2012年12月東京熱海快閃72小時 - Part 1

12月14日 (星期五)
香港 > 成田機場 > 湯河原

完成左10年北海道嘅遊記，本來打算開始寫去年四國嘅trip，不過諗下諗都係快快手整左呢個快閃trip 先，希望五篇可以搞掂~

又係搭凌晨機......得嗰72小時，仲唔搭凌晨機不如唔好去!

2012年2月巴黎倫敦11日 - 從西堤島到協和廣場，跟塞納河一起漫步

12 FEVRIER 2012 (DAY 2 - PART 4)


食完個豪lunch，我地打算沿住塞納河畔漫步當消化一下.......


遠遠望見鐵塔


由新橋行返過去左岸........橋上面嘅街燈好典雅~


Pont Neuf 就係新橋，pont 響法文嘅意思即係橋~


新橋之所以叫新橋，係因為以前巴黎嘅橋上面都蓋左房屋，而新橋則係第一座無蓋屋嘅路橋，響當時嚟講咪叫新囉~

沿塞納河兩岸有好多著名觀光景點，好多旅遊公司提供觀光船遊河，一般都係響聖母院附近同鐵塔上落~

亨利四世騎馬像，專登起嚟紀念呢座橋響佢任內完成~

響新橋望返過去右岸.......

西堤島西邊尖端嘅三角公園Square du Vert Galant，呢度景色好靚呀，希望下次如果再有機會去巴黎可以去逛下啦


西堤島尖端位旁邊就係羅浮宮，我地尋日去過啦~


羅浮宮究竟有幾大? 佢嘅長度橫跨三條橋 (i.e. 藝術橋、卡塞爾橋、皇家橋)，可想而知有幾大，有乜辦法唔行到成隻狗咁

呢條黑色鐵橋就係藝術橋 (Pont des Arts)，係塞納河畔第一座以鑄鐵建造嘅步道橋.......

藝術橋連接羅浮宮同法蘭西學院.......由於羅浮宮響拿破崙時代又叫做藝術皇宮，所以呢座橋就叫藝術橋......


法蘭西學院


藝術橋橋身以鐵條構成......由遠處望過去，橋身嘅構圖好靚，不過再靚都唔及橋上面鐵欄嗰d 大大小小嘅愛情鎖咁搶眼........


唔知由幾時開始，巴黎d 情侶鍾意走到嚟藝術橋掛一把鎖，然後將鎖匙拋到河中， 以此作為佢地此生永不分離至死不渝嘅愛情見証........
 

密密麻麻嘅愛情鎖，雖然有少少泛濫成災嘅感覺，但始終都係象徵每一對情侶堅貞嘅愛情........不過企響我旁邊嗰位超唔浪漫嘅仁兄就唔多欣賞，佢話d 鎖頭多到咁，條橋當日計loading 時唔知有無考慮到.....死未?!


離開藝術橋，繼續向前走~


左岸呢邊一樣有好多舊書攡........


有好多年代久遠嘅舊書、舊海報同舊照片~

 

 

逛左一段路，對岸仍然係羅浮宮.......


塞納河沿岸景色優美，連白鴿都鍾意響度hea 住欣賞

卡塞爾橋 (Pont du Carrousel)

走下走下終於去到皇家橋 (Pont Royal)，呢條橋係連結杜樂麗花園 (Jardin des Tuileries) 同奧塞美術館 (Musee d'Orsay) 嘅主要通道........




去到奧塞美術館啦........

呢個美術館嘅前身係1900年為左萬國博覽會而建造嘅火車站，外形好典雅~

 

美術館外圍已經有好多雕塑~

呢個時候都已經三點半，但仲係好多人排隊入場.......我地有Museum Pass，照理應該唔駛咁排掛? 但現場真係超多人，人龍都有幾條........


搵左一陣又問人先知持有Pass 可以由 Reserved Access 嘅 "C" 入口進入，不過都要排，只係比普通入口嘅人龍短d 啦~

排咁耐嘅原因係因為要過呢個security check........不過我地覺得d guard 都好求其，老爺過個探測器時個鐘咇咇響，d guard 都只係係咁意打開佢個背囊望兩眼撥兩撥，連身都無搜就放佢過


過左security check 如果未買票又要再排隊買票，真係排得嚟都夠鐘，好在我地有Pass 可以直入

奧塞美術館因為係舊火車站改建，一入內其實就係以前嘅車站大堂，拱頂係玻璃結構，大量嘅光線由天花板投射而下，將成個大廳映照得好光亮，原本係月台同路軌嘅地方而家係美術館底層中庭嘅雕塑展區~


唔知幾時開始呢個美術館唔俾人影相 (上下兩張相係響大門入口影過去)，記得N年前嚟我仲影左好多相喎........而家去旅行已經習慣左乜都影一餐，尤其呢度有咁多出名嘅作品，忽然無得影一下子有d 失落添.......逛左一陣老爺唔記得唔可以影相，一個唔為意就挑機想影個車站內籠，點知好快就有個黑人職員走出嚟喝止佢，個面口仲要好黑嗰隻........老爺當然好唔like，佢話都係唔覺意想影啫，又無真係影左，而且又唔係想影d art works，駛唔駛咁凶狠呀! 跟住呢句係佢當時嘅真實對白︰「羅浮宮咁出名都俾人任影相啦，呢度有乜咁巴閉!!」所以佢老人家好唔鍾意呢個美術館，每次講起都好不屑....

