2011年2月北海道道東道北12日 - 流冰漫步

2月22日 - DAY 4 (PART I)
知床Utoro溫泉

第四日啦!! 朝早未夠六點鐘就起左身，好興奮呀

.....因為今朝要去玩呢個trip最期待嘅重點項目，流冰漫步!!

天濛濛光就爬起身，拿拿聲影下窗外邊嘅流冰景色先~~

酒店對出就係防波堤......

遠處有兩座山嗰度就係尋晚睇極光show嘅場地~

我鍾意紅色燈塔，好有一種浪跡天涯嘅浪漫感覺

呢間展望和洋室個大窗真係好大，無摭無掩，望出去個view真係好開揚，成個無敵大海景一覽無遺，好正!!

 房價貴dd都係值得嫁~

大海遠處有好多流冰呀!! 呢d就係由俄羅斯一路南下過來嘅流冰群啦!!

好鍾意呢張相，好寧靜嘅感覺

晨咁早已經有好多籠友擺定架撐影日出.....

等我都同兩隻野影返d造型照先，一陣間出去玩流冰唔可以帶佢地去嫁~

日出呀!!

我地參加呢個流冰漫步係酒店package包埋嘅，如果淨玩流冰漫步要5000円一個人，唔平嫁，不過可以親身同流冰近距離接觸，貴d都值得.......同酒店做reservation時，佢地會先問定客人嘅性別、身高同體重，幫你預備定dry suit~

玩流冰漫步好睇當日嘅天氣，如果天氣唔好隨時會取消，同埋地球暖化好有可能唔夠流冰，所以一路我地都好緊張

，始終山長水遠走到黎知床咁遠都係為左玩呢個流冰漫步，如果cancel真係會幾失望囉.....流冰漫步每日有4個session可以揀，我地揀左最早時段，六點半.....落到去酒店lobby，發覺已經有d人響度等緊，等左一陣，主辦機構Shinra嘅職員就到嘞，今早總共有兩group人，一group係日本人，而另一group就全部都係香港人，Shinra派左個講普通話嘅台灣女仔做我地嘅tour guide，佢同我地講解左一d要注意嘅事項，然後就俾張form我地填，有一個item係類似d生死狀咁上下嘅statement要我地簽，當然要簽啦，唔簽就唔駛去囉~~

搞掂晒手續就離開酒店，Shinra嘅專車已經響外面等緊我地啦.....我地呢團一行六人，除左我同老爺，仲有另外兩pair男女，佢地四個係一齊嘅.......

車行左兩、三分鐘就到嘞......係流冰海岸邊呀，YEAH!! 我地一陣就要行出去啦!!

落左車，tour guide同我地講解要點著件dry suit.....

所謂dry suit，其實係一件連靴同頭套嘅厚厚防水衣套裝，再加一對手套，著左上身可以話係密不透風，除左防水仲可以保暖......不過件野好難著，基本上單憑一個人係好難著得到，好似要將條褲扯上去就要搵人幫手，所以大家都著到一卜一碌，好好笑

另外一組日本人~

我地單係著呢件dry suit已經搞左好耐，件野好重嫁，成條死屍咁，我地仲要除晒羽絨同鞋企響海邊著，凍到黐肺

，我係一路流住鼻水一路手腳僵硬咁拉拉扯扯件野，真係七手八腳，幾經辛苦總算將件野著上身，搞到成個癲婆咁

，咩儀態都無晒.....最後一個step要將個頭套笠埋上去，之後就要tour guide幫我地將後面嘅大拉鍊拉上就大工告成嘞.....

YEAH~成功裝扮完啦!! 我個造型係咪好搞怪呢

帶埋對手套，同老爺齊齊整個合照留念先

.....隻手套得三隻手指咋，唔需要刻意都整左個V手勢出黎呀!!

大家著好晒dry suit，就跟住tour guide行出去海邊.....我地去探險啦))))

著住件dry suit響雪地上行真係好唔慣，我覺得我地好似一群企鵝咁行去海邊覓食....我對靴好大(因為我對腳比較細)，行起黎甩下甩下咁，真係好驚PK呀.....

玩流冰漫步基本上係唔可以帶隨身物品 (如果仲要兼顧埋隨身物品我諗我會PK死)，連手錶都唔好帶.....可以帶相機啦，記住要防水嫁，因為無論你幾小心都好，部機都會肯定濕......不過著住對只得三隻手指又鬆泡泡嘅手套真係好難控制部機，事實上係初初連部機都好難揸得穩，雖然話係防水，但都唔想成部野跌落冰水嘛，所以我地都只係好求其咁影幾張相當留個念咁解啦~~

行左一陣開始比較熟習件dry suit同對靴.....

話咁快就行到去流冰地帶啦，好緊張又好興奮呀!!

Tour guide示範俾我地睇點樣上落水.....

所謂流冰漫步其實唔單只係漫步嫁，要上水落水又要跳來跳去.......d浮冰一大塊一大塊咁，有d好硬淨有d就浮下浮下咁，有時我地需要由一塊冰跳過另一塊，如果唔敢跳就要先落水再爬返上去.....

