2012年2月巴黎倫敦11日 - 向花都出發~

10-11 FEVRIER 2012 (DAY 1 - PART 1)

上一回提到今次呢個trip響臨出發前一個星期出現突發事件，就係歐洲有暴風雪，同埋法航又玩罷工，所以出發嗰日個心仲係好忐忑不安.....一朝早起身就上Air France個網頁check下flight status，法航由香港飛巴黎，基本上日日都有機，我地出發呢一日朝早同夜晚各有一班，等呀等，終於早上嗰班準時開出，我地個心當堂定返d，到左下午見夜晚嗰班都話on schedule，yeah!! 總算有驚無險.....不過之前罷工嗰幾日大部份航班都取消左，四日內總共只開得成兩班機，我地都有d擔心唔知會唔會有好多人因早幾日cancelled左嘅flight會改晒今日，所以穩陣d都係早d去機場，費事同人迫啦~

去到機場，用self-service kiosks 做check in後就去寄行李.....有無搞錯，都未出發其中一個喼已經係20.2kg?! Airline都係俾23kg咋喎，咁點買野返黎??


其實個喼入面有件羽絨同最重要係有個有轆嘅手提行李袋，所以係比較重d，不過都無諗過成20kg 咁重囉，老爺就話係好事，等我可以時刻擔心驚會超重唔駛咩狗屎垃圾都買一餐，我當然唔會理佢d廢話.....搞掂晒就過Immigration，之後就去Travelers' Lounge食免費晚餐，因為今次預早左所以慢慢食完仲可以周圍逛下~

 

我地搭法航AF185，23:35 departure，22:40就已經要我地boarding，唔知點解咁早......anyway, 早d上機就早d上機啦，經歷過之前一個禮拜嗰種擔驚受怕後，有得順利上機乜都無所謂啦......YEAH~ Paris, we are coming now!!

B777個經濟位大部份係3-4-3，係機尾有幾行窗口位係兩座位，agent好醒目幫我地來回機都攞左兩座位，你知啦，十幾個鐘機程，成日要出出入入，三座位好唔方便嘛，真係要讚下個agent well done呀~


Air France 嘅cabin crew基本上都係法國人，不過當然個個都識講英文啦，唔知係咪而家太多內地人搭機，除左空姐同空中少爺，仲有個曉講普通話同廣東話嘅服務員會周不時響機艙走來走去睇下有無人需要翻譯~

一上機就每人派個包包......

有個眼罩、耳筒、耳塞同濕紙巾~

班機都幾新淨，比想像中正，有獨立touch screen 電視屏幕，都有好多款娛樂揀，而且d電影仲係自選式，不過大部份都無中文字幕~

雖然已經係十二點幾，不過我地都唔覺眼瞓，所以都搵左套戲黎睇，老爺又係睇埋d打打殺殺嘅，我就搵左套輕鬆嘅 "Crazy Stupid Love"，都幾好笑幾好睇，不過當時未到Oscar，唔知套 "The Artist" 咁猛，真係嘥料...

套戲睇左一陣就開始派餐.....同平時坐日本凌晨機唔同，往時日本嗰d係light meal，今次呢個係正餐，仲要係好豐富下......serve我地嗰兩個都係空中少爺，唔知係咪法國人都係熱情d，佢地好鬼nice得黎個態度又好causal，好似同d人好friend咁，問佢咩佢地都可以挨住響個椅背同你傾一輪，所以派餐都派得好慢下......之前都知道響法國食餐基本上都會飲酒，仲要係餐前餐中餐後都有......果然一開始就問我地要咩餐前酒，平時坐機我地都好少飲酒，唔係果汁就汽水，不過今次去法國喎，好多機會飲酒，所以我地都要左champagne，諗住要開始warm up習慣下嘛

我個main course係雞.....

