2012年6月27日星期三

2012年2月巴黎倫敦11日 - OMG!! 羅浮宮都有千年木乃伊~~

11 FEVRIER 2012 (DAY 1 - PART 5)



今篇仍然係羅浮宮之旅,因為地方實在太大,展覽品實在太多,而且10e一位入場費,唔影多d相對唔住自己.......上一篇講到我地響 food court 求其食左d野,攤抖左一陣,又繼續上路,下午我地改變策略,決定行晒一個wing先再行第二個~

Hea完d 精力又返晒嚟......進入Richelieu Wing,首先去 Lower Ground 嘅 Cour Marly (馬利中庭).......

 

好大片玻璃天花,型呀!赞




馬利中庭個名係來自十七世紀嘅馬利城堡,當時城堡入面嘅雕塑全部都係法國路易十四時期嘅作品.....今時今日d 雕塑就搬晒過嚟羅浮宮呢個馬利中庭~



當中最出名嘅係呢個路易十五時期嘅「馬利的駿馬」(Horses of Marly)......


叫得駿馬,呢隻馬當然唔簡單,大家睇下佢騰空躍起,姿態美妙,d 馬毛好似隨風飄揚咁,好有動感!


雖然隻馬係主角,我覺得個肌肉男都好有力量嘅感覺


另一組雕像,都係為左歌頌路易十四響戰爭中勝利而造......


馬蹄下嗰堆野都係戰利品~


呢度個環境真係好優美







我個人好鍾意呢個馬利中庭......午後嘅陽光穿過透明嘅玻璃天花,淡淡影照住一個個線條優美栩栩如生嘅雕塑,感覺好清新



另一個角度欣賞馬利中庭~


響馬利中庭流連左一陣,下一個目標係響 Level 1 嘅拿破崙三世套房.......
 












通去拿破崙三世套房嘅呢條樓梯同裝飾好靚呀!!心







好grand 呀,好似去左ball room 跳舞咁~


呢個拿破崙三世套房,其實並無皇帝住過,只不過因為呢度嘅裝飾係仿照19世紀中葉拿破崙三世統治時期嘅風格而名~


一去到就會先見到好大好華麗嘅大水晶燈.....
 




 
Wow! 成組套房四圍都係鑲金浮雕同彩繪天花.....


佩襯住深紅色絲絨窗簾同傢具,好grand 嘅感覺吃惊


好豪好金碧輝煌!! 不過真係好奢華,一屋都係金,好鬼浮誇俗氣啫挖鼻屎,唔駛錢俾你響度免費住都要講句 no thanks 啦


日日咁對住一屋都係金光閃閃,對眼都好辛苦囉,當時有黑超呢樣野未呢?







 
張凳咁樣design,坐響度同隔離嗰個傾計,個頭咪要扭到側晒?!






左右兩個花瓶d圖畫咁中國style嘅?


條樓梯好窄好迂迴,好懷疑以前d皇后公主個個著住拖地長裙點行上行落呢?




 
好華麗嘅宴會廳! 坐響呢度食飯唔知會有咩感覺? 真係會食得開心d??






見識完奢華嘅拿破崙三世套房,跟手睇埋復辟時期同七月皇朝嘅 decorative arts......


法國路易十八嘅龍床......Well, 床前面要咁大空間做咩呢?疑问 做柔軟體操??偷笑




睇下睇下忽然發覺張床好短.....一向只知道拿破崙係矮仔,路易十八都係咁?






又 wow! 今次係水晶鍍金化妝枱.....


而家用嚟俾遊客玩自拍照嘻嘻






呢d 雕像個樣好似係黑人?思考


幫黑人造像,咁開明嘅??






好多唔知係幾多世嘅皇帝肖像,已經睇到無晒感覺



 

行得攰又停停望下外面嘅風景先......





抖左一陣就上level 2......首先去魯本斯畫室,呢度陳列嘅係魯本斯為亨利四世皇后瑪莉而繪畫嘅24幅巨型畫作......






