2012年2月巴黎倫敦11日 - 漫遊巴黎聖母院

12 FEVRIER 2012 (DAY 2 - PART 1)


第二日啦!! Bonjour)))

七點多起身，望出去窗外天色仍然黑濛濛，雖然都知道歐洲冬天日短夜長，但只係以為下午早天黑，原來朝早都好晏先天光......梳洗完就落去食早餐，我地呢個4D3N 嘅package 係包埋早餐，響網上check Hotel California 嘅早餐要成25e 一位嫁，所以要預多d 時間去食盡佢呀!!

Dining 嘅地方都幾典雅舒服~

我地搵左個角落坐，方便d 野食外帶呀

d 野食基本上都係大路嗰d，當然係西式.....出去攞野食時發覺無日式嘅野竟然有dd失落嘅感覺.....



Hehe，有好多款果jam 同 honey......全部都係made in France嫁~


我鍾意食牛奶米米，加 honey 好好味.......歐洲d牛奶都ok，當然北海道最好味.....嗯嗯，我要記住我唔係響日本，唔好成日諗住日本.......

響歐洲食早餐當然都要食下cheese.....buffet bar 有各種cheese 任揀，不過我最鍾意呢個 Babybel，OK幾好食，味道唔會太濃，個packing 好得意，最主要係佢細細個嘅size 真係啱晒我呢d 鍾意外帶嘅C9，哈哈

水果唔錯，都有好多種揀.....

不過呢度嘅早餐最正嘅係有呢d 乾果子，之後響 Harrods 見有得賣，個價錢唔平嫁!! 真係只食乾菓子都抵返晒!!

最後當然仲有 coffe or tea.....Tea 都有幾種揀，今餐我要左錫蘭紅茶~


另有自助cafe bar......正野喎

老爺至愛expresso!

舒舒服服嘆完個早餐，我地就出發開始第二日嘅行程嘞~


今日天氣唔錯，藍天白雲，亦無尋日朝嗰種灰濛濛沙塵滾滾......今日一整日都係響巴黎市觀光，天氣好心情都靚d 呀!!

一出街口又見到LV，好想即刻去呀!!

Lido，遲幾晚我地都打算去睇返場show~

呢間餐廳叫George V，同metro 站名一樣.......

巴黎街頭都有好多白鴿，都唔怕人~

我地又去搭 metro 啦......

今日第一個景點係位於西堤島嘅聖母院.......由George V 站去需要轉車，首先乘搭M1 黃色線去 Chatelet，然後再轉M4 紫紅色線去Cite~

未有車，要等兩分鐘....

周圍昅下......有好多自助零食飲品賣~

車票增值機

求助器? 恐怕係，因為d Metro 成日想搵個職員見下都無~


大約二十分鐘就到左 Cite 嘞......

呢個站嘅style 幾典雅.......

Cite 呢個車站有大大個Metropolitain 字樣~

呢個藝術字樣好有型~

一出站就係一個廣場......


西堤島除左有聖母院，仲有聖徒禮拜堂、古監獄等著名景點，所以今朝我地預左成個上午就響西堤島觀光~

歐洲 d buildings 真係好鬼典雅~

路邊總係有好多咖啡店.......

呢座building 個大門好宏偉，鍍金嫁~

Paris 嘅交通燈，個公仔位置好矮.......

星期日朝早嘅巴黎市街頭，遊人嘅步伐都懶洋洋咁~

聖母院坐落於塞納河中嘅西堤島上，我地沿住塞納河走，一邊順道欣賞河畔風景.......

Batobus，係巴黎市公營嘅水上巴士，全線總共八個站，都係著名嘅觀光點，如果買一張one day pass 就可以隨時上落船~

希望下次再黎巴黎，有機會可以搭下呢種batobus，可以響日間悠閒咁遊下船河

美麗嘅塞納河，只要走在其中，就會不期然感受到佢嗰種流動嘅浪漫~

沿路風景優美，好寫意!

邊行邊影下相，hea 住逛我地竟然用左十分鐘先行到去聖母院.......

聖母院個法文名稱係 Notre Dame，意思係 our lady 咁解.....our lady 就即係聖母瑪利亞囉........呢座世界著名嘅教堂已經有八百幾年歷史，堪稱歌德式建築嘅代表，近距離睇好宏偉呀!

企響正面欣賞，就會見到兩座對稱形嘅鐘樓，搭配正中央嘅玫瑰窗，同埋下底三道尖拱嘅大門........

好精緻嘅雕飾! 玫瑰窗前係聖母抱住baby Jesus，旁邊有兩個天使守護，下面一條長長嘅 King's Gallery，一共有28位猶太歷代嘅國王雕像~

記得嗎? 雨果嘅「鐘樓駝俠」描述駝子每日就係響呢度敲響塔樓入面嘅巨鐘嘞~

三道尖拱門佈滿雕刻，因為當時好多信徒都唔識字，於是教會就以雕塑描述聖經故事同聖徙嘅一生.......中間最大一道門係「最後審判之門」，即好人上天堂壊人落地獄嘅寓意......


