2010年11月27日星期六

2010年10月日本青森6日紅葉狩個吉 - 八戶BBQ


10月22日 - DAY 1 (PART 2)



11:30到左八戶.......嘩! 原來八戶係個大站,因為呢度好似無咩景點,所以我一路以為係細細嗰D站仔..........



或者因為係東北新幹線嘅總站,所以都好有規模~





蓋返D紀念章先~~



觀光案內所響二樓.....


巡例入去攞D資料先~~



有晒方向指示喎.........


單係響八戶站,睇下呢度睇下嗰度又影下相已經八左好多時間........


 


出左JR站,拿拿聲去對面街 Nissan Outlet 攞車........搵左一陣先搵到,因為個門口好鬼祟下........原來係後門.........


呢個先係正門........


呢兩個職員好nice,雖然唔曉英文,但好努力用手勢同單字同我地溝通

........不過佢地把口嗰陣煙味真係好惡頂.........


呢D車仔模型係我地中日兩方溝通嘅工具.......


俾晒錢攪好晒手續就出去攞車.........


Check完車個男職員就同我地講解一下個GPS點用,正當我好慶幸今次終於可以好順利咁攞車準備離開之際,竟然發現呢架車係無map code 同郵番編號設定路線!!



真係晴天霹靂!! 有無攪錯,map code咁基本嘅野都無!!

 嗰下當堂企左響度,我地有一部份景點係無電話號碼只得map code,咁點算........即刻要求換車,當然呢個要求係妄想,呢個所謂outlet咁屎細,數埋得幾架車,但真係唔掂,我地死都唔肯走要佢地諗辦法........個職員愁左一陣,又走入去office商量左一輪,終於諗左一個解決方法,就係叫我地俾個地址佢幫我地用地址search定條路線,咁我地就可以利用 "最近紀錄" 搵返個景點出黎........都無計啦,唯有係咁啦,但一時間實在好難記起邊D景點係只有map code,所以只有搵左D好想去嘅景點俾佢search.......咪以為日本人用地址輸入好簡單,佢地要用嗰D咩咩五十音黎搵,好難攪!! 有D又搵唔到,終於攪左好耐先seach到幾個
.......老爺話算把啦,太嘥時間,到時先算啦........



都唔知有無攪錯,第三次自駕啦,無一次可以順順利利,係都要俾D挫折我地!! 仲係每一次都要係一開始攞車已經要媽媽聲!!

Grrr



已經浪費左好多時間,拿拿聲去八食市場醫肚先啦!!


由八戶站去好近,幾分鐘車程........


呢個市場都幾大,分左好多part.........



我地嘅目標當然係好多香港人都去嘅七里村........


呢間野係專食炭燒海鮮,自助形式,客人自己響附近嘅海鮮舖買海鮮返黎燒,七里村只收200円一位,包炭爐同一D煮食用具,限時兩個鐘.......先俾錢,炭爐稍後奉上........



跟手我地就去買海鮮嘞.........


之前見有blog友食過鮑魚,好想食呢,不過搵勻全個海鮮市場都唔見,好失望!!


事實上D海鮮種類都唔算好多,好似無咩野揀咁........不過有D野都算幾平幾抵食.......


呢D Kinki魚響HK食好貴,成六舊幾水一條,呢度好平,不過間間價錢相差好遠,二、三千円一條又有,千幾円亦有,有D細小小甚至只係幾百円.......


因為老爺除左魚生基本上係唔食魚,所以只係買左一條我自己食........條友話都唔知好唔好食,只肯買條細,幾百円嗰種,貴D都唔肯,真孤寒.......不過唔知係唔係我地燒得唔靚,我覺得只係一般,於是有人就意氣風發咁話好在佢英明只係買條平黎試........係囉,至叻係你啦~~



跟手再買左D大蝦同生蠔........


買完返去七里村,個炭爐已經set好左.........


第一時間燒帶子先.........


都有好多本地人食........


Barbeque


D帶子好好味,又大隻又新鮮,我地都覺得係咁多樣至正!!

而家諗返起都流口水!!! 好想再食呀!!