到此一遊,係咁意掃一掃......我對放響廳中間嘅凳大興趣d.......真係好攰呀!!抓狂


Richelieu Wing 呢邊嘅畫廳人流比較少,大部份人都係集中晒響 Denon Wing 嗰邊~

 
老爺話鍾意呢幅畫,覺得個氣氛幾好咁話喎


下面呢一幅「織花邊的少女」(The Lacemaker) 都幾出名嫁,畫中少女好專注咁穿針引線,有一種寧靜嘅美.....呢幅畫其實好細~


下面呢一幅「加百麗與妹妹」(Gabrielle d'Estrees & One of Her Sisters) ,講得好聽就叫有趣,直接d 其實就叫 K 怪偷笑......


右手邊嗰個係亨利四世嘅情婦Gabrielle,旁邊就係佢個細妹,兩個人據講係響度沖緊涼,後面係一個做緊針線嘅侍女,古怪嘅係唔知點解明明沖緊涼阿Gabrielle隻左手無啦啦拎住隻戒指,而個細妹就用隻手掐Gabrielle個咪咪吃惊......d 專家認為呢個手勢有魅力嘅意思疑问,所以推測Gabrielle當時係有左BB.......好 "R" 頭囉,點諗都諗唔明點解可以推測出呢個結論,不過我地唔係專家,專家d思維係好難明嘅

另一個中庭 (Cour Puget),就響馬利中庭嘅另一邊,兩個中庭嘅design相約.....我覺得都係馬利中庭靚d~





逛晒Richelieu Wing,跟住去Sully Wing.......又抖一陣欣賞下外面嘅風景先....... 


羅浮宮真係好大,要仔細睇晒d展品真係無一個禮拜都睇唔晒~




好靚嘅哥德式建築~






可以望見騎兵凱旋門同埋最遠方嘅新凱旋門,摩天輪後面好隱約嗰度就係~


 攤抖左一陣繼續上路......連通道樓梯嘅ceiling都咁鬼靚!


Sully Wing level 2 仍然係French paintings,我比較有興趣嘅係Ingres 嘅浴女系列,,,,,,先嚟
「土耳其浴室」(The Turkish Bath).....同之前睇嘅「大宮女」一樣,裸女嘅身體比例異於常人,因為想突出女性嘅線條美.......


再嚟「浴女」(The Bather)......講真,呢個畫家,成日都畫裸女入浴嘅背影,其實佢係咪有d 偷竊狂嫁?!哈哈
 











"The Three Graces"......我又有一種想打佢pat pat嘅感覺偷笑



快速掃完level 2,終於要去睇古埃及文物......


呢條螺旋形樓梯由level 2 直達ground floor,一出去就係古埃及文物區,唔知係咪心理作用,落緊條樓梯時覺得陰風陣陣咁悲伤......


牆上嗰d 係年表,不過唔係好記得係咪關於古埃及 lu....


原來唔係只有大英博物館先有古埃及文物,羅浮宮都唔弱,不過唔知係咪同英國佬一樣都係明搶返嚟?


之前做planning 時上羅浮宮嘅網頁搵料時都知道呢度有古埃及文物,不過一直都以為只係有人面獅身像,點知一走入呢個展覽廳就見到好多木乃伊棺木,當堂嚇左一跳吃惊.....


放眼望過去真係一廳都係林林總總嘅木乃伊棺木,平時行街如果經過棺材舖真係大吉利是相信大家都走夾唔抖,但嚟到博物館,對住呢d曾經裝過千年死屍嘅棺材,個個都若無其事挑機影個不停,真係唔知係咩心態


不過呢d木乃伊棺木個 look 又真係幾別緻嘅,而且款式各有不同.....好似下面呢個,.除左成個人形外殼,棺槨表面好colourful......


呢個比較活潑,有彩繪人形圖案~


 
 呢個素色中見深沉~


呢個漆金,好grand!


呢個好古怪,成個佛咁


陪葬公仔?


呢個俾埋內籠你睇......