原來人死左之後係要用天秤黎量度佢嘅一生.......左邊嘅係好人，個頭都係望向天堂，而右邊嘅就係壞人啦，全部望向下面地獄嫁!

層層疊疊嘅雕像，每一個都有唔同嘅表情同姿態，好生動，好似隨時會飛出黎同你打招呼咁




十二門徙，面部表情都好細緻.......

唔好問我係邊個打邊個，我連十二個人嘅名都未必講得出晒


呢個係Jesus......旁邊兩道木門上嘅雕花一樣好精細~


左邊係「聖母之門」，鈙述瑪利亞嘅一生......

點解其中一個雕像拎住自己個頭? 好詭異.....


而右邊係「聖安娜之門」.......聖安娜係邊個? 除左知道係餅店名，唔講唔知，原來係聖母瑪利亞個媽咪~

 

 

 

欣賞完細緻嘅雕塑，我地就走入去教堂內部參觀.......一踏入室內就好似去左另外一個世界......

咁啱做緊彌撒......原來聖母院做緊彌撒都開放俾遊客參觀，天主教真係幾隨和，入內參觀係免費，又可以影相，but 唔準用閃光燈，同埋唔可以高聲講野囉......不過有d人唔知係盲定無文化仍然照用閃燈.......世上任何地方都總有呢類人，真係好想一野打埋去叫佢地stop!!

入面真係好靚呀!!

樓底好高.......教堂內部以拱、柱為結構主體嘅歌德式建築，好美~

唔好睇d相個環境好似好光亮咁，其實現場都幾昏暗.......


圍繞住整個教堂嘅彩繪玻璃巧妙咁引入戶外嘅光線，映照住中間嘅祭壇，氣氛莊嚴而聖潔......當年拿破崙都係響度加冕嫁，尋日響羅浮宮睇過嗰幅「拿破崙的加冕」咪就係描繪呢度當時Josephine加冕嗰一刻囉.......祭壇中央係著名嘅聖殤像，不過做緊彌撒我地唔能夠行埋去近距離欣賞，有d 可惜

教堂最矚目當然係靚靚嘅彩繪玻璃........窗花色彩好豐富，響暗暗嘅環境下欣賞尤其覺得華麗奪目!

比較奇怪係有幾間玻璃室，唔知係office 定係祈禱室呢? 玻璃間隔都好現代feel 喎，有d 格格不入......


只需要兩個歐羅，就可以燃點一小個蠟燭，送出小小嘅心意~

另有d 大個d 貴d 嘅......


個蠟燭樽好靚呀........

5e 一個......我好後悔無買走帶返香港

雖然做緊彌撒，但遊人仍然可以沿住旁邊嘅通道圍繞教堂走一圈.......


其實咁多人遊來遊去唔怕受騷擾咩?


四處都有好多雕像~


聖女貞德

除左雕像，入面仲有好多野睇嫁.......教堂南北面兩邊各有一扇大大嘅玫瑰窗，北面呢個採用藍色作主調，以聖母為中心，周邊係舊約聖經故事嘅人物~


南面則以Jesus 為中心，環繞佢嘅係12門徒~


好似萬花筒......靚到不得了!!!




祈禱室外仲有好多浮雕，描述聖母同耶穌嘅故事.......

附有文字敘述，中英對照.....強國人果然強起來了

d 彩繪玻璃真係影極都唔厭，真係好鬼靚!!!

呢一幅色彩真係好鮮艷! 而且每一格都唔同嫁!!

原來d 窗可以打開......

傳教士棺木

有個木製嘅聖母院模型......

手工好精細呀!

旁邊仲有個模型係展示當年聖母院工程建造時嘅現場模擬，好得意!!

舉行 Concert?

歷年以來聖母院不斷有改建~


原來教堂內有一盞大吊燈，而家拆左落黎做維修~

告解室......等我諗下有無咩野要同天主懺悔下先


逛教堂不忘shopping......有自助紀念金幣售票機，每個2e......

我地當然要整返個啦~

逛下逛下忽然間音樂響起，信徒隨住優美嘅管風琴唱起聖詩呢.......


 

感動人心嘅歌聲悠悠迴盪於教堂內，遊客個個都不其然停低腳步~

幽幽嘅燈光、華麗嘅彩窗、優美嘅歌聲，整個教堂瀰漫住神聖而又祥和嘅氣氛，一剎那好感動啊!!

點燃一枝蠟燭，響胸前劃一個十字架，讓心靈得到片刻嘅寧靜.......


一點燭光，一個祝福，一個盼望.......


無論係咪天主教徒，凝望住點點嘅燭光同莊嚴嘅聖像，你會覺得一切都很美好


悠閒地響教堂內走了一圈，東看看西看看，好寫意! 看看錶，原來不知不覺已經逛左大半個鐘，逛完教堂內部，本來打算登上鐘樓睇下聞名嘅怪獸雕像，點知晴天霹靂原來出左告示話太大風所以塔樓close 左........好失望呀!!

(...待續)