老爺就要beef~


我同兩隻bears影完相搞完一大輪都未開始食，個空中少爺已經攞住一大盆麵包問我地仲要唔要多d.......由搭機呢一刻開始我地就不斷咁食麵包，餐餐都係咁 "質" 好多包俾我地食，d包雖然唔駛另計錢，我雖然愛貪小便宜，但日日咁食法真係食到嘔白泡，到左後期我聽見麵包兩個字都有d打冷震，返到黎香港我地足足有一個星期唔肯再掂麵包......

杯champagne都未飲晒，跟手又問我地要咩wine.....咁人地咁有誠意無理由托人手踭，我地都要左紅酒....個空中少爺開左枝酒仲要俾老爺試下味睇O唔OK，然後一人放低一枝.....hehe，我覺得自己好 "parisian" 囉

呢個沙律好好味

個雞同pasta亦都唔錯~

仲有Camembert cheese，mini bear話好好味，佢好鐘意食cheese嫁~

幾soft同creamy，OK嘅，不過我始終唔係咁識欣賞cheese囉~

今個trip第一杯sparkling，之後成日都飲~


食到咁上下又問要唔要餐後酒......我枝red wine都未飲完，正當我響度諗緊好唔好蝕底唔要，個空中少爺以為我唔知飲咩好，就suggest我不如要個whisky試下.......一不做二不休，死就死啦，一於飲大佢!!


老爺就要brandy.......我飲左啖，嘩! 好辣口呀!!

又champagne又紅酒又whisky又brandy，結果我飲到暈陀陀，連套戲都未睇晒就已經好快瞓著左......

飲左酒真係好瞓d，就算係響機上，我竟然可以坐響度瞓左五個幾六個鐘都無點醒過，半躺狀態當然唔會舒服得去邊，但至少瞓得著囉，所以如果大家第時搭凌晨機或長途機，可以好似我咁飲到啤啤夫咁就可以一教瞓到大天光啦，不過老爺無飲醉，佢話瞓得麻麻，瞓下醒下咁.......瞓醒就覺得肚餓，於是走去buffet bar睇下有咩野食.....個buffet bar雖然唔係好大，但都有幾多野食，連ice cream都有! 有個空姐坐響度坐陣，不過叫得buffet bar佢當然係唔會主動幫你，你問佢野佢都會理你不過就cool cool咁囉~

本來想沖杯麵，不過老爺話應該就快有早餐食，所以係咁意食件三文治飲杯coke算~

仲有三個幾鐘先到巴黎，瞓醒教又睇下電影.....過左無耐就食早餐嘞......

呢個火腿芝士沙律都OK幾好食~

Yogurt, yummy!!

食完早餐，睇下電影又瞓下咁，唔覺唔覺就到左巴黎lu......望出窗外黑媽媽，冬天法國比香港慢七個鐘，而家仲係晨咁早五點鐘咋......


我地班機本來5:45到，不過早左喎，5:20就到左戴高樂機場嘞~


落左機一邊行一邊影下相，又去下個toilet，最後行到去入境處時d人都已經走得七七八八，我地係最後兩個入境，都唔駛點排隊......之前做資料research時都知道法國d人做野好求其，果然係無錯嘅，入境時嗰個海關男officer一句野都無問我，攞住我本passport揭兩揭，望左我一眼就好快速掟返本passport俾我，半分鐘都唔駛就搞掂，而老爺就耐過我小小，同佢deal嗰個係女黑人，響d討論區成日見人講響歐洲入境時最好避開女黑人條line，因為多數好多野問好麻煩，一時唔鬼記得，老爺咁啱就撞正個女黑人，不過好彩都係問左佢幾句野啫，都好正常.....反而我等緊老爺時睇下本passport先發覺唔妥....咦，點解無chop印嘅? 到老爺搞掂出黎我就話俾佢聽，佢話要chop返喎，因為佢第一時間諗到遲d我地仲要入英國境，一向知道入英國境比較麻煩，費事到時搵唔到我地入法國境紀錄啦，於是我地行返轉頭打算搵返之前嗰個男officer幫我chop返個印啦，點知真係講都無人信，只係一眨眼嘅時間，d工作人員已經唔見晒，好在嗰位女黑人都仲響度啱啱準備離開，於是我地同佢講話佢隔離條line嘅officer無幫我chop印.....好神奇，佢大喝一聲，嗰個男officer忽然又出現返，個女黑人同佢嘰哩咕嚕講左幾句，佢就好唔情願咁幫我chop返個印嘞.....成個過程真係好搞野囉，我地幾乎係自出自入，個印係chop又得唔chop又得，求其程度真係拍得住台北呀~

