2012年2月巴黎倫敦11日 - 蒙羅麗莎︰吵死了!!

 

11 FEVRIER 2012 (DAY 1 - PART 3)

離開 Paris Tourisme，我地沿住 Metro Pyramides 站出口嗰條街行去羅浮宮 (Musee du Louvre)......

將近十一點，條街仍然冷清清.......


行左大約六、七分鐘，去到大街盡頭，見到好大一座building，忽然就醒起莫非就係羅浮宮?


好古典嘅建築，真係好大，幾乎見唔到盡頭~


羅浮宮有幾個入口，我地今次係經由 rue de Rivoli 嘅 Carrousel access 進入.....

羅浮宮既為全世界最出名嘅博物館之一，除左館內數之不盡嘅收藏，仲有就係宮殿自己本身嘅建築已經係一件藝術品，所以未入館前一定要響外圍欣賞一下.......

羅浮宮已經差不多有成一千年歷史，十二世紀已經響度，最初只係一座用嚟做防禦嘅城堡，後來法國有皇帝將佢改建為皇宮，之後仲不斷擴建，搞到愈來愈宏偉，最後就變成而家咁樣.......

 

羅浮宮整體建築係呈コ字形，中間係一個好大嘅露天廣場，夏天應該種滿花花草草，冬天就只有枯樹~

 

嘩，有個好大嘅吹氣公仔忽然伏左響某個窗口.....如果係 Mary或者娜姐人形攬枕我諗會更加吸引

玻璃金字塔，呢個唔駛多介紹啦，相信無乜邊個會唔識.......

古典嘅皇宮建築加現代玻璃金字塔，雙映成趣~

咁出名嘅景點，兩隻 bear bear 又點可以唔走出嚟留下倩影!

紫bear︰Piggybread! 快 d 數下個金字塔係咪一共有666塊玻璃?

Piggybread︰.......

Mini bear︰點解係666塊玻璃呀??....666，好驚喎!

紫bear︰Da Vinci Code入面蘭登教授講嫁!! 佢好鬼型嫁，我尤其like Tom Hanks 嗰把麻甩長髮.....

Piggybread︰......(繼續無言 + 面上多左三棟)

老爺響一邊流晒汗唔敢搭嘴當聽唔到，佢好擔心呢三兜友真係咁無聊要佢逐塊玻璃數一下......

-----

呢個就係旅遊書所講嘅新古典主義建築? 雖然我唔係好知係乜東東，不過又真係幾靚幾古典啦!!

玻璃金字塔斜對面就係騎兵凱旋門 (Arc de Triomphe du Carrousel).......呢個凱旋門係拿破崙為左歌頌自己戰爭勝利而建，頂部嘅裝飾就係拿破崙駕駛住四馬戰車歸來嘅模樣，旁邊仲有鍍金嘅希臘勝利女神像.......


響地理上佢同我地今朝響載高樂廣場上嘅凱旋門係成一直線，而如果由呢個騎兵凱旋門再向另一面延伸就會去到一個仲大嘅新凱旋門 (Arche de la Defense)，據講呢三個凱旋門唔單止係連成一直線，而且騎兵凱旋門嘅大細正好可以塞入去凱旋門，而凱旋門又能夠塞入新凱旋門，所以騎兵凱旋門又叫小凱旋門.....本來想行埋過去穿過另一面影返過去金字塔嗰邊，諗住個構圖應該會幾型，不過當時想快d入去羅浮宮所以無行過去，諗住去完羅浮宮出嚟先影，點知之後老人痴呆又唔記得左.....d 野就係咁，成日諗住仲有大把機會，點知一個唔覺意就會錯失左~

 玻璃金字塔其實係羅浮宮嘅主要入口......響我地掛住周圍影相嘅時候，已經有好多人排緊隊入去，老爺就話唔好影相住，快d入左去先，費事一陣間愈排愈多人......

 

呢條隊其實只係過security check 咋，我地排左一陣都唔算好耐啦.....響巴黎基本上大部份博物館都要經過security check，遇啱多人時真係好阻時間，話就話過X ray check 好似好嚴謹，但我地發覺好多時就算你過X ray 時響鬧，d 保安都係咁意打開你個袋望下就算，好求其，d 所謂security check 其實做俾人睇多過實際作用~

過左security check之後要搭電梯落去basement 拿破崙中庭，即係金字塔底部買票入場......望落去 ticket counter 有好多人呀，好在我地有票在手，唔需要再排隧買飛，又可以響度影下相先.....

