2009年2月26日星期四

2009年2月日本東北8日溫泉之旅 - Day 1 (Part 1 向東京出發~~)

2月14日   星期六  (香港 > 東京 > 仙台 > 東京)


自從早兩年響電視睇過雪影移城後,先知道日本東北呢個地方,見D樹冰咁得意,就開始起左要去東北嘅念頭,後黎出左PACE果本東北嘅旅遊書,資料好豐富,於是就決定09年成行。雖然呢幾年去旅行都係自遊行,但都係靠市面嘅旅遊書,次次都十下十下咁,從來唔知道原來網上嘅資訊係咁多架,有次聽朋友講有個日本自由易討論區就去睇下,結果發現D網友好好人,籌劃嘅階段有咩問題上去問都好快就得到回覆,再睇埋D網友嘅 blog 嘅經驗,對今次旅行真係幫助好大,真係要同各位網友講聲唔該晒呀~~


廢 "up"左一輪,都係講返個行程......東北真係好大,有六個縣咁多,想一次過去晒只得八日假係絕無可能嘅事,所以今次我地只係揀左山形、秋田同宮城,青森都好想去,不過唔夠時都係留返下次有機會先去奧入瀨同十和田湖睇紅葉囉.....


為左爭取多D時間,我地今次揀左搭日航01:50開嘅夜機去東京羽田~~          


上左機後已經頂唔順開始要瞓,點知瞓左無耐忽然比老爺叫醒,原來派緊飛機餐,最初以為夜機無野食,所以有D起出望外,再加上我生性愛貪小便宜,梗係即刻當堂醒晒食返夠本啦....


個餐算係light meal掛,有粥架,都幾好食 (都唔明點解D人成日話飛機餐難食,我覺得大部份都OK啦,預整嘅食物,算係咁啦,想點喎~~)


食完就繼續搵周公傾計,老爺慣左夜瞓,繼續睇電影....真係頂佢唔順,條友又睇赤壁,睇左九千幾次都唔厭,佢話D戰況拍得好喎....恕我唔識欣賞,我睇見果個林志玲個「懶」柔情樣就覺得十分造作,吳宇森果幕床戲直頭多鬼餘兼令人生厭.....


只係響N年前搭過夜機去歐洲嘅我,果時後生細女一D都唔覺得辛苦,而家一把年紀咁捱眼瞓真係都幾難頂....不過瞓下醒下,終於都捱到落機~~


半個鐘倒就攪掂晒入境手續同攞埋行李,羽田個國際航廈好鬼簡陋,仲要先搭程 free shuttle bus 去Terminal 2~~


呢兩個就係一路以黎陪住我地穿州過省、周遊列國兼肩負重任嘅行李喼喇,真係辛苦晒佢地~~                              


到左 Terminal 2 就轉搭 Monorail,因為咁早係未有機場巴士....其實響國際航廈搭嘅shuttle bus 係先去Terminal 1 然後再去Terminal 2 ,兩個 terminal 都可以搭Monorail,不過我份人驚死無位坐,所以先響Monorail 嘅總站即Terminal 2 轉車,就係咁樣就做左傻仔浪費晒D時間囉,唔使講梗係即時俾老爺串話晨咁早得果一班早機邊有得咁多人同你爭位坐呀.....我知我知,睇下架Monorail係無人架...(歎氣)


如果搭Monorail後轉搭山手線可以購買優惠車票,500 yen 咋~~


由羽田 Terminal 2 搭去濱松町站,車程大約25分鐘~


Good morning~~


去到濱松町站再轉山手線去東京站,好快架,只係幾分鐘嘅時間。響濱松町站落車時有個日本人同我地搭訕,佢黎過香港做野,識講英文,仲教我地響邊個月台上車~~


去到東京站都只係八點倒,我地打算搭8:28開嘅新幹線去仙台,見有D時間咁我地就諗住將D行李放響酒店先囉。今晚響東京住嘅酒店係 Hotel Marunouchi (東京丸之內),因為東京站做緊維修,周圍都圍晒板,七國咁亂,搵左一陣先搵到個丸之內北口出口,去到酒店有個職員好禮貌咁招呼我地,佢check左一輪,又問我地攞個passport睇,之後就話無我地個reservation....我當堂呆左,唔係掛,俾晒錢有晒hotel voucher喎,即時俾張野佢睇,佢一睇就笑笑口話俾我地聽去錯左酒店 (!)....原來我地訂果間酒店係叫 Hotel Metropolitan Marunouchi,都係響東京站附近架.....大矇嘅我一路都無留意Metropolitan果個字所以攪錯酒店囉,唔使講梗係又俾機會老爺向我翻白眼啦....