之後就去攞行李，去到見d行李仲未出，我就去toilet帶返對con同執下副尊容，到搞掂晒出黎老爺已經攞晒d行李，離開時都無職員check同把關，唔係，應該係話想搵個職員見下都無囉......出到去入境大堂，我地首先搵個地方開喼攞件羽絨出黎，呢個時候有一對老人家走埋黎用普通話問我地係咪中國人，原來佢地係黎接機，但等極都唔見人，因為佢地唔識講法文or英文，想我地幫佢地去問下information班機到左未，咁我地見佢地一把年紀又係中國人無理由唔幫人嘅，不過佢地連班機嘅出發地個英文名都唔知，只係知道係非洲，佢地講嗰個中文名我地真係聽都未聽過，即管試下去information幫佢地問下啦......

Information個女職員，點講呢? 可以話係好典型嘅法國服務業人員，響法國磨多幾日就會遇到好多類似嘅人，佢地唔係唔幫你，只係一定唔係日本人好有heart嗰種啦，個態度好漫不經心，講句野都懶懶行又寸寸咁囉，好似呢個機場information職員，佢一聽我問呢一個鐘內有無flight由非洲飛巴黎，佢聳下個膊頭扁下個嘴，話每個鐘都有好多班機由非洲過黎喎，問返我非洲咁大究竟係東南西北邊一處先? 我話唔知，因為都係幫人問，佢就慢條斯理咁由五點開始逐班機嘅arrival time "up" 俾我聽.....大家明唔明? 佢俾我個感覺係「我唔係唔幫你不過你問d野太空泛好難幫但如果你真係咁想知我就將所有知道嘅野話晒你知你自己諗下啦」.....之後幾日我地遇到好多類似咁嘅情況，如果響香港一早就俾人用劉華tone媽叉今時今日仲咁樣服務態度係唔得嫁......

Information幫唔到手，個婆婆好憂心，想請我幫佢打電話俾對方，但佢個電話號碼又撥極都撥唔到，之後佢就問我可唔可以幫佢入返去攞行李嗰度睇下有無機場嘅工作人員問下情況，唉，做好人就做到底啦......其實我都唔知點解我會咁有耐性花咁多時間幫佢地咁耐，老爺響一邊睇住d行李，離遠見我走來走去搞咁耐都未搞掂開始有d唔耐煩，忽然見我無啦啦走返入去海關入面嚇到傻左，事後佢問我知唔知唔可以咁樣走返入去? 係犯法嫁隨時會俾人拉嫁!.....我知，尤其我一推開度門即刻響起警鐘唔知都變知啦，不過當時我見唔響都響左咯，又無職員走出黎阻止我，咁咪走埋入去睇下囉......不過入面乜人都走清，所有行李輸送帶都停晒，好似個死城咁有d恐怖，無辦法唯有出返去，忽然有個類似機場職員嘅人物行過，即刻叫住佢啦，不過諗返起都覺得好好笑，我叫住佢嘅第一句竟然係 "sumimasen"......呢位男士即刻停低仲好有誠意咁笑容滿面答左我一句sorry幫唔到我......

出返去同婆婆講話真係無晒辦法幫佢唔到，老爺響一邊做晒表情叫快d閃，個婆婆都覺得阻左我地好耐，好唔好意思咁多謝我地，我有d沮喪囉，因為嘥左咁多時間但都係幫唔到佢地.....同佢地道別之後我地就拿拿聲去搵個Gate 8.....我地今次個package係包機場來回酒店接送，根據agent俾我地嘅voucher，因為我地班機響Terminal 2E landing，個meeting point就係響Gate 8...... 