由金字塔內部望返出去羅浮宮嘅 Richelieu Wing.....

見下面愈來愈多人，影左幾張相後我地都搭電梯落去嘞......落到去首先梗係去 Information Desk 攞個導遊圖先啦，十一點幾，人潮其實仲未算係太多，可能始終係冬天唔未係旺季，不過 Ticket Counter 條 line 已經有幾個圈......

其實除左ticket counter之外，亦有自助ticket machine，相信操作都唔會太難，不過除非係即興走嚟啫，如果唔係強烈建議大家先on line又好、買pass又好，總之預早買定飛就隱陣d......羅浮宮入場費成人10e，如果嫌貴，每個月第一個星期日係免費入場，不過既然係free of charge，要有心理準備會迫爆人~

落到去下面 basement 先發覺原來除左自動電梯之外，忽然見到呢條螺旋行人樓梯......

嘩，不得了，老爺好似中左邪上左身咁，對呢舊野發左狂猛咁響度研究.....


有乜咁特別? 大家留意下條樓梯中間嗰碌柱，驟眼睇好似係條樓梯嘅support，其實係獨立無關連嫁......

碌柱其實係一個升降機，紅色箭嘴嗰度就係lift嘅入口.......

嗱，個lift門關上後條通路亦都會缩埋入去條柱度，道門亦會自動close嫁.......

睇下，部lift落左一半......

之後成碌柱無左，因為部lift落到去地面嘞........


我 of course 想去搭下部lift啦，不過原來係 for 傷殘或老弱人士，唔係隨便俾人用~

當然老爺最大興趣都係條樓梯 (職業關係)，不斷響度讚嘆話勁，真係俾左好多個感嘆號!! 佢好驚嘆點解人地可以咁勁計到條完全無support嘅樓梯.....又響條樓梯走上走落話要感受下震唔震，都算，之後又要我走上走落幫佢影相，迷戀程序拍得住我響 LV 個癲喪look 咁樣呀!!

明知我最憎行樓梯，仲要又上又落影造型照......不過算啦，難得條友高興就順下佢意，之後要佢同我行咁多museum其實都好難為佢，咁佢讀嗰行自然對 d architectural stuff 有興趣，難得羅浮宮本身嘅建築都咁著名又啱佢feel，我咁善解人意，當然就由佢啦~~

條樓梯又真係幾型嘅.....

等老爺影夠後就入場啦.......眾所周知，羅浮宮嘅收藏品多不勝數，地方又大，想響短短幾個鐘頭內行晒根本係絕無可能嘅事.....如果你係藝術超級愛好者，恐怕要響呢度預留一星期嘅時間先可以盡情仔細欣賞，but 如果你同大部份遊客一樣，對藝術品無乜興趣，只係諗住純粹到此一遊叫做返到屋企有得同人吹下，響度hea上四、五個鐘已經好夠，最重要當然係focus 響所謂嘅羅浮宮鎮館三寶啦 (i.e. 蒙羅麗莎、維納斯女神像、勝利女神像)......至於我地，當然都係屬於layman一族，只不過因為我細個讀書時叫做讀過下fine arts，所以除左鎮館三寶外仲會有多小小要求咁啦.....同埋最重要係，都係嗰種心態啦，就係d觀光名勝基本上去過一次就夠，既然係咁，當然睇得幾多得幾多，成一舊水入場費喎，最緊要唔好蝕呀!!

如果大家同我地一樣咁嘅心態，咁事前就要有所準備，唔好去到先盲中中周圍搵，要有選擇性咁去逛，出發前要先上網check一check自己想睇咩藝術品，最好download定張地圖圈低展品嘅location，規劃好條路線，時間就會好用好多......不過當然呢個都只係屬於theory層面，去到實際環境好多時會同planning有所出入，尤其好多展品同展覽館會有機會維修，所以入場前一定要響Information Counter 攞份導覽圖再look look~~

導遊圖有多國文字任揀嫁，記得要攞，如果唔係一定會迷路.....


