2008年12月29日星期一

2008年2月北海道道央道南無啦啦熟口熟面又再8日遊 - Index

已經是第三次往北海道啦~~~~~~

其實,早在去年年尾計劃這次旅行時,北海道並非首選,畢竟去年二月才於北海道遊玩過。首選其實是日本東北,因為很想往藏王觀賞樹冰,但當時所能夠找到的資料不多,市面上已出版的旅遊書少之又少,思前想後,始終覺得遊東北這個地方還不是時候,因此最後都決定放下東北這念頭,但是我們都喜歡賞雪、喜歡於寒冷的天氣下感受溫熱的溫泉,而北國的純樸更是我倆心之所繫,遂把目的地改為北海道。


說了一大堆文縐縐的開場白,好啦,開始這個熟口熟面的北海道之旅啦~~~~


Day 1
香港 ~ 札幌
 


Day 2
札幌 ~ 函館


Day 3
函館
Part 1 - 靈異事件部
Part 2 - 續遊函館


Day 4
函館 ~ 札幌 ~ 定山溪 (大災難日!!!)


Day 5
定山溪 ~ 札幌 ~ 小樽 ~ 札幌
Part 1 - 快速遊走定山溪
Part 2 - 小樽!我地又嚟啦~~~


Day 6
札幌 ~ 洞爺湖 ~ 千歲 ~ 札幌 (死寂一片洞爺湖)


Day 7
札幌 (血拚日!!!)


Day 8
札幌 ~ 香港


2008年2月北海道8日 - Day 8 (最後一日喇~~~)

2月28日   星期四


時間過得飛快,尤其係旅行嘅時候,一眨眼今日已經係最後一日啦,要離開北海道.....真係好唔捨得呀~~~~~


今日我地會搭16:20嘅國泰直航機返香港,即係話仲有一個朝早比我地響札幌搏殺呀......響酒店食左早餐後我地就拿拿聲搞好晒check out,然後就立刻出動喇!因為實在太多行李,我地又一時醒唔起自己係購物狂,個package係包來回酒店機場,之前我地唔覺意竟然揀左搭JR而唔係機場巴士....因為酒店離JR站話遠唔遠,但係要拖住咁多件行李響雪地上行,仲要過三條馬路先到,真係都有D難度,尤其係我成日響馬路 PK .....於是我地就決定趁朝早出去逛時,先順道攞住一部份行李去放響JR站D locker度先囉,咁到真係要響酒店離開時拖果兩個大喼過馬路都唔使咁 "lea hea"嘛!


我地準九點響酒店出發,擺好晒行李響車站後,原本諗住先去附近嘅北海道廳舊本廳舍逛下影下相先,不過今朝實在好大雪,所以放完D行李就決定放棄戶外活動,但係D公司又未開,咁咪唯有響車站下層流連囉,哈!又比我搵倒間藥房係開左架....


逛左一陣,我地就起程去西武嘅 Loft,因為想買條旅行鎖帶 (D行李實在太full...)!去到仲未夠十點,唯有響西武門口同附近影下雪景先啦,因為D雪真係落得好大,而且好綿密,有D停泊響路邊嘅車都比白雪蓋住晒...


白雪綿綿嘅札幌街頭獵影~~


札幌嘅天氣真係變化莫測,果頭仲係落緊大雪,我地只不過入去lawson兜左一個圈,出黎個天已經變得陽光普照,D雪亦都開始停...


好快速咁響Loft掃左D野後,我地就落返地下街,沿住Apia一路邊逛邊慢慢行返去酒店囉,條Apia都好多店舖,不過我地專揀有做大減價先入去行,最終都有收獲呀,臨尾我都買左兩件衫同一對mother garden嘅保暖拖鞋~~~


因為之前個package包嘅車票係自由席,所以我地預先去加錢換指定席。我地reserve左12:03嘅快速機場線,所以響地下街行到11:15就打道回酒店喇,果剎那真係好唔捨得條地下街....