去到Gate 8，唔見有咩類似嘅指示，因為見voucher上面寫住安排接機嘅係Cityrama，所以我地好自然就猛咁搵Cityrama.....Cityrama係一間專搞local tour嘅旅行社，響巴黎好出名，今次個trip我地都join左佢地一個 Dinner + River Cruise Tour @ Valentine's Day......之前上佢地個web site check過呢個機場酒店door to door shuttle 單程係收30e一位嫁，我地個package包埋，好抵囉，因為如果搭RER要再轉地鐵，拎住兩件大行李都幾麻煩囉......

響Gate 8周圍附近都搵唔到有Cityrama嘅指示，於是走出去外面望下，外面係巴士站，不過冷清清搵個人都無，風好大天又未光，嗰剎那我地企左響度都唔知點算好，老爺話十成十我地頭先掛住幫人搞得太耐，接我地架車走左啦.....吓? 唔係掛，呢個唔係公共巴士喎，suppose應該算係專車接送，無理由就咁走左去掛?! 忽然見到有個男人經過，我地拿拿聲截住佢俾張voucher佢睇，佢睇左陣就話d巴士走晒啦，然後就問我地想去邊，原來佢係的士司機，如果我地去巴黎市中心大概4、50e，問我地有無興趣.....嘩! 五舊水咁貴，我地當然唔要啦.....走返入去大堂，再睇清楚張voucher，上面有個免費電話，如果班機delay可以打去問，於是我地就搵左個機場電話試下打，不過唔知係因為太早定個number係流嘅，打極都係無人聽囉.....黎之前因為擔心暴風雪d機或者會delay個機場接送未必咁順利，所以都有睇過下點樣由機場搭火車去酒店，雖然轉折d但點都好過搭的士咁貴，而且仲咁早我地都唔趕時間，所以我地就打算去搭火車，不過個心就點都有d唔份氣囉，咁明明係包埋專車嘛......

正當我地個心十五十六唔知走唔走好，就響呢個時候，老爺忽然見到有個著住西裝嘅男人手拎住個大紙牌向住我地行緊過黎，我地即刻迎埋去，YEAH，將紙牌上面寫住我個名嫁! 好野，原來架車仲未走.....呢位男士原來就係黎接我地嘅司機，同佢核對左d資料，佢就話上車地方係另一邊，叫我地跟住佢行過去......原來唔係我地遲，而係因為我地班機早到左所以佢而家先出現，司機叔叔都幾nice，同我地講今日巴黎好凍問我地著得夠唔夠暖，又幫我地推行李車......跟佢走左都一大段路，去到另外一個大堂，佢就叫我地響度先等等佢，原來佢仲要去接另外一pair人~

等緊嘅時候我地就周圍望下.....忽然發現原來呢度先係Terminal 2E...?!  咁頭先我地落機嘅地方係邊度呢? 真係 "R" 頭，照道理landing嘅terminal無理由無啦啦改啫??....不過剛才我地掛住幫人都無影個入境大堂，而家都無從深究.....

呢邊個大堂熱鬧好多，可以話人頭湧湧，好多人響我地旁邊行過~


RER就係巴黎嘅火車，由機場去巴黎市就係搭B線~

有自助咖啡機.....

2e一杯 double expresso.....好想試下呀，不過老爺話驚個司機好快返黎，費事拎住杯野上車啦，同埋我地都無coins.....


咁唔買都睇下d價錢啦.....cappuccino 1.5e，Lipton伯爵茶1.3e，價錢都OK唔算好貴喎~


等下等下，等左好耐個司機都未返，我地雖然唔係趕時間，但咁響度乾等都好厭悶囉，不過無計啦又唔走得開.....終於等左差不多半個鐘個司機先再出現，個心真係有d媽媽聲......司機叔叔話接唔到嗰兩個人，我心諗好在都係接多兩個人，如果你要接一大隧人我地咪有排等??