個職員好好人,帶返我地出去仲教我地點樣行.....於是我地又拖住個行李喼再走黎走去,間酒店係響一座叫Sapia Tower 嘅商廈入面最頂果九層,hotel reception lobby響27樓,麻鬼煩要搭電梯上去架,比較可取係 Sapia Tower 門口對正東京站~~               


放低行李後見到酒店 reception counter 隔離有間餐廳叫 Tenqoo,記得之前睇旅遊書有介紹過話呢間餐廳有個七道菜嘅晚餐好正,同埋窗邊位置睇東京夜景幾靚,咁今日話晒係情人節,老爺就話使唔使問下仲有無得做 reservation不如試下個 candle night dinner啦.....不過最後我地都無去訂位,因為當時唔敢肯定仙台多唔多野行,費事訂左位後限死時間要趕返黎,如果仙台好玩我都寧願響仙台玩夜D囉,反正我地日日都係情人節架啦~~~~


放低左行李就拿拿聲走返去東京站,睇個勢8:28果班車多數趕唔切,希望趕到8:56果班啦。首先要將個 Rail pass activate左先,JR綠窗兌換中心就響八重洲北口~~                 


攪掂左個 pass 就梗係 reserve 埋未來幾日嘅車票啦,我地早有預備,事先整定左張 list show 晒成個 trip 要 reserve 嘅班次,點知個女職員望左一眼張 list 就問我地想 reserve 邊一班,頂佢....ALL 囉!佢即時面燶燶....無野呀,係遊客都係一次過 reserve 定D班次架啦,個位亞姐好不情不願咁幫我地攪,慢吞吞咁,一陣又 check下個電腦,一陣又攞住本時刻表響度揭黎揭去,攪左一輪又同我地講話今日8:56嘅班次已經 full 左,下一班9:16得唔得......梗係得啦,唔得都無辦法喎.....之後又話今日要 reserve 果兩班車都無連位,不過就可以響同一行 (後黎上左車先知所謂同一行係前後....),咁我地諗是但啦,個幾鐘車,上左車都係瞓,求其你快幫D我地攪掂啦,如果唔係連9:16開果班都趕唔切就真係唔該晒喇......


講到呢度我要正式投訴呢位JR嘅職員,因為呢位亞姑唔知係唔係唔多高興要幫我地攪咁多張車票,所以特登整鬼我地,咁多日嘅飛竟然都係唔連位架!.....佢老闆!粗俗D都真係要講句頂佢個肺!你估我第一日出黎搭JR唔知訂?有咩理由班班車都咁多人搭呀!雖然仙台算係熱門嘅城市,但係一個鐘有成四班車咁多,點都無理由咁啱會有咁多人去仙台掛!所以後黎去到仙台就試下再 reserve 今晚返黎果程車睇下可唔可以有連位啦,去到仙台票務處果位小姐好快速就幫我地出左連位飛喇!跟住夜晚我地返到東京有時間再望埋其他飛先發覺跟手果幾日D飛係全部唔連位!當堂成晚唸@%$%^&..@#$&xyz.....!!!!  打死我都唔信山形呢處地方會有咁多人搭新幹線啦,所以第二日去到田沢湖就即刻再 reserve 過所有飛....結果係無問題架,所有飛都可以連位,個職員一D唔高興或唔耐煩都無!真係想唔媽叉東京果位八婆都唔得,擺明佢係有心玩我地啦.....一向都覺得東京D人無日本其他地方D人咁友善,但都無諗過首都D人嘅 service 會咁差....心心不忿...後黎最後果日返到東京想話去影低果位亞姑個樣公諸於世,但係去過兩次都遇唔返佢,所以大家千祈唔好誤會係上面果兩位職員~~


發完牢騷,繼續講返個trip,攪掂晒後就去搵22號月台上車~~


呢架就係9:16開嘅新幹線 Komachi 11號喇~~


睇下架新幹線幾得意,呢班車嘅 final stop 其實係八戶,響中途站盛岡兩組車係會分割架~~           


Komachi 11號準9:16時開,向仙台進發啦)))))))


---> Day 1 - Part 2 漫遊仙台


2009年2月23日星期一

2009年2月日本東北8日溫泉之旅 - 前言

從日本東北回來啦~~~~


一年一度的「大旅行」終於在依依不捨的心情下結束,籌備了三個多月的日本東北溫泉之旅總算順利完成,想去的地方大致上都能按計劃去得到。雖然東北的天氣變化很大、很快,但十分慶幸這次旅程並沒有遇到大風雪而令行程被延誤。


日本東北真是很美,尤其是漫天飄雪下點點的淒美。回來後問我家那位最愛北海道的老爺喜歡日本東北還是北海道多一點時,他老人家竟然猶豫不決,最後還是我代他答就是北海道加東北便是最完美的配搭吧~~......事實上這次旅程因為每天都要轉換不同的酒店,要他揹一個大背囊,手拿著兩大袋行李,一時間趕搭新幹線,一下子又要乘巴士,心底很是過意不去,再加上我常常為一些小事情而鬧情緒,在此向他說一聲 "sumimasen" 呢!不過要數最「攞膽」的一次經歷,就是因為我的大意而令他在鶴の湯溫泉「赤裸裸」地暴露於一眾遊人面前,真的要跟他作九十度鞠躬說句 "gomennasai" 囉 !!!....(不過真的是很好笑呢~~~~)


這次旅遊,有著很多個「最」︰


最多次入住日式溫泉旅館 -- 連續五晚!....單是浸溫泉都浸至「甩皮」!