另外館內仲有provide 好先進嘅 audio guide，係N3DS 黎嫁，唔怕煩可以攞返部一邊聽一邊睇，幾有型，有七種語言揀，but sorry，係無普通話嘅，而且要5e租金!.......所以我地 No thx la

(Extracted from official web site)

羅浮宮有三個大展館︰Denon Wing (德儂館)、Sully Wing (敘利館)、Richelieu Wing (黎塞留館)，三個展館相連，每個展館再細分好多個展覽廳......進入每一個大展館都要查票，基本上所有展館都可以影相，但就唔可以用閃光燈~



館入面有成幾萬件展品供人欣賞，為左體貼一眾趕時間嘅遊人，響官方網頁同免費索取嘅導覽圖上都 list out左一d selected masterpieces，俾大家參考同唔駛搵得咁辛苦.......不過話雖如此，響好似迷宮一樣充滿住一間又一間嘅展覽廳行走，d 出名嘅collection 又分散響唔同嘅角落，即使睇住location map，要搵心頭好，就算唔怕搵到頭都暈，對腳都行到跛!

整個羅浮宮一共有五個levels.....Basement 金字塔底部除左有 Information Desk、Ticket Counter之外，當然最重要有我至愛嘅 souvenir shop & book store啦，逛完長長嘅shopping mall，就會見到好有型嘅倒金字塔，旁邊仲有新開嘅 Apple Store 嫁~

Lower Ground 有中世紀羅浮宮遺跡，同埋個人認為好靚嘅馬利中庭


Level 1 嘅展品好多都好有名，當中最著名嘅唔駛講一定係鎮館三寶之「蒙羅麗莎」同「勝利女神」雕像，仲有金碧輝煌嘅拿破崙三世套房~


Ground Floor 就有鎮館另外一寶「維納斯女郎」雕像，同古羅馬、古埃及文物，獅身人面像都有!


Level 2 以 paintings 居多，本來有我個人比較期待 Corot 嘅風景畫 "Recollection of Mortefontaine"，不過去到竟然發覺展覽廳維修close 左，有d失望囉~ 



咁多層就算唔詳細研究只係就咁每個level掃一圈都有排行，最初我地諗住費事上上落落嘥晒d時間，所以就打算行完晒一個level先去第二個level，但咁樣其實係唔work嫁，因為有d 展覽廳close 左會block 左條路，需要經第二個level 兜個大圈先去得到，行到我地死死下，好沮喪，所以suggest有志之士都係去完一個大展館先去另一個~

好，出發!!


同所有人一樣，最緊要梗係搵左鎮館三寶先啦，一場去到羅浮宮如果連三寶都無睇返到香港點有面目見江東父老呀.......三件典藏都係響Denon Wing (維納斯女神像其實屬於Sully Wing，不過個location 響正Denon Wing Room No. 6 隔離)，所以我地一開始就先去Denon Wing......呢三寶既然係必看景點，沿路都會有指示方向，基本上唔難搵囉~

呢個 hall 我覺得幾型......一邊係通去 Galerie Michel-Ange，有 Michelangelo 嘅雕塑.....

多人到可以用人頭湧湧黎形容.....冬天都咁樣，暑假旺季時唔知會有幾恐怖~

而 hall 嘅另一邊盡頭係一條巨型石梯，上面就係鎮館三寶其中一寶「勝利女神」雕像 (Winged Victory of Samothrace) 嘞.......

貴為鎮館其中一寶，當然有返咁上下standing，唔會同其他展品一齊迫，個雕像自己獨霸一個空間.....就咁睇旅遊書睇唔出佢嘅size，其實好巨大嫁......

呢一個斷臂女神像已經有好多年歷史，係公元前190年嘅作品，公元前! 即係耶穌都未出世，真係好久遠之前喎......Samothrace 係希臘一個島，呢個雕像就係響島上一座廟宇被發現，據講係為左紀念海戰勝利而建，女神高舉雙翼，挺立響戰船嘅船頭，衣衫迎風飄揚，好英姿颯颯呀~

 

雕像雖然已經無左個頭，但係整體造型好似展翅、挺胸以至衫嘅皺摺都表現得栩栩如生.....大家睇下佢身上、大脾嘅衫紋，望落去真係好似被海風吹起，同被海浪打濕左後緊貼住肌膚咁.....可以將咁堅硬嘅大理石處理到咁生動，古代d藝術家真係好勁呀!!

再嚟多一個側面.....


