2017年11月10日星期五

2016年3月北國極地18日 - 來一場尋夢之旅


我一直好想去睇極光,有人話呢個係一生人點都要去一次嘅旅行,我好同意,雖然我不斷有好多個一生人點都要去一次嘅地方.....好記得好幾年前去北海道,有一晚響知床海旁睇激光 show,響無邊黑暗嘅夜空上打上變幻嘅燈光,個感覺真係好奇異,當時已經同老爺講,總有一日我要去極地睇真正嘅極光~

要睇極光其實都有好幾個選擇︰北歐、冰島、加拿大、阿拉斯加、NZ 等等,好多人話要睇極光肯肯定係去黃刀鎮睇啦,一年有二百幾日都好易睇到,但我嘅第一選擇係北歐.......識睇嘅人一定會話我傻,但我呢個人其實真係傻傻地......睇極光固然係重點,但我又唔想只係純粹為咗追光而去.....事實上我幾鐘意北歐呢個地方,好多年前我初初出嚟做野時曾經去過,感覺好好,雖然物價好高,但當地環境、人情都令人好舒服,當年跟學聯嘅歐洲巴士團,而家慣咗自由行,再去嘅感覺應該好唔同,所以決定要再去一次,今次要入埋北極圈,希望可以睇到期待已久嘅北極光~~

呢個 trip 其實已經係舊年三月嘅事,當時去完返嚟好想寫返留個 record,但又係一個字.....哈哈,唔係懶字 (雖然我真係好懶),係忙呀!.....我係真忙,舊年一共去咗七個 trips,平均計都至少兩個月去一次啦,完成一個 trip 又要忙住搞下一個,真係想每次記返個大概都無時間呀!

今次呢個旅行,由 planning 到出發,身邊嘅人都極度唔贊成,老爺尤其反對.......係呀,因為呢個 trip 只係我自己一個人去!.....由最初期蘊釀時細妹佢地話一齊去,搞下搞下到最終決定自己獨行,當中有過好多心理掙扎.....最重要一點係到底我係咪有能力響零下二三十度環境下去應付一 d 預測唔到嘅困難呢? 我一向論盡嘛,多年嚟又慣咗倚賴老爺,雖然近年都有自己去日本嘅經驗,但大佬,講緊嘅係日本! 日本喎,點同人煙飄渺嘅北極圈相比.....當然,仲有就係點解我要自己一個人去? 而呢個亦係老爺最不解嘅地方,到底有乜理由要急於一個人去? 點解唔等埋佢將來時間許可時先一齊去呢? 而家諗返轉頭,自己都覺得好任性,要身邊嘅人為我擔心......不過我諗人總有任性嘅時候,年紀愈長,愈發覺可以隨心所欲嘅時間唔係好多,趁仍有條件可以支持自己任性就任性一下啦......或者咁講,我好想去做一 d 我一直無試過做嘅事,生活過得愈安穩人漸漸就會失去冒險精神......關於旅行,每次我都會俾自己一個主題,坐破冰船、玩流冰漫步、追櫻、賞楓、賞芝櫻、上立山睇雪牆、瑞士健行、合家親子樂等等 (當然,shopping 都係一個主題,haha).....講到底其實都係俾自己一個籍口去玩.....然而講真,現世代大部份人要去旅行基本上已經唔需要再搵理由,打卡呃 like 先最緊要吧?  不過有時候我仍然會諗,旅行於我自己有咩意義? 響每一個大大小小嘅旅遊當中我到底有乜野得著? 年紀愈大愈覺得響精神上、心靈上總該要有一點點嘅收獲吧?

2017年11月8日星期三

2015年4月東京伊豆8日 - 追櫻.淺草隅田公園


追櫻之旅第三日上午揀咗去位於淺草嘅隅田公園,諗住除咗賞櫻仲可以睇埋晴空塔,可惜呢一日天氣開始轉差,好陰天,結果晴空塔個景係咁樣......


天氣不似預期,不過都已經習慣,一於專心賞櫻吧!

相比前一日嘅藍天,呢日陰天下嘅櫻花景真係差好遠.......