我咁lady當然儘量唔跳啦.....d水估計其實好冰凍，不過我地件dry suit好保暖，所以完全no problem.....我覺得由水爬返上塊冰係最難嫁，有d浮冰郁下郁下，件dry suit又重又厚，我本身已經夠輪盡，爬上去又唔夠力，成日要人拉我推我扯我，甚至試過要老爺俾隻大脾我踩先可以爬上返去塊浮冰度，真係儀態盡失!!

行行下去到一大片流冰群，tour guide話呢度比較危，唔可以成班人一齊行，佢要逐一帶我地行過呢一大片左右浮動嘅薄冰呀......Hehe，等我呢個心口掛個勇字牌嘅港嬋做先頭部隊行先啦~

好緊張呀，d薄冰浮下浮下，每行一步都聽到腳底下d冰裂開嘅聲音，好似隨時會爆裂咁!!

哎呀，個tour guide一個唔覺意踩裂左塊浮冰跌左落水，佢本來一路拖住我，佢一跌我幾乎都俾佢拉跌，嚇到我v哇鬼叫........

好在我d平衡力都唔係太弱

d流冰除左浮下浮下，仲有大有細，有高有低，要上上落落，著住件dry suit每跨一步都幾難.....

如果放膽，其實快手快腳跳過d薄冰好快就可以行完，不過我緊張到死，姐手姐腳又驚跣又驚PK，真係一步一驚心

......

行行行，YEAH!! 我終於成功行到出去啦!!!

之後就到左最緊張時刻嘞，tour guide教我地點樣慢慢浮響水上面，原來唔係好難咋，件dry suit除左保暖，仲非常之浮，一瞓低就會自動浮起......

成功啦!! 不過隻手套會入水嫁，所以對手要舉起，如果唔係入左水就會好凍!!

響呢度我地有一陣自由活動時間......

個個都趁機自己玩浮水，好好玩呀!!

大家可以想像我呢個咁貪玩嘅人有幾興奮，試問一世人有幾可可以響零下唔知幾多度嘅冰海中暢泳呢? 不過玩玩下忘晒形對手入左水，唔係講笑，真係有d凍入心嫁!!

浮響冰海上面嘅感覺真係好正好過癮.....此時此刻，身處被列為世界自然遺產嘅知床半島，遠離吵鬧嘅都市，四周渺無人煙，只有未受污染嘅大自然，抬頭望上天係藍藍嘅晴天，放眼望過去係了無盡頭嘅大海，身邊係觸手可及嘅西伯利亞流冰，一生人能有幾多次咁難得嘅機會呢，好開心可以達成今個trip最大嘅願望呀!!

大家見唔見我身上有好多冰呀? 因為我地響冰海中打冰雪戰呀，大家好似癲左咁

......玩完等我正正經經攞塊冰影張相先.......

我都話我d平衡力唔差啦!! 係咪好英呢??

癲完一輪，tour guide又叫我地響水入面搵下浮游生物，佢話好彩嘅話可以睇到天使流冰魚嫁，於是我地個個收晒口乖乖咁靜悄悄探頭睇下水底係咩環境......不過我地搵左好耐都唔見，只係見到好多海草同極其量一兩條白色魚仔好快速游過......雖然著住dry suit，但響水入面靜靜企左一陣唔點郁就開始覺得都有陣陣寒意.......

玩左接近一個鐘，我地要回程啦.....好唔捨得呀

......

離開時見到又有第二group行出去玩.....我好想跟埋去再玩過呀!!

行到返去近岸邊，經過一個舖晒雪嘅斜坡，我地架van仔就係停泊左響斜坡上面，之前黎嘅時候我地係兜遠路行樓梯落黎，tour guide就提議我地不如爬斜坡上去.....我望住呢個都真係好斜下嘅斜坡

，除左雪想搵棵草借下力都無，完全係玩徒手攀爬嗰種款，個心實在有d慌

，不過d團友個個都無咩異議，唯有頂硬上，死就死啦......爬左一半都OK無咩難度，正當我沾沾自喜以為自己好掂之際，一個唔覺意踩錯腳成個人跣左落去，好在老爺同tour guide響我附近一手拉住我，但我已經嚇到魂不附體

.....幾經辛苦終於爬到差不多到頂 (其實個斜坡唔可以叫做高，係我無Q用啫)，已經喘晒氣，手腳都無力，試左幾次我都無辦法再爬埋最後一步，嗰剎那真正係上又唔係落又唔係企左響度，最後唯有要d團友同tour guide出盡吃奶嘅力又拖又拉又扯先將我推上去

......真係瘀到爆!! 呢d就係平時lazy唔做運動嘅結果，好在另外兩個女團友個情況同我差唔多，唉......

終於完成晒個流冰漫步啦，玩到筋疲力盡，已經四肢無力，我地仲要除左件厚重嘅dry suit，嗰個頭套真係好難除，好實好迫呀，我d頭髮俾佢 "啜" 住晒，除完個頭套真係頭都暈，個個都已經攰到半死狀態!!

換返晒衫同鞋，係時候上返Shinra專車返酒店......呢個流冰漫步真係好好玩

，我地玩得真係好開心，好唔想走呀!!

Bye-bye啦，美麗嘅知床流冰海岸，我會永遠記得今次咁難忘嘅經歷!!

(...待續)