2009年1月25日星期日

2008年10月東京長野川越6日 - Day 4 (Part 2 舊輕銀座‧南輕井澤)

10月4日   星期六


返到去舊輕井澤都未夠11點,我地首先去舊輕井澤森ノ美術館~


個美術館好得意架,D畫就咁用肉眼睇好似無咩野,但係透過相機影出黎嘅效果就好立體,D野全部都變得好真實,人企埋去張畫旁邊就好似實物一樣,好好玩呀!雖然入場費要1500 yen,但都算值得~~


我地響個美術館玩左成個鐘,簡直有D樂而忘返....行晒三層樓後仲有件免費cheese cake 或 apple pie奉送,不過咖啡就要另俾錢,500 yen 一杯!擺明搶錢喎,所以我地cheese cake照食,但兩個人就只叫左一杯 ice tea 咋,寧願慳返500 yen過隔離果間souvenir shop買野好過啦,咁樣先係精伶嘅購物狂嘛~~


個美術館嘅外觀都好有趣,好似有個人就跌落黎咁~~~


離開美術館,我地就繼續響舊輕銀座一帶逛,大概係旅遊點嘅關係,所以沿路好多遊人好熱鬧。大街兩邊有好多小店,除左一般嘅精品店,仲有我地最鍾意逛嘅食品店,有賣果醬、漬物、蜂蜜嘅地道特產,我地逐間店舖都走入去試食,尤其係有間專賣醃漬物嘅,簡直食到停唔倒嘴....真係咩都抵返晒呀~~


どんぐり共和國,分店真係遍佈全國~~


舊輕井澤一帶有好多小型教堂,呢間係最出名嘅聖保羅教會,咁啱有人響入面預備緊婚禮,所以無得入去~~


唔知係咪多教堂嘅緣故,附近有好幾間婚紗店,有D仲好似係酒店嘅形式,感覺好似去左九龍塘咁~~


沿路好多人拖住狗仔行街散步~


間屋好有歐陸小鎮 feel~~                  


行到咁上下,見差唔多兩點,我地就兜返轉頭去搵野食,最後揀左間叫腸詰屋,專賣德國肉腸兼有食店。呢間野應該係幾出名,因為沿路已經見到兩、三間分店。


食店係自助形式,我揀雜腸,配食店自製嘅芥末都幾好味,老爺只係要左個咖哩飯加沙律,計埋啤酒全部2880yen~~


食飽後我地就起程去位於南輕井澤風越公園嘅德國玩具博物館同繒本之森美術館。之前已經響網上search左個行走輕井澤全市嘅西武高原循環巴士線時刻表,知道舊輕井澤呢區有個巴士站,點知搵左好耐都搵唔倒,好彩老爺唔死心,再走返去原本應該係站嘅地方再睇清楚,先發覺有張告示,雖然係日文,但我地估估下最後又俾我地搵到個車站原來係搬左去另一條街....


響巴士站旁邊有兩個日本女人響度吹水,咁我地就拎住本旅遊書去向佢地問呢個車站啱唔啱,其中一個年紀較大嘅竟然識講英文,同我地講佢地都係搭呢架巴士,又做手勢話佢都係去果度....點知架巴士到嘅時候佢地仲迷惘過我地,好猶疑咁唔知上唔上好,咁我地咪唯有自己走去問個司機囉,然後再叫埋佢地上車....最攪野就係上左車後個女人仲同我地講左句 "Don't worry",真係俾佢吹脹...


上左車以為好老定,點知望下望下先發覺呢架巴士係無電子顯示屏show車站名架!真大鑊,雖然上一年我去過鹽澤湖,但成個風越公園咁大,都唔係好知響邊度落車架!咁我地心諗都仲可以跟住果兩個女人落車,點知架巴士行左無耐果兩位阿姑竟然一先一後落晒車,連招呼都無同我地打....我地除左呆晒都唔知點好,好在呢架巴士係循環線,我地盤算即使去唔倒風越公園至多返番JR火車站啦....架車行左一陣已經無晒乘客,就響呢個時間個司機就問我地去邊,咁老爺就拿拿聲攞住本旅遊書走去話俾佢聽,指手畫腳左一輪,佢恍然大悟咁話"Museum Museum",然後就同我地講左一大堆野,我地都唔係好明,不過最緊要佢知我地去邊同埋叫我地落車就得啦....個司機好好人,因為車站距離個美術館都有段距離,佢雖然唔可以載我地去到美術館,但就響條路嘅入口特別俾我地落車,又教我地點行同埋回程響邊度搭車,真係好nice呀~~


行左六、七分鐘倒就去到德國木偶博物館,入到去搵唔倒個售票處,見有個姐姐行過就問下路,原來去錯左個souvenir shop同埋體驗坊,個姐姐又係好好人,佢除左教我地點行仲提醒我地個博物館係close 16:30......乜唔係收五點咩?!明明之前響博物館個web site check左10月份係收五點架....我地望下個錶將近四點,咁都一場黎到梗係照去啦,至多唔去另外果個美術館囉....個木偶博物館其實就響個souvenir shop對面,去到買票,入館料600 yen,兩館共通券就1000 yen,但因為唔知夠唔夠時間去埋個美術館,所以無買共通券~~


呢個木偶博物館個全名其實叫 Erzgebirge Toys Museum,Erzgebirge係德國好出名嘅木製玩偶品牌,因為佢地認為輕井澤好有歐陸風情,所以就響度開間海外分館囉。D木偶都好精細,不過我地趕時間關係都無好細心逐個木偶睇,好快速咁行左個圈同影兩張相就離開喇....