2017年11月3日星期五

2015年4月東京伊豆8日 - 追櫻.千鳥ヶ淵


離開靖國神社,順步就過去旁邊另一個東京著名嘅賞櫻地點,千鳥ヶ淵~

櫻花基本係集中響個湖邊,沿住個湖走一個圈,d 櫻花真係開得好盛! 不過真係勁多人,因為個個都係要向住個湖攞景,好自然就個個塞住晒條路,尤其初初一段,真係迫爆!


2017年10月20日星期五

2016年韓國首爾5日 - 戰利品篇


唉! 實在係太太太太太 lazy 啦,接近一年無 update,首爾都走完第二轉返嚟,哈哈.....呢篇泡菜國戰利品其實好耐之前已寫咗一大半,咁月頭剛又外遊完,距離下一個 trip 又有 d 時間,呢兩個月應該比較得閒,的起心肝完成埋佢啦~~

響 show off 我呢次嘅戰利品前都要補充返少少觀光部份先.....今個 trip 除咗第一篇嘅南怡島同小王子村,第二篇因為追蹤池晟 oppa 嘅足跡而去過嘅景點外,其實都仲有幾個地方到此一遊~

首先係東大門.....其實係因為想去現代百貨 outlet,不過反而響 outlet 無乜收穫,卻順道去咗附近嘅 DPP 東大門設計廣場......雖然只係響外圍影下相,已經覺得呢個 building 好大好型!!

2016年11月3日星期四

2016年韓國首爾5日 - 尋找 oppa 的足跡


雖然已經一把年紀,潮流所趨,阿豬媽去韓國當然都要學下小妹妹去搵下韓劇景點,尋找一下 oppa 嘅足跡.....不過時下大眾都 like 嘅宋仲基或者金秀賢等長腿 oppa 都唔係我杯茶,響芸芸韓星中我最欣賞嘅就係池晟.......自從睇過佢嘅「Kill Me Heal Me」就迷上咗佢,oppa.....(雖然佢年紀細過我 DD 但我都係鍾意叫佢做 oppa 囉,正如劇中瑤拉所言︰長得帥的都是 oppa) Oppa 演技了得之餘又靚仔,真係好鍾意佢呀,所以今次去韓國一定要搵下佢 d 劇嘅景點感受一下佢嘅存在呀~

時間有限,再加上韓國嘅交通對一般遊客來講又未至於好方便,所以今次只係去咗幾個景點,最主要係響市區 subway 去得到同埋夾到自己個行程啦~

首先當然係我嘅最愛「Kill Me Heal Me」......認得嗎? 呢度就係車度賢同吳俐珍嘴嘴嘅地方!
(實景)

(劇照)

2016年10月23日星期日

2016年9月韓國5日 - 阿豬媽重遊首爾


上個月嘅中秋走咗轉首爾.......不經不覺原來上一次到訪韓國已經係 2005年,仲記得當時係最 hit 大長今嘅時候,當年我同老爺去嗰個大長今 park 真係一頭煙,交通唔算方便,搭巴士基本係文盲兼雞同鴨講,我地最後都係搞唔掂終於只有打的來回......當年對韓國嘅印象真係好一般,覺得 D 人好粗魯,唔知點解無啦啦又成日俾人撞,D食店好似唔歡迎遊客咁,招呼黑口黑面,所以當年去過一次之後都再無重遊嘅打算.....事隔十一年,因為韓劇 hit 關係,趁住中秋假期請多兩日假去玩咗五日,今次重遊印象好好多呀,D 野好食,買野又平,尤其護膚品! Super 購物狂嘅我直情好似走水貨咁,買得好滿足呀,哈哈!!


2016年10月21日星期五

2015年4月東京伊豆8日 - 追櫻.靖國神社


追櫻之旅第二個景點係靖國神社.......

雖然成日去日本,但講真從來無諗過會去靖國神社,今次之所以會去只因為想要去附近嘅千鳥之淵賞櫻,搜習資料時發覺原來周邊嘅靖國神社都有櫻花,所以就順道走過來逛逛吧~