我家老爺嘅手掌印....永遠咁留響札幌街頭.....


幾經辛苦終於將D行李拖到去車站,今次無響馬路PK呀~~~響locker攞返朝早放低嘅行李,我地就歷盡艱辛咁將所有行李拉去月台喇.....不過幾辛苦都無所謂啦,因為全部都係戰利品嘛,做人要識得感恩架~~~~    


好快就去到機場,只係12點半。Check out左後一身鬆晒,然後就梗係喳喳林響機場大樓作最後衝刺啦!不過好多野都熟口熟面,而且D錢又已經使得七七八八,要就住黎使,所以都無咩特別收獲,最後只係買左D cheese cakes同 Royce朱古力咁啦~~



然後就去食午飯喇.....響三樓兜左個圈,我地都係去返舊年果間店舖食魚生飯呀~~


我嘅海膽魚子飯,好鮮甜呀~~~


我家老爺嘅海鮮定食,真係好正架.....兩個定食夾埋都係4100yen咋~~~


一路食一路欣賞窗外嘅雪景~~


食飽後就繼續逛多一陣,行到三點幾,老爺就命令我要去過關喇....我心諗仲有成個鐘,使乜咁緊張喎....點知未去到過關果度已經見到好多香港人排左條好長嘅龍喇,原來國際直航得一絛X光帶,再加上好多人響機場買左D蟹同海膽,但係原來唔可以hand carry 上機,所以check得好慢.....排左好耐,真係好驚趕唔切班機....最慘就係排響我地前面果對男女又不斷咁攬身攬世,仲要你一啖我一啖咁咀黎咀去,真係攞命!呢D咁私人嘅野唔該留返響屋企先做得唔得,都無人想睇你地表演!大佬,又唔係靚仔靚女過人,亨亨同嘉嘉都話望下當睇戲呀!我都明白情到濃時嘅野應該敢愛敢做,不過我真係覺得佢地係好刻意咁做比人睇囉....仲要個男仔每攬一次果個女仔都好鬼大動作,有幾次佢隻手仲拍倒我,你話呢D人幾咁黑人憎....簡直丟盡香港人嘅臉 ....#%@^*&@!....


將近四點鐘終於排到過關喇,最開心嘅係前面果個女仔過X光帶時竟然有問題比職員截住要搜袋,咁我地就梗係即刻爬佢地頭過關先啦.....你話我黑心都係咁話,見住佢地手足無措嘅樣,真係好鬼開心,比掃倒貨仲要興奮呀~~~~


飛機準16:20起飛喇....北海道bye bye啦,我地一定會再黎玩架~~~~


呢個就係返到香港嘅滿足樣喇.....


我嘅戰利品呀~~~


2008年12月26日星期五

2008年2月北海道8日遊 - Day 7 (血拚札幌!!!)

2月27日   星期三


話咁快個旅程已經去到第七日啦!今日係血拚日,一整日都會響札幌逛.....滿心期待....


朝早望出窗外,天色都幾好,有陽光,遠處Norbesa果個摩天輪都睇得好清楚~~


響酒店食完早餐就出發囉。經過JR Tower 前嘅廣場當然係影返D相留念先啦~~


好多白鴿好悠閒咁響度踱步同覓食~~


好似一棵聖誕樹~~                  


呢個車站就係當日我地搭去定山溪果個巴士站喇~~


因為試過舊年響一、兩處地方磨得太耐而令到D時間失晒預算,所以今次我地採取速戰速決嘅策略......我地響JR Tower、Stellar Place、ESTA一帶流連左差唔多兩個鐘,響大丸、Gap、Comme Ca、西武等店舖都有收獲呀~~~~~


札幌街頭......shopping 之餘不忘拍照~~


之後我地就搭一個站嘅地鐵東豐線去大通站,目的地係丸井今井,好快速咁就掃埋指定目標Agnes B 同 Blue Label,不過款式唔係好啱,反而買左個Anna Sui手袋.....