之後就跟住佢去攞車，行到去出口佢就叫我地停低等佢出去揸架車過黎......又等緊嘅時候有個應該係內地同胞走黎用普通話向我地問路，我覺得佢係有病囉，第一佢d語氣好無禮貌，就算大家係中國人我都唔係是必要幫你，第二，點睇我地個樣都似係遊客啦，鬼知你問嗰處地方點去咩!!

等左一陣個司機就返黎嘞.....呢架就係接我地嘅專車啦~

車行左都好耐下，呢個時候已經係朝早七點，但個天仲係黑媽媽，沿路又無咩風景睇，坐下坐下我地又瞓著左.....大約過左半個鐘一醒返就見到熟悉嘅凱旋門，我地架車響旁邊經過，好宏偉呀! 之後就駛入知名嘅香榭麗舍大道......


差不多七點半，我地終於去到位於香榭麗舍大道旁邊嘅 Hotel California Paris 啦!!

 

原本我地打算將d行李寄存響酒店先，諗住晨咁早都唔慌有可能俾到房我地.....接待我地嘅係一位好高大嘅黑人，講真第一眼望見佢我有d驚囉，不過佢原來好nice，同我地講可以幫我地做check-in，同埋即刻安排到房俾我地......Wow, good呀，可以上房去個toilet洗個面同hea一陣先嘛，呢位黑人哥哥d英文都好容易聽，同我地講解酒店嘅設施亦好詳盡，而且笑容滿面好friendly，我地對佢嘅印象都幾好.....搞掂晒check-in，我地就問係咪應該有個Paris Museum Pass send左俾我地......

所謂Museum Pass，其實係一張博物館通票，持有呢張Pass可以免費參觀巴黎市同周邊地區60多個博物館同古蹟，而且參觀次數不限，最重要係慳返好多排隊買票嘅時間，因為一d熱門嘅博物館同景點好似羅浮宮、凡爾賽宮、凱旋門等基本上好多人排隊買票，尤其係旺季，分分鐘可以排半粒鐘以上.....Museum Pass有2、4同6 days三種，如果鍾意逛博物館買呢個Pass肯定有著數，好似我地今次買呢個2 days Pass個價錢係39e，單係羅浮宮入場費已經要10e，凡爾賽宮全票要25e，再加埋凱旋門入場費9.5e，三個景點已經超過39e，仲未計其他博物館例如我至愛嘅Museum d'Orsay同必去嘅聖母院鐘樓.....Museum Pass可以響網上購買，網頁有中、英文選擇，不過on-line order就只有英文，購買後可要求佢by post俾你，當然要shipping cost啦，如果唔係亦可以到時去佢地嘅office攞，又或者叫佢地將個Pass送去你住宿嘅酒店......因為張Pass要連續使用，我地只有第一、二日同最後兩日係全日stay響巴黎，所以一開始我地就plan左去到嘅第一、二日用，但攞Pass嘅Office要10:00先open，我地原先諗住咁早機一早去到酒店放低d行李，食埋個早餐都仲可以九點前去到羅浮宮，正所謂時間就係金錢，慳得一個鐘都好，所以決定俾多10e請佢地先送個Pass去Hotel California啦~

黑人哥哥check左一陣就話無收過有Museum Pass係俾我地.....唔係掛，俾晒錢有晒email confirmation 喎，我地於是攞張野俾佢睇.....


因為諗住一去到11號一朝早就要即刻用，我仲特登將個arrival date講早一日，等佢地唔會11號先送去酒店......黑人哥哥幾好人，主動幫我地打電話去詢問，不過唔知係咪太早無人接聽囉，佢又再幫我地搵多次但當然係搵唔到啦......唉，我地第一個挫折咁快就到嫁!! 無計可施，唯有上左房放低d行李先再諗辦法啦~

大堂有兩部lift.....

