2010年2月日本中部北陸9日 - 白川鄉點燈

 2月20日  (DAY 2 - PART 6)

 

 

響大田屋settle down之後，我地拿拿林出發去展望台........

去荻町展望台其實有好幾條條路，大田屋既然係響通向展望台必經嘅車路國道360，我地好自然係揀行呢條路啦.......但係上山嘅路真係行屎人，又唔可以hea住慢慢行，因為時間已經唔早，驚搵唔到好位睇景，所以都趕得好辛苦下........

(點解響日本旅行成日都要行到成隻狗咁.........)

沿途都係鋪滿白雪嘅風景~

唔知點解一路都無咩其他人行呢條路.......原來又蠢左，後來睇返map先知，響山下車路入口有條遊步道直通上去展望台，應該快好多.........之前細妹早兩個月黎唔知係咪行嗰條游步道呢，不過細妹話條路好崎嶇好危險下........聽佢地兩公婆講行完嗰條路兩人幾乎反面要攪離婚.........

幾經辛苦，響個山兜左個大圈終於上到去，山頭已經人頭湧湧.......好緊張......我地即刻鑽入人群當中，企圖搵個有利位置望向山下...........

各位，呢個就係我地期待已久響展望台影落去滿佈合掌屋嘅荻町風景嘞.......

 

係，大家無眼花，現場所見真係咁，白濛濛一片，因為實在好大雪，視線非常之唔清楚.......

 

個景已經有D令人失望，仲要周圍都係人，迫到爆!! 最攞膽係我地太遲去到，前面幾行位已經俾人佔據晒，D人牆完全阻擋晒D視線........

咁都不特止，仲要D雪愈落愈大，D人又擔住把摭，嗰D摭(s) 對於我呢種嬌小玲瓏嘅女人仔 (或者叫港嬸，哈!!) 黎講簡直係惡夢........

人嬌小真係無辦法，將部機伸到最高點都係影到人頭同摭

........

呢個時候將近五點，落住大雪嘅天雖然陰陰沉沉，但就無天黑嘅跡象.......其實上得黎就預左要企響度等天黑，因為今晚係今年度最後一晚點燈日，當個天黑左之後，某D合掌屋就會亮起D燈，個夜景會好靚嫁!! 一年先得嗰七日點燈，好難得我地又book到旅館，點燈日D旅館好快爆嫁，之前有D識嘅blog友遲左都book唔到心水旅館........所以點都要等到天黑為止，老爺都有帶定個腳架諗住影返D靚相~

睇怕仲有排等，雖然都預左要D時間，不過就咁齋企響度等，D雪兜頭兜腦咁洒落黎，又凍又濕，都幾係野

.......最慘係我地又無帶摭，人俾雪 "dub" 都算，部相機新買，仲有幾日要用，如果整濕左就真係揼心囉，但又無野摭，唯有除左條頸巾摭住佢先啦.......不過我就凍到僵硬晒........

企響度等真係好悶，個景又睇得唔清.......唯有影下周圍D環境........

我今次無誇，四方八面都真係人.........前面.........

右面.........

左面.........

後面........有人無聊到響度玩手指........

有工作人員響度看守住，唔俾人行咁遠，驚個山頭危險......不過現場所見有D人都唔聽勸喻，係都要走入D限制區域，害到D工作人員要跟住入去搵人........

Hello~~

Hee.....呢張相影到個心心出黎........

下面呢兩張叫做影得比較清楚........

唉......將近五點半，個view仲係濛查查

........

老爺部機 (同手勢)影出黎嘅效果好小小~~

平時冬天去日本總係好想見到落雪，落得愈大愈開心，不過今次係有史以來最唔想佢落雪嘅一次，個心不斷響度祈禱希望個天停一停唔好落雪，等個view可以清晰D..........

再等多一陣，D雪果然開始細返小小，不過都仲未亮燈........(((好悶))).........

5:40........天色開始有D黑，D雪細左視野就比較清楚D.........

俾個實景大家睇下，其實而家睇返都OK幾靚，不過當時或者因為太多人又等到無晒mood所以就唔覺好正..........

5:50.....開始有D燈著左嘞，不過個天都仲未黑得夠

.........

就快六點啦，但個light up都唔係好突出喎.........

都六點啦，個天都仲未黑齊，企響度等左個幾鐘，個地下又濕滑，踩得耐成個雪地都已經結晒冰，隨時一個唔小心就會跣餐死，眼見前後左右都有人跣低，我一路企一路都好驚會PK..........

 

我地約左民宿六點半食晚飯，等到六點零五分，個天都未黑齊

.......有無攪錯，換轉響北海道或者東北六點已經黑媽媽.......等極都未見到預期中嘅夜景，心入面媽媽聲.......折滕左一整日，又攰又凍又餓，響嗰一剎那真係好想快D走人返去民宿食飯.........

 

呢個時候響身邊好多人開始離開，我地亦打算唔再等落去........其實睇返影出黎D相都OK勉強可以接受啦，不過當時個感覺係俾預期嘅失望囉........

官方網頁嘅冬天合掌屋夜景.........

 

雖然個view無預期中咁正，不過都算係咁，去過就叫完成左一個夢想.......呢個時候個天D雪又開始大返，我地就決定走人嘞..........

響展望台有一間土產店........無論幾咁想快D返民宿，我D shopping慾已經急不及待咁驅使我走入去觀摩一下.........

嘩~呢間野有好多飛驒寶寶嫁!!

除左shopping，仲可以醫肚........

好快速咁打左個圈，都唔駛點諗我就已經抱左一堆精品俾錢走人..........

 

睇完景買完野，基本上已經叫做完成左今個trip一個最重要嘅使命.......離開展望台，我地諗住沿返上山嘅路行返落山，點知出到去發覺個路口有交通警響度攔住唔俾人行，要所有人向另一個方向離開.......

唔係掛?? 咁點算? 呢條路都唔知通去邊，我地唔曉點行返去大田屋喎..........莫非個天今日仲未耍夠我地???

(待續

)