呢個係之後我地響另一邊 hall影返過去~


勝利女神 v.s. Mini bear，大家覺得邊個好樣 d??

Soft 左嘅紫bear又點睇?

睇完勝利女神像，我地快速向住羅浮宮另外一寶進發......穿越過幾個 hall，終於去到收藏「蒙羅麗莎」嘅第六號展覽廳 Mona Lisa Room......

未入到去已經覺得好嘈同見到好多人出出入入，響門口望入去真係一廳都係人，好恐怖......雖然話羅浮宮入面有所謂鎮館三寶，但館方對「蒙羅麗莎」嘅重視程序係唔同d嫁，幅畫放正響廳嘅正中心，有好大塊防彈玻璃罩住，畫嘅前方有欄杆攔住晒，兩邊仲有守衛(s)看守


真係多人到爆!


我地左攝右攝終於走到去正中間搵到個有利位置影返張相睇下佢嘅微笑.......登登登登，羅浮宮嘅 superstar「蒙羅麗莎」(Mona Lisa)!!


d人用「世上最美麗嘅微笑」黎形容，老實講算唔算最美麗呢樣野就真係好見人見智，在我睇嚟，我覺得我家嗰位大寶貝小姪女嘅微笑絕對迷人過佢囉，不過審美嘅野好主觀嘅，響達文西畫筆下嘅麗莎女士個笑容又真係好似笑非笑、幾撲朔迷離啦......

(Searched from Google photos)

其實呢幅畫個size好細，又有幾層玻璃阻隔住，仲要鬼屎咁遠距離望過去，想細心欣賞幾乎係無乜可能嘅事，而且 Mona Lisa Room 永恆地迫爆人，現場真係好嘈......望住 Lisa 姐嘴角嗰一抹略帶嘲弄嘅微笑，我就會諗，佢老人家唔知響心入面會唔會媽媽聲︰無時無刻都咁Q多人真係嘈Q死!!.......真係無一刻安寧，仲要廳入面明明大大個 notice唔準人用閃光燈，唔知點解總係有d人唔知係盲定係有病，硬係要閃來閃去.....Lisa 姐好好地一個貴婦，無啦啦俾人放響度供大眾蹂躪，唔怪得個笑容咁詭異啦~

話時話我成日見d人去睇完就鬧話俾人搵笨，投訢多人到死根本睇唔清楚，又話唔覺幅畫有幾巴閉幾特別，保安又 "懶" 嚴密...諸如此類，我其實覺得呢d人幾多餘囉，除非係藝術愛好者又或者係幅畫嘅超級fans，先會懷住一種仰慕嘅心情走嚟朝聖或者鑽研真蹟，大部份人嚟到都係當見識下同到此一遊嫁啦，你唔係諗住俾左10e 就妄想響有限嘅時間同空間去慢慢研究幅畫掛?? 而家科技咁發達，要欣賞或者認識一幅名畫，隨時上網都可以搵到大量圖片同有關資料啦，認真d亦可以買本畫集鑽研......老實講，嚟得羅浮宮，十個著左有九個半人都係要嚟睇 Mona Lisa，人多就一定預左啦，common sense啫，無咩人睇嘅畫你都未必有興趣啦，如果真係咁想靜靜欣賞，羅浮宮入面仲有好多展覽廳係無咩人逛有好多名畫係唔弱得過 Mona Lisa 等緊你去深入欣賞喎!!

Mona Lisa 咁多人有興趣一睹佢嘅風采，咁查實呢一幅幾乎稱得上係全世界最出名嘅油畫有咩咁特別呢? 撇開嗰d乜乜構圖、暈染法透視法唔講，相信一般人對文西兄點樣運用佢嘅高超畫作技巧都無乜所謂，估計大家同我一樣，比較有興趣八嘅係佢d詭異野囉......讀書時聽Miss講書最覺得奇異嘅就係當你望住呢一幅畫，無論由邊一個角度睇，阿 Lisa 姐都係望住你......Well, 呢個說法係堅嫁，我由細到大，做過好多次testing想去推翻呢個statement但都唔成功......

(Searched from Google photos)

老爺唔信耶，係都要實地考察一下......首先嚟個左手面角度......

張相影得比較朦，無計，隔到老遠影過去，d 防彈玻璃又反光，係咁上下，不過現場睇 Lisa 姐對眼真係昅實你......

再走去右邊 check下.....


