2月22日 - DAY 4 (PART 3)
摩周JR站 > 摩周湖
上一回講到響摩周站旁邊嘅ぽつぽ亭食完摩周豚丼之後，我地就開始下午嘅taxi sightseeing之旅嘞.....
響未講行程前想先吹下水，最主要係想紀錄返當日plan弟子屈呢一part行程嘅痛苦經歷，因為之前真係愁左好耐
所謂弟子屈係指摩周湖、屈斜路湖同川湯溫泉一帶，最初plan行程時因為想夜晚響川湯溫泉睇diamond dust同觀星，所以打算日間先遊覽弟子屈一帶景點，夜晚就stay響川湯溫泉.....不過JR只係去到川湯溫泉，想去其他景點就要搭其他交通工具......之前上網search過，知道有條阿寒摩周國立公園觀光巴士線，由網走或阿寒出發，中間會途經弟子屈一帶景點，咁因為我地響知床住嗰間酒店朝早有免費shuttle bus去網走，於是一心就諗住響網走搭呢個觀光巴士，點知! 今年呢條觀光線竟然無啦啦取消左
，真係晴天霹靂，一向都有做嘅巴士線，偏偏我地要坐就cancel!!
於是就搵下川湯溫泉市內有無觀光巴士啦，點知又一個失望，係無嘅
...真係奇怪，話晒摩周湖、砂湯都係出名旅遊熱點，點解響川湯咁近嘅地方會無巴士去嫁??
無計，唯有send email問下打算入住嘅川湯第一ホテル忍冬，睇下佢地可唔可以安排酒店車或者幫我地book架的士啦，呢間酒店d service真係一流，當然佢地d房價都好金，不過一分錢一分貨，佢地好快就回覆，個manager d英文好掂嫁，真係非一般嘅日式英語，但佢地嘅回覆就令人O嘴囉，三個鐘嘅taxi sightseeing tour要20500円!!
好貴啫，我幾想去都無可能俾咁多錢去玩幾個景點啦.....
左諗右諗，似乎只有租車自駕係唯一辦法，於是就去check下即日還車睇下要幾銀啦，點知又一個打擊，原來川湯呢個咁鄉下嘅地方係無outlet出租車
....真係頂，個天係咪要玩我地呀??? 咁又唔得咁又唔得!!
我當然無咁容易放棄啦，川湯無車就搵下附近地方....最近有provide出租車嘅地方係網走，本來我地都可以響網走攞車，但如果玩完即日返去還車又再去搭JR返川湯就好憨居囉，而且咁轉接還完車返到川湯都深夜啦.....OK!! Fine!! 咁唯有響川湯stay一晚第二日先揸返網走還車，之後再轉JR去北見搭酒店shuttle bus去阿寒啦，時間上都夾得到....雖然麻煩同嘥時間左d，不過響無計可施之下都不失為一個可行辦法啦.....
初步決定左自駕就上網search下條路線同參考下其他blog友d遊記啦，唔search尤自可，search完就真係令我地又要重新考慮，老爺始終十五十六，最主要係雪地自駕呢樣野，自從上次響白川鄉試過差d撞雪山事件後，佢已經講明唔想再雪地自駕
，今次雖然唔係自駕好長時間，但由網走去川湯溫泉呢一條路線係必須要經過一段比較危險嘅野上峠，我地仲要走兩轉，實在有d擔心囉
......
距離出發只係淨番兩個多星期，響諗無可諗之下老爺話既然我真係好想去咁死就死啦
，唔好諗咁多一於下定決心去book車，就響呢個時候咁啱由blog友CK鼠處知道有間民宿叫Pension Atreyu，響屈斜路湖好似話幾正，最主要係可以安排車玩弟子屈一帶，於是我地就send email去問呢間Pension，佢地好快就有回覆，不過佢地無時間車我地，但就可以幫我地預約一架的士，費用以人頭計，4000円per head.....兩個人要8000円，話貴唔算好貴，話平又真係唔可以叫平，但相比川湯第一ホテル忍冬要平好多囉，所以都唔需要點考慮就confirm啦....YEAH!!
終於搞掂可以放下心頭大石，可以嘅話始終我地都唔想自駕嘛.....響呢度要同CK鼠講聲唔該晒呀!!
Pension Atreyu主人識講英文，溝通完全無問題，老闆娘會send email問我地個行程，想去咩地方只需要話俾佢知，佢會同我地plan條路線，包括每處景點suggest我地stay幾耐....佢好nice嫁，我地因為想響古丹溫泉浸浴所以起碼要stay半粒鐘，如果咁架的士就要等好耐，個價錢就要貴d，佢地就話不如完成左個taxi sight-seeing tour後，佢地再車我地去古丹溫泉，浸完浴再黎車我地返民宿，而且夜晚仲可以車埋我地去川湯溫泉睇diamond dust，不過因為呢間Pension唔係locate川湯，如果我地要去join埋個觀星tour就無可能夠時間食佢地個dinner....最終我地決定放棄唔去觀星，因為諗住遲d響然別湖仲有機會睇....好彩我地揀左響Pension食dinner，如果唔係我地就會miss左呢一個trip最美味難忘嘅一頓晚餐啦!!
吹水完畢，繼續講返個行程......
由摩周站去摩周湖大約10分鐘，沿路風景好靚，天氣又好，真係可以用風光明媚黎形容呀!!
好快就到左摩周湖第一展望台......
摩周湖因為以透明嘅湖水同濃霧聞名，又叫霧之湖.....據講佢長時間俾釧路濕原d霧氣籠罩，一年內天朗氣清嘅日子唔多，好難先可以睇清楚湖嘅全貌，再加上湖四周係絕壁，遊人好難去得到，所以好神秘咁話......不過話雖如此，我平時見親d人去完摩周湖返黎影d相都唔多覺有霧，我反而想睇下滿佈雲霧嘅湖面囉~
好靚呀!!
湖中間無啦啦有個島仔.....
d湖水真係好藍喎!!
道東有所謂聞名嘅道東三湖︰阿寒湖、屈斜路湖同呢個摩周湖，今次我地全部會去晒，計埋我地以前去過嘅網走湖，除左摩周湖，其他三個湖冬天個湖面都結晒冰，就係得呢個摩周湖無結冰，雖然到而家我都唔明點解有d湖會結冰有d又唔會
，不過睇得多結左冰嘅湖，間唔中睇下有湖水嘅湖都唔錯，不過呢個摩周湖，比較起黎好似細左d
展望台另一面可以遠眺連綿嘅雪山~~
響展望台影完相，我地當然走去休憩室逛逛.....
Yeah!!! 入面好多野shop呀!!
巡左一陣老爺就催話要走.....望下個錶，唔係掛，行左都唔夠五分鐘，做咩咁快走?? 我地之前響呢個景點係預算停留30分鐘，預計最遲12:50離開，而家先係12:35，仲有成15分鐘逛喎，但老爺話見個車長好似好無聊咁一直跟住我地，費事要人地等我地咁耐.....我其實真係好頂老爺唔順，大佬，個taxi fee係預左咁多時間，你唔用盡佢咪即係蝕俾人囉
，而且呢度有好多野買呀，我真係好唔想走住
但條友猛咁響度催
搞到我咩mood都無晒，係咁意揀左幾件野就好不情願咁離開，真係有強權無公理
......走左之後先醒起唔記得買摩周湖之霧罐頭，頂!
Bye-bye 摩周湖!!
離開摩周湖，我地又向下一個景點硫磺山進發......
(...待續)
