面條溫泉街睇下個夜景~

夜晚嘅銀山溫泉又有唔同嘅風貌~

黑夜之中有點點嘅昏黃嘅燈光，加添左一份寂寥嘅感覺....

夜晚無咩人行，間唔中先見到兩、三個人，有對上左年紀嘅夫婦見到我地主動話幫我地影合照，又同我地用半日半英文閒聊左一陣，雖然夜晚嘅銀山溫泉好凍，但係響途中能遇見好nice嘅途人，個心就好溫暖~~

行左唔係好耐，D雪愈落愈大，未見過咁綿密嘅雪，我地又無帶雨傘，老爺話驚會整濕件羽絨就麻煩，所以逛左一陣就返入去旅館喇~

上房換返浴衣，我地就各自去浸下個男女湯....呢間旅館嘅男女湯都只係得室內~

走廊盡頭就係女湯~

男湯響另一邊，要落去下面個basement~

入到去女湯，入面唔係好大，一眼見晒，同藏王國際爭好遠，有個兩個女仔沖緊身，我走去係咁意沖沖身就走落個溫泉度.....D水都好鬼熱，不過就好舒服....浸左一陣其中一個女仔就走過用腳尖試下水，即刻V嘩鬼叫唔肯再落水，佢個friend見佢咁又走黎試下，佢就好小小，都夠膽放晒成對腳落水，不過都響度怪叫，大概係話好熱啦.....睇佢地咁樣我真係覺得好得意，見佢地成日望住我笑，咁我就主動同佢地搭訕....佢地都識D英文噃，咁我就教佢地先坐響個樓梯級上，用水先潑暖自己上身，然後慢慢將個身滑落去個溫泉度，適應左個水溫就唔會覺得太熱嫁喇.....

係咪好醒呢? 香港人教返日本妹點浸溫泉....

佢地照我講去做，終於都肯落水浸，我又問佢地有無上過去三樓試下浸private bath，佢地竟然唔知有貸切風呂，我話俾佢地知個露天風呂D水仲熱，佢地笑住話等陣都要去試下.....

我地一路浸一路傾，雖然係用好有限嘅英文同日文，但係就傾得幾開心，我覺得呢D真係好難得嘅經驗，旅行嘅樂趣亦都係可以同唔同地方嘅人交流，呢一晚都幾難忘~~

下面呢個就係女湯喇 (旅館網頁圖片)

浸夠後同佢地講bye-bye，出返去見到老爺響個休憩位攤抖緊~

同老爺交流左各自響內湯嘅情況，就周圍行下影下個旅館啦~

有個古老大鐘~

大門口玄關位

接待處

旁邊放左好多相，大概係乜乜名人都黎住過啦....下面中間嗰個就係一路招呼我地嘅女將喇~

順手睇埋聽朝公共巴士出大石田嘅時間表~

銀山溫泉舊時嘅外貌，真係有好多年歷史~~

古樸嘅木樓梯~

上返三樓，見到個室內貸切無人用喎，咁我地咪又順手走埋入去浸浸囉，唔好嘥嘛~~

室內貸切嘅設備好過露天，至少有暖氣~

個洗手盆有熱水嫁~

終於可以舒舒服服咁沖個涼，仲洗埋個頭呀~

溫泉水一樣係超熱!!

浸夠後就返房喇，一晚浸左幾次浴，成個人都好舒服....浸過浴後新陳代謝都快D嫁，返到房又覺得有D肚餓，係時候食宵夜....攞返下午響溫泉街買嘅咖哩飽出黎填肚先~

雖然凍左，但係肚餓時候就咩都好味啦~~

食完睇左陣電視已經十一點，係時候搵周公啦.....睇下個枕頭好鬼細，大過我個手袋小小咋~

Good night, 銀山溫泉~~

P.S. (幾無聊，男士可以skip左佢唔繼續睇.....)

唔知點解，由呢一晚開始，我塊面勁乾同埋開始甩皮，好驚!! 我懷疑之前響藏王浸溫泉時，我試過多手將D溫泉水潑落塊面度，所以皮膚唔受得.....好在我有帶左一隻專係補濕用嘅護膚品去，話時話，呢隻護膚品唔貴嫁 (L字頭，算係新產品，響Watsons同Mannings有得賣)，但係就好好用，勁補濕!! 當時搽左兩日，開始有效無繼續甩皮，所以話有時唔係一定貴野先好嫁~~

---> Day 6 - Part 1 漫天飄雪的銀山清晨