奧塞美術館嘅典藏以1848至1914年間嘅法國繪畫藝術為主，當中有大量印象派同後印象派嘅作品.......Manet 嘅 "Olympia"、Monet 嘅蓮花 &「日出．印象」、Degas 嘅芭蕾舞女郎、Renoir 嘅豐滿女人同熱鬧嘅party、Gauguin 嘅大溪地paintings.......真係令人目不暇給，睇得好爽呀!! 當然最重要就係仲有我最欣賞嘅 Van Gogh，雖然呢度收藏佢嘅作品唔算好多，佢出名嘅向日葵同starry night 都欠奉，但望住佢最後完成嘅一幅自畫像，藍綠色嘅調子、一條條深刻嘅紋路，強烈嘅筆觸充分表現出佢當時不安嘅情緒.......好仰慕佢嘅才華呀!!

(from google photo) 

除左大量印象派作品，另外仲有一d Barbizon 嘅paintings，最愛 Millet 嘅「拾穗」同「晚禱」，同埋Rodin 嘅「地獄之門」等等，真係睇到唔想走，可惜我地太晏去只可以停留兩個鐘，唔可以細心欣賞，真係意猶未盡呢!!

館入面唔俾影相，影外面就無問題啦~

俾人休息嘅凳都型過人.......d 鬼仔鬼妹一個二個攤屍咁.......


話時話如果呢d 人係強國人，攤到咁樣就會覺得好丟臉，所以我都認自己係對強國人有好大嘅偏見，我認嫁，我係對強國人好有成見，不過我真係忍唔住囉，好似早幾日我地去廸廸尼玩，響toilet 明明大家響度排緊隊等候，忽然一個強國人殺入嚟，夠膽死完全無視條queue 一個唔該都無就搶先衝左入去一個啱啱開門嘅廁格......排緊隊嗰幾個人只能O 晒嘴你眼望我眼都唔知俾咩反應好

響Orsay 逛到五點半就要離開 lu，想唔走都唔得，因為館方開始呼籲叫人走.......臨走當然要去埋souvnier shop (shop closed at 18:00)，超多人呀!! 而且d 野好鬼貴，不過我當然唔會空手而回，最後買左個Degas 嘅tote bag 同磁石貼，好開心喔!!

依依不捨同Orsay say bye-bye~~

離開Orsay，我地又由左岸經Passerelle Solferino 過返去右岸.......響橋上影返張Orsay 全景先~


呢座就係頭先嚟嘅時候經過嘅皇家橋........


只要身處其中，就會發現塞納河上最美麗嘅風景其實係牽引兩岸各具特色嘅橋樑

Passerelle Solferino 係一座人行橋，橋身都一樣叩左好多愛情鎖.......或者因為藝術橋已經俾d 鎖頭攻陷，所以d lovers 要向其他橋埋手


鎖都唔夠，仲要畫埋塗鴉，真係愛得出晒面

呢座橋有兩層，幾特別嘅設計~


今日一整日響左右兩岸來來回回，係有d 攰，不過真係好寫意.......塞納河沿路嘅風景，百看不厭

返到去右岸，一落橋就係杜樂麗花園........

呢個花園好大，位於羅浮宮同協和廣場之間，園內有好多雕像，有部份係由羅浮宮移過嚟.......夏天時呢度樹木成蔭，綠草如茵，絕對係一個好適合hea 嘅地方，不過冬天就無草無花無乜色彩，比較冷清~


人工湖都結左冰~

遠遠嘅building 就係羅浮宮.......望過去好似唔係太遠，要行過去都幾係野~

本來按schedule 呢一日我想去埋呢個橘園美術館 (Musee de L'Orangerie)，好想睇Monet 嘅巨幅「睡蓮」同用盡張museum pass，不過佢收六點，唯有又等next time la~

穿過杜樂麗花園，不知不覺就行到去協和廣場 (Place de la Concorde).........呢個摩天輪應該係期間限定，平時係無嫁.......

原來仲有一d 臨時攤位擺賣，good 呀，又可以shopping 一下


我想玩摩天輪，但要100e 一位，老爺話太貴「勸籲」我唔好玩


Fine!  唔俾玩咪影多兩張相囉


協和廣場最初建於18世紀，原名路易十五廣場，展示國王雕像，之後法國大革命，超過1200人包括路易十六同瑪麗皇后就係響呢度被處決斬頭，為左一洗血腥嘅歷史，呢度後來再重建又改名為協和廣場，中間嘅噴泉同環置嘅八個女神雕像就係象徵共存共榮嘅意思.......

由埃及運嚟嘅方尖碑係廣場嘅標記......


碑上刻有當年係點樣將巨大石碑運抵巴黎嘅過程~

接近六點半，路邊嘅街燈亮起.......


環繞廣場周圍有呢d 鑲金雕花路燈，好華麗~

 

穿過協和廣場，遠遠見到盡頭嘅凱旋門同埋永恆地車水馬龍嘅香榭麗舍大道.......

好似好近，其實好遠~

期間限定，影多幾張相先!

響協和廣場hea 左一陣，之後就要考慮到底係繼續向前行定搭metro 走人......逛左一日其實已經好攰，事實上今朝一早響聖母院、聖禮拜堂逛完，去KONG 食lunch 叫休息過一陣，之後就由新橋一路走到去奧塞美術館，跟住又再行埋過嚟協和廣場，其間係完全無坐低休息過，咁漫長嘅一段路諗諗都覺得累，好想返酒店休息下，不過響協和廣場再行過d 其實就係大皇宮、小皇宮同著名嘅亞歷山大三世橋，如果而家唔去埋過幾日我地未必有時間再專登走嚟逛，所以我地最後都係決定繼續行埋過去~

離開協和廣場，繼續長征，向香榭麗舍大道進發~

(...待續)