2010年3月30日星期二

2010年2月日本中部北陸9日 - 好金嘅金沢午餐


2月19日 - DAY 1 (PART 3)


 


同大家講解左金沢巴士嘅種類後,就繼續講返個行程喇.......響酒店放低左D行李,我地就走去東口巴士總站,睇下有咩巴士可以搭啦........只不過響酒店逗留短短幾分鐘,外面唔單止無落雪,仲已經落緊微雨,氣溫雖然都有四度,但感覺就好寒下~~



唔知點解,每一次去旅行我都會有帶雨傘,但就次次都放左響喼入面,次次都要響日本買雨傘帶返香港,攪到一屋都係雨傘........今次都唔例外,雖然落緊雨,我地都無意欲返入去酒店攞返行李拎把摭,老爺仲輕描淡寫話一陣間去買咪得囉,咁提到個「買」字喎

,我梗係好樂意聽佢話啦
.......不過今次就因為無雨傘呢單野攪到互片收場
,詳情響適當時候容後再講啦~~



呢個時候先係朝早十一點鬆DD,不過搭左一晚夜機,成朝都未有野落過肚,老爺已經不斷響度吶喊話餓到暈,於是第一個行程就梗係去搵野食先啦

........



金沢有一個超人氣漁市場 --> 近江町市場,我地當然要去踩踩場.......呢個漁市場響武藏ヶ辻,如果搭城下町周遊巴士,要去到第18個站先落車,好嘥時間啫,去到餓屎都未天光,所以今日我地唔打算搭呢個觀光巴士,改為搭local-line bus

.......響金沢站東口有幾個巴士站都係for local-line bus嫁,我地研究左一陣,搵倒有條巴士線係先去武藏ヶ辻,第二個站已經係,咁啱又有巴士到,當然拿拿林上車啦~~


同日本一般巴士一樣,上車時響上車口先攞整理券~


巴士入面都有電子顯示屏show下一個到站名.......我地嘅目的地第二個站已經係喇~~



車程只係幾分鐘......唔知大家會唔會同我地一樣呢,好多時搭完D巴士,落左車都唔知響邊處,唔知要行邊個方向先去到想去嘅目的地

.........我地落左車,周圍好多人,但呢個時候勁大風雨,個感覺唔知點解好似有D徬徨咁
......好在響當眼處有個大地圖,走埋去睇睇有 "Your are here" 嘅指示,咁就無有怕啦~~



跟住地圖嘅方向,唔駛一分鐘就行到去近江町市場........呢個市場已經有二百幾年歷史,以前係加賀籓御廚選購食材嘅地方,而家已經變成一般市民嘅市場,有「金沢廚房」嘅稱號,場內有成二百幾個攤檔同店舖~~


我地揀選醫肚嘅地方係響市場地下「上通」橫街入面嘅井ノ彌,據旅遊書介紹,呢間食店係近江町市場丼嘅發源地,人氣高企

.......不過我地都係抱住即本走去昅下嘅心態,我地一向嘅習慣係多人就唔會等,話之你有幾出名.......或者仲係比較早,好好彩無咩人排隊,都唔駛點等就可以入去喇~~


先俾個熱茶暖暖肚先........


Menu有圖片,點餐無難度,而且店內仲有一位識講普通話嘅waitress~~


呢間食店唔係好大,可以容納二十多人咁上下啦,現場所見侍應有兩個,但魚生師傅就只得一個,另加一位姐姐仔幫手整壽司飯........可想而知落左order都唔慌快趣有得食

.........


漁生師傅真係做到無停手........



預左無咁快有得食,但我地都真係等左好Q耐!!

不過見食店入面D本地客人個個都無咩怨言好奉旨咁坐響度呆等,我地都唔好意思催啦,但真係餓到反艇,不過另一方面都好佩服日本人佢地D忍受力..........



等左40分鐘,老爺嘅炸蝦野菜天婦羅丼終於出場喇........


雖然呢間食店最出名係新鮮魚生丼,不過老爺患緊感冒,費事食生野啦,其實我都知食炸野都唔係咁好,但無計啦,呢度又無其他料理,是但點個熟野頂住當先囉

.......


至於小人,終於等左差唔多一粒鐘先有得食!!.......大家睇下,我呢個「上ちらし近江町(特盛)」係咪好誇張呢?? 仲有金箔響上面嫁

,金光燦爛
........絕對係襯晒我呢D咁浮誇嘅人呀!!!



近江町市場丼嘅特點只有一個字︰豪!!

 師傅將一塊一塊厚切魚生片逐一鋪放響壽司飯上面,要鋪到完全睇唔見D飯,而且D魚生唔係流嫁,D吞拿魚腩真係入口即溶,好好味呀)))))......咁豪嘅名物當然身價不菲,呢碗野多謝2900円!!


我地兩個定食都附有湯同漬物........不過我個海鮮丼實在太大份,小女子實在無可能食得晒,幾經努力食晒D魚生,D壽司飯真係無能為力,淨返大半碗,覺得非常唔好意思

,老媽子成日話做人要有衣食,D人種米粒粒皆辛苦,而且D日本米仲咁好食,不過我都唔想嫁,真係食唔落
..........


食飽就埋單走人~~


基本上我覺得大部份魚生片都OK啦,不過個海膽就一般,到而家我仍然認為函館朝市嘅海膽係暫時食過最美味嘅海膽,第二處地方係無得比嘅

.........另外我覺得有樣野比較失望嘅係,呢碗野竟然有三文魚刺身! 上次蔡瀾響節目講過話日本人係唔會生食三文魚,因為好多細菌......咁究竟係呢間食店用料唔講究,定係蔡生D料唔夠堅呢??


食到飽一飽,走嘅時候見到好多人響度排緊隊喇!!


我地跟手就響個海鮮市場逛下.......


逛日本朝市最鍾意就係睇巨蟹~



話晒係著名觀光點,成個市場都係人........


逛左一陣就走人喇,但見外面橫風橫雨,下午嘅行程究竟點安排好呢?



(待續

)