最難忘應該是挑戰鋪滿白雪的一千多級石級的山寺...


最有趣的經歷是跟一大班不相識的男男女女於乳頭溫泉鄉作日歸混浴!


最美麗的地方....其實很多地方都美不勝收,但是美得來帶點浪漫的要算是白雪下的銀山溫泉吧。


最寫意的自是每晚都泡個熱滕滕的溫泉浴才去入睡......


最感動的應該是日本人的細心及熱情,雖然亦有遇到一些不太友善的人,但總括來說總是友善的佔多,尤其是妙乃湯旅館的女將,她們的體貼及熱心令我們至今難忘...


最豪的一餐當然是登起波的米沢牛....yummy)))))


入住此生暫時最昂貴的酒店,葉山溫泉的橋本屋,埋單51750yen~~~~~~~


至於最期待的藏王樹冰反而有點失望,因為天氣不佳,未能一覽萬千樹冰群的宏偉場面,而且那些樹冰都頗「瘦弱」,還沒有發展到「雪怪」的模樣,不過總算能夠近距離欣賞日與夜的樹冰,也很是高興!


從東北回來後,難免有些失落的感覺,最懷念的其實是溫泉旅館提供的每日超飽的早、晚餐,回看當時拍下的照片仍然令人垂涎欲滴.....


事不延遲,再重溫這次旅遊的點點滴滴吧,出發啦~~~~~



Day 1 - 香港 > 東京 > 仙台 > 東京

美味的仙台牛舌~~



Day 2 - 東京 > 田沢湖 > 鶴の湯溫泉 > 蟹場溫泉 > 孫六溫泉 > 妙乃湯溫泉


漫天風雪下古樸的鶴の湯溫泉



Day 3 -
妙乃湯溫泉 > 角館 > 松島

清晨下的妙乃湯溫泉



Day 4 - 松島 > 山形 > 藏王溫泉


松島的日出,好美喔~~



燈影下的藏王樹冰



Day 5 - 藏王溫泉 > 山寺 > 銀山溫泉


清麗脫俗的山寺,雖然爬級爬得像一條狗,但是真的很值得去親身細味呢!



淒美的銀山溫泉,古色的煤氣燈開始亮起,夜色快來了....



Day 6 - 銀山溫泉 > 最上川 > 天童 > 葉山溫泉

再來一張清晨下的銀山溫泉~~

秀麗的最上川山河雪景



Day 7 - 葉山溫泉 > 米沢 > 東京

超「豪」的溫泉旅館,私家藏王石露天風呂~~



米沢牛 ....... 極度奢侈的午餐!!!!!!



Day 8 - 東京 > 香港

夕陽西下的羽田機場......bye-bye 啦~~~~~~


---> Day 1 向東京出發


2009年2月13日星期五

2008年10月 東京長野川越6日 - Day 6 (新宿血拚!!)

10月6日  星期一


時間過得好快,響東京最後一日喇...今日將會留響新宿進行血拚~~~


響酒店食過早餐後就出發喇,首先去10:00就開門嘅高島屋百貨,不過無咩收獲...之後走去Tokyu Hands買左些少野,跟住就向Comme Ca進發,途經 Victoria Golf,老爺梗係欲罷不能,響入面磨左好耐啦....事實上,每次去旅行,佢都好有耐性陪我逐間店咁搏殺,一D怨言都無,所以每次見到有佢嘅至愛,我都會儘量俾多D時間佢逛架....


老爺入左D貨後,就到我響Comme Ca行番夠本...最後都買左兩件衫同DD accessories...然後就去伊勢丹...好開心買左個Anna Sui手袋呀......之後行埋Agnes B同Fancl,睇睇錶已經差唔多一點,老爺就催促返酒店喇...總計短短三個多鐘頭收獲都OK啦~~


D電話裝飾好靚呀,我買左第二個花,不過要換返個摺機先可以貼~~


響酒店攞返D行李,就搭13:35嘅Limousine去機場~~


去到機場就check out啦....點知個地勤話我地行李超重........真係晴天霹靂!...唔係掛,兩個人夾埋都係兩個大行李箱加一個旅行袋啫,咁都超左12kg...過往響北海道返黎八、九件行李寄艙都無事,今次得三件野都超重?!...真係諗極都唔明....個空姐話已經俾左10kg free我地,最後2kg實在幫唔倒喎...2kg要收5000yen呢,但係一時間要我地響個喼執返D野出黎hand carry都好係野,所以唯有科水算把啦....


攪完 check out 後,我地先去填肚....我地揀左食天婦羅,兩個天婦羅定食盛惠2700 yen~~                       


食飽飽後就爭取時間繼續shopping,不過都係只買左D野食做手信~~


我地搭18:25機,返到香港10點鐘鬆D....六日嘅東京長野川越之旅就響不捨嘅心情下完結喇~~~~~


呢六日嘅戰利品呀...咁少野都超重....離晒譜...