雕花都幾精細嫁~


不過一諗起呢一大堆棺材全部都裝過屍體,唔多唔少都有d毛骨悚然嘅感覺

 
除左棺槨,仲有其他一d古文物......有好多學生就地坐響度聽老師講解......嗯,講書都搵個光猛舒服d嘅地方啦,呢度附近個陰氣好重喎生病


古埃及女人都鍾意玩波波?.....咦,呢個女人有個肚腩仔偷笑


影下影下,忽然見到不遠處有好多人聚埋,超八嘅我當然即刻攝入去昅下睇睇咩料......唔睇由自可,一睇即刻哇一聲叫左出嚟抓狂....OMG! 木‧乃‧伊呀!!.....

Well, 我唔係未見過木乃伊,只不過響毫無心理準備之下忽然見到一條真嘅木乃伊真係好驚囉!! 記得N年前去大英博物館睇 mummies,當時年少無知,見到 d mummies 鬼死咁興奮,有個mummy even 連頭髮都飛左出嚟,雖然好恐怖但仍然起勢咁猛咁影相,要知道N年前仲用緊菲林機,無得話影完唔鍾意就delete左佢,之後返香港曬返晒d相,老媽子一睇火都嚟鬧足我好幾年怒骂,話我好帶埋呢d 野返屋企......

唔知係咪年紀大左,而家個膽反而細返,唔好話驚俾老媽子丙,自己都唔想影條死屍,亦嚴禁老爺影,所以響羅浮宮同之後大英博物館我地都無影mummy嘅相,如果大家有興趣可以去官方網頁睇下......其實呢個 mummy 都 keep 得好完整,不過一諗起係條千年老屍我就覺得好恐怖囉!! 望左幾眼我就閃開.....老爺當然仲好有興趣響度由頭望到去腳趾,研究左一輪,條友仔好似發現左新大陸咁勁 high 呼召我,佢話個 mummy 旁邊有幾個器皿估計應該係裝住條死屍嘅內臟.....我的媽,好嘔心好核突呀!!






雖然放置木乃伊同棺木嘅展廳有好多遊客,不過唔知點解始終覺得有d 陰森嘅感覺,老爺研究完個 mummy 我就扯住佢閃人嘞......


古埃及除左mummy當然仲有好多其他文物,好似呢個拉美西斯二世坐像 (Ramesses II),佢係埃及第19王朝嘅法老王,呢位仁兄好猛料嫁,佢掌權嘅時期係古埃及王國最強盛嘅時代~
 






 
對腳好巨呀!


呢個雕像明明係一個人但個頭就係一隻鷹......唉,我都係鍾意睇古希臘嘅雕塑多d 囉,至少有肌肉男睇下!挤眼


跟住去到人面獅身像區域啦......


古埃及人認為人面獅身 (Sphinx) 係負責守護法老王嘅陵墓,所以d 金字塔入口通常都會有人面獅身像看守......




據講d人面獅身像個個嘅樣貌都唔同,因為係根據當時佢地所守護嘅法老嘅樣貌而刻嫁~




逛完古埃及文物區,終於去到我地羅浮宮之旅最後一個景點,中世紀羅浮宮城壕.......


呢個城壕唔係複製品,係真跡嚟嫁,即係話呢d一塊塊石已經有好多個世紀嘅歷史,而且成個城壕面積都幾大,再加上陰陰涼涼咁黑线,我想快d行完個圈就閃囉委屈


水井?


有個大模型,展示中世紀時羅浮宮嘅原貌.......


唉,我想快d 閃失望,但老爺一見到建築物模型就發狂~


佢話呢個係護城門.....














仲要走返轉頭搵返個實物對照.....







參觀完中世紀羅浮宮城壕,我地嘅羅浮宮之旅亦正式結束嘞耶......逛左差不多四個半鐘,我對腳攰到好似唔係自己咁,幾乎要不支倒地生病,雖然我地只係好粗略咁睇左一d 比較知名嘅展品,佔成個羅浮宮館藏十分一都無,而且好多展覽品我地都唔知係乜東東,但我地都睇得好滿足好享受,希望將來有機會我地可以再嚟慢慢仔細欣賞啦~

離開Sully Wing,當然仲未同羅浮宮bye bye啦,因為行左大半日,終於到左最重要嘅時刻,就係shopping 時間呀嘻嘻,Yeah!!!

(...待續)