之後我地都係決定去埋隔離果個繪本之森美術館,因為講真都唔知仲有無機會再黎輕井澤嘛....去到售票處見收費要800 yen,咁我地就試下攞頭先木偶博物館嘅入場票俾個售票員睇,睇下可唔可以而家先補買共通券,D日本人真係好軍真,個小姐仲好樂意咁只係收返我地個balance咋...


呢個美術館係由三間小屋組成,畫本主題都係著名歐美同日本嘅故事,D畫好靚架,不過唔準影相....咁就淨係影下個展館啦~~


行完晒三個展館,去埋個souvenir shop買左少少野,我地就離開行返去巴士站果邊,諗住行下個風越公園,點知去到問下個售票員,佢話個公園仲有幾分鐘就 close....咁我地唯有搭巴士返JR車站囉~


返到去JR車站,見仲有成個鐘先夠鐘搭車,咁我地就決定去多次outlet行下啦~


五點鬆D就日落喇...


響 outlet 逛左大約45分鐘,都有D收獲呀....之後就行返去車站攞返D行李,然後就搭18:21嘅新幹線返東京。行左成日回程時終於感覺到好攰,架火車開左無耐我地都瞓著晒....返到去東京再轉去新宿,返到酒店已經八點半,放低野攤抖左一陣就去搭酒店嘅 shuttle bus 出返去新宿車站附近搵野食。


雖然已經九點,新宿街頭仲係好熱鬧,同輕井澤真係無得比....經過Sakuraya見仲未 close,就順便入去兜個圈,買左少少野....因為實在太攰,我地是但去左三葉迴轉壽司食晚餐....雖然話是但揀,但D壽司都唔錯,兩個人總共食左17碟,都係4110咋...D海膽真係好好味....而家諗起都好想再去食呀.....


食到飽飽,D精力又返晒黎喇,咁就梗係去行下夜市啦~~


我地又去藥房同激安逛,仲行埋歌舞伎仃,終於攪到12點幾先返酒店....勁攰呀,對腳好似唔係自己咁....拿拿林沖涼瞓教啦,因為聽日約左同事雲尼妹一齊去川越玩呀~~~~


----> Day 5 小江戶川越


2009年1月20日星期二

2008年10月東京長野川越6日 - Day 4 (Part 1 輕井澤白糸之潼)

10月4日   星期六

第四日喇!起身梳洗後,我地就趁未夠鐘食早餐先出去酒店外面行下。朝早睇返間酒店同夜晚真係兩個樣,白天望落去真係幾靚,好有歐陸色彩~~


我地book左八點食早餐,個餐廳係法式設計....唔係食一般自助餐噃,係有waiter將每道菜捧上架,有南瓜湯、頭盤、主菜同甜品,好grand呀....不過一朝早就食鵝肝好似有點哪個~~


D刀叉擺設都好講究~


仲有個沙律吧同果汁任取~~


食飽後就check out 喇。因為都係就唔啱個巴士班次,所以咪請酒店職員幫我地call左架的士去JR站囉,呢一程車貴過尋晚,盛惠 1280 yen~


去到車站我地又先將D行李放響locker度,然後就買定今晚返東京嘅車票。攪掂晒後就起程去白糸之潼,我地搭9:25嘅草津巴士,車費 710 yen,9:48就到喇~~


由巴士站行去白糸之潼只係幾分鐘嘅時間~


呢個瀑布其實只係高3米,不過就闊70米,雖然唔係好有澎湃嘅感覺,但係望落去就真係幾似白絲咁輕柔,D水都幾清澈~~


影晒相就行返去車站,前後都係十五分鐘倒,不過好舒服,空氣又清新,都幾值得黎遊覽架~~


入口有介紹呢處嘅歷史,原來平成十三年曾經山泥傾瀉...日本人做野真係有板有眼,一D好細微嘅野佢地都可以好認真咁去做,香港政府唔該學習一下....


車站對面有小食檔,有炭火鹽燒岩魚賣,熱剌剌,好好味呀...


之後我地響附近果間手信店行左個圈,然後就搭10:31班次嘅巴士返去舊輕井澤繼續我地悠閒之旅喇~~


---> Day 4 (Part 2 舊輕銀座‧南輕井澤)