不過我地鍾意搭呢部玻璃門嘅~

要用房門key card activate部lift嫁~

頭一二日我地嘅房係package包嘅，所以預左一定係standard room，之後有兩晚係自己經網上直接同酒店做booking，見有promotion我地book左間superior room，以為會比standard room豪小小，點知原來差不多，size一樣，分別只係個樓層，standard room響一樓，而superior room就高d響六樓，仲有就係六樓間房個view好d囉.....不過老爺話個lift lobby都有d唔同，佢話六樓嗰個靚d喎~

成間酒店都掛左好多畫，連走廊都係.....值得一提嘅係一樓走廊d牆壁都殘舊d嫁~

我地住響118號房~

房間都OK，如果同日本嗰d商務酒店比，直情係超大，平放兩個喼響地下pack行李都可以....

有兩個衣櫃.....不過唔同日本，無provide拖鞋......

好在我有先見之明帶定兩對呢d即棄嘅，所以唔好話我成日貪小便宜響酒店乜都貪，唔覺唔覺攞埋忽然要用就知我呢d港嬸有幾醒啦

張床都幾舒服，不過唔知係咪for西方人多，我覺得無論巴黎或倫敦，佢地d床都比較高~

房間有free wi-fi，不過速度好慢同埋成日斷線囉!

叫做有個落地長窗，不過一樓無景睇~

Washroom 幾闊落.....

當然唔係日本嗰d可以洗pat pat咁正啦~

設備都算齊全，shower gel、shampoo、lotion、風筒都有，係無牙刷同牙膏.....牙刷我地一向有帶定，因為用唔慣嗰d旅行裝，但勢估唔到牙膏無囉，去慣日本咩都齊備嘛，其實之前都聽過下話係日本先咁好會provide牙刷牙膏，所以都有帶定一枝小型牙膏，係諗住響Mont St Michel d 酒店比較山卡啦多數無provide，但無諗過連巴黎同倫敦d四星酒店都無囉~

仲有歐洲好似唔興用浴簾，個浴缸得半塊玻璃阻隔，d水灑到一地都係，最鬼憎!!

咦，歐洲都有兩粒welcome candy喎~


 
響房hea左陣，係時候要諗下個Museum Pass要點搞......張Pass未到手，老爺就話係咪可以改改行程將個Pass改遲d先用，本來除左第一二日，最尾嗰兩日都係連續stay響巴黎，將個行程掉轉其實無咩大問題，不過好衰唔衰，大家記唔記得我臨出發前咪仲改緊行程? 原本諗住第二日會用Pass去凡爾賽宮，但因擔心暴風雪影響個花園會close，所以臨急將第二日嘅行程同尾二嗰日掉轉，仲快快手 on-line book左個一人價for二人嘅入場package....visa card都已經碌埋所以尾二呢日無得改一定要去凡爾賽宮，咁即係話我地唔可以最尾嗰兩日先用個Museum Pass，一定要第一二日用囉.....

既然行程無得再改，咁就唯有睇下點樣可以check到個Pass嘅下落，根據頭先reception嗰位黑人哥哥講，今日係星期六，恐怕嗰間Tourisum無咁早有人辦公，即係話唔好旨意reception會幫我地繼續打電話去check，既然係咁，無謂嘥時間坐響度等，老爺話不如自己親身走去個office問啦......唉! 真係搵黎搞，早知一開始唔叫佢地送過黎酒店啦，白白浪費我10e俾左個 hotel delivery cost，不過無計啦，鬼叫係自己急咩，於是就拿拿聲攞返個confirmation出黎睇下個office嘅地址響邊先......

照睇可以搭Metro(地鐵)去，個站係 "Pyramides"，我有d印象好似幾近羅浮宮喎，啱晒啦，攞完個Pass跟手就可以去埋嘞，但係初黎步到人生路不熟，出左站咩方向都唔知點搵呀?? Hehe，好在呢個世界有internet，好在我地帶左部 iPad，即刻試下上去google map search下先.....Yeah! 好易就search到嘞，睇落都唔太難搵~

搵左個location，睇埋個地鐵要搭邊條線，搞掂晒，望下窗外面個天都開始光......

再睇清楚個 office 係十點先open，而家差不多九點，一於出去香榭麗舍大道食個早餐先~~

(...待續)