2月21日 - DAY 3 (PART 2)
網走 > 知床斜里
上一回講到響浜長駅前食完飯,見差唔多夠鐘去搭流冰Norokko號,咁就埋單行返去網走站.......
去到JR站對出嘅馬路口,老爺突然話唔好去JR站住,不如過去對面條橋睇下......吓,仲睇? 夠鐘上車lu喎.....老爺話好快啫,去重溫一下條河啦,上次我地都有行過去嫁.....
過左馬路行多幾步就見到條河.....
但我真係無咩印象行過呢度喎,老爺就用一副好不以為然嘅語氣話,我地上次仲響度玩過掟石仔落河,當時條河面舖左一層薄冰.....佢咁講又有返dd印象......
返到屋企摷返d相睇,真係有響度影過相嫁....原來佢d記性好過我好多喎.....
重溫完當年嘅甜蜜時刻,我地就飛快咁走返去JR站......
響locker攞返d行李,就拿拿聲入閘.....
呢架就係流冰Norokko號啦~~
流冰Norokko號行走於網走至知床斜里,沿線望嘅係鄂霍次克海岸,每年冬天黑龍江嘅江水流到鄂霍次克海,因為鹽份較低,響海面上就結成大片大片流冰,形成流冰群 (呢段野好明顯係抄旅遊書啦,因為以我嘅智力係無可能明白點解鹽份低就會結冰)....呢個冬季限定觀光列車每年一月尾至三月中運行,每日兩邊都有兩班車對開~~
真係好多人搭呀.....
呢個就係我地book左嘅海側席,所謂海側席,即係兩人橫座,張凳係面向窗口,方便大家欣賞沿岸嘅流冰~~
我地坐5號車廂.....
呢架流冰Norokko號全車共有五個車廂,只有四、五號兩個車廂係指定席,另外三個車廂係自由席,普通坐位無咩特別,指定席嘅車廂當然就特別d啦,一邊係6人坐嘅box seat,另一邊就係海側席,兩個指定席夾埋唔夠40個位,所以海側席好搶手~
成架車迫爆!!
呢個流冰號雖然唔及冬之濕源號咁古典,但都係屬於古舊火車.....有好多動物公仔響車上做裝飾~
車廂入面仲有魚網、大魚旗等好古舊嘅擺設.....
仲有炭爐,可以去小賣部買d魷魚去烤~~
沿途有職員負責廣播介紹風景,不過佢只講日文......
車長都好忙下,要不時幫手加炭......
又要周圍兜售列車紀念卡.....
我呢d嘥錢精當然有幫襯啦~~
流冰號開行左一陣開始見到沿海嘅流冰啦~~
嘩,海面遠遠有好多流冰呀!!
有兩隻天鵝企左響d薄冰上面呀!!
火車行左約15分鐘14:11就到左北浜站,呢個車站因為對出就係無敵海景,最接近鄂霍次克海,所以好多人黎到都會落車響海岸邊影相同眺望一下流冰海面,而我地呢班流冰Norokko 3號響呢個站亦會停留7分鐘等乘客有多d時間~~
我地嘅座位係23CD,響正上落車口隔離,火車一停定我地幾乎係最早落車嗰兩個人,一落車我地就即刻衝去展望台......
上到去展望台,景觀真係好開揚,成個鄂霍次克海一覽無遺.......
大海最盡頭嗰度就係俄羅斯啦~~
所有乘客都落車響岸邊睇下流冰海面......
影夠就離開展望台,拿拿聲走返去車站月台,只得7分鐘,唔係好多時間可以hea咋......
好古舊下嘅車站.....
木造嘅候車室,入面d牆同天花板全部都貼滿晒乘客留低嘅卡片、JR車票,甚至boarding pass都有......當一個車站嘅作用再唔只係車站,慢慢就成為一個旅遊景點,帶廣嘅愛國站都係一樣貼滿遊人嘅留名紀念,好懷舊嘅感覺!!
呢個「停車場」唔係停車場,其實係一間餐廳,就響候車室隔離......
據旅遊書講餐廳嘅蛋包飯唔錯,不過我地只得7分鐘時間當然唔駛諗,如果行程唔太趕,可以響呢度stay耐d食下野慢慢影相.......
不過我地都無邊一次嘅行程係可以稱得上叫唔趕,就算好似呢一日咁唔算認真趕頭趕命,我地都只係可以響度stay半個鐘,下一班去知床斜里嘅普通列車14:45開,得半個鐘入去餐廳食野又驚唔夠時間,再下一班車就要等到16:33,響呢度又無可能磨咁耐,而且都唔想太夜去到知床斜里,取捨之下當然情願早d去知床斜里hea,所以我地都係搭返原車走,同埋架流冰號都未影夠相啦~~
差不多夠鐘開車,我地盡last minute搏命影,幾乎係最後兩個人上車~~
上返車先發覺成架車著左大半人無上返車......
我地坐嘅5號車廂好d,都好多人上返車......
但成卡4號指定席就空空如也,估計d人係跟旅行團,純粹搭由網走至北浜呢一段,應該有旅遊車響北浜接返佢地,因為我地上車時個月台同候車室都已經無咩人,除非佢地入晒去餐廳食野啦.....無晒人,正啦,我地可以響度走黎走去點影相都得!!
首先當然去小賣部巡下先,仲有唔小得就係蓋紀念印~~
烤下魷魚.....
玩下加炭......
同bear bears影下造型照......
真係鍾意點影都得~~
邊隻bear留低嘅腳印呀?
由北浜站去知床斜里要30分鐘,搞完一輪之後就正正經經睇下車外嘅風景啦......
久不久就會有遍佈流冰嘅海面出現,好正呀!!
連綿嘅雪山
唔好怪我post咁多相,因為d流冰同雪景真係好靚,同埋無幾可啦,下一次要再去真係唔知要到幾時......
終於14:48去到知床斜里站啦!!
我地要響度吽到16:35,兩個多鐘唔知要點過,周圍望下睇怕知床斜里都係一處非常鄉郊嘅地方,不過近車站附近都應該有d shops可以消磨下掛??
(...待續)