燒左一陣我地又出去巡過,因為無鮑魚,條氣好唔順,唯有索性豪佢一豪,揀左隻毛蟹.........


就係呢隻啦,好大隻,要3000円!! 貴過之前買嗰盤海鮮!!


店員好細心幫我地開蟹斬件........


呢堆野都有排食........


燒呀燒,好期待.......


好多蟹膏呀!! 好鮮甜!! 真係食到 "lam lam 脷" !!

Thumbs Up


食完之後就逛下市場其他部份........


有好多乾貨賣.......


有大抽獎喎.......原來之前每買一次海鮮就送左D票俾我地,唔記得儲夠幾多錢就可以抽........早講!! 我地都唔知D票有用,買毛蟹時個店員無俾我地都唔知要攞,泵心呀!!



最後我地將手頭上嘅票俾左等抽獎D人,佢地好高興,我地就當做善事~~


臨走見到有呢D野賣,有人又話要食........唔知係咪生蟲,條友食極都唔飽

.........


咩黎嫁??


入面係紅豆蓉,有人話好好味,我覺得甜左D囉!!


食飽飽,入左D貨,之後去返停車場攞返架車走 lu.......


Cruisin


下午原本嘅行程係食完野去八戶市附近嘅種差海岸行下,聽講話D風景好靚,不過頭先攞車時已經嘥左好多時間,我地今晚會入住淺虫溫泉,由八戶去都要成個半鐘,老爺唔想太遲去酒店,所以唯有skip左種差海岸唔去,改為去酒店附近嘅ほたて広場,呢個廣場係帶子廣場,有關於帶子嘅專門展覽,同埋最重要係有大大隻嘅帶子食!!


Set左GPS,預計16:03到~~


上IC......


本來無咩好講,因為上車無耐,唔知係咪飯氣攻心,兩個人都開始十下十下,我瞓都唔緊要,連揸車嗰位嘅眼皮都睜唔開

.......於是有人一個唔為意就響分叉路行錯線
,明明應該行三沢方向,兜友竟然行左盛剛方向,嚇到我當堂醒晒
,尖叫都黎唔切.......



雖然唔駛俾額外錢,但就嘥左D時間........


走左去南鄉,唔知咩地方........



浪費左大半個鐘時間!!


為左避免再瞓著又行錯路,即刻出動剛剛響八食市場買嘅蘋果小食.......


薄薄一片脆卜卜,蘋果味都幾重~~


本來都已經唔係早,仲要行錯路,前面D車又行得慢,去到目的地唔知會唔會已經天黑

.......


途經 Lawson,放放水,行個圈止下眼瞓先.........


頂唔順都要整返個coffee~~


日落啦!!


呢條有料道路真係行到人懨懨欲睡,因為一路有架大貨車響前面慢遊

........懨悶之餘條尾龍骨坐到好鬼痛!!




16:45,淺虫溫泉在望!! YEAH~~~


差不多五點終於去到淺虫溫泉,呢個時候個天仲未黑,但已經日落西山.......


呢個島好得意,背後係日落景,現場睇好似個仙境咁.......不過我地唔得閒停車慢慢欣賞.......


原本我地set左GPS去ほたて広場,但遲左成粒鐘,當然取消唔去改直接去酒店........見到前面靠海邊有個大空地,於是就駛埋去停車再set過個GPS.......點知又一個晴天霹靂,酒店個電話號碼竟然輸入唔到!! 頂!!

呢架車個GPS得電話號碼輸入,你叫我地點........


鎮定D鎮定D,我記得酒店附近有個道之駅,之前搵定左個電話號碼諗住有時間去shopping下,即刻試下入過code......點知又一個頂!!

真係唔到你唔媽媽聲,原來我地身處嘅地方就係道之駅!!.......有無攪錯,四周空盪盪一片,個駅響邊??


兩個人響海邊,日落嘅餘暉好浪漫咁照住我地,本來係好sweet嘅moment,但我地真係無mood去浪漫,只能夠你眼望我眼

Shock 2
Shock 3
,呆左響度唔知點算好
........



究竟我地最終搵唔搵到、又或者搵左幾耐先搵到間酒店呢? 欲知後事如何,請看下回分解.........


......待續