嗱! 無呃大話，佢又係昅住你，個目光真係好似跟住你行咁嫁!!


嚟一張響網上是但搵到比較清楚嘅圖片......

大家留意下 Lisa 姐後面個背景，左右兩邊係唔平衡嫁，左邊嘅地平線比右邊低，望落去感覺上左邊就比右邊大........記得嗎? 根據Da Vinci Code 入面蘭登教授講，因為傳統上左邊係代表女性，所以佢認為達文西想借呢幅畫去提高女性嘅地位.....老老實實，我覺得蘭登教授完全係bull shit囉

搞怪嘅野當然唔只咁小，有人話文西兄畫呢幅畫時阿 Lisa 姐其實係 pregnant......點解? d 專家話因為佢對手好腫脹喎，而佢雙手交叉放響肚上，好明顯佢係想掩飾呢個事實.....好好笑，唔知係咩人會有d 咁騎呢嘅解說，真係幾攞膽囉，各位姊妹千萬要記住，第時中年發福對手肥美左，影相時千祈唔好雙手掩腹呀，如果唔係俾人話你老蚌生珠就唔好啦

另外仲有一樣幾搞野，傳說畫中人其實係達文西自己本人......大家睇下兩個人似唔似......唔似? 再睇落去.......


有d人將文西兄嘅自畫像同Lisa 姐畫像拼埋一齊......咁樣睇有無幾分相似?


話蒙羅麗莎係達文西本人自畫像固然騎呢左d，不過又有傳說話達文西係 gay 嘅，所以佢d人像畫好多時都雌雄莫辨就係咁解喎

「蒙羅麗莎」既然被喻為全世界最出名嘅油畫，魅力之大後世當然有N咁多個臨摹之作，正所謂人怕出名豬怕肥，自然亦有好多惡搞，尤其而家電腦科技咁先進，只要上網按下個button，即刻search 到好多利用電腦加工嘅Mona Lisa圖片，當然其中好多係無聊惡搞甚至惡意冒犯，不過有d又真係整得幾搞笑幾有創意

事實上，早響1919年，達達主義嘅杜象 (Marcel Duchamp) 已經將 Mona Lisa 嘅畫像加上鬍鬚，藉以去否定一向既有嘅美學價值.....如果當年響杜象身處嘅社會都好似而家香港政府咁硬推版權修訂條例，杜象想惡搞蒙羅麗莎之前，恐怕要先搵搵psychic或者我地嘅問米婆，問一問達文西可唔可以俾佢地響佢名畫上加上兩筆鬍子

Marcel Duchamp 嘅 L.H.O.O.Q ......想知 L.H.O.O.Q.點解，hehe，麻煩自己上網check


類似嘅仲有S. Dali 嘅自畫像 Self-portrait as Mona Lisa，型到爆!


不過我覺得兩位大師嘅作品都唔夠我響蒙馬特街頭搵到嘅 post card 咁可愛得意囉......各位，有請來自Muppet 嘅 Mona Pigga

 

搞野完畢，繼續羅浮宮之旅.......響Mona Lisa Room入面大眾嘅焦點唔駛講一定被 Mona Lisa 吸引住，不過呢個廳其實仲有其他名畫，同 Mona Lisa 打對面係羅浮宮館內最大幅嘅畫「迦拿的婚宴」(The Wedding Feast at Cana)......

呢幅畫係以聖經入面耶穌將水變成酒嘅神蹟故事為題材，描繪出當時達官貴人嘅華麗婚宴.......好熱鬧嘅一幅畫，同遙遙相對嘅 Mona Lisa，一幅大一幅細，一幅色彩繽紛一幅色調深沉，一幅熱鬧喧鬧一幅獨自一人，兩張畫，兩種強烈嘅對比，互相對照，好有趣嘅陳列佈置

睇完兩幅名畫，再匆匆掃埋廳入面其他嘅畫先，呢個展覽廳基本上都係展示十三至十五世紀嘅意大利 paintings，好多我地都唔認識，所以好快速scan左一遍就閃......同 Mona Lisa say左個bye再拋低個微笑，一踏出六號展覽廳耳根總算稍為清靜小小.....

搞掂左兩寶，叫做完成左一半使命啦，yeah!! 心情都輕鬆d.....離開 Mona Lisa Room，繼續向羅浮宮其餘角落探索~~

(...待續)