離開丸井今井就見到札幌電視塔,呢個時候都只係13:12咋~~~


行左成朝已經有D攰,咁我地就決定先食午餐抖抖先囉......我地響丸井今井大通館十樓嘅Food Court 揀左間叫築地玉壽司食壽司飯,雜錦壽司只係 1260yen ~


食飽飽後我地就起程先上去電視塔欣賞下札幌市個雪景先....大通公園D路鋪滿晒雪,望上去D雪好似軟綿綿咁,真係好想瞓上去.....


去到電視塔就買票上展望台,700 yen 一位....其實呢個電視塔都唔係好高,不過響上面可以望晒成個札幌市,白雪中嘅大通公園同札幌市別有一番情調~~


響電視塔流連左一陣,逛埋三樓個手信店就離開喇。之後我地就當然係繼續血拚啦,下一站係Matsymoto Kiyoshi藥房,然後Tokyu Hands....最後就梗係去狸小路嘅激安店、Kobushiya等,同埋最緊要係果間好多香港人幫襯嘅免稅土產店啦....去到又見到果位識講多國語言嘅大叔,我地入左D白癡戀人、六花亭士多啤利朱古力、Hello Kitty公仔同精品咁囉,個大叔照舊比個九折我地,我地同佢用廣東話加普通話閒扯左一輪,佢就再減多小小比我地喇....



響狸小路掃晒貨後,睇下個錶都係五點半咋,不過個天已經開始暗,咁我地就決定去食晚餐喇,因為逛左成日,對腳實在好攰.....我地今晚打算食札幌美食之一嘅蒙古烤肉,目標係位於薄野區嘅味の羊ケ丘,不過拎住咁多野好唔方便,所以我地就走落去地下街先搵個 locker 放低D戰利品先囉~~


呢個 Pole Town 我都好想行,不過實在太攰......


放低晒一袋二袋野後,我地就由 Robinson 上返地面,不過D雪落得好大,行左一條街實在頂唔順,D雪四方八面咁吹過黎,個地又濕好難行呀,我地就決定放棄去搵味の羊ケ丘....行左一陣見到有間店舖都係食成吉思汗炭燒羊肉,咁就走入去幫襯囉~~


我地order左雜錦羊肉,有唔同部位嘅羊肉,又有lamb同mutton,好豐富呀!個炭鍋上放左件羊脂肪,等D脂肪溶晒後就可以放羊肉同埋配菜。烤熟左D羊肉沾埋醬汁,再加一口啤酒,真係好好味呀~~~


食食下我地見個menu話可以叫拉麵,係免費架,咁我地咪同個事頭婆講要點拉麵囉,點知個事頭婆聽見我地要拉麵顯得有D驚訝,旁邊有兩個男座客仲毫不客氣咁大笑起黎,仲係有少少嘲笑成份果種添.....原來果D拉麵係留響最後先食,食晒D羊肉後,將殘餘物資撈埋落另外一個鍋度自己煮....不過鄰座果兩個男人真係無禮貌,我地係遊客嘛,唔識得點食有咩咁出奇喎.....


食飽後埋單只係4290 yen,真係幾抵食~~~~


出到外面發覺D雪已經細左好多,咁就梗係影返張相留念啦~~


見時間尚早,咁我地又再兜去激安行個圈囉....逛到心滿意足先行返去地下街攞返D戰利品,然後就搭地下鐵返酒店喇。返到去都係九點幾,不過真係攰到飛起....今晚係最後一夜喇,攤抖左一陣,就要起身做最唔想做嘅野,就係pack行李呀!....


執左好耐,終於將所有野pack好晒,總共八件行李....兩個人先得八件行李都唔係好過份啫....


Bye bye 啦....好唔捨得嘅札幌夜景.....


-----> Day 8 最後一日啦~~~